INARESTO ng Bureau of Immigration (BI) ang isang puganteng Chinese national dahil sa umano’y pagkakasangkot sa telecom fraud, sa isinagawang operasyon sa Makati City.
Isinagawa ang pag-aresto ng mga operatiba ng BI Fugitive Search Unit (FSU), sa pangunguna ni Chief Rendel Ryan Sy, katuwang ang Philippine National Police, Makati City Police, at iba pang ahensyang paniktik ng pamahalaan.
Ang suspek, na kinilalang si Zhang Jinglong, 29, ay nahuli sa Mercedez Street, Barangay Bel-Air, matapos ang intelligence information na nagkumpirma na siya ay wanted ng mga awtoridad sa Guangdong, China dahil sa telecom fraud.
Nag-ugat ang operasyon mula sa opisyal na komunikasyon na natanggap ng BI na nagpapatunay na si Zhang ay isang pugante na iniimbestigahan ng mga awtoridad sa China.
Sa operasyon, kasama ni Zhang ang tatlo pang Chinese nationals na sina Zhang Pengguang, Feng Mincong, at Zhang Yunpeng. Lahat sila ay nabigong magpakita ng valid passport o anumang dokumento sa imigrasyon nang sila ay tanungin ng mga awtoridad.
Iniulat na sinubukan ni Zhang na iligaw ang mga awtoridad sa pamamagitan ng pag-angking siya ay isang mamamayan ng Vanuatu, na taliwas sa opisyal na rekord na nagpapatunay na siya ay Chinese citizen.

Mas lalong nagdulot ng pangamba sa mga awtoridad nang mapansing tila may proteksyon si Zhang mula sa mga armadong indibidwal, kabilang ang isang aktibong pulis at isang reservist. Ang usapin ay isinangguni na sa mga kinauukulang ahensya para sa kaukulang imbestigasyon.

Ayon sa rekord ng BI, pumasok si Zhang sa Pilipinas noong Nobyembre 2019 bilang isang temporary visitor ngunit nanatili sa bansa nang walang valid extension o visa conversion, kaya siya ay itinuturing na overstaying alien. Siya rin ay saklaw ng isang umiiral na blacklist order dahil sa mga naunang paglabag sa immigration.

Binigyang-diin ni BI Commissioner Joel Anthony Viado na patuloy ang kampanya ng Bureau laban sa mga dayuhang sangkot sa panlilinlang at iba pang transnational crimes.

“Hinding-hindi namin papayagan ang mga kriminal na samantalahin ang aming sistema o gamitin ang bansa bilang base ng mga mapanlinlang na gawain,” ani Viado. “Sa pamamagitan ng malapit na koordinasyon sa mga foreign counterparts at lokal na law enforcement, titiyakin naming matutunton, maaaresto, at mapapaalis sa bansa ang mga pugante.” ( Gene Adsuara)

KULUNGAN ang kinasadlakan ng 32-anyos na basurero nang mahuli sa akto na sumisinghot ng shabu sa harap mismo ng paslit niyang anak sa Valenzuela City.

Sa ulat ni Valenzuela police chief P/Col. Joseph Talento kay Northern Police District (NPD) Acting Director P/BGen. Christopher Dela Cruz, dakong alas-7:10 ng gabi nang maaresto ng mga tauhan ng Police Sub-Station 2 alyas “Jerome” sa kanilang bahay sa San Gregorio St. Brgy. Gen. T. De Leon.

Habang nagsasagawa ng “Oplan Galugad” ang mga tauhan ng SS2 sa nasabing lugar nang mapansin nina P/Cpl. Elmer Olieca at Pat. Sherwin Caampued ang paggamit ng shabu ni ‘Jerome’ sa kanilang tirahan.

Nang lapitan ng mga pulis, kitang-kita ang ginagawang pagsinghot ng shabu ng suspek sa harap mismo ng isa’t kalahating taong gulang niyang anak.

Nakumpiska ng mga pulis sa suspek ang isang plastic sachet na may bahid ng shabu, alluminum foil, improvised burner at dalawang disposable lighter.

Na-inquest na ang suspek sa mga kasong Illegal Possession of Drug Paraphernalia at Use of Dangerous Drugs ng RA 9165 o ang Comprehensive Dangerous Drug Act of 2002 sa Valenzuela City Prosecutor’s Office. (Richard Mesa)

BISTADO sa Port of Clark ang tinatayang P3.536 milyong halaga ng hinihinalang shabu na itinago sa loob ng motor filter nang masabat ito ng Bureau of Customs sa pakikipag-ugnayan sa Clark Interagency Task Force Against Illegal Drugs.
Nagmula sa Zambia ang shipment at nakatakdang ipadala sa Cavite.
Nadiskubre ang iligal na droga matapos ma-flag sa X-ray Inspection Project ng BOC at magpositibo sa K-9 sniff test, dahilan upang isailalim ito sa masusing inspeksyon.
Sa isinagawang pagsusuri, natagpuan ang limang sachet ng puting kristal na substansya na kalauna’y nakumpirmang methamphetamine hydrochloride, isang ipinagbabawal na gamot sa ilalim ng Republic Act No. 9165 o Comprehensive Dangerous Drugs Act of 2002.
Naglabas ng Warrant of Seizure and Detention si BOC Port of Clark District Collector Jairus S. Reyes laban sa shipment dahil sa paglabag sa Republic Act No. 10863 o Customs Modernization and Tariff Act, kaugnay ng RA 9165.
Ipinag-utos din ni Customs Commissioner Ariel F. Nepomuceno ang pagpapatibay ng operasyon laban sa iligal na droga bilang bahagi ng kampanya ng pamahalaan sa ilalim ni Pangulong Ferdinand R. Marcos Jr. upang maprotektahan ang publiko laban sa epekto ng ipinagbabawal na gamot.
(Gene Adsuara)