PINAKILOS ni Pangulong Ferdinand Marcos Jr., ang lahat ng ahensiya ng pamahalaan na may kinalaman sa paghahanda sa napipintong pagpasok ng super typhoon sa bansa at magpalakas ng southwest monsoon o Habagat.

“Ito naman po ay whole-of-government approach so lahat po ng ahensiya na-involve ay kailangan pong kumilos – iyan po ang utos ng Pangulo,” ayon kay Presidential Communications Office (PCO) Undersecretary at Palace Press Officer Claire Castro sa press briefing sa Malakanyang, araw ng Lunes, Hunyo 6.

Kabilang aniya sa mga utos ng Pangulo sa National Disaster Risk Reduction & Management Council (NDRRMC) ay magsagawa ng pre-disaster risk assessment scenario meetings, at panatilihing naka-standby ang NDRRMC at Regional Disaster Risk Reduction and Management Council (RDRRMC) response clusters.

Magbigay at magpalabas ng alert warning at information campaign sa lahat ng channels at platforms.

Magpatupad ng preemptive evacuations sa high-risk areas; i-secure ang safe evacuation centers at maglagay ng livestock equipment zones; i-preposition ang rescue teams, relief goods at essential supplies, kabilang ang mga special needs, at tukuyin ang alternate routes.

Magpatupad ng sea travel bans at inspeksyunin ang mahahalagang imprastraktura at magbigay ng maagang tulong sa vulnerable sectors at i-monitor public health risk gaya ng flood related diseases.

Sa ulat, inaasahang papasok ng Philippine Area of Responsibility (PAR) ang Super Typhoon na may international name na “Bavi” bukas ng gabi o madaling araw ng Miyerkules, Hulyo 08, 2026. ( DARIS JOSE)

INILUNSAD na ng pamahalaan ang ikalawang yugto ng EDSA Rehabilitation Project bilang bahagi ng direktiba ni Pangulong Ferdinand R. Marcos Jr. na pagandahin ang pangunahing lansangan ng Metro Manila at matiyak ang mas ligtas at mas maginhawang biyahe para sa mga motorista at commuter.

Sa press briefing sa Malakanyang, sinabi ni Presidential Communications Office (PCO) Undersecretary at Palace Press Officer Claire Castro na inatasan ni Pangulong Marcos si Department of Public Works and Highways (DPWH) Secretary Vince Dizon na tiyaking mas matibay ang mga kalsada, mas malalapad ang mga bangketa, at de-kalidad ang mga materyales na gagamitin sa rehabilitasyon.

Ayon kay Castro, nagsimula ang pagkukumpuni sa northbound Ortigas Bus Lane sa Mandaluyong City nitong Sabado, Hulyo 4.

“Alinsunod sa direktibang ito ng Pangulo, double-time ang kilos ng DPWH sa pamumuno ni Secretary Vince Dizon. Sinimulan ang repair works sa northbound ng Ortigas Bus Lane sa Mandaluyong nitong Sabado, July 4,” ani Castro.

Sinabi ni Castro na nais ng Pangulo na maging prayoridad ang rehabilitasyon ng EDSA, na itinuturing na pangunahing transport artery ng Metro Manila, upang matiyak ang tuloy-tuloy na daloy ng trapiko at mabawasan ang abala sa araw-araw na biyahe ng libu-libong Pilipino.

Aniya, sumasalamin ang proyekto sa pangako ng administrasyon na maghatid ng matibay at de-kalidad na imprastraktura na tumutugon sa pangangailangan ng publiko.

“Mas matibay na kalsada, mas malalawak na sidewalk gamit ang de-kalidad na materyales at pulidong trabaho. Ang lahat ng ito ay para sa ating mga kababayang commuter at motorista. Prayoridad ng Administrasyon ang repair works sa tinaguriang main transport artery ng Metro Manila,” dagdag ni Castro.

Dagdag pa ng opisyal, sa ilalim ng Bagong Pilipinas, binibigyang-diin ng administrasyon na ang mga proyektong pang-imprastraktura ay hindi lamang dapat matapos, kundi dapat ding maisagawa ayon sa mataas na pamantayan upang maranasan ng mga Pilipino ang mas maayos na serbisyo ng pamahalaan. ( DARIS JOSE)

HINIKAYAT ng Malakanyang sina Sen. Rodante Marcoleta at dating Cong. Michael Defensor na sagutin ang alegasyon sa korte.

Binigyang diin ng Malakanyang na ginagalang ng administrasyon ang judicial processes at hindi kailanman makikialam sa justice system ng bansa.

Nauna rito, inaresto si Marcoleta sa bisa ng arrest order na ipinalabas ng Sandiganbayan.

Sakop din ng arrest order ang dating mambabatas na si dating Congressman Mike Defensor at dalawang negosyante na ayon sa anunsyo ni Department of Interior and Local Government Secretary Jonvic Remulla ay inaresto na rin si Defensor.

Kasama sa mga inaresto ay ang businessman na si Joseph Espiritu, sa isang coffee shop sa Quezon City nito lamang tanghali ng Lunes, Hulyo 6.

Sina Defensor at Espiritu ay co-accused ni Senador Rodante Marcoleta para sa kasong plunder.

Ang naturang kaso ay non-bailable.

Sinabi pa Castro na ginagalang ni Pangulong Ferdinand Marcos Jr., ang naging hakbang ng Sandiganbayan Third Division na magpalabas ng arrest order laban kay Sen. Rodante Marcoleta kaugnay ng non-bailable plunder charges laban sa kaniya dahil sa umano’y hindi pagdedeklara ng P75 milyon na campaign donations.

“Kung iyan po ang isinasaad at sinasabi ng batas at iyan naman po ang kautusan ng korte, iyan naman po ay irerespeto ng Pangulo,” ayon kay Presidential Communications Office (PCO) Undersecretary at Palace Press Officer Claire Castro sa press briefing sa Malakanyang, araw ng Lunes, Hulyo 6.

Sa kabilang dako, sinagot naman ni Castro ang mga pahayag ni Defensor na siya at si Marcoleta na nauna pa silang ipinakulong ng administrasyong Marcos sa halip na ang mga tunay na magnanakaw, winika ni Castro na dapat ay minadali ng mga ito, Marcoleta at Defensor na magsumite ng konkretong ebidensiya sa mga awtoridad sa halip na magngangawa sa media.

“Iyon nga po, sana po ay minadali din nila ang pagbibigay ng mga ebidensiya – kongkretong ebidensiya, hindi lang puro pa-media,” ayon kay Castro.

“Mas magkakaroon po ng resolusyon at ng solusyon kung sila ay nagsumite kaagad ng mga kongkretong ebidensiya para kung sino iyong mga tao na nais nilang papanagutin ay napanagot na po sana, nadala na po sana sa korte ang mga kasong kanilang idudulog,” aniya pa rin.

At nang hingan ng reaksyon si Castro sa iginiit ni Defensor na ang kasong inihain laban sa kanya at kay Marcoleta ay walang legal na basehan.

Ang payo ni Castro kay Defensor ay “Sa korte na lamang po nila ito gawin at depensahan.” (DARIS JOSE)

MAGSILBI sana umanong aral ang pagkaka-aresto kay Senador Rodante Marcoleta sa lahat ng public officials, lalo na yaong mga makapangyarihang lider ng bansa.

Ayon kay Akbayan Partylist Rep. Perci Cendaña, bilang isang public officials ay nanumpa umano sila sa konstitusyon at sa sambayanan na pagsisilbihan ang interes ng mga ito. 

Sinabi pa nito na ang public office ay isang public trust at ang sinumang lumabag dito, maging ito ay nasa mababang posisyon o pinakamakapangyarihang lider ng bansa, ay dapat harapin ang consequences ng kanilang aksyon.

“Tila akma ang pagkaaresto kay Sen. Marcoleta sa unang araw ng paglilitis ni Vice President Sara Duterte. I hope it serves as a reminder to the Vice President that she too will one day be held to account for her own abuse of power and wanton theft of our nation’s coffers,” anang mambabatas.

Inaresto sa Sandiganbayan si Marcoleta matapos ibasura ang kanyang mga mosyon sa kinakaharap nitong kasong plunder.

Ang warrant of arrest ay inisyu ng Sandiganbayan Third division laban kay Marcoleta kasama ang kapwa mga akusado na sina dating partylist Rep. Mike Defensor, Aristotle Viray at Joseph Espiritu.

Nagtungo ang senador sa sandiganbayan para sa pagdiig sa inihain niyang mosyon na nagpapabasura sa reklamo ng Ombudsman at para mapigilan ang pagpapalabas ng arrest warrant laban sa kanya.

(Vina de Guzman)

NASAWI ang isang  call center agent nang bumangga sa harang ng tulay ang minamanehong motorsiklo sa Pandacan , Maynila. Dead on arrival sa Sta. Ana Hospital ang biktima na si James Fernandez , ng  Quezon City. Sa imbestigasyon ng Manila Police District -Traffic Enforcement Unit ,  dakong alas- 6:30 ng umaga nang naganap ang insidente  sa kahabaan ng Zamora Link Bridge, Pandacan. Minamaneho ng biktima ang kanyang Honda Click  nang pagsapit sa itaas na bahagi ng nasabing tulay ay nawalan ng kontrol sa minamanehong motorsiklo dahilan para bumangga sa concrete bridge barrier. Dahil sa malakas na impact , tumilapon pa ang biktima sa dulo bago tuluyang bumagsak sa semento kaya matinding pinsala ang tinamo sa aksidente. Isinugod sa ospital ang biktima  ngunit binawian din ng buhay habang sumasailalim sa medical treatment .  (Gene Adsuara)