CALOOCAN CITY — “Dapat ang Barangay ilapit sa Tao!” Ito ang mariing pahayag ni Barangay Chairman Bryan Gonzales-Año ng Barangay 38, Zone 4, Distrito 2, sa kanyang patuloy na paghahatid ng tapat at may-pusong paglilingkod sa kanyang mga kabarangay.

Ayon kay Kapitan Año, ang pamamahala ay dapat suklian ng maayos na serbisyo dahil ang tiwala ng mamamayan ang nagluklok sa kanya sa posisyon. Dahil dito, agad niyang tinutugunan ang bawat pangangailangan ng pamayanan sa abot ng kanyang makakaya sa pamamagitan ng mga sumusunod na programa:

Kaligtasan at Emergency Response

Mini-Ambulance at Rescue Vehicles: Ito ang naging pangunahing proyekto ng kapitan upang matiyak na may agarang sasakyan ang mga residente sa oras ng medikal na emergency.

Oplan Galugad at Police Visibility: Isinasagawa ito tuwing ikatlong linggo upang mapanatili ang kapayapaan at maiwasan ang anumang kaguluhan.

CCTV at Road Lighting: Nagdagdag ng mga Closed-Circuit Television (CCTV) cameras at naglagay ng mga ilaw sa bawat kalsada at eskinita para sa seguridad ng publiko.

Public Address System: Nagkabit ng mga speaker sa komunidad para sa mabilisang pagpapakalat ng mahahalagang anunsyo.

Planong Fire Hydrants: Kasalukuyan nang inihahanda ang paglalagay ng mga fire hydrant sa barangay upang mabilis na maapula ang sunog sakaling magkaroon ng insidente.

Kalinisan at Kalikasan (Clean and Green)

HAPAG Program: Isang inisyatibo ng DILG at lokal na pamahalaan kung saan nagtatanim ang barangay ng iba’t ibang uri ng gulay para sa sapat na nutrisyon ng komunidad.

De-clogging at Clean-Up Drive: Regular na Road Clearing at paglilinis ng mga estero at kanal tuwing Sabado upang maiwasan ang pagbaha, lalo na ngayong panahon ng tag-ulan.

Serbisyong Panlipunan at Kagalingan

Para sa Senior Citizens: May palagiang nakalaang iba’t ibang uri ng gamot para sa kanilang kalusugan.

Scholarship at Insentibo: May programa para sa mga mag-aaral, kung saan binibigyan ng insentibo ang mga may matataas na marka bilang pagkilala sa kanilang pagsisikap.

Tulong sa PWDs: Madalas na nag-aabot ng personal na panggastos si Kapitan Bryan mula sa sarili niyang bulsa para sa mga Persons with Disabilities (PWDs).

Lubos ang pasasalamat ni Kapitan Año sa kanyang mga kabarangay dahil sa kanilang pagkakaisa at pakikipagtulungan upang mapanatili ang kalinisan, kaayusan, at katahimikan. Nagpaabot din siya ng pasasalamat kay Mayor Along Malapitan para sa mga patuloy na tulong at suportang ibinababa ng lungsod sa kanilang barangay.

Muling pinatunayan ni Kapitan Bryan Gonzales-Año na sa tamang pamamahala, ang gobyerno ay tunay na nararamdaman ng bawat mamamayan. ( Sonny Asignacion)

PINAIIMBESTIGAHAN ng Kabataan Partylist, Makabayan Bloc kasama ang environmental groups ang illegal shipments ng 235 containers ng hazardous electronic at plastic waste mula sa United States sa Subic Bay Freeport Zone.

“Ginawa na nga tayong military playground at firing range ng US sa Balikatan Exercises at Tomahawk Missile Launching. Ngayon, gagawin pa tayong basurahan, tambakan ng e-waste at plastik nila,” ayon kay House Assistant Minority Leader at Kabataan Partylist Rep. Atty. Renee Co.

Ang shipments, na nagsimula mula Marso 2025 ay naglalaman umano ng toxic materials tulad ng lead, mercury, cadmium, chromium, PCBs, beryllium, at asbestos na mapanganib sa kalusugan at sa kalikasan.

Iginiit ng Kabataan Partylist na nilabag ng illegal importation ang Republic Act No. 6969 at binuwag nito ang obligasyon ng Pilipinas sa ilalim ng Basel Convention on hazardous waste control, kung saan signatory ang bansa simula 1994

“The Bureau of Customs claims it cannot act due to a court ruling treating Subic Bay as a separate customs territory. This legal gray area is being exploited to circumvent our environmental laws,” ani Co.

“Ang karapatan ng bawat Pilipino sa ligtas na kapaligiran at malusog na kalikasan ay hindi dapat isakripisyo para sa interes ng dayuhan. Clearly, this is both a national sovereignty issue and an environmental defense issue,” dagdag ni Co.

Sa House Resolution 1164, hiniling ng Kabataan na agad magsagawa ng imbestigasyon sa naturang 235 containers ng e-waste at plastic waste; panagutin ang kawalang aksyon ng government agencies, pagbalik sa lahat ng illegal hazardous waste shipments, palakasin ang enforcement mechanisms upang hindi na maulit ang ganitong uri ng importations at ibasura ang kasunduan na magkokompromiso sa soberenya at kaligtasan ng kapaligiran.

“Hindi papayag ang kabataan na tambakan ang ating kapiligaran at dumihan ang ating kinabukasan. Lahat ng sangkot sa maruming kalakaran, dapat managot,” pagtatapos ni Co.

(Vina de Guzman)

SUGATAN ang dalawang riders nang mahagip ng kawad ng kuryen mula sa bumagsak na poste ng Meralco ang kanilang motorsiklo sa Navotas City, Lunes ng gabi.

Sa ulat, nangyari ang insidente dakong alas-7:28 ng gabi sa Marala Bridge patungong Honorio Lopez Blvd matapos unang bumagsak ang isang malaking pribadong poste at nahagip ang mga kawad ng kuryente na dahilan ng pagbagsak ng poste ng Meralco.

Kaagad namang nagresponde sa lugar ang mga tauhan ng Navotas City Disaster Risk Reduction and Management Office (CDRRMO), kasama ang kapulisan, City Traffic and Parking Management Office (CTPMO) at Bureau of Fire Protection (BFP) upang asistihan at madala sa pagamutan ang nasugatang riders saka i-cordon ang lugar.

Naglabas din ng abiso ang Pamahalaang Lungsod ng Navotas sa mga motorista na maghanap muna ng alternatibong daan at mag-ingat sa pagbiyahe habang pinaalalahanan din ang mga pedestrians na iwasang magdaan sa lugar.

Pansamantalang isinara sa daloy ng trapiko ang naturang tulay upang bigyang-daan ang mabilis na pagkukumpuni ng Meralco sa natumbang poste at pagbabalik ng supply ng kuryente sa mga apektadong lugar. (Richard Mesa)

NASAWI ang isang 45-anyos na babae matapos siyang mabangga ng isang rumaragasang motorsiklo habang tumatawid sa Southbound lane ng Delpan Flyover sa Barangay 20, Tondo, Maynila, bandang alas-11:30 ng umaga.

Kinilala ang biktima na si Cynthia Lamar y Burawis ng Parola Compound, Tondo, Manila. Agad siyang isinugod sa Gat Andres Bonifacio Medical Memorial Center ngunit idineklara siyang dead on arrival ng mga doktor. Samantala, kinilala ang rider ng motorsiklo na si Gervin Efsali y Dilasa, 26, vendor ng Bakod Bayan, Cabanatuan City, NUeva Ecija, ay nasa kustodiya na ng pulisya.

Ayon sa imbestigasyon ng pulisya, bigla umanong tumawid ang biktima sa kalsada nang mabangga siya ng isang Yamaha Sniper 155 na motorsiklo. Dahil sa lakas ng pagkakabangga, tumilapon siya ng ilang metro at nagtamo ng mga matitinding pinsala na naging sanhi ng kanyang pagkamatay.

Inilipat na sa Manila District Traffic Enforcement Unit ang kaso para sa mas malalim na imbestigasyon. (Gene Adsuara)

OBLIGADO nang maglagay ng mga closed circuit television (CCTV) camera ang lahat ng 897 barangay sa Lungsod ng Maynila bilang hakbang na mahadlangan at masugpo ang krimen sa kanilang mga lugar.

Sa ilalim ng City Ordinance No. 9152, Series of 2026 na inakda ni 1st District Councilor Rosalino “Jhun” Ibay, ang bawat barangay, maliit man o malaki, ay inaatasang maglagay hindi bababa sa 10 CCTV sa mga lugar na madalas kaganapan ng krimen.

Sa panayam ng Manila City Hall Press Club (MCHPC) kay Councilor Ibay, Chairman ng Committee on Peace and Order and Public Safety, kaagad aniyang nilagdaan ni Mayor Isko Moreno Domagoso ang ordinansa nang maipasa ito ng mayorya ng Sangguniang Panlungsod dahil malaki ang maututulong nito para sa seguridad ng bawat komunidad

Sinabi ni Konsehal Ibay na ang mga tauhan ng Manila Police District (MPD) na nakakasakop sa kani-kanilang barangay ang makakatuwang ng barangay sa paglalagay ng mga CCTV sa istratehikong lugar na madalas kaganapan ng krimen.

May katapat namang kaparusahan mula sa pagkakasuspinde hanggang sa pagkakasibak sa tungkulin ang sinumang Kabesa ng barangay na hindi tatalima sa ordinansa lalu na’t ang magbebenepisyo rito ay ang taumbayan, higit ang kanilang mamamayan. (Gene Adsuara)

PINANGUNAHAN ng Pamahalaang Lungsod ng Valenzuela, kamasama ang Department of Information and Communications Technology (DICT) Cybersecurity Bureau at Korea International Cooperation Agency (KOICA) ang isinagawang groundbreaking ceremony para sa proyekto ng “Establishment of the National Cyber Security Center for Enhancing the Cyber Crisis Response Capabilities in the Philippines,” na ginanap sa DICT Valenzuela Compound.

Nanguna sa kaganapan sina Mayor WES Gatchalian, DICT Secretary Henry Aguda, Ambassador of the Republic of Korea to the Philippines H.E. Lee Sang-hwa, at KOICA Vice President Lee Yun-young, kasama ang mga kinatawan mula sa iba’t ibang ahensya ng gobyerno at partner na institusyon.

Ang proyekto, ay isang pinagsamang inisyatiba sa pagitan ng Republika ng Pilipinas at Republika ng Korea sa pamamagitan ng KOICA na naglalayong palakasin ang information security management, linangin ang isang bagong henerasyon ng mga dalubhasang propesyonal sa cybersecurity, at pagbutihin ang pakikipagtulungan ng dalawang bansa sa larangan ng cybersecurity.

Kabilang sa mga pangunahing bahagi ng proyekto ay ang pagtatatag ng isang Information Security Management System (ISMS), pagtatayo ng isang state-of-the-art na National Cyber Security Center (NCSC) main center sa DICT Valenzuela Campus at backup center sa Ilocos Norte, pagbuo ng isang national cybersecurity system para sa cyber threat monitoring at information sharing, capacity-building programs, at ang pagpapatupad ng P-Security education cybersecurity.

Ipapatupad ang proyekto sa loob ng limang taon na may aktibong partisipasyon ng mga organisasyong Critical Information Infrastructure, ahensya ng gobyerno, local government units, at pribadong sektor.

Nagmarka ang groundbreaking ceremony ng isang makabuluhang hakbang tungo sa pagpapahusay ng mga kakayahan sa pagtugon sa cyber crisis ng bansa at pagpapalakas ng imprastraktura ng cybersecurity ng Pilipinas. (Richard Mesa)