PINANGUNAHAN ni Punong Barangay Danilo D. Gloria ang malawakang paglilinis sa komunidad ng Brgy. 17, Zone 2, District 2, Caloocan City. Katuwang ang mga opisyal at staff ng barangay, isinagawa ang regular na de-clogging ng mga kanal upang masiguro ang mabilis na daloy ng tubig at maiwasan ang pagbaha ngayong panahon ng tag-ulan.

Bukod sa lingguhang Clean-up Drive at Clearing Operations, prayoridad din ng administrasyon ni Kap. Gloria ang kalusugan at kapakanan ng mga residente sa pamamagitan ng mga sumusunod na programa:

Lingap Pangkalusugan: Pamamahagi ng mga libreng gamot para sa mga Senior Citizens at kabataan.

Kaligtasan laban sa Rabies: Libreng Anti-Rabies vaccination para sa mga alagang hayop.

Nutrisyon: Regular na Feeding Program para sa mga bata.

Upang mas mapataas ang antas ng seguridad at kahandaan sa sakuna, nagkabit din ng mga karagdagang CCTV camera para sa 24/7 monitoring, naglagay ng mga bagong ilaw sa kalsada, at naghanda ng mga fire extinguisher para sa mga hindi inaasahang sunog.

Lubos naman ang pasasalamat ni Kapitan Gloria kay Mayor Along Malapitan sa patuloy na suporta at mga programang ibinababa ng pamahalaang lungsod para sa ikauunlad ng kanilang barangay. 

(Sonny Asignacion)

PANALO pa rin si tennis star Alexandra Eala sa puso ng masang Pilipino.

Ito ang inihayag ni Speaker Faustino “Bojie” G. Dy III bilang pagbibigay pugay kay Eala bagama’t di na siya umabot sa quarterfinals ng prestiyosong Wimbledon sa Britanya.

“Hindi man nagtapos sa panalo ang makasaysayang kampanya mo sa Wimbledon, Alex, panalo ka pa rin sa puso ng bawat Pilipino,” sabi ni Dy.

Ani Dy, ang kampanya ni Eala na i-promote ang Philippine tennis sa Wimbledon ay naging matagumpay matapos niyang matalo ang No. 2 seeded player at defending champion Iga Swiatek ng Poland.

“Every match, every victory, every loss is another step forward in what is already becoming an extraordinary career,” sinabi ni Dy.

Pinamunuan ni Dy ang mga mambabatas sa pagpasasalamat kay Eala sa pagbibigay inspirasyon sa mga at atleta at mga kabataan.

“Maraming salamat sa karangalang ibinigay mo sa ating bayan. Proud kaming lahat sa’yo. The best is yet to come.”

 (Vina de Guzman)

ANG milyun-milyong boto na nakuha ni Vice President Sara Duterte ay hindi nangangahulugan na maaari na siyang gumawa ng katiwalian, ayon kay House prosecution panel adviser at spokesperson Robert Ace Barbers.

Ito rin ang pahayag ni Barbers bilang kasagutan sa argumento ni Atty. Sheila Sison, lead defense counsel ni Duterte, na ang pakay ng impeachment ay para mapatalsik ang Bise Presidente at sayangin ang 32.2 million na bumoto sa kanya nung 2022 national elections.

“Does that mean because you’re the most powerful person in the government and because you were able to get X amount of votes, does that give you a license to commit all these violations? Sa aking palagay, medyo hindi iyon ang intensyon ng gumawa ng ating Saligang Batas,” sabi ni Barbers.

Pinaliwanag ni Barbers na ang impeachment process ay ginawa para panagutin ang sinumang tiwaling opisyal ng gobyerno. 

Nakasaad sa Article XI, Section 2 ng 1987 Constitution, na tanging ang Pangulo, Pangalawang Pangulo, mga miyembro ng Supreme Court, mga miyembro ng Constitutional Commissions, at Ombudsman ay maaaring matanggal sa tungkulin sa pamamagitan ng impeachment. 

“Kaya nga nilagay ito sa ating Constitution ay para proteksyunan ang interes ng ating mamamayang Pilipino laban sa mga posibleng pag-abuso o paglabag ng ating matataas na opisyal sa gobyerno,” ani Barbers.

“The Constitution does not exempt anyone from accountability simply because they received millions of votes,” dagdag pa ng dating kongresista. (Vina de Guzman)

SWAK sa kulungan ang pitong indibidwal kabilang ang tatlong hinihinalang sangkot sa droga matapos maaresto sa ‘Oplan Galugad’ operation sa magkahiwalay na lugar sa Valenzuela City.

Dakong alas-2:10 ng Martes ng madaling araw, nagsasagawa ng anti-criminality operation “Oplan Galugad” ang mga tauhan ni Valenzuela Police Chief P/Col. Joseph Talento sa A. Industrial St., Brgy., Karuhatan, nang maaktuhan nila ang tatlong indibidwal na nagsusugal umano ng ‘lucky 9’.

Nilapitan nila ang mga ito sabay nagpakilala mga pulis na katalaga sa Police Sub-Station 9 bago inaresto at nasamsam sa mga suspek ang bet money, gambling parapernalya at isang plastic sachet na naglalaman ng umano’y shabu na nakuha umano kay alyas “Ros”, 41, waiter.

Nauna rito, alas-2:00 ng Lunes ng hapon nang maaresto naman ng mga tauhan ng Police Sub-Station 6 ang dalawang kelot habang naglalaro ng sugal na ‘cara y cruz’ sa Lingahan Road. Brgy., Malanday at nakuha sa kanila ang bet money, pangara at isang plastic sachet na naglalaman ng umano’y shabu na nakumpiska umano kay alyas “Danilo”, 37.

Noong nakaraang Linggo, alas-6:40 ng gabi nang matimbog din ng mga tauhan ng SS6 ang dalawang lalaki na nagsusugal umano ng ‘cara y cruz sa D. Santiago St., Brgy., Malanday. Nasamsam sa kanila ang bet money, gamling parapernalya at isang plastic sachet na naglalaman ng hinihinalang shabu na nakuha umano kay ‘Rey’.

Nahaharap ang mga suspek sa kasong paglabag sa PD 1602 (Anti-Gambling Law) at R.A 9165 (Comprehensive Dangerous Drug Act of 2002 habang hinihikayat naman ni Col. Talento ang publiko na makiisa sa pagpapanatili ng kapayapaan at kaayusan sa pamamagitan ng maagap na pagbibigay ng impormasyon sa pulisya. (Richard Mesa)

NAGPALABAS si Manila Mayor Francsico “Isko Moreno” Domagoso ng P688.9 milyong benepisyo para sa 359,295 pulis, guro, estudyante, senior citizens, PWD, at solo parent.

Ito ay may kabuuang P688,901,100 na benepisyo para sa 359,295 benepisyaryo mula sa iba’t ibang sektor sa kanyang “Talk to the People” Facebook livestream nitong Martes, Hulyo 7.

Sinabi ni Atty. Paul Vega, ng City Treasusrer’s Office na ang pondo ay sasaklaw sa tatlong programa: P158,757,600 para sa mga benepisyaryo ng mga ordinansang pinondohan ng lungsod na ipamamahagi mula Hulyo 8 hanggang 11; P452,353,500 para sa monetary allowances ng 293,655 benepisyaryo na ipamamahagi mula Hulyo 22 hanggang 24; at P77,790,000 para sa Social Pension ng Department of Social Welfare and Development (DSWD) para sa 25,930 senior citizens, na ilalabas din mula Hulyo 22 hanggang 24.

“Nilalaan po namin ay humigit-kumulang 688 million, 900 thousand na ire-release ngayong 1 ng July,” ani Domagoso. Nilinaw niyang P611,111,100 sa kabuuang halaga ay mula sa pondo ng Pamahalaang Lungsod ng Maynila, habang ang P77,790,000 ay mula sa pambansang pamahalaan sa pamamagitan ng DSWD.

Sa ilalim ng programa ng mga ordinansang pinondohan ng lungsod, 4,447 na tauhan ng Manila Police District ang tatanggap ng P2,500 kada buwan para sa Abril hanggang Hunyo, na nagkakahalaga ng P33,305,000. Tatanggap din ng kaparehong insentibo ang 358 na tauhan ng Bureau of Fire Protection at 431 na miyembro ng Bureau of Jail Management and Penology para sa parehong panahon.

Makakatanggap naman ang 12,466 na guro ng P2,000 buwanang insentibo para sa Abril hanggang Hunyo, na may kabuuang halagang P69,237,841.54. Samantala, ang 5,524 na Grade 12 students ng DepEd Manila ay makatatanggap ng P500 para sa buwan ng Hunyo, na umaabot sa P2,762,000.

Makikinabang din ang mga mag-aaral ng dalawang unibersidad ng lungsod. Ang 9,155 na estudyante ng Universidad de Manila ay tatanggap ng P1,000 bawat isa para sa Abril at Mayo na may kabuuang P18,310,000, habang ang 7,869 na estudyante ng Pamantasan ng Lungsod ng Maynila ay makatatanggap din ng parehong halaga na nagkakahalaga ng P15,738,000. Ang EARIST naman ay tatanggap ng dalawang quarterly subsidy na tig-P6,803,135.

Sa ilalim ng monetary allowance program, 11,515 menor de edad na persons with disabilities (PWDs), 51,766 adult PWDs, at 17,281 solo parents ang bawat isa ay tatanggap ng P500 kada buwan para sa Abril hanggang Hunyo. Ang pamamahagi ng mga ito ay nakatakda rin sa Hulyo 22 hanggang 24.

Samantala, ang 212,553 senior citizens ng Maynila ay makatatanggap ng P500 kada buwan para sa Abril hanggang Hunyo na may kabuuang P331,445,000. Bukod dito, ang 25,930 senior citizens na rehistrado sa DSWD ay makatatanggap pa ng karagdagang P1,000 kada buwan para sa parehong panahon sa ilalim ng Social Pension Program ng pambansang pamahalaan. Dahil dito, dalawang magkaibang benepisyo ang matatanggap ng mga kwalipikadong senior citizens. (Gene Adsuara)

SUMIKLAB ang sunog sa isang lumang bodegang imbakan ng mga scrap na dahilan upang matupok ito sa Valenzuela City, Martes ng umaga .

Hindi pa batid ang dahilan ng pagsiklab ng sunog sa lumang bodega sa Molina St. Brgy. Veinte Reales pasado alas-7:00 ng umaga na kaagad itinaas sa ikalawang alarma bandang alas-7:51 matapos ang malakas na lagablab ng apoy at makapal na itim na usok.

Kaagad namang nakontrol ng mga nagrespondeng tauhan ng Valenzuela City Bureau of Fire Protection (BFP), sa ilalim ng pangangasiwa ni City Fire Marshal F/Supt. Ma. Theresa Alqueza ang sunog dakong alas 8:30 ng umaga, kaya’t hindi na kumalat ang apoy sa mga katabi pang istraktura.

Alas-9:22 ng umaga nang tuluyang maapula ng mga bumbero ang apoy na tumupok sa hindi pa batid na halaga ng iba’t ibang uri ng scrap na plastic, metal, at hindi pa batid na uri ng kemikal na nakalagay na mistulang supot ng semento.

Wala namang napaulat na nasawi o nasugatan sa naturang sunog habang patuloy pa rin inaalam ng mga awtoridad ang dahilan ng pagsiklab ng apoy. 

(Richard Mesa)