ISINUSULONG ng isang mambabatas ang panukalang magpataas sa pondo para sa edukasyon ng mga lokal na pamahalaan sa pamamagitan ng pagtaas ng Special Education Fund (SEF) levy mula 1% na maging 3%.

Sa ilalim ng House Bill No. 9227 o “Strengthened Special Education Fund Act of 2026,” na inihain ni Nueva Vizcaya Rep. Timothy Joseph “Tim” Cayton, layunin ng panukala na mabigyan ng mas sapat na pondo ang mga pampublikong paaralan para sa konstruksyon at rehabilitasyon ng classrooms, pagbili ng instructional materials, learning recovery programs, sanitation facilities, at iba pang pangangailangan ng mga estudyante at guro.

Ayon kay Cayton, matagal nang hindi naa-adjust ang kasalukuyang SEF rate kahit patuloy na tumataas ang gastos sa edukasyon at dumarami ang pangangailangan ng mga paaralan.

Binigyang-diin din ng mambabatas na malaking tulong ang dagdag na pondo upang masuportahan ang mga local school boards at mga LGU sa pagtugon sa kakulangan sa pasilidad at resources sa mga pampublikong paaralan.

Sa ilalim ng panukala, mananatiling eksklusibong gagamitin ang dagdag na koleksyon para lamang sa Special Education Fund upang matiyak na direktang mapupunta ito sa pagpapabuti ng edukasyon.

Ayon kay Cayton, ang pagtaya sa edukasyon ay pagtaya sa kinabukasan ng bansa at nararapat lamang na mabigyan ito ng sapat at napapanahong suporta.

 (Vina De Guzman)

NAG-ULAT ang Philippine National Police (PNP) ng malaking pagbaba sa walong pangunahing krimen sa bansa, na nakapagtala ng 15.99% na pagbaba sa buong bansa mula Abril 6 hanggang Hunyo 3, 2026, kumpara sa monitoring period noong Pebrero 6 hanggang Abril 5, 2026.

Ipinakita ng datos ng PNP na ang mga insidente na kinasasangkutan ng walong pangunahing krimen ay bumaba mula 5,811 na kaso patungo sa 4,882 na kaso, na katumbas ng 929 na mas kaunting insidente sa buong bansa. Ang pagbaba ay naitala sa lahat ng kategorya ng krimen na minomonitor, na may kapansin-pansing pagbaba sa rape, physical injury, carnapping of motor vehicle, carnapping of motorcycles, robbery, theft, homicide at murder.

Ang tagumpay na ito ay kasabay ng pagpapatupad ng Safer Cities Initiative sa ilalim ng Enhanced Managing Police Operations (E-MPO) program, na inilunsad noong Abril 6, 2026. Pinaigting ng inisyatibo ang police visibility, mga nakatutok na pagpapatrolya, mga hotspot intervention, at mga pagsisikap sa pag-iwas sa krimen na nakabatay sa komunidad sa mga lugar na natukoy na vulnerable to criminal activity.

Sinabi ni Police General Jose Melencio C. Nartatez Jr., Chief PNP, na ang mga pinakabagong datos ay nagpapakita ng epekto ng proaktibong pagpupulis at matibay na kolaborasyon sa pagitan ng pulisya, mga lokal na unit ng pamahalaan, at ng publiko.

“Ang pagbaba ng crime incidents ay patunay na kapag tuloy-tuloy ang police presence, mabilis ang pagtugon, at aktibo ang partisipasyon ng komunidad, may positibong resulta tayong nakikita. Ngunit hindi tayo titigil dito. Our goal is not only to reduce crime statistics but to ensure that every Filipino feels safer in their homes and communities,” sabi PGen Nartatez.

Binigyang-diin niya na ang mga natamong ito ay dapat magsilbing motibasyon para sa mga unit ng pulisya sa buong bansa upang ipagpatuloy ang kanilang mga pagsisikap at patuloy na pagbutihin ang paghahatid ng serbisyo.

“Magandang indikasyon ito na gumagana ang ating mga programa, pero kailangan nating panatilihin ang momentum. We will continue to strengthen crime prevention measures, improve police visibility, and work closely with our stakeholders while ensuring that all police actions remain within the bounds of the law and with full respect for human rights,” dagdag pa ni PGen Nartatez.

Sa walong pangunahing krimen, ang rape ang nagtala ng pinakamataas na pagbaba na 30.07%, kasunod ang physical injury na 25.18% at carnapping of motor vehicle na 25.93%, na malaki ang naitulong sa kabuuang pagbaba.

Binanggit din ng PNP na ang lahat ng walong pangunahing kategorya ng krimen ay nagtala ng pagbaba sa panahon ng implementasyon, na sumasalamin sa patuloy na pagbuti sa pag-iwas sa krimen at mga pagsisikap sa kaligtasan ng publiko sa buong bansa. (PAUL JOHN REYES)

KINONDENA ng Makabayan bloc ang paggamit ng sinasabing “Blue Ribbon Committee” hearing bilang plataporma umano ng political demolition jobs, alang batayang akusasyon at gawa-gawang naratibo laban sa mga progresibong lider at dating representante ng Makabayan.

Ayon kina Rep. Sarah Elago, Rep. Antonio Tinio at Rep. Renee Co, sa gitna ng nagpapatuloy na sigalot sa liderato ng Senado, nakababahala anila na may mga pagdinig na itinutulak sa ilalim ng kaduda-dudang awtoridad at pagkatapos ay ginagamit upang magpakalat ng mga alegasyong walang sapat na ebidensya.

“Kahiya-hiya sa mamamayan ang isang hearing na batbat ng tsismis, haka-haka, at pampulitikang agenda. Ang ipinresentang “ebidensya” ay hindi ebidensya kundi puro kuwento, insinuation, at tahasang kasinungalingan. Lalong nawawalan ng kredibilidad ang mga tinaguriang testigo dahil kitang-kita ang pagbabago ng kanilang script depende sa umiiral na pampulitikang alyansa. Pabagu-bago ang mga kasinungalingan depende sa kung sino ang kakampi at sino ang kalaban sa kasalukuyang agawan sa kapangyarihan. May mga pangalang nawawala at may mga bagong pangalang lumilitaw depende sa pangangailangan. Ito ang pinakamalinaw na patunay na maruming pamumulitika ang nagaganap. Weather-weather ang kanilang mga akusasyon. Hindi ito seryosong imbestigasyon kundi isang demolition job na nakabalot sa anyo ng Senate hearing,” saad sa statement ng mga mambabatas.

Muli ring pinabulaanan ng mga kongresista ang anumang pagtatangkang iugnay ang Makabayan sa flood control scandal.

Anila, walang flood control projects, infrastructure allocations, o project insertions ang Makabayan, kaya wala ring anumang kickback na maaaring matanggap.

“The Senate should get its house in order. Ang mga pasilidad at pondo ng bayan ay hindi dapat ginagamit para sa mga bogus na hearing, bogus na testigo, at bogus na ebidensya,” dagdag pa.

Inihayag pa na hindi papayag ang Makabayan bloc na matakot o maalarma ng mga gawa-gaang alegasyon, political harassment, o smear campaigns.

Patuloy anila nilang igigiit ang katotohanan at pananagutan habang naninindigan kasama ng mamamayan laban sa korapsyon at pang-aabuso sa kapangyarihan. (Vina de Guzman)

INAPRUBAHAN ng House of Representatives sa final reading ang panukalang Anti-Political Dynasty Act na naglalayong huwag pahintulutan ang magkakamag-anak na tumakbo sa halalan.

Sa botong 267-20 at pitong abstentions, pinasa ng mga mambabatas ang House Bill No. 8389, o Anti-Political Dynasty Act, na pagbawalan ang mga magkakamag-anak na tumakbo sa halalan upang bigyan ng pagkakataon at oportunidad ang nakararaming Pilipino na magsilbi sa gobyerno.

Ang panukala ay iniakda nila Speaker Faustino “Bojie” Dy III at House Majority Leader Ferdinand Alexander “Sandro” A. Marcos ng Ilocos Norte, kasama ang 173 iba pang mambabatas bilang co-authors. Ang nasabing panukala ay isa sa mga priority measures ng Legislative-Executive Development Advisory Council (LEDAC) at inendorso ni President Ferdinand R. Marcos Jr.

Ayon kay Dy, ang HB 8389 ay tugon sa matagal na pangangailangan sa Saligang Batas na gumawa ng Anti-political dynasty law para sa mas masigasig na demokrasya

“Sa loob ng halos apat na dekada, naghihintay ang ating Saligang Batas na maisakatuparan ang pagbabawal sa political dynasties. Ngayon, kumilos ang Kamara. Isang mahalagang yugto ito sa ating demokrasya sapagkat ang isang pangakong konstitusyonal ay nagsisimula nang maging isang konkretong reporma,” ani Dy.

“This measure does not intend to target families or restrict legitimate political participation. It seeks to ensure that public office remains open to all Filipinos and that leadership is determined by the people’s trust, not by the concentration of power in a few clans.”

Nakasaad sa Article II, Section 26 ng 1987 Constitution na nag-aatas sa Estado na magbalangkas ng batas na ipagbawal ang political dynasties.

Sa ilalim HB 8389, ang depenisyon ng political dynasty ay kontrol, konsentrasyon at pagiging dominante ng isang pamilya at kanilang mga kamag anak sa loob ng second degree of consanguinity o affinity sa larangan ng politika.

Dito pinagbabawal ang mga magkakamag anak at kapamilya na humawak ng elective position sa isang lugar tulad ng national, provincial, city, municipal o maging sa barangay. Kabilang sa ipinagbabawal ang tumakbo ang magkakamag anak sa parehong congressional district para sa House of Representatives. 

Lahat ng kandidato ay kailangan mag submit ng sworn declarations sa Commission on Elections (Comelec) na ang kanilang kandidatura ay hindi saklaw ng anti-political dynasty relationship.

“This vote is bigger than any political party, family or administration. It is about giving future generations a more open and competitive democracy where public service is accessible to all who are willing and qualified to serve,” sinabi ni Dy. 

“The House has done its part. We hope this reform continues to move forward so that a constitutional promise made nearly 40 years ago can finally become a reality for the Filipino people.” (Vina de Guzman)

KULUNGAN ang kinasadlakan ng dalawang hinihinalang drug personalities nang mahuli sa akto ng pulisya na sumisinghot umano ng shabu sa magkahiwalay na lugar sa Valenzuela City.

Sa kanyang ulat kay Valenzuela Police Chief P/Col. Joseph Talento, sinabi ni Police Investigator P/MSgt. Ana Liza Antonio na nakatanggap ng SMS complaint mula sa isang concerned citizen ang mga operatiba ng Station Drug Enforcement Unit (SDEU) hinggil sa umano’y ilegal drug activities ni alyas “Renz”, 33, pedicab driver, ng J. Santiago St., Libo 1, Brgy., Malanday.

Kaagad namang inatasan ni SDEU chief P/Lt. Sherwin Dascil ang kanyang mga tauhan na puntahan ang nasabing lugar para alamin kung may katutuhanan ang naturang report.

Pagdating sa lugar, naaktuhan nina PSSg Marlon Saquing at PSSg Ed Shalom Abiertas ang suspek na abala umano sa pagsinghot ng shabu sa loob ng kanyang bahay na nagresulta sa pagkakaaresto sa kanya pasado alas-3:40 ng hapon.

Nakumpiska sa kanya ang isang plastic sachet na naglalaman ng hinihinalang shabu na nagkakahalaga ng P3,876, isang nakabukas na plastic sachet na may bahid ng umano’y shabu at drug paraphernalias

Dakong alas-1:40 ng Huwebes ng madaling araw nang maaktuhan naman ng mga tauhan ng Police Sub-Station 2 na nagsasagawa ng anti-criminality operation ‘Oplan Galugad’ si alyas “Marlon”, 36, na gumagamit din umano ng droga sa isang parking area ng 6111B Lower Tibagan,, Barangay Gen T De Leon.

Nakuha sa kanya ang isang nakabukas na plastic sachet na may bahid ng umano’y ng shabu at drug paraphernalias.

Isinailalim na ang mga suspek sa inquest proceedings sa Valenzuela City Prosecutors Office kaugnay sa kasong paglabag sa R.A 9165 o ang Comprehensive Dangerous Drug Act of 2002. (Richard Mesa)