ANG patok na primetime teleseryo na “Sigabo” ni Coco Martin ay sumailalim ng compliance seminar sa pamumuno ng Movie and Television Review and Classification Board (MTRCB) matapos makatanggap ng mga reklamo ang ahensya tungkol sa diumanong paulit-ulit at labis na pagpapakita ng karahasan sa programa. 

Ginanap ang compliance seminar para sa CCM Film Productions sa tanggapan ng MTRCB sa Lungsod Quezon noong Lunes, Hulyo 6. Ang CCM Film Productions ay itinatag ni Martin. 

Ang seminar ay tugon sa maraming reklamo tungkol sa labis na paglalarawan ng karahasan sa teleserye na nagsimula ang pag-ere noong Hunyo 22. 

Sa kanyang paunang salita, ipinahayag ni MTRCB Chair Lala Sotto ang kagustuhan ng ahensya na tulungan ang industriya ng telebisyon na mamayagpag at lumikha ng de-kalibreng mga palabas na maaari ding mapanood ng mga nakakabatang manonood, basta’t may gabay ng kanilang mga magulang.

“I just want to make it clear that the reason why we are having this compliance seminar today is because we want to help you, we want to help drive the production. We want you to understand where we are coming from and we want a better understanding also of the production,” sabi ng MTRCB Chair.

“Magiging very socially relevant, I’m sure, ‘yung mga scenes at ‘yung mga magiging storyline. Which we understand and we fully support. But there are always limitations. Lahat ng bagay, may limitasyon,” dagdag ni Sotto.

Ang “Sigabo” na pinagbibidahan din ni Julia Montes ay co-produced ng Dreamscape Entertainment ng ABS-CBN at ng CCM Film Productions.

Ang compliance seminar ay isinagawa ni MTRCB Vice Chair Juan “Johnny” Revilla at Board Members Ricardo “Jojo” Salomon, Eloisa Matias, and Robert “Bobby” Andrews sa ilalim ng “Responsableng Paggabay” na inisyatiba.

Ang compliance seminar para sa “Sigabo” ay isang maagap na tugon sa mahigit 10 na reklamong natanggap ng MTRCB tungkol sa teleserye na ipinalapabas sa free TV channels ALLTV, A2Z, at TV5.Binanggit ng mga ulat ang diumanong labis na pagpapakita ng karahasan, suntukan at pisikal na agresyon, malupit na eksena ng torture, at marahas na pananalita sa programang “Sigabo.” 

Nauna nang binigyan ng MTRCB ng rating na Strong Parental Guidance or Strktong Patnubay at Gabay (SPG) ang “Sigabo.”

Ang mga palabas na may SPG na klasipikasyon ay naglalalaman ng mga mas seryosong paksa o tema na maaaring hindi angkop na panoorin ng mga bata, maliban na lamang kung may mahigpit na pagpatnubay ng isang magulang o nakatatanda. 

Sa paggawad ng ganitong rating, isinasaalang-alang ng MTRCB ang layunin, genre, time slot, at paglalarawan ng tema, karahasan, droga, lenggwahe, sekswal, at katatakutan. 

Ilan sa mga ulat na natanggap ng MTRCB ay nagmungkahi ng pagsusuri ng mga primetime na teleserye na naglalaman ng marahas na content. 

Ikinalugod ng CCM Film Productions ang compliance seminar bilang tugon sa mga isyu sa “Sigabo.” 

Ayon kay Malu Sevilla ng CCM Film Productions, nakita at naintindihan nila ang layunin ng MTRCB at nailahad din naman nila ang direksyon at intensyon ng teleserye.

Dagdag niya, mas responsable na sila sa pagsisiguro na sinusunod nila ang mga pamantayan ng MTRCB sa mga palabas na angkop sa mga mas batang manonood.

“We are all here to help this industry. So kung itinataas mo ang level ng entertainment at medyo nag fa-falter kami, we appreciate the help,” sabi ni Sevilla.  

IN-ANNOUNCE na ang first four official entries sa 52nd Metro Manila Film Festival (MMFF) na ginanap sa GH Mall nitong Martes, Hullo 7, 2026 kung saan ang mga organizers ay naghain ng lineup na nagtatampok ng emosyonal na drama, nakakakilabot na horror, at comedy na pawang panghakot sa madla na manned ng mga pelikula.

Ayon kay MMFF executive committee member Boots Anson-Roa Rodrigo, ang mga inisyal na seleksyon ay pinili mula sa mga isinumiteng entries batay sa apat na pamantayan: 40 percent technical at creative merit, 40 percent commercial value, 10 percent global appeal, at 10 percent infusion of Filipino values.

Nanguna sa first batch ang ‘2nd Miracle in Cell No. 7’ mula sa Viva Films.  Sa direksyon ni Nuel C. Naval at penult ni Mel Mendoza-del Rosario, ang prequel  ng MMFF 2019 entry na ‘Miracle in Cell No. 7, magpapatuloy sa kuwento na kinagiliwan sa mga manonood, kung saan pagbibidahan nina Aga Muhlach at Xia Vigor ang cast.

Pumasok din sa listahan ang ‘Amir’, produced by GMA Pictures, GMA Public Affairs, and Brightburn Entertainment and directed by Zig Dulay.  Pinagbibidahan Nina MMFF Best Actor Dennis Trillo, Glaiza de Castro, 9th Eddys Best Supporting Actor Will Ashley at ang bagong child actor na si Argus Aspiras, ang drama ay inaasahang maghahatid ng isang taos-puso at emosyonal na kuwento.

Nakapasok naman sa horror genre ay ‘Haunted Carnival’ mula sa Regal Entertainment na labis na ikinatuwa ni Ms. Roselle Monteverde.  Sa direksyon ito ni Joey De Guzman, tampok sa pelikula ang isang ensemble cast sa pangunguna nina John Arcilla, Julia Barretto, James Reid, Ronnie Alonte, RK Bagatsing, Fyang Smith, at Maricel Soriano.  

Naka-set sa isang haunted carnival backdrop, ang pelikula ay nangangako ng suspense and supernatural thrills.

Kukumpleto sa first four entries ang ‘The Greatest Showdown’, sa direksyon ni Jun Robles Lana at ginawa ng ABS-CBN Film Productions Inc. (Star Cinema), The Idea First Company, APT Entertainment, at M-Zet Films.  

Nagdudulot na ng excitement ang komedya dahil minarkahan nito ang kauna-unahang big-screen collaboration nina Vice Ganda at Vic Sotto, dalawa sa pinakamalaking comedy box-office stars sa bansa.

Ang natitirang four official entries na pipiliin sa mga submitted finished films ay ia-announce sa October.

Dalawa ang host cities para sa 52nd MMFF ang Mandaluyong at San Juan sa Metro Manila, at ang bongga this year ay nagdagdag pa sila ng pangtatlo dahil kasama rin ang Bacolod City na kung magkakaroon din ng Parade of Stars.

Ayon pa kay Atty. Romando Artes ang ticket price sa 52nd MMFF ay P299 or less, para mas maraming makapanod sa taunang festival.

AYON kay Sofia Pablo, tunay na mahirap pagsabayin ang showbiz career at lovelife, kasabay ng pagkumpirma na hindi na nanliligaw sa kanya si Allen Ansay. 

Sa ulat ni Aubrey Carampel sa GMA News ’24 Oras’ kamakailan ay ito ang ibinahagi ng Sparkle GMA Artist female star…

“Siyempre, pareho po kami na bata pa and marami kaming dreams for our family.

“Maybe it’s not the right time to continue talaga na pursue namin ‘yung isa’t-isa.”

Thankful rin si Sofia kay Allen dahil sa pagiging honest ng binata tungkol sa tunay nilang sitwasyon.

Sa umpisa pala ay nagdesisyon sila na huwag ipaalam sa publiko ang personal nilang kasunduan pero naisip nila na magtataka ang mga netizens kung bakit hindi na sila makikitang magkasama.

“Initially po kasi ang naisip po namin is hindi na namin nga sasabihin sa public kung ano man yung status ng ligawan kasi it’s personal naman sa amin.

“But we understand the fans, siyempre magtataka sila kung bakit hindi na kami nagkakasama,” saad pa ni Sofia.

Nagbigay rin ng paglilinaw si Sofia tungkol sa pagkaka-link sa kanila ni Iñigo Jose. 

“Kasi siyempre may mga fan gatherings kami and even naman inside the house naging close naman po talaga kami,” sambit ng dalaga.

“I don’t think na dapat isipin talaga ng tao na there’s someone involved kung bakit tumigil si Allen.

“Kasi clear po talaga sa amin ni Allen na tumigil kami kasi we want to focus on our respective careers.”

Sinabi pa rin ni Sofia na open sila ni Allen na magkasama pa rin sa mga upcoming projects pero kailangan din daw nilang mag-grow sa labas ng kanilang loveteam.

Noon ay very vocal at obvious si Allen sa pagpapakita ng kanyang pagtingin kay Sofia.

Pero kamakailan, sa isang comment niya sa Tiktok ay sinabi ng Sparkle GMA Artist Center male star na noong March pa siya huminto sa panliligaw kay Sofia.

Sinabi rin niya na maayos ang kanilang samahan.

Inihayag rin niya na pareho sila ni Sofia na nagbago ang mga prayoridad, lalo na pagdating sa career, at hindi nawawala ang respeto sa isa’t isa.

Labis rin ang pasasalamat ni Allen na nakasama niya si Sofia sa malaking parte ng kanyang showbiz career.