PINASARINGAN ng Malakanyang ang tinutukoy nitong credit-grabber para sa isang housing project sa Davao City.

Hindi naman pinangalanan ni Presidential Communications Office (PCO) Undersecretary at Palace Press Officer Claire Castro kung sino ang mga ito.

“Isang maayos na pabahay, isang tunay na komunidad, ngunit ang proyektong ito ay pilit na inaagaw ng ilang mapagpanggap na kahit wala silang anumang kontribusyon sa pagod ng Pangulong Marcos Jr. at ng DHSUD ay pilit bubulagin ang mga kababayan natin sa pamamagitan ng pagpapanggap na kanila raw ang proyekto na People’s Ville sa Davao City,” ani Castro.

Habang hindi naman nagbigay ng pangalan si Castro, nauna nang nagpahayag si Vice- President Sara Duterte na ang People’s Ville project ay nagsimula sa panahon ng kanyang termino bilang Alkalde.

Para patunayan na ang mga proyekto ay nagsimula sa panunungkulan ni Pangulong Ferdinand Marcos Jr., nagpakita ng resibo si Castro na magpapatunay na ang proyekto ay nagsimula sa Marcos administration.

“So, mainam po na maging mapanuri tayo, at ang proyektong ito ay para po sa ating mga kababayan, hindi para magpabida ang sinuman kung hindi laan ito para sa ating mga kababayan lalung-lalo na sa Davao City,” ang winika ni Castro.

Samantala, tinukoy naman ni Castro ang data mula sa DHSUD, sinabi nito na may 2,6000 housing units ang natapos na, at apat pang gusali ang sumasaillaim ngayon sa konstruksyon.  ( DARIS JOSE)

PINAPURIHAN  ni Marikina 2nd District Rep. Miro Quimbo ang Energy Regulatory Commission (ERC) sa panukalang polisiya na alisin ang 12% value-added tax (VAT) na kasalukuyang ipinapataw sa system loss charges.
Sa ilalim ng draft resolution ng ERC, hindi na isasama ang system loss charges sa taxable gross receipts ng generation companies maging ng National Grid Corporation of the Philippines (NGCP).
Nasa proposal din ang pagre-require sa mga distribution utilities na linawing tukuyin na ang system loss ay isang hiwalay na item sa electricity bills ng consumers.
“I commend the ERC for this move. This is the product of sustained consultation between Congress and the Commission, and we appreciate the ERC’s initiative to act on an issue that directly affects consumers. This is government working together to remove costs from electricity bills wherever we can. At a time when every peso matters, even seemingly small reductions can provide meaningful relief to Filipino households and businesses,” ani Quimbo.
Una nang inihain ni Quimbo ang House Bill No. 10602 na nagsusulong na alisin ang 12% VAT na ipinapataw sa system loss charges.
“There is no value in energy that is not consumed. We should not be taxing consumers for electricity that never reached their homes or businesses in the first place,” ani Quimbo.
Sa ilalim ng ERC proposal, ang pagtanggal sa VAT ay maipapatupad sa sandaling naisapinal na ang resolusyon at kumpirmahin ng Bureau of Internal Revenue (BIR) ang kaukulang tax treatment.
(VINA de GUZMAN)

LUNGSOD NG STO. TOMAS, Batangas — Muling pinagtibay nina Mayor Atty. Arth Jhun Aguilar Marasigan (AJAM) at Vice Mayor Catherine Jaurigue-Perez ang kanilang matibay na paninindigan para sa patuloy na pagsulong, pagkakaisa, at pagbabago ng Lungsod ng Sto. Tomas sa pagtatapos ng ikalimang State of the City Address (SOCA).  

Sa naganap na ulat sa bayan, binigyang-diin ng pamahalaang panlungsod na ang tagumpay ng bawat programa ay bunga ng matibay na kooperasyon sa pagitan ng ehekutibo, ng Sangguniang Panlungsod, at ng buong sambayanang Tomasino.

“Kapit-kamay tayo sa bawat hakbang, sa bawat hamon, at sa bawat tagumpay,” ang naging mensahe na sumasalamin sa nagkakaisang panawagan ng liderato nina Mayor Marasigan at Vice Mayor Jaurigue-Perez para sa patuloy na bayanihan sa komunidad.

Ibinida rin sa okasyon ang mga nagawa at kasalukuyang programa ng lokal na pamahalaan na nakatuon sa pagpapabuti ng kalusugan, edukasyon, imprastruktura, at kabuhayan upang iangat ang antas ng pamumuhay sa lungsod.

Sa pagtatapos ng pagtitipon, nanawagan ang pamunuan sa mga mamamayan na panatilihin ang pagtutulungan upang makamit ang mas maunlad, matatag, at masiglang kinabukasan para sa Lungsod ng Sto. Tomas. 

(BOY MORALES SR.)

PATAY ang isang pulis at isang sibilyan habang ginagamot ang isa pang pulis matapos barilin ng kanilang kabaro nang nagkaroon ng mainitang pagtatalo sa parking area ng isang resort sa Maragondon Miyerkules ng madaling araw.

Kinilala ang namatay na si PMSg Junmark Sisante, miyembro ng PNP na nakatalaga sa Magallanes MPS at residente ng Magallanes at Arjay Mojica ng Magallanes, Cavite umano’y bodyguard ng isang Mayor habang inoobserbahan pa si PCpl Louie Vidon Climacosa, nakatalaga sa Ternate MPS at residente ng Magallanes Cavite habang ang suspek ay kinilalang si PCPL Rolando Periodico Jr. 35, nakatalaga sa Trece Martires City Police Station , Trece Martires City Cavite, at residente ng Magallanes Cavite.

Sa ulat, bandang ala-1:30 ng madaling araw nang naganap ang insidente sa parking area ng Marie’s Resort sa Barangay San Miguel A, Maragondon, Cavite kung saan ayon sa saksi ang mga sangkot ay pawang nakainom at pauwi na ang mga ito subalit pagdating sa lugar ng nagkaroon ng mainitang pagtatalo na nauwi sa barilan.

Isinugod sa pinakamalapit na ospital ang mga biktima kung saan idineklarang dead on arrival sina Sisante at Mojica.

Nakumpiska sa kanila ang isang Glo ck 17 .9mm pistol na may magazine na naka-istu sa suspek at isang Pierto Berreta . 9mm pistol na isyu mula sa biktima. 

(Gene Adsuara)

KALABOSO ang dalawang kelot matapos maaresto ng pulisya habang naglalaro ng illegal na sugal at makuhanan pa ng droga ang isa sa kanila sa Valenzuela City, Martes ng gabi.

Kinilala ni Valenzuela Police Chief P/Col. Joseph Talento ang mga suspek na sina alyas “Conrad”, 40, delivery helper ng Brgy., Maysan at alyas “Rico”, 43, construction worker ng Pasay City.

Sa kanyang ulat kay Northern Police District (NPD) Director P/BGen. Benliner Capili, sinabi ni Col. Talento na habang nagsasagawa ng Anti-Criminality Operation ‘Oplan Galugad’ ang mga tauhan ng Police Sub-Station 9 nang maaktuhan nila ang dalawang lalaki na nagsusugal umano ng ‘cara y cruz’ sa loob ng Saint Angeluz Cemetery sa Padrigal St., Barangay Maysan, pasado alas-7 ng gabi.

Kaagad nilang nilapitan ang mga suspek sabay nagpakilala bilang mga pulis saka ipinaalam sa kanila ang nilabag nilang pagkakasala bago inaresto ang mga ito.

Nakumpiska sa mga suspek ang pangara, P320 bet money at isang plastic sachet na naglalaman ng hinihinalang shabu na nagkakahalaga ng P1,836.00 na nakuha umano kay alyas Conrad.

Mahaharap ang mga suspek sa kasong paglabag sa PD 1602 (Anti-Illegal Gambling Law) habang karagdagan pa na kasong paglabag sa Section 11 ng R.A 9165 (Comprehensive Dangerous Drug Act of 2002) ang kakaharapin ni alyas Conrad. (Richard Mesa)