Para sa mga magsasaka, transport sector…Sa gitna ng fuel prices, gobyerno, naghahanda para sa bagong round ng UPLIFT aid 

NAGHAHANDA na ang administrasyon ng new round o bagong ikot ng fuel assistance sa ilalim ng Unified Package for Livelihoods, Industry, Food, and Transport (UPLIFT) para magbigay ng relief o tulong sa vulnerable sectors habang ang benchmark Brent oil ay tumama na sa $100 per barrel nito lamang Setyembre 9, ang kauna-unahan simula Hulyo sa gitna ng renewed US-Iran tension.

Sinabi ni Agriculture Assistant Secretary Arnel de Mesa, ang mga magsasaka at mangingisda ang mga initial targets ng bagong UPLIFT assistance.

Samantala, sinabi naman ni Transportation Secretary Giovanni Lopez na ang administrasyon ay nagpapatuloy na naghahanap ng paraan para mapagaan ang local impact ng pagtaas ng presyo ng langis sa global market, na nakaapekto sa public transport sector at mga mananakay.

Winika ni Lopez, na seryosong pinag-aaalan ng Department of Transportation (DOTr) na isama ang iba pang modes of public transport sa fuel subsidy na ini-enjoy ngayon ng PUJs at UV express. Nagsasagawa naman ang Land Transportation Franchising and Regulatory Board (LTFRB) ng konsultasyon ukol sa fare-hike petitions.

“Sa ngayon inihahanda na natin ang fuel assistance under the UPLIFT program natin. Ito ay direktang mapapakinabangan ng ating mga magsasaka at mangingisda,” ayon pa rin kay De Mesa sa isang panayam.

Winika pa ni De Mesa na ang malaking tipak ng gastos ng mga magsasaka at mangingisda ay napunta sa langis para sa kanilang palay harvester at motorized bancas.

“Ngayon ay harvest season ng ating mga palay. Makakatulong ito sa bawas gastos. Lalo na kung ginagamit nila iyong combined harvesters. At ganoon din sa ating mga mangingisda. Alam natin malaking bahagi ng gastusin nila ay ang ginagamit na krudo o fuel sa mga bangkang de motor,” ani De Mesa.

Kinokonsidera rin ng gobyerno ang pagpapanumbalik ng toll waivers para sa mga sasakyan na naghahatid ng agricultural products mula Northern Luzon at Southern Luzon sa Metro Manila.

“Pag nagkaroon ng pagtaas ang presyo ng petrolyo ang unang naaapektuhan sa sektor ng agrikultura ay iyong dagdag na gastusin sa movement or transportation costs na ipinapasa sa ating mga consumers,” aniya pa rin.

“Naging epektibo dati iyong pagbibigay ng libreng toll doon sa ating mga viajero. Isa iyan sa magandang pangyayari sa mga nakalipas na pagtaas ng (presyo) ng produktong petrolyo,” ang tinuran nito.

“At mayroon ng mga aksyon na ibalik itong libreng toll. Lalo na sa mga major tolls going in and out of Metro Manila, from south to north, hanggang doon sa iba pang mga links, skyways, toll areas. Up to P150 million iyong naibibigay na additional na libre para sa ating mga viajero,” ang pahayag ni De Mesa.

Hinggil naman sa panukala ng private sector hog industry association na itaas ang pork tariffs, sinabi ni De Mesa na maingat na pinag-aaralan ng gobyerno ang potensiyal na epekto ng presyo ng baboy at ang sumunod na pagtaas ng presyo ng processed pork products gaya ng hotdogs at luncheon meat, na ginagamit ng mga Pinoy sa araw-araw.

“Kailangang balansehin para hindi makaapekto sa pagtaas ng presyo ng bilihin lalo na sa inflation. We really need to have a careful balance,” ang sinabi ni De Mesa.

Sinabi ni Secretary Lopoez na, “Sa ating mga bus operators at drivers, una po, kami po, ako po ay personal na humihingi ng inyong pasensya, paumanhin at konsiderasyon. At makaaasa naman po kayo na ang gobyerno gumagawa ng mga iba’t ibang mga inisyatibo para po matulungan kayo and in the meantime, matulungan din natin ang ating mga commuters.”

Sa kabilang dako, hinggil naman sa petisyon para sa fare hike, sinabi ni Lopez masusing kinokonsidera ng LTFRB ang mga usapin at concerns ng mga operators, drivers, at mga mananakay.

“Pagdating po sa ating fare hike po, ito po ‘yung sinasabi ko parati na at this point in time po, pinipiga pa rin natin ang gobyerno. Kung anong pwede nating ibigay na inisyatibo, subsidiya. Tulad po ng fuel discount natin, alam po namin ‘yan na from P10 naging P12 at limitado po ang transport modes na makikinabang dyan, ‘yung jeepney at tsaka mga UV Express. Iniisip namin kung paano ‘to pahahabain pa at isama ‘yung iba’t ibang transport modes,” ang sinabi ni Lopez.

Kinilala ang pagtaas ng inflation rate, sinabi ni Lopez na “The inflation itself is quite high. Ang August inflation natin is 6.1, ‘pag nagtaas po tayo ng pamasahe ay sigurado pong makakadagdag din ‘yan sa ating inflation. Makakadagdag sa presyo rin po ng serbisyo at presyo ng mga goods.”

“So, we’re trying to say po, sasaluhin po ito ng gobyerno, pipigain natin hanggang sa kaya natin, mga subsidiya, mga iba’t ibang inisyatibo. Ongoing naman po lahat ang DOTr initiatives at sana maging last resort po ‘yung pagbibigay natin ng fare hike. It’s just a matter of time po,” dagdag na pahayag ni Lopez.

Samantala, sinabi ni Pangulong Marcos na nilikha ang UPLIFT upang magbigay ng tulong sa ‘most vulnerable sectors’ bilang bahagi ng whole-of-government approach para mapagaan ang epekto ng nagpapatuloy na krisis sa Gitnang Silangan. ( DARIS JOSE)