IGINIIT ni dating speaker at Leyte Rep. Ferdinand Martin G. Romualdez na handa siyang sumunod sa tamang proseso at patunayan na wala siyang nilabag na batas.

Ayon kay Romualdez, bagama’t masakit para sa kanilang pamilya ang naging pahayag ng Pangulo, iginagalang niya ito at nilinaw na hindi siya kailanman humingi ng anumang pabor o espesyal na pagtrato.

“Ang tama ay ang sumunod sa proseso at hayaan ang ebidensya ang magsalita. Naninindigan akong wala akong ginawang anumang labag sa batas at handa akong patunayan ito,” ani Romualdez.

Reaksyon ito ni Romualdez kasunod ng naging pahayag ni Pangulong Ferdinand Marcos Jr. sa kanyang ikalimang State of the Nation Address (SONA) kahapon kaugnay sa paghahain ng kaso laban sa ilang opisyal ng gobyerno kaugnay sa kontrobersiyal na flood control scandal, kung saan nabanggit ang kanyang pinsan na dating speaker ng Kamara.

(VINA de GUZMAN)

TULOY ang magiging deliberasyon ng Kamara sa panukalang 2027 national budget sa kabila ng nagaganap na impeachment trial ni Bise Presidente Sara Duterte sa senado.

Ang paniniguro ay ginawa ni House Majority Leader Ferdinand Alexander “Sandro” A. Marcos kahapon habang naghahanda sa inaasahang isusumiteng National Expenditure Program (NEP).

“Wala naman ‘yung impeachment sa Lower House. We will continue doing our job. So to answer your question, I don’t think it will affect, at least I can only speak on behalf of the Lower House. It will not affect what we have to do and what needs to be done,” pahayag ni Marcos sa isang ambush interview.

Sa ilalim ng taunang proseso ng budget, isusumite ng ehekutibo ang NEP sa kongreso bilang basehan para sa General Appropriations Bill (GAB), kung saan rerebyuhin ito ng House Committee on Appropriations bago magsagawa ng agency-level hearings.

“As you know, the budget is the single most important piece of legislation for both the House and the Senate,” pahayag ni Marcos.

Sinabi pa ng majority leader na inaasahan na isusumite ng Marcos administration ang panukalang badyet ngayong darating na Agosto.

“You are right, now we are expecting the NEP to be turned over sometime next month, hopefully not too late, but hopefully the NEP turnover will be sometime in August. Then we can proceed with the budget briefings,” paliwanang ni Marcos.

(VINA de GUZMAN)

SINABI ni Presidential Communications Office (PCO) Undersecretary at Palace Press Officer Claire Castro. na mananatiling nasa “maximum level” ang security ni Pangulong Ferdinand Marcos Jr., matapos ang pagsabog malapit sa Department of Justice (DOJ).

Sa isang ambush interview bago pa ang pang-5 State of the Nation Address (SONA), inilarawan ni Castro ang insidente bilang “alarming.”

“Yung operasyon na ‘yan, ibibigay ko na lamang sa security saka sa mga kapulisan at hindi ko puwedeng pangunahan kung anong mga balak nila. Pero siyempre kung ano man ang nangyayari dito, alarming ‘yun,” ayon kay Castro.

“Kung wala namang mga Pilipino manggugulo, sana mas asensado na sana ang Pilipinas,” aniya pa rin.

HIndi pa masabi ni Castro kung mayroong anumang adjustments sa security ng Chief Executive.

Maging anuman, binigyang diin ni Castro na ang security nG Pangulo ay mananatili sa “maximum level.”

“Kahit may pagsabog o walang pagsabog, dapat ang proteksyon sa Pangulo ay to the maximum level. Alam naman natin ‘yan,”diing pahayag pa ni Pagulong Marcos.

At nang tanungin si Castro nakababahala ba ang insidente, tinuran nito na “Hindi kami nagkausap ng Pangulo but definitely, ‘yung mga kapulisan natin dapat mas matindi ang pag-iingat at seguridad.”

Nauna rito, napaulat na may isang homemade bomb ang sumabog malapit sa entrance ng Department of Justice (DOJ), bago naman natagpuan ang isang hinihinalang bomba malapit sa gusali ng Senado.

Ayon sa mga awtoridad, nangyari ang pagsabog pasado alas-12 ng hatinggabi nitong Lunes, July 27.

Wala namang naiulat na nasugatan sa insidente.

Ilang oras matapos ang pagsabog, isang kahina-hinalang bagay na pinaghihinalaang bomba ang nakita sa kalsada malapit sa Senado, bago maganap ang ikalimang State of the Nation Address (SONA) ni Pangulong Marcos.

Sa mga larawang lumabas sa media, makikita ang nabasag na windshield ng isang sasakyan at mga kalat na pinaniniwalaang dulot ng pagsabog.

Samantala, ayon sa ulat ng pulisya, dakong alas-8:30 ng umaga nang mapansin ng isang tow truck driver ang hinihinalang bomba sa kalsadang katabi ng Senado. ( DARIS JOSE)

INANUNSYO ni Pangulong Ferdinand R. Marcos Jr. ang pagpapalawig ng government assistance programs at panukalang tax relief measures na naglalayong pagaanin ang financial burden ng milyong mga Filipino partikular na ang vulnerable families, mga manggagawa at small businesses.

Sa kanyang pang-limang State of the Nation Address (SONA) sa Batasang Pambansa Complex sa Quezon City, sinabi ni Pangulong Marcos na ang gobyerno ay naglaan ng mahigit sa P60 bilyon para sa assistance programs hanggang sa katapusan ng taon upang matulungan ang mga Filipino na makaagapay sa nagpapatuloy na economic challenges.

“Hanggang kailangan, asahan ninyo na hindi titigil ang pagsuporta ng pamahalaan. Naglaan tayo ng mahigit PHP60 bilyon para dito, hanggang katapusan ng taon,” aniya pa rin.

Winika pa ng Pangulo na ang pondong nabawi mula sa iregularidad sa government projects ay agad na ilalaan sa mga programang direktang mapakikinabangan ng publiko.

Sinabi pa ng gobyerno na ire-recalibrate nito ang assistance programs para ma-cover ang mas maraming Filipino na nangangailangan, kabilang na ang Pantawid Pamilyang Pilipino Program (4Ps) at Walang Gutom Program.

Ang pinalawaig na tulong aniya ay inaasahan na aabot ng 3.5 milyong benepisaryo ng dalawang programa, 1.5 million minimum wage earners na miyembro ng Social Security System, at 2.5 million na mahihirap na Filipino na hindi pa nakatatanggap ng tulong ng gobyerno.

Ani Pangulong Marcos, ang patuloy na tulong ay ipaabot sa transport sector, magsasaka, at iba pang agriculture stakeholders, at overseas Filipino workers na naapektuhan ng global uncertainties.

“Kung susumahin, mahigit pito’t kalahating milyong pamilya na lubos na nangangailangan ang matutulungan natin sa mabigat na kabanatang ito,” aniya pa rin

Maliban sa pinalawak na social protection programs, winika ni Pangulong Marcos na hangad niya na makapagbigay na kaginhawaan sa middle class at small businesses, na patuloy na nakararamdam ng epekto ng economic disruptions.

“So, to ensure the continued progress of the middle class amidst the lingering effects of the crisis, we will pursue tax relief measures that promote growth, generate revenue, and advance equity toward socio-economic sustainability,” anito.

Sa kabilang dako, hinikayat naman ng Pangulo ang kongreso na magpasa ng batas na magpapawak sa income tax exemptions sa mga manggagawa na kumikita ng hindi hihigit sa P350,000 taun-taon at bawasan ang income tax rates para sa ibang manggagawa.

Tinuran ng Pangulo na ang panukalang reporma ay naglalayon din na alisin ang minimum corporate income tax para sa small businesses at pagkalooban ng tax amnesty saklaw ang unpaid income tax, estate at donor’s tax, value-added tax at kaugnay na parusa.

“Kaya bilang natatanging proteksyon sa kanila at para mas mapakinabangan nila ang pinaghirapan nilang kita, nanawagan ako sa Kongreso na maipasa ang batas na magbibigay ng bahagyang ginhawa para sa ating bayaring buwis,” aniya pa rin.

 ( DARIS JOSE)

NASAMSAM sa dalawang durugista kabilang ang isang High-Value Individual (HVI) ang mahigit P.2 milyong halaga ng shabu kasunod ng pagkakaaresto sa kanila isinagawang buy bust operation ng pulisya sa Caloocan City.

Sa kanyang ulat kay Northern Police District (NPD) Acting Director P/BGen. Benliner Capili, sinabi ni Caloocan Police Chief P/Col. Joey Goforth na ang mga suspek ay 36-anyos na driver, (HVI) ng Brgy., 185 at 30-anyos na mekaniko, (SLI) ng Brgy., 186.

Ikinasa ng mga operatiba ng Station Drug Enforcement Unit (SDEU) ng Caloocan Police sa pangunguna ni P/Lt. Restie Mables ang buy bust operation laban sa HVI suspect, sa koordinasyon sa PDEA.

Matapos umanong tanggapin ng suspek ang marked money mula sa isang pulis na nagpanggap na buyer kapalit ng isang plastic sachet ng shabu ay agad siyang dinamba ng mga operatiba, kasama ang mekanino na umano’y kanyang parokyano sa Barangay 185.

Nakumpiska sa mga suspek ang humigi’t kumulang 30.9 grams ng suspected shabu na may standard drug price na ₱210,120.00, at buy-bust money.

Mahaharap ang mga suspek sa kasong paglabag sa Sections 5 at 11, Article II ng R.A 9165 (Comprehensive Dangerous Drugs Act of 2002) sa Caloocan City Prosecutor’s Office. (Richard Mesa)