• November 20, 2026

  • Ang Diyaryong Pinagkakatiwalaan

Archive for November 18th, 2026

BUS OPERATOR, IPINATAWAG NG LTFRB DAHIL SA BASTOS NA DRIVER NITO

Posted on: November 18th, 2026 by Francis Paolo Torres No Comments

IPINATAWAG ng Land Transportation Franchising and Regulatory Board (LTFRB), sa ilalim ng patnubay ni Department of Transportation (DOTr) Secretary Vince Dizon, ang operator ng isang passenger bus kaugnay ng umano’y hindi magalang na pakikitungo ng isang driver nito sa isang pasahero na ibinahagi at umani ng batikos sa social media. 

Ayon kay LTFRB Acting Chairman Atty. Greg G. Pua Jr., naglabas ang ahensya ng show cause order (SCO) laban sa Joyselle Express upang mabigyan ng pagkakataong magpaliwanag ang operator at ang kinauukulang driver kaugnay ng mga alegasyong paggamit ng mga hindi angkop na pananalita at pagbabanta umano nito sa isa sa mga pasahero. 

“Napakinggan na natin ang panig ng pasahero batay sa kanyang ibinahagi sa social media. Bilang bahagi ng pagtiyak sa patas na proseso, nais din nating mabigyan ng pagkakataong maipahayag ng driver, sa pamamagitan ng operator nito, ang kanyang panig hinggil sa insidente,” saad ni Acting Chairman Pua.

“Gayunman, kung mapatutunayang totoo ang mga alegasyon, walang lugar sa sektor ang ganitong uri ng pag-uugali. Kaakibat ng pagiging isang PUV driver ang responsibilidad na igalang at maayos na pakitunguhan ang mga pasahero, bukod pa sa pagsunod sa mga alituntunin at regulasyon sa kaligtasan sa kalsada,” dagdag niya.

Ayon sa salaysay ng netizen, gumamit umano ng hindi angkop at masasakit na pananalita ang driver at patuloy na nakipagtalo sa kanya sa kabila ng ilang ulit na pagtatangka ng konduktor na pakalmahin ito.

Ayon kay Acting Chairman Pua, bahagi ng isinasagawang imbestigasyon ng LTFRB ang pagtukoy sa mga pangyayari at posibleng pinagmulan ng insidente. Dahil dito, binigyan ang operator ng tatlong araw mula sa pagtanggap ng Show Cause Order (SCO) upang isumite ang paliwanag at panig nito.

Nakatakda sa November 24 ang pagdinig kaugnay ng insidente. Binigyang-diin ng LTFRB na ang hindi pagdalo sa itinakdang pagdinig o hindi pagsunod sa mga ipinag-uutos sa SCO ay maaaring magresulta sa kaukulang parusa, kabilang ang multang ₱5,000. 

Hinimok din ni Acting Chairman Pua ang mga operator ng mga pampublikong sasakyan na patuloy na paalalahanan ang kanilang mga drayber na panatilihin ang maayos na asal, paggalang sa mga pasahero, at disiplina sa bawat biyahe bilang bahagi ng kanilang responsibilidad sa pagbibigay ng ligtas at maayos na serbisyo publiko. (PAUL JOHN REYES)

Rhenz Abando nasa option na ni Cone para isabak sa FIBA World Cup Asian Qualifiers – SBP

Posted on: November 18th, 2026 by Francis Paolo Torres No Comments

IBINUNYAG ng Samahang Basketbol ng Pilipinas (SBP) na naging pangunahing opsyon talaga ni Gilas Pilipinas head coach Tim Cone si Rhenz Abando na makasama sa fifth window ng FIBA World Cup Asian Qualifiers.

Ayon kay SBP executive Director Erika Dy, na mayroong laging short list na manlalaro si Coach Tim.

Sakaling hindi puwede na makapaglaro ang nasa listahan ay mayroon agad itong mabilis na mahuhugot.

Nanguna si Abando sa listahan nina Cone at mga coaching staff ng Gilas Pilipinas.

Kapalit ni Abando sina Carl Tamayo at Calvin Oftana na hindi makakapaglaro sa torneo na gaganapin sa Malaysia.

Si Tamayo kasi ay mayroong ankle sprain injury habang ang asawa ni Oftana ay nakatakdang manganak na.

Irish Boxer Lee Reeves, pumanaw sa edad 31 matapos ang tatlong buwang pagka-coma

Posted on: November 18th, 2026 by Francis Paolo Torres No Comments

PUMANAW na ang Irish boxer na si Lee “El Champo” Reeves matapos ang ilang buwang pakikipaglaban sa kanyang buhay kasunod ng kaniyang pagkaka-knockout sa isang boxing match noong Agosto 1 sa Dublin, Ireland.

Nakipagbakbakan si Reeves kay Gary Cully para sa BUI Celtic Light-Welterweight title, ngunit natalo sa ika-10 round matapos dalawang beses na mapabagsak.

Agad siyang isinugod sa ospital at sumailalim sa operasyon bago inilagay sa medically induced coma dahil sa malubhang kondisyon.

Nagpaabot ng pakikiramay ang kaniyang coach na si Jonathan O’Brien at huling nakalaban na si Cully, na kapwa nagbigay-pugay sa kaniyang katapangan at pagkatao.

Bukod sa boksing, nakilala rin si Reeves bilang tagapagtaguyod ng mental health awareness at ambassador ng Limerick Treaty Suicide Prevention group.

Carlos Yulo nag-eensayo na para sa tennis

Posted on: November 18th, 2026 by Francis Paolo Torres No Comments

NAGHAHANDA na si Pinoy two-time Olympic gold medalist Carlos Yulo para sa laro nitong tennis.

Kabilang kasi si Yulo sa homecoming event ni Pinay tennis star Alex Eala na gaganapin sa buwan ng Disyembre sa Philippine Arena.

Kasama nitong nag-ensayo ang nobya nitong si Chloe San Jose.

Dahil sa pagsali ay itinuturing na ang event bilang Philippine Sports all-stars dahil makakasama rin si boxing champion Manny Pacquiao.

Makakasama rin nila ang mga ibang mga artista para maglaro sa nasabing exhibition game.

Sa main event ay makakaharap ni Eala si WTA Southeast Asian champion Janice Tjen ng Indonesia.

Magugunitang nasa ranked number 15 si Eala sa pinakahuling ranking ng Womens Tennis Association.

Mayor Gatchalian, ibinahagi ang Child Protection Program ng lungsod sa 18th Ako Para sa Bata conference

Posted on: November 18th, 2026 by Francis Paolo Torres No Comments

BILANG bahagi ng 2nd Global Ministerial Conference on Ending Violence Against Children, dumalo at naging panauhing tagapagsalita si Valenzuela City Mayor Wes Gatchalian sa 18th AKO PARA SA BATA Conference na may temang “From Practice to Scale: Experiences and Innovations in Philippine Child Protection,” na ginanap sa Marriott Hotel.

Dito, ibinahagi ni Mayor Gatchalian ang mga programa at hakbang ng lungsod para mapangalagaan at maprotektahan ang mga bata, at kung paano patuloy na pinapalakas ang mga serbisyong tumutugon sa kanilang kaligtasan, kapakanan, at karapatan.

Ang mga inisyatibong ito para sa child protection ang nagbigay-daan sa pagkilala sa Valenzuela City bilang 2024 Galing Pook Awardee at tumanggap ng Special Citation in Participatory Governance mula sa USAID.

Tiniyak ni Mayor Wes na sa kanyang pamumuno, patuloy na nagsisikap ang Pamahalaang Lungsod na bawat bata sa Valenzuela ay ligtas, napapakinggan, napapangalagaan, at nabibigyan ng pagkakataong magkaroon ng magandang kinabukasan. (Richard Mesa)

Pinas, ipinasa na sa Singapore ang pamumuno sa ASEAN

Posted on: November 18th, 2026 by Francis Paolo Torres No Comments

PORMAL nang ipinasa ng Pilipinas sa Singapore ang chairmanship ng Association of Southeast Asian Nations (ASEAN) para sa susunod na taon.

Sa closing ceremony ng 49th ASEAN Summit and Related Summits, iniabot ni Pangulong Ferdinand Marcos Jr. kay Singapore Prime Minister Lawrence Wong ang gavel na sumisimbolo sa paglipat ng pamumuno ng samahan simula Enero 1, 2027.

Pinasalamatan ni Marcos ang lahat ng naging bahagi ng matagumpay na pagdaraos ng summit, kabilang ang mga ahensiya ng gobyerno at mga indibidwal na nagtulungan upang maging maayos ang nasabing pagtitipon.

Nagpahayag din ang Pangulo ng pasasalamat sa mga Pilipinong naapektuhan ang kanilang araw-araw na gawain dahil sa mga paghahanda at aktibidad kaugnay ng summit.

Sa pag-upo ng Singapore bilang susunod na ASEAN chair, ito na rin ang mangunguna sa pagpapatuloy ng negosasyon para sa South China Sea Code of Conduct (COC), isang kasunduan na naglalayong magtakda ng mga alituntunin sa pagkilos ng mga bansa sa pinagtatalunang karagatan.

Ayon kay Department of Foreign Affairs Secretary Thess Lazaro, nasa 80 porsiyento na ang draft provisions ng COC at ang susunod na chair ng ASEAN ang inaasahang magtatapos sa mga natitirang usapin upang maisulong ang kasunduan sa lalong madaling panahon.

Umaasa si Lazaro na magtatagumpay ang Singapore sa pagkumpleto ng negosasyon, bagama’t hindi siya nagtakda ng tiyak na deadline.

Matagal nang pinagmumulan ng tensyon sa rehiyon ang magkakapatong na pag-aangkin ng ilang bansa sa South China Sea, dahilan upang itulak ng ASEAN at China ang pagbuo ng COC bilang gabay sa pagpapanatili ng kapayapaan at katatagan sa lugar. 

(DARIS JOSE)

Pangulong Marcos sa ASEAN East Asia leaders: Tiyakin supply ng pagkain, enerhiya

Posted on: November 18th, 2026 by Francis Paolo Torres No Comments

NANAWAGAN si Pangulong Ferdinand R. Marcos Jr. sa Southeast at East Asian leaders na gawing konkretong aksyon ang kanilang pagtutulungan para masiguro ang sapat at tuluy-tuloy na supply ng pagkain at enerhiya sa rehiyon.

Sa pagbubukas ng ika-29 na ASEAN Plus Three (APT) Summit nitong Martes, binigyang-diin ni Pangulong Marcos na hindi dapat direktang maramdaman ng mga mamamayan at negosyo ang negatibong epekto ng mga pandaigdigang krisis, tulad ng pagtaas ng presyo ng bigas, enerhiya at iba pang pangunahing bilihin.

Kahit malayo aniya ang pinagmumulan ng isang pandaigdigang krisis, mabilis pa rin itong nakaaapekto sa pang-araw-araw na pamumuhay ng mga pamilya at operasyon.

Mahalaga rin aniya ang pagpapanatili ng maayos na daloy ng kalakalang pandagat at logistics para masiguro na makarating sa tamang destinasyon ang mga pangunahing produkto at supply.

Bukod dito, ibinahagi rin ni Marcos ang kahalagahan ng mga umiiral na mekaniso ng pagtutulungan, kabilang ang Chiang Mai Initiative Multilateralization (CMIM) at ASEAN Plus Three Emergency Rice Reserve (APTERR), na nagsisilbing pananggalang ng rehiyon laban sa krisis pinansyal at kakulangan sa suplay ng bigas.

Layunin ng mga mekanismong ito na mapatatag ang ekonomiya, mapangalagaan ang seguridad sa pagkain at matulungan ang mga bansang nanga­ngailangan sa panahon ng mga emergency.

Ayon pa sa Pangulo, mas nagiging mahalaga ang pagkakaisa ng mga bansa sa gitna ng mga sigalot, pagkagambala sa suplay, kawalan ng katiyakan sa pananalapi at mga kalamidad. ( DARIS JOSE)

Trump nasa Pinas para sa 49th ASEAN

Posted on: November 18th, 2026 by Francis Paolo Torres No Comments

DUMATING na sa Pilipinas si United States President Donald Trump para dumalo sa 49th ASEAN Summit and Related Summit at ASEAN-US Special Summit.

Bandang alas-5:33 ng hapon ng lumapag si Trump sa Ninoy Aquino international Airport (NAIA) Balabag ramp.

Sinalubong ang presidente ng Amerika nina Executive Secretary Ralph Recto, House Majority Leader Sandro Marcos, US Ambassador Jose Manuel Romualdez, US Ambassador to the Philippines Lee Lipton at Pasay City Mayor Emie Calixto.

Matapos ang ilang minuto ay sumakay si Trump sa “Marine One” at dumiretos sa Solaire Resort, Parañaque kung saan siya pansamantalang manunuluyan ng ilang araw.

Ngayong araw ay magtutungo si Trump sa Malacañang Palace kung saan inaasahan na magkakaroon sila ng bilateral meetings si Pangulong Ferdinand Marcos Jr.

Dumalo si Trump sa huling araw ng Summit at inaasahang babalik sa Amerika ngayong araw matapos ang kanilang pagpupulong ni Pangulong Marcos. (DARIS JOSE)

Pailaw sa Mulanay, Idinaos; Mayor Aguirre, Hinikayat ang Publiko na Magkaisa sa Gitna ng Banta ng El Niño

Posted on: November 18th, 2026 by Francis Paolo Torres No Comments

MULANAY, QUEZON — Sa kabila ng kinakaharap na krisis sa kalikasan, naging matagumpay ang paglulunsad ng taunang Christmas lighting ceremony o pailaw sa Liwasang Alfaro sa bayang ito nitong ika-16 ng Nobyembre, 2026.

Ang aktibidad ay pinangunahan ni Mayor Aris Aguirre kasama ang Sangguniang Bayan sa pangunguna ni Vice Mayor Jay Castelleja, kasama sina Konsehal Gelo Amisola, Konsehal Morales, at iba pang mga opisyal ng bayan. Dumalo rin bilang mga panauhing pandangal sina Bokal JJ Aquivido at Bokal Meg Uy Esguerra.

Sa kabila ng makulay na pagdiriwang, seryosong tinalakay ni Mayor Aguirre sa isang panayam ang kinakaharap na banta ng Super El Niño na inaasahang tatagal hanggang sa taong 2027. Aniya, bagamat apektado ang ilang liblib na barangay sa suplay ng tubig, ginagawa ng lokal na pamahalaan ang lahat upang masolusyunan ito katuwang ang iba’t ibang ahensya ng gobyerno.

Nanawagan naman ang alkalde ng pang-unawa at kooperasyon mula sa mga mamamayan habang patuloy na pinaghahandaan ng pamahalaang bayan ang pangmatagalang solusyon sa nasabing problema.

Sa kabila ng mga pagsubok, isinagawa ang simpleng pailaw upang maipadama sa mga Mulanayin ang diwa ng Kapaskuhan. Nag-iwan din si Mayor Aguirre ng mensahe ng pagkakaisa at pagpapadala ng pagbati ng isang Maligayang Pasko, na hinahangad na mangibabaw ang pag-ibig sa puso ng bawat isa. 

(Yvonne Bagang/ Kim Bornella/ Jeremiah Solomon/ Boy Morales)

Unang Ginang Lisa, nanawagan ng mas matibay na pandaigdigang pagtutulungan laban sa online abuse at exploitation sa mga bata

Posted on: November 18th, 2026 by Francis Paolo Torres No Comments

NANAWAGAN si Unang Ginang Louise Araneta-Marcos ng mas matibay na kooperasyon sa pagitan ng mga bansa upang maprotektahan ang mga bata laban sa pang-aabuso at pagsasamantala sa internet.

Hinikayat ng Unang Ginang ang mga pamahalaan, paaralan, pamilya at pribadong sektor na magkaisa upang matiyak ang isang ligtas na digital na kapaligiran para sa kabataan.

Sa ginanap na Fostering the Future Together gathering sa Hilton Manila sa Pasay City nitong Lunes, sinabi ni Unang Ginang Lisa na ang online protection o kaligtasan ng mga bata sa internet ang magiging pangunahing prayoridad ng Pilipinas sa ilalim ng pandaigdigang inisyatibong “Fostering the Future Together.”

Ang pagtitipon ay dinaluhan ng Unang Ginang, mga opisyal ng pamahalaan, mga guro, tagapagtaguyod ng karapatan at kaligtasan ng mga bata, gayundin ng mga kinatawan mula sa pribadong sektor.

Kabilang din sa mga dumalo sina Malaysia’s H.E. Dr. Wan Azizah Wan Ismail at Mrs. Lawrence Wong ng Singapore, kasama ang iba pang mga international delegate at kinatawan mula sa iba’t ibang sektor.

Nakatuon ang inisyatibo sa apat na pangunahing larangan: AI in Education, EdTech Tools, Online Protection at Digital Skills.

“Bagama’t mahalaga ang lahat ng larangang ito, nais kong bigyang-pansin ang online protection bilang pangunahing prayoridad ng Pilipinas,” pahayag ni Unang Ginang Lisa.

Binanggit din niya ang mga ulat na nagsasabing nasa edad 10 ang karaniwang edad ng mga batang Pilipino nang una silang magkaroon ng access sa internet. Ayon sa kanya, ang maagang pagkakalantad ng mga bata sa mga digital platform ay maaaring maglantad sa kanila sa panganib ng online abuse at exploitation.

Nanawagan siya sa mga pamahalaan at lider ng pribadong sektor na palakasin ang mga hakbang at proteksyon laban sa mga banta sa internet, habang ginagamit ang makabagong teknolohiya upang suportahan ang edukasyon at pag-unlad ng mga bata.

Sa kabilang dako, kinilala rin ng Unang Ginang ang mahalagang papel ng Child Protection Network sa pagpigil at pagtugon sa pang-aabuso sa mga bata sa pamamagitan ng pakikipagtulungan ng mga eksperto at pagsasanay sa mga frontline child protection worker, kabilang ang mga hukom, piskal, social worker at pulisya.

Binati rin niya ang Child Protection Network at mga katuwang nitong Childlight Global Child Safety Institute, Consuelo Zobel Alger Foundation at UNICEF Philippines sa pag-oorganisa ng ika-18 AKO PARA SA BATA Conference kasabay ng nasabing pagtitipon.

Binigyang-diin din ng delegasyon ng Estados Unidos ang matibay na ugnayan ng Pilipinas at Amerika sa pagsusulong ng edukasyon, digital literacy at ligtas na paggamit ng mga bagong teknolohiya, partikular na ang artificial intelligence o AI.

Binanggit din nya ang $25 milyong pondong ipinangako ng mga katuwang na kumpanya sa teknolohiya kasunod ng pagpupulong ng dalawang First Lady sa New York noong Setyembre. Layunin nitong palawakin ang access ng mga bata sa edukasyon, pagpapaunlad ng kasanayan at inobasyon.

Sa pagtatapos ng kanyang mensahe, binigyang-diin ni Unang Ginang Lisa ang tanyag na pahayag ng pambansang bayani na si Dr. Jose Rizal: “Ang kabataan ang pag-asa ng bayan.

Nanawagan siya para sa isang kinabukasang ang bawat bata ay ligtas, pinahahalagahan, napoprotektahan at nabibigyan ng pagkakataong maabot ang kanilang buong potensyal.

“Bigyan natin ang kabataan ng pagkakataong mangarap. Let us build a world where the youth can dream,” pagtatapos ng Unang Ginang. ( DARIS JOSE)