SINIGURO Pangulong Ferdinand R. Marcos Jr., na magpapatuloy ang availability ng abot kayang presyo ng bigas.
Sinabi ng Pangulo na kanilang sisiguraduhin na maging accessible sa mga mamimili ang affordable rice habang ginagawang tuloy- tuloy din ang pagpapatupad ng mga programa para sa mga abot kayang bilihin ng pagkain para sa mamamayan.
Kabilang dito ang Benteng Bigas Meron Na nagtataguyod ng murang halaga ng bigas o 20 pesos per kilo of rice na iniaalok sa iba’t ibang target beneficiaries.
Kasama na aniya rito ang senior citizens, solo parents, persons with disabilities na kabilang sa vulnerable sectors habang kasama din sa beneficiaries ang transport workers, benipesyaryo ng 4Ps, nga magsasaka at mangingisda.
Winika pa ng Pangulo na kanilang pinakikinggan ang panawagan ng mamamayan sa pagkakaroon ng government interventions upang mapababa ang presyo ng mga bilihin kabilang na ang pagkain. (Daris Jose)

WALANG nakikitang dahilan ang Malakanyang para mabahala kaugnay ng isasagawang malaking rally na itinakda sa November 30 na isa umano sa layunin ay may maipakulong ng sangkot sa flood control mess.
Sinabi ni Presidential Communications Office Undersecretary at Palace Press Officer Claire Castro na hindi ganoon kabilis ang gumawa ng kaso at agad na maibilanggo ang sinomang sangkot.
Kaya nga ang tanong ni Castro, ‘ano ang magiging resulta kung hindi kumpleto ang ebidensiya sa paghahabla at baka kapag nadismiss ang asunto ay baka lalo pang dumami ang magsagawa ng rally.’
Kaya mas makabubuti aniya na kumpletuhin ang ebidensiya at makagawa ng matibay na case build up ng sa gayon ay masigurong maisasampa ang kaso sa korte.
Samantala, sinabi pa ni Castro na nadinig na ni Pangulong Ferdinand R. Marcos Jr., ang taumbayan na galit sa korapsyon kaya’t naririyan na nga ang ICI na nag- iimbestiga at magrerekomenda kung sino ang mga dapat makasuhan. (Daris Jose)

INAASAHAN na ang pagdagsa ng mga luluwas palabas ng Metro Manila para sa darating na Undas sa darating na Oktubre 30, 2025.
Ito ang sinabi ni Toll Regulatory Board spokesperson Julius Corpuz sa Bagong Pilipinas Ngayon sa gitna ng ginagawa na nilang paghahanda para sa mga luluwas palabas ng National Capital Region.
Aniya, magtutuloy tuloy ang dagsaan ng mga motorista papalabas ng Metro Manila ng hanggang sa Oktubre 31.
At kung uwian naman ang pag- uusapan, November 2 o sa araw ng Linggo ang inaasahan naman nilang laki ng volume na magsisibalikan gayung may pasok na aniya ng November 3.
Ito ani Corpuz ang kanilang mga araw na binabantayan na siyang mga araw na inaasahang magkakaroon ng pagbigat ng traffic palabas at papasok ng Kalakhang Maynila. (Daris Jose)

SINABI ng Department of Agriculture (DA) na manggagaling na sa mga accredited na kooperatiba ng mga magsasaka at mangingisda ang mga pagkaing ibebenta sa kantina ng iba’t ibang Kagawaran o Departamento ng gobyerno.
Ito ang sinabi ni ni Agriculture Spokesperson Assistant Secretary Arnel de Mesa sa Bagong Pilipinas sa gitna na din ng inisyung EO 101 para sa full implementation ng Sagip Saka Act.
Ani de Mesa, sakop din ng kautusan para sa mga accredited farmers at fisherfolk cooperative ang kumuha ng suplay ng pagkain para sa mga canteen sa mga nasa local government, state colleges and universities.
Kabilang din dito ang mga GOCC na dapat tumalima na kung saan, pati ang suplay ng agricultural at fishery products na gagawin sa kanilang events ay kukunin din sa mga farmers’ and fisherfolk cooperatives and enterprises o FFCE.
Sa pamamagitan aniya nito ay magkakaroon ng hakbang para mapalakas ang productivity at matulungang mapataas ang income ng mga magsasaka at mangingisda.
(Daris Jose)

PATULOY na nakikipag-usap ang Pilipinas sa Estados Unidos upang matiyak ang tariff exemptions para sa ilang ‘major exports.’
Sa pagsasalita sa sidelines ng 47th Association of Southeast Asian Nations (ASEAN) Summit and Related Meetings, sinabi ni Presidential Communications Office Undersecretary at Palace Press Officer Claire Castro na hangad ng Pilipinas na matiyak na ang mga produkto gaya ng niyog at semiconductors ay mananatiling protektado.
“May mga issues kasi na maaari nating sabihing komprehensibo na patungkol sa trade rules and regulations at pati na ang mga non-tariff measures like ‘yong services at investments,” anito.
“At nandoon kasi ‘yong mga issues patungkol sa gusto na protektahan ng bansa natin — ‘yong mga agricultural products katulad ng coconuts, pineapple, sugar, cocoa, electronic products,” ang sinabi pa rin ni Castro.
Ilan aniya sa trade concerns ani Castro ay nangangailangan ng maingat na negosasyon at hindi kailangan na madaliin.
“So, nandoon pa rin ang pakikipag-usap para ‘yong mga ibang produkto natin ay hindi naman maapektuhan,” ani Castro.
Samantala, nagpapatuloy naman ang pag-uusap para palakasin ang intra-ASEAN trade sa 47th ASEAN Summit, kabilang na ang sa pamamagitan ng pagpapaghusay sa free trade areas na may dayalogo sa mga partners gaya ng Tsina.
Sa sidelines ng high-level gathering sa Kuala Lumpur, tinintahan ni US President Donald Trump ang reciprocal trade agreements kasama ang Thai, Malaysian, Cambodian, at Vietnamese counterparts.
( Daris Jose)

IPINAHAYAG ni Chairman Emeritus Dr. Jose Antonio Goitia ang kanyang matibay na suporta sa mga kasapi ng Armed Forces of the Philippines (AFP) at Philippine Coast Guard (PCG) matapos ang mga pahayag na bumabatikos sa kanilang katapatan at layunin sa paglilingkod.
“Ang ating mga sundalo at coast guard ay naglilingkod hindi para sa pulitika o para sa ibang bansa, kundi para sa sambayanang Pilipino,” ani Goitia.
“Ang pagdududa sa kanilang katapatan nang walang patunay ay isang insulto sa bawat Pilipinong nagsasakripisyo para sa bayan.”
Ayon kay Goitia, ang ganitong mga akusasyon ay “nakakasira sa pagkakaisa ng bayan sa oras na dapat tayong magkaisa para ipagtanggol ang ating dangal at teritoryo.”
Nagpahayag si Goitia matapos ang palitan ng pahayag nina Rep. Paolo “Pulong” Duterte at PCG spokesperson Commodore Jay Tarriela, kung saan inihayag ni Duterte ang hinala na may impluwensya umano ng CIA at Estados Unidos sa mga polisiya ng depensa ng Pilipinas.
Mabilis itong pinabulaanan ni Tarriela, na tinawag ang mga pahayag na “divisive noise” o mga salitang naghahati-hati sa bansa at nagpapahina sa ugnayan ng Pilipinas sa mga katuwang nitong bansa.
Binigyang-diin ni Tarriela na ang AFP at PCG ay tapat sa Republika at sa mga Pilipino, lalo na sa pagprotekta ng West Philippine Sea.
Sang-ayon si Goitia, na sinabing ang ganitong mga paratang ay pabor lamang sa mga gustong pag-awayin ang mga Pilipino at pahinain ang loob ng bansa.
“Hindi tapat na malasakit sa bayan ang basta pagbibintang sa ating mga sundalo. Ang matapat na mamamayan ay nagbibigay-suporta, hindi paninira,” paliwanag niya.
“Ang ganitong pananalita ay naglilihis sa atin sa tunay na hamon — ang pagtindig laban sa mga banyagang patuloy na inaangkin ang ating karagatan at dangal bilang bansa.”
Binigyang-pugay ni Goitia ang AFP at PCG sa kanilang tahimik ngunit matapang na paglilingkod sa bansa sa kabila ng mga batikos at kasinungalingan na ibinabato sa kanila.
“Sa likod ng bawat ingay, patuloy silang naglilingkod nang may dangal at disiplina,” aniya.
Dagdag pa ni Goitia, araw-araw ay sinusuong ng mga sundalo at coast guard ang panganib sa karagatan ng West Philippine Sea at sa mga lugar na tinatamaan ng sakuna.
Nanawagan si Goitia sa mga lider at mamamayan na maging responsable sa paggamit ng kanilang boses at iwasan ang mga salitang nagdudulot ng pagkakawatak-watak.
“Ang kalayaan sa pananalita ay hindi kalayaan mula sa pananagutan,” paalala niya.
Sa huli, nanawagan si Goitia na unahin ang kapakanan ng bansa bago ang pulitika.
“Ang Republika ay mananatiling matatag kung tayo ay nagkakaisa sa paggalang sa katotohanan at sa mga taong nagtatanggol dito,” pagtatapos niya. (Richard Mesa)