SA pamamagitan ng patuloy na pagsisikap nitong bigyang kapangyarihan ang mga Malabueño sa epektibo at responsableng paggamit ng media at digital platform, ang Pamahalaang Lungsod ng Malabon, sa pakikipagtulungan ng United Nations Educational, Scientific and Cultural Organization (UNESCO), ay buong pagmamalaki na inihayag na ang Lungsod ng Malabon ay opisyal na inilunsad bilang isa sa mga Pilot Cities ng Media and Information Literacy (MIL) sa mundo.

Ginanap ang seremonya ng paglulunsad sa online seminar “Paglunsad ng MIL Cities” na may temang “MIL Cities: Connecting Communities through Information and Culture.” Ang Malabon ay isa lamang sa 10 lungsod sa buong mundo na napili upang maging isang MIL Pilot City.

“Hindi lang po ito basta karangalan para sa atin. Ito ay isang pagkakataon upang masiguro na ang bawat Malabueño ay marunong sa matalinong paggamit ng social media at iba pang digital platforms. Noong simula pa lamang ng ating panunungkulan, prayoridad na natin na masiguro na ang bawat residente ng lungsod ay may tamang kaalaman tungkol sa ating mga programa at serbisyo, at hindi basta-basta naniniwala sa mga maling balita. Ang Media and Information Literacy ay hindi lamang isang konsepto—ito ay isang makapangyarihang kasangkapan na magpapalaya sa ating kaisipan,” ani Mayor Jeannie Sandoval.

Ayon sa UNESCO, isinasama ng MIL Cities ang pag-aaral ng media at information literacy sa parehong pisikal at virtual spaces, na naglalayong bigyang kapangyarihan ang lahat ng mga mamamayan na mag-isip nang kritikal at gumamit ng media nang responsable. Kabilang dito ang pag-embed ng mga prinsipyo ng MIL sa mga pampublikong espasyo tulad ng transport terminal, health facilities, paaralan, at community centers, fostering lifelong learning, inclusivity, at sustainability.

Ang Pamahalaang Lungsod ay gumagamit ng aktibong official social media pages nito, kabilang ang (Malabon City Government, Mayor Jeannie Sandoval, Malabon City Tourism and Cultural Affairs Office, Malabon DRRMO, Malabon CENRO, City Health Department – Health Promotion Unit, bukod sa iba pa) upang maghatid ng mga real-time na balita, mga advisory sa kalusugan, at weather and emergency updates.

Noong 2024, inilunsad ng lungsod ang Malabon TV, isang mapagkakatiwalaang mapagkukunan ng balita at impormasyon para sa lahat ng Malabueño.

Itinatag naman ng City of Malabon University (CMU) ang CMU I-Connect, isang online news platform na nagbibigay ng kapangyarihan sa mga student journalist na gumawa at magsuri ng nilalaman ng balita para sa kanilang mga kapantay—nagsusulong ng kritikal na paggamit ng media sa loob ng akademikong komunidad.

Sa panahon ng kaganapan, si City Administrator Dr. Alexander Rosete ay nagsilbi rin bilang isang panelist, tinatalakay ang mga hakbangin ng pamahalaang lungsod sa pagtataguyod ng isang “thinking culture” sa pamamagitan ng media at information literacy.

“Media and Information Literacy is not just digital—it’s about thinking critically, acting responsibly, and celebrating who we are as Malabueños. And by becoming critical thinkers, Malabueños will be encouraged to engage in local government initiatives directed toward the city’s development. Our goal is to build a city that not only consumes information but also understands, analyzes, and uses it to promote progress,” ani Dr. Rosete. (Richard Mesa)

PINALAGAN ng Philippine Coast Guard (PCG) ang video post ni Cavite Congressman Kiko Barzaga na umano’y “sumisira sa integridad at propesyonalismo” ng PCG.

Naglalaman ng mapanlinlang at nakakapinsalang pahayag na nagpapababa sa kredibilidad ng institusyon ang naturang video, ayon kay PCG West Philippine Sea Spokesperson Commodore Jay Tarriela,

Sinabi ni Tarriela na ang mga sinabi ni Barzaga na ang operasyon ng PCG sa West Philippine Sea ay walang silbi at posibleng magdulot ng “World War III.”

Ayon sa opisyal, bahagi ng mandato ng PCG ang protektahan ang soberanya ng bansa, ang mga mangingisda, at ang ating karagatan — hindi ito provocation kundi tungkulin ng patriotismo.

Sinabi pa ni Tarriela na ang paratang ng mambabatas na korap at dapat ipasara ang PCG ay “irresponsable at insulto” .

Giit niya,malinaw sa batas na ang PCG ay civilian maritime organization at hindi military unit.

Nanindigan ang Coast Guard na mananatili silang tapat sa mandato, maglilingkod nang may integridad, at hindi papaapekto sa pulitika o disinformation. (Gene Adsuara)

NANAWAGAN ang Bagong Henerasyon (BH) Party-list sa mga Pinoy na manatiling ligtas, alerto at magmuni-muni ngayong Undas holidays at wellness break para sa mga guro at estudyante mula Oct. 27 hanggang 30, na idineklara ng Department of Education (DepEd).

Ang Undas, o All Saints’ Day ngayong Nov. 1 at All Souls’ Day sa Nov. 2, ay isa sa ginugunitang holiday sa Pilipinas. Milyong Pilipino ang umuuwi sa mga probinsiya para dumalaw sa puntod ng kanilang yumaong mahal sa buhay o kaanak, na kadalasangb nauuwi sa mabigat na trapiko at siksikang terminal.

Pinaalalahanan ni BH Party-list Rep. Robert Nazal ang mga biyahero na magplano ng maaga at magdoble ingat sa kanilang biyahe.

“Let’s all travel safely and responsibly. Check your vehicle, avoid fatigue and always put your family’s safety first,” ani Nazal.

Pinayuhan din ng mambabatas ang publiko na siguruhing nakasarang maigi ang tahanan at huwag ipahayag sa social media ang kanilang biyahe.

“Don’t make your home a target by posting where you’re going or when you’ll be away. A little caution can go a long way in keeping our families safe,” pahayag nito.

Una ng nagdekalara ang DepEd ng wellness break para sa mga guro at estudyante upang makapagpahinga at makabawi mula sa academic fatigue bago magbalik ang klase.

Hinikayat naman ni dating BH Party-list Rep. Bernadette Herrera ang pamilyang Pilipino na gamitin ang naturang break para makapagpahinga, magnilay-nilay at mag-reconnect.

“This wellness break is more than just time off. It’s an opportunity to recharge our minds and renew our spirits before the busy months ahead,” ani Herrera.

Pinaalalahanan din nito ang mga bibisita sa sementeryo na maghanda sa posibleng pagulan, huwag magkalat ng basura at sumunod sa mga local safety guidelines.

“Let’s make Undas a time of quiet reflection and respect. Honoring our loved ones also means caring for our communities and the environment,” pahayag pa ni Herrera. (Vina de Guzman)

PLANONG magpapatayo ni Manila Mayor Isko Moreno ng bagong gusali para sa Pamantasan ng Lungsod ng Maynila (PLM) College of Allied Health Sciences upang palawakin ang kapasidad ng unibersidad sa pagsasanay ng mga doktor, nars, at iba pang health professionals.

Ginawa ni Moreno ang pahayag sa 57th Commencement Exercises ng PLM kung saan sinabi niyang magiging karagdagang tahanan ng mga estudyante sa larangan ng medisina at health sciences ang nasabing pasilidad.

Bahagi ito ng pangmatagalang programa ng lungsod para palakasin ang kalidad ng edukasyon, lalo na sa medical at allied fields.

Matatandaang inanunsyo rin ng alkalde na ang lumang gusali ng Ospital ng Maynila ay gagawing PLM Academic Building for Health Sciences.

Ayon kay Moreno, layunin niyang gawing sentro ng kahusayan ang PLM at patuloy na maglaan ng pondo para sa edukasyon sa lungsod ng Maynila. (Gene Adsuara)

HABANG dumarami ang mga pasaherong tumutungo sa mga terminal ng bus at iba pang transport hubs upang gunitain ang Araw ng mga Santo at Araw ng mga Kaluluwa sa Nobyembre 1 at 2, nanawagan ang Land Transportation Franchising and Regulatory Board (LTFRB), sa ilalim ng patnubay ni Acting Secretary ng Department of Transportation Giovanni Z. Lopez, sa lahat ng pasahero na isumbong ang anumang overpricing sa pamasahe ng mga taxi at ride-hailing services.

Ayon kay LTFRB Chairman Atty. Vigor D. Mendoza II, inaasahang magiging maagap ang lahat ng regional offices ng ahensya sa pagtugon sa mga reklamo ng pasahero, maging ito man ay ipinaabot sa pamamagitan ng hotline o social media, alinsunod sa direktiba ni Pangulong Ferdinand “Bongbong” R. Marcos Jr. na tiyaking ligtas at maginhawa ang paglalakbay ng mga Pilipino ngayong Undas.

“Panahon na naman ng mga biyahe ng ating mga kababayan, at panahon na naman ng pananamantala ng iilang nasa transport sector, lalo na yung mga taxi na nangongontrata,” ani Chairman Mendoza.

“Sa ating mga kababayang pasahero, huwag po nating hayaan na maging normal na lamang ang ganitong kalakaran. Bawal po ito, kaya magtulungan tayo upang mahuli ang mga abusadong driver,” dagdag pa niya.

Ipinahayag din ni Chairman Mendoza na makikipag-ugnayan ang LTFRB sa iba pang ahensya ng pamahalaan para sa deployment sa mga bus station at transport hubs, lalo na sa Metro Manila at iba pang urban areas.

Kanyang tiniyak ang pagpapatuloy ng operasyon laban sa mga pasaway na taxi driver at iba pang PUV driver sa Ninoy Aquino International Airport.

“Palalawigin pa natin ito sa mga terminal ng bus, pantalan, at iba pang lugar kung saan karaniwang nagkakatipon ang mga pasahero tuwing mahahabang bakasyon gaya ng Undas,” ani Mendoza.

“Ito ang bilin ng ating Secretary Banoy Lopez na dapat ay nararamdaman ng ating mga pasahero ang presensiya ng pamahalaan sa kanilang paglalakbay upang agad na matugunan ang kanilang mga hinaing at reklamo,” diin pa niya.

Ang mga reklamo ay maaaring ipasa sa LTFRB nationwide hotline: 09567610739.

Dagdag pa ni Chairman Mendoza, maaaring i-tag ng mga pasahero ang LTFRB at DOTr social media accounts para sa anumang larawan o video na may kaugnayan sa pang-aabuso ng mga PUV driver. (PAUL JOHN REYES)