OPISYAL na nilagdaan ng Department of Labor and Employment o DOLE at ng Metropolitan Manila Development Authority o MMDA ang Memorandum of Agreement o MOA nitong Hulyo 1, 2026.

Layunin nito na palawakin at paigtingin ang malawakang clean-up drive at ang programang Bayanihan sa Estero sa Metro Manila sa ilalim ng Tulong Panghanapbuhay sa Ating Disadvantaged Workers o TUPAD.

Tugon ito sa direktiba ni Pangulong Ferdinand Marcos Jr. para sa paghahanda sa tag-ulan. Pinangunahan nina DOLE Secretary Francis N. Tolentino at MMDA Chairperson Atty. Romando Aries ang pagpirma sa pinagsamang inisyatiba.

Sinusuportahan ito ng P220-milyong budget ng DOLE TUPAD para mabigyan ng emergency employment ang 10,000 na disadvantaged workers na maglilinis ng mga drainage system sa Metro Manila upang maiwasan ang pagbaha sa lungsod.

Dahil nalalapit na ang tag-ulan, binigyang-diin ni Tolentino ang kahalagahan ng inisyatibang ito. Aniya, mahalaga ang maagap na paghahanda para matiyak ang kaligtasan ng publiko, maiwasan ang baha, at mapigil ang pagkalat ng mga sakit na dala ng tubig. Ngayong Hulyo 1 ang unang deployment kung saan 500 kwalipikadong benepisyaryo ang ide-deploy ng DOLE para maglinis ng mga baradong drainage, maglinis ng mga daluyang tubig, at magpatupad ng waste segregation.

Tutulungan sila ng MMDA sa pamamagitan ng orientation tungkol sa maayos na waste segregation at material recovery. Kasabay nito, pinoproseso na rin ng DOLE-NCR, MMDA, at mga kaukulang lokal na pamahalaan ang profiling ng 3,600 benepisyaryo para sa susunod na deployment. Dumalo rin sa pagtitipon ang mga opisyal ng DOLE kabilang sina Undersecretary Atty. Felipe Egargo, Jr., Assistant Secretary Amuerfina Reyes, Bureau of Workers with Special Concerns Director Leilani Reynoso at *DOLE-NCR Regional Director Sarah Mirasol .

(Gene Adsuara)

MATAGUMPAY na naisagawa ng Pamahalaang Lungsod ng Valenzuela, katuwang ang Pambansang Pamahalaan sa pamamagitan ng inisyatiba ng Bawat Bayan Makikinabang ni Pangulong Ferdinand R. Marcos Jr. ang ikalawang yugto ng programang pamamahagi ng bigas sa pagtiyak ng pangako nito na na walang maiiwan na Valenzuelano.

Umabot sa kabuuang 2,645 kwalipikadong benepisyaryo ang nakatanggap ng 10 kilo bawat isa mula sa natukoy na vulnerable sectors na nagpapatibay sa pangako ng gobyerno sa pagpapagaan ng pasanin dahil sa tumataas na gastusin sa bahay at pagtataguyod ng seguridad sa pagkain sa mga komunidad.

Inilunsad noong Pebrero 2026, ang programa sa pamamahagi ng bigas ay bahagi ng inisyatiba ng Bawat Bayan Makikinabang ni Pangulong Marcos Jr., na naglalayong magbigay ng direktang suporta sa mga pamilyang Pilipino sa buong bansa sa pamamagitan ng pagpapalakas ng accessibility ng pagkain at pagpapaabot ng tulong sa mga karapat-dapat na sektor.

Sa kanyang mensahe, nagpahayag ng kanyang pasasalamat si Mayor WES Gatchalian sa Pambansang Pamahalaan sa patuloy na pakikipagtulungan nito sa pagpapatupad ng mga programang direktang makikinabang sa mga lokal na komunidad.

Sa pamamagitan ng pagtutulungang pagsisikap na ito, kapwa ang Pambansang Pamahalaan at ang Pamahalaang Lungsod ng Valenzuela ay patuloy na tinitiyak na ang mahahalagang tulong ay makakarating sa mga higit na nangangailangan nito.

Ang pamamahagi ng bigas ay umaakma sa matagal nang inisyatiba ng Pamahalaang Lungsod ng Valenzuela, kabilang ang taunang programa ng Pasko sa Hulyo, na nagbibigay ng rice assistance sa halos 80,000 senior citizens sa lungsod. Binibigyang-diin ng mga hakbangin na ito ang patuloy na pangako ng lungsod sa pagsuporta sa mga mahihinang sektor at pagtiyak na ang mahahalagang tulong ay makakarating sa mga residenteng higit na nangangailangan nito.

“Kami ho, sa lokal, starting july [ay] mamimigay rin po kami ng bigas… [kung saan] ang mga lolo’t lola po natin, ang higit 80,000 natin na senior citizens ay makakatanggap naman ng maagang pamaskong handog galing sa lokal na pamahalaan,” ani Mayor WES.

Dagdag niya, nananatiling matatag ang pamahalaang lungsod sa pagsuporta sa mga hakbangin na nagtataguyod ng seguridad sa pagkain, katatagan ng komunidad, at inklusibong serbisyo publiko.

Dumalo rin sa pamamahagi sina San Juan City Mayor at League of Cities of the Philippines President Francis Zamora, Vice Mayor Marlon Alejandrino, 1st District Congressman Kenneth Gatchalian, 2nd District Congressman Gerald Galang at City Councilors. (Richard Mesa)

SIMULA sa Hulyo 15, mas pinalawak na ang coverage ng Philippine Health Insurance Corporation para sa moderate hanggang severe na kaso ng leptospirosis.

Ayon kay Presidential Communications Office (PCO) Undersecretary at Palace Press Officer Claire Castro , alinsunod ito sa hangarin ni Pangulong Ferdinand R. Marcos Jr. na mas marami ang makakuha ng kinakailangang gamutan nang hindi nalulubog sa napakalaking gastusin.

Sa ilalim nito, mas mataas aniya na ang coverage para sa mga pasyente – hanggang P63,000 para sa hospital care, P170,000 para sa hemodialysis, at hanggang P230,000 para sa peritoneal dialysis. 

Maaari rin aniyang umabot ang package sa P411,000 para sa mga kuwalipikadong pasyenteng nangangailangan ng kritikal na gamutan at kung kinakailangan ng kombinasyon ng hemodialysis, mechanical ventilation, at pulmonary rehabilitation.

Libre na rin aniya ang konsultasyon sa mga Yakap provider kung saan maaaring maresetahan ng doxycycline kung kinakailangan.

“Iniinom ang gamot na doxycycline bilang pang-iwas sa leptospirosis ayon sa payo ng healthcare provider.,” ani Castro.

“Saklaw ito ng PhilHealth “Gamot Package” na nagbibigay ng hanggang 20,000 pesos kada miyembro annually para sa mga kinakailangang gamot para sa leptospirosis,” aniya pa rin. (DARIS JOSE)

ITINUTULAK ni Speaker Faustino “Bojie” G. Dy III ang panukala na protektahan ang mga kabataan sa impluwensiya ng social media.

Ayon kay Dy, marapat na pangalagaan ng gobyerno ang kapakanan ng mga kabataan at protektahan sila sa mga panganib ng teknolohiya.

Kasama ni Majority Leader Rep. Ferdinand Alexander “Sandro” Marcos ng Ilocos Sur, inihain ni Dy ang House Bill No. 9965 o Children’s Social Media Safety Act.

“Nakikita natin na malaking bahagi ang social media sa araw-araw na buhay kaya mas malaki rin ang ating responsibilidad na tiyaking ligtas ang ating mga anak habang gumagamit nito. If we will allow Filipino children to explore the online world, they should be given sufficient protections,” sabi ni Dy.

Inamin ni Dy na malaki ang naitutulong ng teknolohiya o mga digital platforms sa pagtataguyod ng kaalaman at komunikasyon ng mga kabataan subalit may kaakibat na panganib tulad ng cyberbullying, harmful content, online exploitation, addiction, anxiety, sleep disruption, and iba pang hindi pa kasalukuyang natutugunan ng batas.

“Kung may batas tayong nagpoprotekta sa mga bata sa paaralan, sa lansangan, at sa ating mga komunidad, dapat mayroon din tayong malinaw na proteksiyon habang sila ay gumagamit ng social media,” sabi ni Dy.

“Responsibilidad nating siguraduhin na ang teknolohiya ay para sa kabutihan ng bata, hindi nagiging sanhi ng panganib sa kanilang paglaki,” dagdag ng kongresista.

Pinanukala ni Dy ang pagtataguyod ng age-based framework na magpapahintulot sa mga bata ng gumamit ng social media. 

Ang mga bata na 13 years old pababa ay hindi papayagan na gumamit ng social media accounts. Samantala, ang mga bata na 13 years old pataas na hindi hihigit sa 18 anyos ay maaaring magkaroon ng social media accounts 

Nais ni Dy na magtaguyod ng age verification systems para ma-disable agad ang mga prohibited social media accounts na may parental o guardian consent at active supervision. 

Sa ilalim ng HB 9965, ang mga social media companies ay required na maglagay o mag-implement ng sistema para ma-monitor ang mga online activity ng mga kabataan at mag impose ng screen-time limits at limitahan ang interactions.

“Hindi natin ipinagkakait sa kabataan ang teknolohiya. Malaki ang naitutulong nito sa pag-aaral, komunikasyon, at pagkatuto. Ang layunin natin ay tiyaking naaayon ang paggamit nito sa kanilang edad at magkaroon sila ng sapat na gabay ng magulang. Habang lumalawak ang digital world, kailangan ding patibayin ang proteksiyon para sa ating mga anak,” sabi ni Dy.

Inaatasan din ang Department of Information, Communication and Technology (DICT) na mag monitor, mag isyu ng cease-and-desist order sa koordinasyon ng National Telecommunications Commission at ng National Privacy Commission, sa mga paglabag. 

“Tungkulin din ng pamahalaan na tiyakin na ang mga social media platform ay may pananagutan sa paggawa ng mas ligtas na digital environment para sa ating mga kabataan. Sa panahon ng mabilis na pag-unlad ng teknolohiya, ang kapakanan ng bawat batang Pilipino ang dapat maging pangunahing batayan ng ating mga polisiya,” sabi ni Dy. 

(VINA DE GUZMAN)

DAPAT ihayag ni Ombudsman Jesus Crispin Remulla ang buod ng kasunduan na gawing state witness si dating Public Works and Highways Secretary Manuel Bonoan sa mga kasong flood control corruption.

Ito ang pahayag ni House Deputy Minority Leader at ACT Teachers party-list Rep. Antonio Tinio na inalis si Bonoan sa kasong plunder na kinakaharap nito kapalit na maging state witness sa mga imbestigasyon at kaso kaugnay ng multi-milyong pisong flood control anomalies.

Ayon kay Tinio, nakakabahala ang ginawang hakbang ng Ombudsman na gawing state witness si Bonoan.

Partikular na tinukoy ni Tinio na si Bonoan, bilang kalihim ng DPWH, ay may “final say” sa preparasyon at paano gagastusin ang budget ng ahensiya, kabilang ang mga sinasabing budgetary insertions at kickbacks mula sa mga ghost at overpriced flood control projects. 

“In other words, he (Bonoan) is one of the top officials that should be held accountable instead of being handed a get out of jail card. Hindi pa ba sapat ang testimonya ng mga state witness katulad nina (dating DPWH) Usec. Roberto Bernardo?” tanong ni Tinio.

Ayon kay Tinio, mas maraming katanungan ang ginawang state witness si Bonoan. “Kaya bang ituro at diinan ni Bonoan ang mga dating kasama niya sa gabinete na sangkot din sa flood control? May testimonya ba siya na magdidiin sa Pangulo mismo, katuldad ng nilahad ni Usec. Bernardo?”

“Bonoan must not be let off the hook without delivering fish bigger than himself. Kung hindi, mangangamoy ang kasunduang ito,” babala ni Tinio. (VINA DE GUZMAN)