KULUNGAN ang kinasadlakan ng anim na indibidwal kabilang ang tatlong drug suspects nang maaresto ng pulisya sa magkahiwalay na operation sa Valenzuela City, Huwebes ng hapon.

SA ulat ni police investigator PSSg Pamela Joy Catalla kay Valenzuela Police Chief P/Col. Joseph Talento, nagsasagawa ng Anti-Criminality Operation ‘Oplan Galugad’ ang mga tauhan ng Police Sub-Station 1 sa M. Gregorio St., Bypass, Brgy., Canumay West nang maaktuhan nila ang dalawang kelot na nagsusugal umano ng ‘lucky 9′ ala-1:15 ng hapon.

Nilapitan nila ang mga ito sabay nagpakilala bilang mga pulis bago inaresto at nakumpiska sa dalawa ang bet money, baraha at isang plastic sachet ng hinihinalang shabu na nakuha kay alyas “Jonatan’, 31.

Bandang alas-2:37 ng hapon nang maaresto naman ng mga tauhan ng Police Sub-Station 9 ang dalawa ring lalaki na nagsusugal umano ng ‘cara y cruz’ sa isang abandonadong bahay sa Camia St., Simeon Doon Comps., Brgy. Karuhatan.

Nasamsam sa kanila ang bet money, pangara at isang plastic ng hinihinalang shabu na nakuha kay alyas “Wilson “, 31.

Sa Brgy., Malinta, natimbog naman ng mga tauhan ng SS4 ang dalawang lalaki habang naglalaro umano ng sugal na ‘cara y cruz’ sa Pinagpala St., Pinalagad, Brgy., Malinta dakong alas-5:45 ng hapon.

Ayon kay SDEU investigator P/MSgt. Carlito Nerit Jr., nakumpiska sa dalawa ang bet money, pangara at isang plastic sachet ng umano’y shabu na nakuha kay alyas”Romeo “, 43. (Richard Mesa)

SA ulat na pagkakadakip kay dating Congressman Zaldy Co, dapat agarang kumilos ang gobyerno na pabalikin ito sa bansa upang harapin ang kinasangkutang kaso nito, ayon kay Mamamayang Liberal partylist Rep. Leila de Lima nitong Biyernes.
“Dapat harapin na nya ang mga kaso laban sa kanya, panumpaan niya sa tamang forum ‘yung mga alegasyon niya at isiwalat sa mga imbestigasyon ang lahat-lahat ng mga nalalaman niya maging mga ebidensyang meron sya ukol sa maanomalyang flood control projects,” pahayag ni De Lima.

“Pagsabay-sabayin natin ang imbestigasyon sa mga alegasyon na kinasasangkutan nya. Dahil tulad sa impeachment, hindi dapat itengga ang paghahanap ng katotohanan,” dagdag ng kongresista.

Sa parte naman ni Akbayan Partylist Rep. Chel Diokno, ang pagakakadakip kay Co sa Prague, Czech Republic ay isang “welcome development.”

“Pagkakataon na rin ito ni Co na magpaliwanag at sagutin ang mga alegasyon tungkol sa 2025 budget at maanomalyang flood control projects,” sinabi ni Diokno.
Matatandaan na idinawit ni Co si Pangulong Ferdinand R. Marcos Jr. at ilang opisyales sa mga anomalya sa flood control projects.
Hindi na bumalik ng bansa ang dating Kongresista matapos manawagan si Marcos ng malawakang imbestigasyon sa flood control projects anomaly. Ito ay matapos isiwalat ng Department of Public Works and Highways (DPWH) na kabilang si Co sa mga nakinabang at kumita sa mga kickbacks ng mga proyekto nito.
“As the country continues to deal with the consequences of these projects, one thing is clear: hindi nakakalimot ang taumbayan. May this serve as a reminder that the rule of law must apply to all, including those in power and influence,” pahayag ni Diokno.
(Vina de Guzman)

HINIKAYAT ni Deputy Speaker Paolo Ortega V ng La Union si Vice President Sara Duterte na isoli ang P73.287 million na confidential expenses na na-disallowed ng Commission on Audit (COA), bilang pagpapakita ng pananagutan mula sa isang public servant.

Ayon sa mambabatas, ang isyu ay hindi lamang sa papel kundi panawagan ng responsibilidad.

“Kung talagang nais ni VP Sara na ipakita ang kanyang accountability bilang public servant, mas mabuting isauli na lang ang pondong ipinapabalik ng COA. Dapat siyang managot sa pera ng bayan na ipinagkatiwala sa kanya at kilalanin kung saan nagkulang sa proseso,” ani Ortega.

Tinukoy nito ang COA’s affirmation of Notice of Disallowance No. 2024-002-100 para sa confidential expenses ng Office of the Vice President mula Dec. 21-31, 2022.

Sa ginanap na April 14 hearing ng House Committee on Justice, inihayag ng COA officials ang apela na inihain ni Duterte at iba pang OVP officials na kanilang ibinasura.

Sinabi pa ng ahensiya na sa sandaling naging pinal ang desisyon, kailangang ibalik sa gobyerno ang naturang halaga.

Sakop nito ang P69.787 milyon na pabuya at P3.5 million na equipment expenses, kabilang na ang mesa, upuan, computers, at printers.

“Hindi ito barya. Napakalaking halaga nito, at sa hirap ng buhay ngayon, inaasahan ng taumbayan na bawat sentimo ng pondo ng gobyerno ay maayos na naipapaliwanag,” pahayag nito.

Ang disallowance ay nag ugat sa findings of noncompliance with Joint Circular 2015-01 ng COA para sa paggamit ng confidential at intelligence funds.

“Kapag may disallowance na at in-affirm pa ng COA, malinaw na may kakulangan na hindi naipaliwanag sa ilalim ng umiiral na mga tuntunin. Isa itong pormal na finding ng constitutional body na nagbabantay sa kaban ng bayan,” pahayag ni Ortega.

Idinagdag nito na mas mataas ang standard sa confidential funds dahil mas mataas ang tiwala ng bayan sa humahawak nito.

“Kaya mas makabubuti na sumunod sa utos ng COA at ituwid kung ano ang dapat ituwid,” giit nito.
(Vina de Guzman)

REHAS na bakal ang kinasadlakan ng dalawang lalaki nang maaresto ng pulisya dahil sa pagdadala ng baril at pampasabog sa Caloocan City.

Ayon kay Caloocan Police Chief P/Col. Joey Goforth, nagsagawa ng beripikasyon ang kanyang mga tauhan matapos ang natanggap na impormasyon hinggil sa dalawa umanong armadong lalaki na gumagala sa Barangay 73, ng lungsod at naghahanap umano ng taong konektado sa kanilang ilegal na aktibidad.

Pagdating sa lugar, naispatan ng mga tauhan ng Warrant and Subpoena Section WSS ng Caloocan Police ang dalawang lalaki na kapwa may sukbit na baril sa kanilang baywang.

Gayunman, nang mapansin ng dalawang lalaki ang presensya ng mga pulis ay tumakbo umano ang mga ito para tumakas kaya hinabol sila ng mga park.

Nang makorner, pumalag pa umano ang mga ito subalit, nagawa rin silang maaresto ng mga pulis at nakumpiska sa 36-anyos na kelot ang isang kalibre .45 pistol na kargado ng bala at isang hand grenade.

Nakuha rin sa 40-anyos na suspek ang isang kalibre.38 revolver na kargado din ng bala at nang hanapan sila ng kaukulang mga dokumento hinggil sa naturang mga armas ay walang naipakita ang mga suspek.

Nahaharap ang mga suspek sa kasong Disobedience to a Person in Authority, at mga paglabag sa firearm laws, at illegal possession of explosives.

Pinuri naman ni Northern Police District (NPD) Acting Director P/BGen. Christopher Dela Cruz ang operating units para sa kanilang kasipagan, disiplina, at propesyonalismo at binigyang-diin na ang matagumpay na operasyon ay sumasalamin sa mahigpit na pagpapatupad ng NPD laban sa kriminalidad. (Richard Mesa)

NANINIWALA ang Malakanyang na malaki ang naging papel ng naging kanselasyon ng pasaporte ni dating AKO Bicol partylist representative Zaldy Co sa pagkakaaresto sa kanya.
Sinabi ni Presidential Communications Office (PCO) Undersecretary at Palace Press Officer Claire Castro, lumiliit na kasi ang tsansa ng isang indibidwal na magpa- ikot ikot kapag kinansela na ang pasaporte nito.

Si Zaldy Co ay nahaharap sa kasong malversation of public funds dahil sa P289 milyong flood control projects sa Naujan, Oriental Mindoro.
Ang kontrata ay nakuha ng kumpanyang Sunwest na pag-aari ni Zaldy Co.
Matatandaang, inanunsiyo ni Pangulong Marcos na kinansela na ng Department of Foreign Affairs (DFA) ang pasaporte ni Zaldy Co.
Bunsod nito kaya inatasan ng Pangulo ang DFA at Philippine National Police (PNP) na makipag-ugnayan sa ating mga embahada sa iba’t ibang bansa para masiguro na hindi magtatago sa kanilang mga bansa si Zaldy Co.
Sakali man aniyang mapunta sa kanilang ­bansa ay maibabalik agad sa Pilipinas si Zaldy Co.
Samantala, naniniwala si Castro na ang pagkakahuli kay Zaldy Co ay gawa na rin ng nasa Itaas sabay sabing “God works in mysterious ways” at sadyang darating aniya ang panahon na masusukol din ang mga taong dapat na humarap sa kanilang pananagutan.
Siniguro naman ni Castro na magbibigay sila ng update tungkol kay Zaldy Co kasunod ng pagkakahuli rito. (Daris Jose)

ISINAGAWA ng Philippine Coast Guard (PCG) ang sabay-sabay na donning of ranks at oath-taking ceremony para sa 20 bagong na-promote na flag-rank officers sa National Headquarters, Port Area, Maynila.

Inaprubahan ni Pangulong Ferdinand R. Marcos Jr. ang pag-angat ng ranggo ng dalawang Coast Guard Rear Admiral at 18 Coast Guard Commodore..

Sa kanyang mensahe, pinuri ni Department of Transportation (DOTr) Secretary Giovanni Lopez ang mga na-promote dahil sa kanilang mahusay na serbisyo at propesyonalismo. Binigyang-diin niya na ang kanilang dedikasyon ay nakatulong upang mapataas ang reputasyon ng ahensya at makapaghatid ng karangalan at tiwala sa taumbayan.

Samantala, ayon kay PCG Commandant Admiral Ronnie Gil L. Gavan, ang pag-abot sa flag rank ay may kaakibat na mas mataas na antas ng pananagutan at responsibilidad. Iginiit niya na ang promosyon ay hindi lamang pagbabago ng posisyon, kundi muling pagpapatibay ng kanilang dedikasyon sa serbisyo at sa organisasyon.
Kabilang sa mga na-promote na opisyal ng PCG ay sina:
1. Rear Admiral John Esplana – Commander, Coast Guard Aviation Command
2. Rear Admiral Marco Antonio Gines – Commander, Coast Guard Logistics Systems Command
3. Commodore Jane Gesulgon – Deputy Chief of Coast Guard Staff for Maritime Security Law Enforcement
4. Commodore Jonathan Marfil – Commander, Coast Guard District Eastern Visayas
5. Commodore Glen Daraug – Chief of Staff, Coast Guard Fleet
6. Commodore Lejanie Dy – Deputy Chief of Coast Guard Staff for Civil Relations Service
7. Commodore Jerome Cayabyab – Commanding Officer, Coast Guard Communications and Electronics System
8. Commodore Jimmy Naisod – Commander, Coast Guard Special Operations Force
9. Commodore Joselito Maluyo – Commander, Explosive Ordnance Disposal Group / Acting Superintendent, Special Operations School
10. Commodore Julian Bayawa Jr. – Deputy Commander, Coast Guard District Central Visayas
11. Commodore Dann August Cariño – Deputy Chief of Coast Guard Staff for Operations
12. Commodore Richard Paragas – Commander, Coast Guard Finance Service
13. Commodore Cynthia Esquivias – Deputy Commander, Coast Guard Inspector General and Internal Affairs Service
14. Commodore Noemie Cayabyab – Deputy Chief of Coast Guard Staff for Education and Training / Acting Commander, Coast Guard Public Affairs Service
15. Commodore Jose Mari Cucharo – Deputy Commander, Coast Guard Aviation Command
16. Commodore Rolando Lorenzana – Commander, Coast Guard District Northeastern Luzon
17. Commodore Laurel Paul Mariano Jr. – Deputy Chief of Coast Guard Staff for Ships and Aircrafts Engineering
18. Commodore Eliezer Dalnay – Director, National Port State Control Service
19. Commodore Eric Ferrancullo – Deputy Chief of Coast Guard Staff for Strategic Studies and Modernization
20. Commodore Lawrence Roque – Commander, Aids to Navigation Service

Ang seremonya ng donning of ranks ay isang tradisyon sa Coast Guard na sumisimbolo sa pagtanggap ng responsibilidad at pagpapakita ng tiwala ng pamunuan sa kanilang kakayahan bilang mga lider.
(Gene Adsuara)