NAITALA ng Northern Police District (NPD) ang pinakamababang bilang ng walong Focus Crimes sa lahat ng police districts sa National Capital Region Police Office (NCRPO) sa unang 45 araw na pamumuno ni P/BGen. Benliner Capili, Acting District Director ng NPD.

Ang makabuluhang tagumpay na ito ay sumasalamin sa pinaigting na pagsugpo sa krimen at mga pagsisikap ng interbensyon ng Distrito, na naka-angkla sa FOCUS Agenda ng Hepe ng Philippine National Police, ang ABLE-ACTIVE-ALLIED Framework ng National Capital Region Police Office (NCRPO), at ang Six Strategic Program Thrust ng Northern Police District.

Sa pamamagitan ng pinalakas na police visibility, intelligence-driven operations, community engagement, at proactive law enforcement initiatives, pinalakas ng NPD ang kaligtasan ng publiko sa buong CAMANAVA area habang pinalalakas ang mas matibay na partnership sa mga stakeholder at komunidad.

Binigyang-diin ng P/BGen. Capili na ang tagumpay na ito ay bunga ng sama-samang dedikasyon, disiplina, at propesyonalismo ng bawat tauhan ng NPD, gayundin ang walang patid na suporta ng publiko at mga katuwang na ahensya.

“This milestone inspires us to work even harder in sustaining peace and order. We remain committed to delivering responsive, proactive, and service-oriented policing to ensure safer communities for every resident of CAMANAVA,” ani Gen. Capili.

Ang Northern Police District ay nananatiling matatag sa kanyang pangako sa pagpapanatili ng mga tagumpay nito at higit pang pagpapalakas ng mga hakbangin sa kapayapaan at kaayusan sa paghahangad ng isang mas ligtas, at matatag na komunidad. (Richard Mesa)

Yahoo Mail: Search, Organize, Conquer

WALANG nakikitang dahilan ang Malakanyang para ikansela ang official visit ni Pangulong Ferdinand Marcos Jr., sa Canada para patatagin ang bilateral ties at makakuha ng ilang cooperation agreements.

Sinabi ni Presidential Communications Office (PCO) Undersecretary at Palace Press Officer Claire Castro na tuloy ang byahenng ito ng Pangulo sa Canada sa kabila ng nagpapatuloy na rally sa EDSA.

“Kasi matagal na rin po itong naka-schedule at kailangan din po niyang magtrabaho. Hindi po kasi siya pwedeng pahintuin lamang ng mga bulung-bulungan na merong lulusob sa Malacañang, na merong gagawa ng destabilization,” ayon kay Castro.

“Hindi po mapapahinto ang Pangulo sa kaniyang pagtatrabaho para sa taumbayan,” dagdag na wika nito.

Ipinahayag ito ni Castro sa gitna ng nagpapatuloy na rally ng mga miyembro ng Iglesia ni Cristo malapit sa EDSA People Power Monument sa Quezon City.

Aniya, ang four-day visit ay naglalayon na mas palalimin pa ang relasyon ng Pilipinas at Canada sa pamamagitan ng patuloy na pagtutulungan sa mga mahahalagang sektor.

“May ilang mga formal framework of cooperation at iba’t ibang kasunduan ang inaasahang ilalabas sa pagbisita ng Pangulo, lalo na sa mga area ng energy, natural resources, trade and investment, labor and immigration, tourism, culture and arts,” ang tinuran ni Castro.

Sinabi pa ni Castro na nakatakdang makapulong ng Pangulo ang mga Canadian business leaders para hikayatin ang mga ito na mamuhunan sa mga priority sectors sa Pilipinas, kabilang na sa mining at nuclear energy.

“Nakatakda ring dumalo ang Pangulo sa iba’t ibang business meetings at private sector engagement, particular sa pakikipagpulong ng Pangulo sa economic players ng Canada sa larangan ng mining, IT and business process management, telecommunications, nuclear energy and financial services,” aniya pa rin.

Samantala, nakatakdang makapulong ni Pangulo Marcos ang Filipino community sa Vancouver, British Columbia, bilang pagkilala sa kontribusyon ng overseas Filipinos sa dalawang bansa at kanilang papell para palakasin ang bilateral ties.

Sinabi ni Castro na ang detalye ng Philippine delegation at mga government officials na itinalaga sa oversee day-to-day operations sa panahon ng pagbyahe ng Pangulo ay ia-anunsyo maya-maya lamang. (DARIS JOSE)

MASUSING pinag-aaralan ni Pangulong Ferdinand R. Marcos Jr. ang rekomendasyon na palawakin ang P50 per kilo na maximum suggested retail price (MSRP) ng gobyerno pagdating sa imported na bigas, lampas sa nakatakdang expiration bilang bahagi ng pagsisikap na panatilihin na matatag ang presyo ng pagkain sa gitna ng global uncertainties.

Sinabi ni Presidential Communications Office (PCO) Undersecretary at Palace Press Officer Claire Castro na inirekomenda ng National Price Coordinating Council na palawigin ang price cap, na nauna nang ipinataw para pigilan ang tumataas na presyo ng bigas at protektahan ang mga mamimili.

“Inaaral pa po ito ng Pangulo para sa kanyang approval dahil tinitignan na malapit na ang anihan sa September kaya kino-consider ito ng Pangulo,” ayon kay Castro.

Nauna rito, inihayag ng Malakanyang na irerekomenda ng Department of Agriculture (DA) ang pagpapalawig ng P50 kada kilo na maximum suggested retail price (MSRP) sa bigas na nakatakdang magtapos sa Hunyo 30.

“Sa kasalukuyan po, ang ating gobyerno ay nagbibigay ng mga abono at pataba sa ating mga magsasaka dahil planting season na so mas mababa ang cost production nila, which would mean lower po ang cost ng palay once harvest season,” anito.

Aniya pa, patuloy aniya na namumuhunan ang gobyerno sa post-harvest facilities at cold storage infrastructure para mabawasan ang ‘food losses’ at mapahusay ang supply chain efficiency. ( DARIS JOSE)

HINAMON ni Mayor Jeannie Sandoval ang 2,255 graduates ng City of Malabon University (CMU) na dalhin ang mga pagpapahalagang natutunan nila sa labas ng silid-aralan at gamitin ang kanilang pinag-aralan upang maiangat hindi lamang ang kanilang sarili kundi maging ang kanilang mga pamilya, komunidad, at Lungsod ng Malabon.

Ito ay sa isinagawang 31st CMU Commencement Exercises, na may temang “From Knowledge to Nation Building: Graduates at the Forefront of Change,” na ginanap noong Martes sa Philippine International Convention Center (PICC) Forum sa Pasay City.

Binati ni Mayor Jeannie ang mga nagsipagtapos sa pag-abot ng isang milestone na naging posible sa pamamagitan ng mga taon ng tiyaga, sakripisyo, at determinasyon. Ipinaalala niya sa kanila na ang pagkakaroon ng diploma ay hindi ang katapusan ng kanilang paglalakbay ngunit ang simula ng isang mas malaking responsibilidad na maging mga ahente ng positibong pagbabago.

“Hindi lamang diploma ang inyong tinatanggap ngayon, kundi ang responsibilidad na gamitin ang inyong kaalaman para sa kabutihan ng inyong pamilya, ng ating komunidad, at ng ating bansa. Dalhin ninyo saan man kayo makarating ang inyong pinagmulan, ang tapang, lakas ng loob, at pagpupursige dahil kayo ay mga tunay na Malabueño,” aniya Mayor Sandoval.

Sa 2,255 nagtapos para sa School Year 2025–2026, 599 na estudyante ang nakakuha ng Latin honors, kabilang ang 13 Summa Cum Laude na makakatanggap ng tig-P5,000, 260 Magna Cum Laude na tatanggap ng tig-P3,000, at 326 Cum Laude na mag-uuwi ng tig-P2,000 mula sa lokal na pamahalaan.

Hinikayat naman nina Senator Joseph Victor “JV” Ejercito at Atty. Marco Cicero F. Domingo, CHED-NCR Director III na kapwa nagsilbing guest speakers ang mga nagsipagtapos na maging produktibo.

Kinilala rin ni Mayor Jeannie ang suporta ng mga magulang, tagapag-alaga, miyembro ng faculty, at tauhan ng unibersidad na ang paggabay at sakripisyo ay nakatulong sa paghubog ng tagumpay ng mga nagtapos. Muli rin niyang pinagtibay ang pangako ng kanyang administrasyon sa pagsusulong ng de-kalidad na edukasyon sa Malabon.

Makalipas ang 33 taon, nakatanggap ang CMU ng Institutional Recognition mula sa CHED noong Mayo 2026, sa ilalim ng termino ni Mayor Sandoval.

Dumalo rin sa graduation rites sina City Administrator Dr. Alexander Rosete, First Gentleman Cong. Ricky Sandoval, City Councilours, CMU President Dr. Glen DV. de Leon, college deans, at university faculty at non-teaching personnel, at mga magulang ng mga nagtapos.

“Sa pangunguna ng ating kagalang-galang na Mayor Jeannie Sandoval, patuloy nating palalakasin ang edukasyon dahil naniniwala tayo na ang bawat kabataang nabibigyan ng pagkakataong makapagtapos ay nagiging pag-asa ng kanilang pamilya at ng kinabukasan ng ating lungsod,” sabi ni Dr. Rosete. (Richard Mesa)

INARESTO ng Bureau of Immigration (BI) ang isang South Korean national na pinaghahanap ng mga awtoridad sa kanyang bansa dahil sa umano’y pagkakasangkot sa isang telecommunications fraud o telecom scam na nambiktima ng maraming indibidwal.

Kinilala ni Immigration Commissioner Joel Anthony Viado ang pugante na si Park Junhyeon, 44, , na inaresto ng mga operatiba ng BI Fugitive Search Unit (FSU) noong gabi ng Hunyo 28 sa kahabaan ng MacArthur Highway sa Barangay Balibago, Angeles City, Pampanga.

Isinagawa ang operasyon sa pakikipag-ugnayan sa mga awtoridad ng South Korea, Criminal Investigation and Detection Group–National Capital Region (CIDG-NCR), at Department of Justice (DOJ).

Si Park ay saklaw ng Interpol Red Notice na inilabas noong Mayo 7, 2026, kasunod ng warrant of arrest na ipinalabas ng Busan District Court sa South Korea kaugnay ng kasong pandaraya o fraud.

Ayon sa mga awtoridad ng South Korea, pinamunuan umano ni Park, kasama ang kanyang mga kasabwat, ang isang mapanlinlang na no-show” scam kung saan nagpapanggap siyang negosyante na nangangakong babayaran o ire-reimburse ang mga produktong binili ng kanyang mga biktima para sa kanya.

Sa imbestigasyon, lumabas na pitong biktima ang nalinlang sa pamamagitan ng 24 na mapanlinlang na transaksyon, na nagresulta sa pagkalugi ng humigit-kumulang 170 milyong Korean won (KRW).

Batay sa tala ng BI, huling dumating si Park sa Pilipinas noong Disyembre 12, 2025 bilang isang pansamantalang bisita. Gayunman, nag-overstay siya matapos mag-expire ang kanyang pinahihintulutang pananatili noong Hunyo 9, 2026.

Ibinunyag din ng Bureau na ang pasaporte ni Park ay nauna nang napasakamay ng Angeles Field Office matapos magsumite ang kanyang kinatawan ng aplikasyon para sa pagpapalawig ng kanyang pananatili sa bansa. Gayunman, napag-alaman ng mga awtoridad na hindi personal na humarap si Park sa pagproseso ng naturang aplikasyon.

Kinumpirma rin ng BI na si Park ay nauna nang isinama sa kanilang watchlist bilang isang undesirable alien dahil sa kanyang pagiging pugante. (Gene Adsuara)