REHAS na bakal ang kinasadlakan ng isang kelot at kasabwat nitong bebot matapos magbenta ng baril sa isang pulis na nagpanggap na buyer sa Caloocan City.

Nakatanggap ng impormasyon ang mga tauhan ni Caloocan Police OIC Chief P/Col. Joey Goforth hinggil sa umano’y iligal  na pagbebenta ng baril ng 25-anyos na construction worker at 28-anyos na bebot.

Nang magawang makipagtransaksyon sa mga suspek ng isa sa mga operatiba ng Caloocan Police Station Intelligence Section, agad nilang ikinasa ang entrapment operation.

Hindi na nakapalag ang mga suspek nang arestuhin sila ng mga tauhan ni Col. Goforth matapos tanggapin ang marked mula sa pulis na nagpanggap na buyer kapalit ng baril na kanilang ibinenta dakong ala-1:30 ng madaling araw sa kanto ng St. Peter Street at San Simon Alley, Brgy. 186.

Nakumpiska sa mga suspek ang isang kalibre .38 revolver at buy bust money na isang tunay na P500 bill, at P7,500 boodle money na binubuo ng isang P500 at pitong P1000 boodle money.

Mahaharap ang mga suspek sa kasong paglabag sa Section 32 ng R.A 10591 o ang Comprehensive Firearms and Ammunition Regulation Act.

Pinuri naman ni P/BGen. Jerry Protacio, Acting District Director ng Northern Police District (NPD) ang pagsisikap at propesyonalismo ng arresting team, na nagbibigay-diin sa kanilang hindi natitinag na pangako sa pangangalaga sa kaligtasan ng publiko. (Richard Mesa)

BILANG proteksyon na rin sa mga lokal na magsasaka ngayong panahon ng anihan, suportado ng isang mambabatas ang desisyon ni PBBM na suspendihin ang lahat ng importasyon ng bigas.

Reaksyon ito ni Albay Rep. Rep. Raymond Adrian Salceda, Chairman ng House Special Committee on Food Security, sa naging desisyon ng pangulo na suspendihin ng dalawang buwan, simula Setyembre 1 ang importasyon ng bigas.

“Tama po na dapat walang kakumpetensiya ang saganang ani ng mga magsasaka sa tanging pagkakataon nila upang kumita at patuloy na makapagsaka. This is the season when our farmers try to recover their costs and earn enough to survive. We owe them this protection,” ani Salceda.

Kasabay nito, sinabi ng mambabatas na dapat maghanda ang bansa para sa mahabang panahon o long term kung kaya inihain niya ang House Bill No. 48, na magpapalakas sa buffer stocking function ng National Food Authority at mandato sa paggamit ng modernong storage technologies para sa preserbasyon ng bigas.

“Kung maghihigpit tayo sa importasyon, kailangang may tiwala tayong may sapat at sariwang suplay mula sa sariling ani,” dagdag nito.

Sinabi pa nito na kapag pinalakas ang sektor ng bigas ay magagawa nitong makipagkumpetensiya sa ibang bansa sa isyu ng pag-ani at pagreserba sa suplay ng bigas.

“Wala pa po tayo dyan sa ngayon, pero may mga probinsya na kaya na. Gayahin po natin ang best practices nila. Strong support for irrigation, certified seeds, mechanization, and farmer cooperatives has made the difference in those areas,” pagtatapos nito. (Vina de Guzman)

HALOS 300 aplikante ang na-hire on-the-spot sa Mega Job Fair na isinagawa ng Pamahalaang Lungsod ng Caloocan na ginanap kamakailan sa South Caloocan.

Ayon sa Public Employment Service Department (PESD), may kabuuang 293 aplikante ang natanggap sa 77 pribadong kumpanya sa iba’t ibang industriya.

Binati ni Mayor Dale Gonzalo “Along” Malapitan ang daan-daang aplikante na lumahok sa job fair at nangakong patuloy na gagawing mas accessible ang mga oportunidad sa trabaho para sa kanyang mga nasasakupan.

“Sa unang termino ko bilang ama ng lungsod, hiningi ko ang tulong ng PESD sa paglalapit ng maraming oportunidad sa mga Batang Kankaloo upang tiyaking mayroon silang maayos at disenteng trabaho upang mamuhay ng maginhawa at marangal.” ani Mayor Along.

“Ngayong ikalawang termino ko, sinisiguro ko na sisikapin nating maglapit ng mas maraming trabaho at kabuhayan. Hindi limitado sa mega job fair ang ibibigay natin, kundi pati na ang libreng skills training, livelihood demonstrations, livelihood packages, at mga local recruitment activities.” dagag niya.

Inihayag din ng pamahalaang lungsod na magsasagawa sila ng isa pang Mega Job Fair sa Agosto 14, 2025 sa North Caloocan.

Ito ay gaganapin sa Ground Floor ng SM City Caloocan – Bagumbong mula alas-9 ng umaga hanggang alas-4 ng hapon at magkakaroon din ng one-stop shop sa event para sa mas madaling pagproseso ng mga dokumento ng gobyerno ng mga aplikante. (Richard Mesa)

AYON kay dating Bayan Muna Rep. Neri Colmenares, isa umanong pagtataksil sa panawagan ng mga Pinoy na accountability at isang mapanganib na precedent na sisira umano sa konstitusyon.

“Ang Senate ay tumalikod sa kanilang constitutional duty. By archiving this case, they are essentially telling the Filipino people that high officials can misuse public funds without consequence. The senators are shirking from their sole power to try impeachment. Ang bilis nila mag-archive ng kaso kahit may motion for reconsideration pa. This shows their unwillingness to hold VP Duterte accountable for the alleged misuse of confidential funds,” ani Colmenares.

Iginiit nito na sa ilalim ng Article XI ng konstitusyon ay inioobliga nito ang Senado na dinggin at desisyunan ang lahat ng kaso ng impeachment at ang pagbasura o pag-archive sa reklamo ay malinaw na paggiba sa natitirang mekanismo ng accountability laban sa mga impeachable officials.

“Hindi pwedeng i-archive lang nang ganun-ganun ang impeachment case. The people deserve answers about where the P612.5 million in confidential funds went, and whether recipients like ‘Mary Grace Piattos’ actually exist,” pahayag pa ni Colmenares.

Nagbabala ito na kung ganito ang mangyayariay kahit sinumang corrupt na opisyal ay maaaring maghain ng teknalidad upang maiwasan ang pananagutan.

Ang mga taxpayers, lalo na ang aming mga guro na nagbabayad ng buwis, ay deserve ng transparency sa paggamit ng public funds. The Senate must remember that they serve the Filipino people, not any particular political dynasty. Accountability is not optional—it is a constitutional requirement,” pahayag ni Colmenares. (Vina de Guzman)