MAINIT na tinanggap ng House prosecution team ang naging desisyon ng Senate impeachment court na ibaba ang voting threshold sa impeachment trial ni Vice President Sara Z. Duterte.

Ayon kay Akbayan Party-list Rep. Chel Diokno, nirerespeto ng prosecution ang naging desisyon ng Senate impeachment court. 

“Ginagalang po namin at nirerespeto ’yung naging pagpapasya ng ating impeachment court. Para sa amin sa prosecution, wala namang pinagkaiba sa trabaho namin, sa tungkulin namin bilang prosecutor: i-presenta ang ebidensya, ilatag ang kaso to the best of our ability. As far as we’re concerned, that is still our focus, and we will continue to do that job until the end of this trial,” sinabi ni Diokno. 

Nagdesisyon ang impeachment court nitong Miyerkules na baligtarin ang naunang pahayag ni Presiding Officer Sen. Francis “Chiz” Escudero noong July 6 na kinakailangan 16 na boto para convict si Duterte, base sa two-thirds ng lahat ng 24 na miyembro ng Senado na nakasaad sa Konstitusyon.

Nag-ugat ang desisyon matapos maghain ng mosyon si Senator-Judge Erwin Tulfo na itinatanong kung dapat ba isali sa botohan ang apat na senador na hindi makadalo sa paglilitis. Tinukoy ni Tulfo ang apat na senador na sina Ronald “Bato” dela Rosa, Jinggoy Estrada, Rodante Marcoleta at Loren Legarda.

Si Dela Rosa ay kasalukuyang nagtatago at umiiwas sa warrant of arrest laban sa kanya ng International Criminal Court (ICC) kaugnay sa madugong kampanya laban sa ilegal na droga, si Estrada at Marcoleta na nahaharap sa kasong plunder samantalang si Legarda ay under medical leave at nagpapagamot sa ibang bansa. 

Naunang dininig ng impeachment court ang opinyon ng apat na dating mahistrado, amici curiae, hinggil sa isyu at isinagawa ang oral arguments nitong Miyerkules bago ang botohan.

Iprinisinta ni Diokno ang posisyon ng prosecution hinggil sa isyu at sinabing ang constitutional requirement na two-thirds ay hindi magbabago at ang pagtatalunan lamang ay kung sino ang mga kwalipikadong bumoto.

Nang tanungin si Diokno kung napadali ang trabaho ng prosecution matapos ang desisyon ng impeachment, sinabi niya: “It never gets easier.” 

Aniya, ang naging challenge sa prosecution ay magtayo ng bahay na gawa sa ebidensiya. “Dati nabanggit ko na rin ito, ’yung trabaho ng prosecution at ’yung mismong pinakamalaking hamon sa amin ay magtayo ng bahay ng ebidensya,” ani Diokno.

“Mas, in a way, mas madali na ang trabaho ng defense dahil ang nais lang nila ay sirain ang bahay,” dagdag ng kongresista.

 (VINA de GUZMAN)

KAAGAD binisita ni Valenzuela 2nd District Congressman Gerald Galang ang mga pamilyang naapektuhan ng sunog sa Brgy. Gen. T. De Leon, Valenzuela City upang personal na kamustahin ang kalagayan ng mga ito at maghatid ng tulong sa kanila. Aniya, hindi man nito mapapalitan ang mga nawala, sana ay magsilbi itong kaunting suporta sa panahong higit nila ang kailangan ng karamay. Kasama aniya sila sa kanilang pagsisimula muli at ipagdasal din niya ang kaligtasan at pagbangon ng bawat pamilyang naapektuhan ng sunog. 

(Richard Mesa)

TUMIMBUWANG ang duguang katawan ng 41-anyos na ginang at menor-de-edad niyang manugang na hilaw matapos pagbabarilin ng hindi pa kilalang salarin habang papasakay sa isang pampasaherong jeep sa Caloocan City.

Dead-on-the-spot ang mga biktimang sina alyas “Gina” at alyas “Binoy”. 15, kapwa residente ng Pangarap Village, North Caloocan, sanhi ng mga tinamong tama ng bala sa katawan habang ligtas naman ang 17-anyos na babaing anak ng nasawi na live-in partner ng binatilyo.

Sa ulat ni Caloocan police chief P/Col. Joey Goforth kay Northern Police District (NPD) Director P/BGen. Benliner Capili, pasado alas-7:40 ng gabi noong Lunes nang maganap ang insidente sa harapan ng Bankers Village II Gate 4, Quirino Highway, Sapang Alat, Brgy. 181 ng nasabing lungsod.

Sa pahayag sa pulisya ng kinakasama ng binatilyo na si alyas “Lyka”, magkakasama silang tatlo na nag-aabang ng masasakyang pampasaherong jeep na biyaheng Malaria, Brgy. 185 sa naturang lugar.

Nang makapara na sila ang jeep, naunang sumakay ang dalagita at nang pasakay na rin ang dalawang biktima ay bigla na lamang sumulpot ang salarin na nakasuot ng asul na jacket at itim na short pants saka malapitang binaril ang kanyang ina bago sinunod na pinaputukan ang kanyang live-in partner.

Matapos ang insidente, mabilis na tumakas ang gunman habang inaalam pa ng pulisya sa motibo ng pamamaslang kung saan bumuo na ng team si Col. Goforth na tututok sa pagdakip sa salarin. 

(Richard Mesa)

NAKIISA si Unang Ginang Liza Araneta-Marcos sa global coalition na pinangunahan ni United States (US) First Lady Melania Trump

Hangad ng koalisyon na palawakin ang access ng mga kabataan sa teknolohiya at edukasyon habang pinoprotektahan ang mga ito mula sa panganib sa online.

Inanunsyo ni Unang Ginang Liza ang kanyang partisipasyon sa “Fostering the Future Together” coalition matapos dumalo sa isang luncheon kasama si Trump at kapwa First Spouses sa St. Regis Hotel sa New York, araw ng Martes.

“Happy to join First Lady Melania Trump and fellow First Spouses for the ‘Fostering the Future Together’ luncheon,” ang sinabi ni Unang Ginang Liza sa isang social media post, araw ng Miyerkules.

Aniya, ang koalisyon ay mayroong iisang layunin at iyon ay tiyakin na ang mga kabataan ay mayroong oportunidad na “learn, grow and thrive” habang nananatiling ligtas at protektado sa lalong tumataas na digital world.

“Here’s to building a safer, brighter and more hopeful future for all children — especially our young Filipino youth who have fallen victims to all these creepy websites,” aniya.

Ang inisyatiba, inilunsad ni Trump sa isinagawang 80th United Nations General Assembly noong 2025, pinagsama-sama ang mga First Spouses at lider para i- promote ang kapakanan ng mga kabataan sa pamamagitan ng edukasyon, inobasyon at teknolohiya.

Naka-pokus ang koalisyon sa larangan ng artificial intelligence sa edukasyon, education technology tools, online safety at protection, at digital literacy. Hangad din nito na pangasiwaan ang partnerships sa pagitan ng gobyerno at technology companies para palawakin ang access sa tools para sa mga bata, magulang at mga tagapagturo.

Napaulat na magho-host si Unang Ginang Liza sa “Fostering the Future Together” event sa panahon kung saan ay magho-host ang Pilipinas sa ASEAN Summit bago matapos ang taon.

Sinabi naman ng White House na ang koalisyon ay mayroong 57 member nations, na may First Spouses na tumutulong sa kani-kanilang gobyerno para galugarin ang technology-based educational opportunities at mga hakbang para protektahan ang mga kabataan mula sa online. ( DARIS JOSE)

NAGWAKAS na ang pagtatago ng 28-anyos na kelot na wanted sa apat na bilang ng kasong panggagahasa sa Caloocan City nang matunton ng pulisya sa kanyang pinagtataguan sa lalawigan ng Eastern Samar.

Hindi na nakapalag ang akusado na nakatala ang akusado bilang No. 3 sa Top Ten Most Wanted Person sa Northern Police District (NPD) nang posasan ng mga tauhan ni NPD Director P/BGen. Benliner Capili.

Sa ulat, nakatanggap ng impormasyon ang mga operatiba ng NPD District Special Operations Unit (DSOU) na tumutuloy ang akusado sa lugar ng kanyang live-in partner sa Sitio Rawis, Barangay Alang-Alang, Borongan City, Eastern Samar kaya kaagad silang nakipag-ugnayan sa HPG Regional Group Police Unit 8.

Katuwang ang mga operatiba ng Eastern Samar Provincial Highway Patrol Team, Regional Group Police Unit 8, Criminal Investigation and Detection Group Eastern Samar Provincial Field Unit, Eastern Samar Provincial Intelligence Unit, NDIT-RIU NCR at Borongan City Police Station, ikinasa ng NDP-DSOU sa pangunguna ni PLTCOL Jobie Astucia ang operation na nagresulta sa matagumpay na pagkakaaresto sa akusdo dakong alas-10:35 ng umaga.

Dinakip ang akusado sa bisa ng arrest warrant na inisyu ng Family Court, Branch 1, Caloocan City para sa kasong four counts of Rape na walang inirekomendang piyansa para sa kanyang pansamantalang paglaya.

Ayon kay BGen. Capili, patuloy na pinalalakas ng NPD ang mga pagsisikap nito sa paghahanap at paghuli sa mga wanted na indibidwal, partikular ang mga Top Most Wanted Persons, sa pamamagitan ng sustained intelligence gathering, inter-unit coordination, at focused police operations. (Richard Mesa)

TINAPOS na ng Kamara nitong Miyerkules ng gabi ang plenary deliberations ng P300.96-billion proposed 2027 budget ng Department of Transportation (DoTR) at attached agencies at corporations nito.

Gayundin, ang interpelasyon ng panukalang P4.04-billion budget ng Civil Service Commission (CSC), at 148.63-million budget ng Career Executive Service Board (CESB) na susuporta sa operasyon ng human resource governance, professionalization, workplace cooperation at administrative justice.

Sa ilalim ng panukalang P4.04-billion budget, layon nito ang modernisasyon ng Philippine Civil Service system, upang gawing digital ang human resource system, personnel records at payroll mechanism habang ang P148.63 million allotment para sa CESB ay gagamitin naman sa patuloy na development at maintenance ng competent career executive service.

Tinapos din ng Kamara ang sponsorship at debate sa panukalang budgets ng Department of Energy (DOE) at Energy Regulatory Commission (ERC) na nagkakahalaga ng P5.58-billion at P944 million, respectively.

Bukod dito, ipinasa na rin ng Kamara ang panukalang badyet ng Commission on Higher Education (CHED) at State Universities and Colleges (SUCs) kabilang na ang University of the Philippines System.

Ang panukalang P35.45-billion budget para sa CHED ay gagamiting suporta sa pagpapatuloy ng mga programa para palakasin ang higher education institutions, promote research and innovation initiatives, at maglaan sa mga estudyante ng oportunidad na makakuha ng de kalidad na mataas na edukasyon.

Nasa P27.79-billion o 78% ng proposed 2027 budget ay nakareserba para sa Universal Access Quality Tertiary Education (UAQTE) program.

Habang nasa 141.09-billion budget para sa SUCs, na tumaas ng 3.18-billion mula sa 2026 level. (VINA de GUZMAN)

INIREKOMENDA ni Naga City Mayor Leni Robredo kay Pangulong Ferdinand Marcos Jr. si Senior Associate Justice Marvic Leonen bilang susunod na Chief Justice ng Korte Suprema.

Kinumpirma mismo ng Korte Suprema ang sulat ni Robredo, kung saan iginiit niyang si Leonen ang pinakamatagal na nakaupong mahistrado at pinakapasok sa pamantayan ng Konstitusyon — may competence, independence, probity at integrity.

Binalikan ni Robredo ang malawak na track record ni Leonen — mula sa pagiging negosyador sa framework agreement sa MILF, hanggang sa paghawak ng mga sensitibong posisyon bilang Acting Chief Justice, chair ng mga dibisyon, electoral tribunals at judicial committees.

Itinampok din niya ang pagiging lider ni Leonen sa modernisasyon ng hudikatura, kabilang ang eCourt PH at paggamit ng artificial intelligence.

Giit ni Robredo, kailangan ng Korte Suprema ng lider na may kredibilidad at paninindigan para sa social justice, human rights, at integridad ng institusyon. (Gene Adsuara)

HINARANG at pinabalik ng Bureau of Immigration (BI) ang isang 46-anyos na Romanian national na dati ng nahatulan sa kasong pagre-recruit ng mga kababaihan para sa prostitusyon sa kanyang pagdating sa Ninoy Aquino International Airport (NAIA) Terminal 3 noong Setyembre 22.

Batay sa mga talaan at intelligence information, si Razvan Mircea Nedelea ay miyembro ng isang Romanian criminal group na sangkot sa human trafficking ng mga kababaihan patungong Scotland. Kasunod nito, siya ay nahatulan at nasentensiyahan sa kasong pagre-recruit ng mga babae para sa prostitusyon.

Dahil sa rekord sa krimen at nakaraang hatol kay Nedelea, hiniling ni Bienvenido Castillo III, Deputy Chief ng BI Anti-Terrorist Group (ATG), sa BI APIS Operations Center (APOC) na bantayan ang kanyang pagbibyahe at agad na abisuhan ang ATG kapag na-detect ito.

Sa kanyang pagdating noong Setyembre 22, inirefer ng nakatutok na Primary Immigration Officer si Nedelea sa mga tauhan ng ATG, na nagrekomenda na harangan ang kanyang pagpasok at ibalik siya sa kanyang bansang pinagmulan.

Pinuri ni BI Commissioner Joel Anthony M. Viado ang pagiging alerto ng mga tauhan ng imigrasyon at ang epektibong koordinasyon sa pagitan ng APOC, ATG, at mga immigration officer sa paliparan. 

(Gene Adsuara)