TIMBOG ang isang helper na wanted sa kaso ng Robbery sa lalawigan ng Batangas nang matunton ng pulisya sa ikinasang operation sa Valenzuela City.

Ayon kay Valenzuela Police Chief P/Col. Joseph Talento, ang 41-anyos na akusado na residente ng Brgy., Ugong ng lungsod ay pansamantalang nakapiit sa Custodial Facility Unit ng Valenzuela City Police.

Sa kanyang report kay Northern Police District (NPD) Acting Director P/BGen. Benliner Capili, sinabi ni Col. Talento na nakatanggap ng impormasyon na kasalukuyang nanunuluyan sa lungsod ang akusado.

Ang akusado ay may nakabinbin na arrest warrant na inilabas ng Regional Trial Court, Branch 87, Rosario, Batangas para sa kasong Robbery (Article 293 of the Revised Penal Code).

Kaagad namang isinagawa ng mga operatiba ng Valenzuela Police Sub-Station 8 ang operation laban sa akusado na nagresulta sa pagkakaaresto sa kanya bago dinala sa Valenzuela City Hospital para sa medical examination.

Pinuri naman ni P/BGen. Capili ang operating team sa kanilang pagsisikap na natugisin ang mga wanted na indibidwal na pinaghahanap ng batas at tiyaking maihaharap ang mga ito sa hukuman. (Richard Mesa)

NAGWAKAS na ang mahigit isang taon na pagtatago ng 42-anyos na lalaki na wanted sa kasong Murder matapos masukol ng pulisya sa ikinasang manhunt operation sa Navotas City.

Sa ulat ng tanggapan ni Northern Police District (NPD) Acting Director P/BGen. Benliner Capili, ang akusado na residente ng lungsod ay nakatala din bilang No. 1 Top Ten Most Wanted Person sa NPD.

Nakatanggap ng impormasyon ang mga tauhan ni Navotas Police Chief P/Col. Renante Pinuela na muling naispatan ang presensya ng akusado sa lungsod nang magtago makaraang malaman na mayroon siyang arrest warrant.

Kaagad ikinasa ang operation ng Warrant and Subpoena Section ng Navotas Police ang manhunt operation laban sa akusado hanggang sa makorner siya sa Green Zone, Road 10, Brgy. NBBN, ng lungsod.

Inaresto ang akusado sa bisa ng warrant of arrest para sa kasong Murder na inisyu ng Regional Trial Court, Branch 287, Navotas City, noong February 26, 2025 na walang inirekomendang piyansa.

Isinagawa ang operasyon bilang bahagi ng pinaigting na kampanya ng kapulisan laban sa mga wanted na indibidwal at sa patuloy na pagsusulong ng kapayapaan, kaayusan, at hustisya sa Lungsod ng Navotas. 

(Richard Mesa)

“KAHIT na sino pa ang maging presiding officer, handang-handa na kami magprisenta ng aming mga ebidensya at testigo.”

Ito ang pahayag ni House prosecution trial spokesman Lanao del Sur Rep. Zia Alonto Adiong matapos mahalal si Sen. Francis Escudero bilang presiding officer ng impeachment court sa Senado.

“Buong respeto po naming igagalang ang desisyon ng ating mga kagalang-galang na Senator-Judges at ng buong Impeachment Court,” sinabi ni Adiong.

Nauna dito, nahalal si Escudero ng mayorya ng mga senador sa botong 12 laban sa walo sa hanay ni Sen. Alan Peter Cayetano.

Nagpahayag ng pagtutol si Cayetano sa paghalal ni Escudero at pinagpilitan nito na ang dapat mamuno ay si Senate President Win Gatchalian.

Nagkaroon ng debate ang mga senador at kalaunan ay nauwi sa botohan sa pabor ni Escudero na mamuno sa impeachment trial ni Vice President Sara Duterte sa Senado.

Nauna dito, sinabi ni Adiong na ang House prosecution panel ay nananawagan sa lahat ng partido na huwag hadlangan ang constitutional process at hayaan ang impeachment court na dinggin ang ebidensiya.

Ayon kay Adiong, ang Senado, bilang impeachment court ay ang tamang forum para matukoy ang katotohanan, hindi sa “court of public opinion.”

“The Senate impeachment court will begin a process that our Constitution clearly provides for. As we have consistently said, this is not about personalities or politics. This is about allowing our institutions to do their work,” sabi ni Adiong.

“Our simple appeal is this. Let the trial begin. Let the evidence be presented, and let both sides be heard. The Filipino people deserve nothing less than a fair, orderly, and transparent process.”

Idinagdag ni House trial spokesperson Kabataan party list Rep. Renee Co na nakasalalay ang kinabukasan ng demokrasya ng bansa sa ginaganap na impeachment trial.

“Dapat nating baybayin ang ebidensya para masagot ang mga matagal na nating tanong ng taumbayan,” pahayag ni Co. 

“The public deserves to hear the evidence. Karapatan ng taumbayan na marinig ang ebidensya at maintindihan ang mangyayari.” (VINA de GUZMAN)

TUMANGGAP na ng kanilang Transfer Certificate of Title (TCT) ang 1,000 benepisyaryo ng pangunahing programang pabahay ng administrasyon ni Pangulong Ferdinand R. Marcos Jr., ang Pambansang Pabahay Para sa Pilipino Program (4PH).

Sa press briefing sa Malakanyang, araw ng Lunes, sinabi ni Presidential Communications Office Undersecretary at Palace Press Officer Claire Castro na patuloy na lumalawak ang programa at mas maraming Pilipino ang nagkakaroon ng sariling titulo ng lupa.

“Informal settlers no more…” ani Castro, na nagbibigay-diin sa pangmatagalang epekto ng programa sa pamilya ng mga informal settler

Idinagdag ni Castro: “Dahil sa ilalim ng expanded 4-PH program ng Pangulo, mas maraming Pilipino na ang nakakamit ang kanilang hinahangad na titulo.”

Sinabi pa ni Castro: “Pangarap lang noon pero reyalidad na ngayon… ganito mailalarawan ang magandang bunga ng expanded 4-PH program ni Pangulong Ferdinand R. Marcos Jr. para sa mga naging benepisyaryo nito.”

Sinabi ni Castro na mahigit 200 benepisyaryo mula sa San Isidro Labrador Homeowners Association at mahigit 800 benepisyaryo mula sa Sitio Santo Niño sa Antipolo ang tumanggap kamakailan ng kanilang mga titulo ng lupa sa isang awarding ceremony na pinangunahan ng Social Housing Financing Corporation (SHFC).

Ayon pa kay Castro, may ilang benepisyaryo na mahigit 25 taon nang naghihintay na magkaroon ng sariling titulo ng lupa.

“Para sa ibang benepisyaryo, mahigit 25 years ang kanilang hinintay para makamit ang pangarap na titulo ng lupa,” wika ni Castro.

Inihayag pa ng Palace Press Officer na ipinatutupad ang programa sa pangunguna ng Department of Human Settlements and Urban Development (DHSUD).

Patuloy din anya, na pinabibilis ng kagawaran ang pamamahagi ng mga titulo at pabahay sa ilalim ng pamumuno ni DHSUD Secretary Jose Ramon Aliling.

Binigyang-diin ni Castro na hindi lamang pamamahagi ng lupa ang layunin ng programa kundi ang pagbibigay din ng mas maayos na pamumuhay sa mga Pilipino.

“Disenteng tahanan at pamumuhay na may dignidad para sa lahat… Ito ang layunin ng programang pabahay ni Pangulong Marcos Jr. para sa mga Pilipinong patuloy na nagsisikap at nangangarap,” diin ni Castro. 

( DARIS JOSE)