NAGBABALA si Caloocan 2nd District Representative Edgar “Egay” Erice na ang bansa ay nahaharap sa isang malubhang krisis sa pananalapi na dulot ng paghina ng paggasta ng gobyerno at pagtaas ng presyo ng langis sa mundo, at inihayag na maghain siya ng panukalang batas na naglalayong makabuo ng hanggang ₱1 trilyon sa mga bagong kita ng gobyerno.

Sa kanyang privilege speech sa House of Representatives, sinabi ni Erice na ang kasalukuyang presyur sa pananalapi ay nagmumula sa isang trilyong pisong anomalya sa imprastraktura na nakaapekto na sa mga paggasta ng gobyerno at aktibidad sa ekonomiya, na nagreresulta sa nawalan ng mga trabaho, naghihirap na negosyo, pagbaba ng mga pamumuhunan, at nabawasan ang mga koleksyon ng buwis.

Aniya, ang sitwasyon ay pinalala ng pagtaas ng presyo ng langis dulot ng tumitinding tensyon at tunggalian na kinasasangkutan ng Estados Unidos, Israel, at Iran, na maaaring magdulot ng mas mataas na gastos sa transportasyon at pagtaas ng mga presyo ng mga pangunahing bilihin.

Napansin ni Erice na hiniling ni Pres. Ferdinand Marcos Jr. sa Kongreso na bigyan ng espesyal na awtoridad na suspindihin ang fuel taxes upang pigilan ang mga mamimili sa epekto ng pagtaas ng presyo ng langis.

Gayunpaman, nagbabala siya na ang pagsususpinde sa 12% value-added tax (VAT) sa gasolina sa loob ng anim na buwan ay maaaring magresulta sa humigit-kumulang ₱300 bilyon na nawalang kita, habang ang pagsususpinde sa mga excise tax sa petrolyo ay maaaring humantong sa isa pang ₱125 bilyon na foregone income — o kabuuang potensyal na pagkawala ng ₱425 bilyon.

Upang matugunan ang posibleng agwat sa pananalapi, inihayag ni Erice na maghahain siya ng panukalang batas na nag-aamyenda sa Administrative Naturalization Law upang lumikha ng legal na landas sa Philippine citizenship for qualified foreign nationals na matagal nang naninirahan sa bansa ngunit nananatiling iregular ang katayuan sa imigrasyon dahil sa mga nakaraang paglabag sa dokumentaryo.

Sa ilalim ng panukala, ang mga aplikante ay dapat na nanirahan sa Pilipinas ng hindi bababa sa pitong taon, nagpapakita ng magandang moralidad, at kumuha ng mga clearance mula sa National Bureau of Investigation at Philippine National Police. Ang mga kwalipikadong aplikante ay kailangan ding magbayad ng ₱5 milyong administrative application fee at ₱1 milyong naturalization fee.

Ayon kay Erice, ang consultations sa mga pinuno ng Filipino-Chinese organizations ay nagpapahiwatig na aabot sa 50,000 long-term residents ang posibleng maka-avail ng programa.

“If implemented, this measure could generate hundreds of billions, possibly up to ₱1 trillion in revenues that can help stabilize our economy and allow the government to suspend fuel taxes to protect our people from rising costs,” ani Erice.

Binigyang-diin ng mambabatas na ang panukala ay hindi lamang isang revenue-generating measure kundi isang paraan din upang matugunan ang matagal nang iregularidad, maiwasan ang korapsyon, at pormal na kilalanin ang mga indibidwal na nag-ambag sa paglago ng ekonomiya at trabaho sa bansa.

Nanawagan din si Erice sa kanyang mga kasamahan sa Kongreso na seryosong isaalang-alang ang panukala, at sinabing makakapagbigay ito ng kinakailangang espasyo sa pananalapi habang tinutulungan ang mga Pilipinong mamimili at mga negosyo mula sa epekto sa ekonomiya ng pagtaas ng presyo ng pandaigdigang gasolina.
(Richard Mesa)

NAKIISA ang National Housing Authority (NHA) sa pagdiriwang ng 2026 National Women’s Month ngayong buwan ng Marso, na nagpapakita ng mas pinagtibay na pangako ng ahensya sa gender equality at women’s empowerment.

Sa ilalim ng pamumuno ni General Manager at Gender and Development (GAD) Champion Joeben A. Tai, buo ang suporta ng ahensya sa kampanya ngayong taon na pinangunahan ng Philippine Commission on Women (PCW), alinsunod sa temang “WE for Gender Equality and an Inclusive Society” at ang sub-theme nitong “Lead like the Babaylans, Filipinas!”

Binibigyang-diin ng pagdiriwang sa taong ito na ang pagsusulong ng pagkakapantay-pantay ng bawat kasarian ay isang kolektibong responsibilidad. Nananawagan ito sa konsepto ng ‘Women and Everyone (WE)’ na naglalayong pagpapaunlad ng ligtas, inklusibo, at isang matatag na komunidad. Buhat sa inspirasyon mula sa lakas, karunungan, at pamumuno ng mga Babaylan–na mga simbolikong pigura ng impluwensya ng kababaihan sa kasaysayan ng Pilipinas–kinikilala ng NHA ang hindi matatawarang papel ng kababaihan sa paghubog ng mga tahanan, pagpapalakas ng mga institusyon, at pagbuo ng bansa.

Sa kanyang mensahe, binigyang-linaw ni GM Tai ang malalim na pagpapahalaga ng NHA para sa mga babaeng empleyado ng ahensya, habang kinikilala ang kanilang mahalagang kontribusyon bilang mga propesyonal, pinuno ng kani-kanilang komunidad, may-ari ng kanilang mga kabahayan, at mga katuwang sa pagbuo ng bansa.

“Ang kanilang dedikasyon ay nagpapalakas sa aming trabaho at pangako na mas mapaglingkuran ang bawat pamilyang Pilipino nang may dignidad, pagkakapantay-pantay, at pagdamay,” ani GM Tai.

Pinagtibay pa nito ang tunguhin ng NHA na i-mainstream ang gender equality sa mga patakaran, polisiya, at programa ng ahensya.

“Bilang General Manager, pinapangako po ng NHA na mas itataguyod namin ang mga inklusibong oportunidad, pagtiyak ng isang ligtas at patas na ahensya, at pagsuporta sa mga inisyatibang nagbubukas ng pagkakataon para sa ating mga kababaihan tungo sa kanilang paglago,” dagdag ni GM Tai.

Upang mas suportahan ang makabuluhang pagdiriwang ng buwang ito, naghanda ang NHA-GAD Advocacy, Networking, and Public Communications Committee (ANPCC) na pinamumunuan ni Community Support Services Department Officer-in-Charge Maricris G. Maninit, ng ilang aktibidad.

Sa pamamagitan ng mga hakbang na ito, muling pinagtitibay ng NHA ang mandato nito na bumuo ng mga komunidad kung saan ang bawat kababaihan ay maunlad, namumuno, at nagbibigay-inspirasyon sa pamamagitan ng pagsulong ng isang mas inklusibo at pantay na lipunan para sa lahat. (PAUL JOHN REYES)

TINIYAK ng Malakanyang na sapat ang suplay ng gasolina at pangunahing bilihin sa bansa sa kabila ng pagtaas ng presyo ng langis bunsod ng tensyon sa Gitnang Silangan.“Sa ngayon, tulad ng aking sinabi kahapon sa DTI, wala naman daw movement ng presyo sa mga basic commodities natin sa NCR at sa ibang mga region,” ayon kay Presidential Communications Office (PCO) Undersecretary and Palace Press Officer Claire Castro sa isang media briefing sa New York.Dagdag pa ng Palasyo, anumang hindi pangkaraniwang pagtaas ng presyo ng mga pangunahing bilihin at produktong petrolyo ay dapat agad iulat sa DTI at Department of Energy (DOE).Nagsimula na rin ang ilang kumpanya ng langis na magpatupad ng tatlong araw na sunud-sunod na dagdag-presyo sa produktong petrolyo.Gayunpaman, sinabi ni Castro na nakahanda ang pamahalaan upang mabawasan ang epekto ng tensyon sa Gitnang Silangan.“Hindi man ito nagaganap at hindi ito ang kagustuhan ng ating gobyerno pero dahil sa tension na nagpapatuloy sa Middle East, kailangan talagang paghandaan ng mga kababayan natin. Pero hindi kailangan magkaroon ng panic buying dahil kumpleto naman at enough pa ang supply, lalong-lalo na ang ating fuel at ng ating mga basic commodities,” ayon kay Castro. (Daris Jose)

BALIK-TAMBALAN sina Angelica Panganiban at Zanjoe Marudo sa upcoming Filipino crime drama na “The Silent Noise” na produced ng ABS-CBN Studios.Mula ito sa direksyon ni Onat Diaz (“The Alibi”), which tells the story of a deaf son who risks a Makakasama sina Angelica at Zanjoe sina Mylene Dizon, Zaijian Jaranilla, Mute Orquia at ang newest child actor na si KD Omalin.Nasa mini-series din sina Joem Bascon, Karina Bautista, Tommy Alejandrino, Ramon Christopher Gutierrez, Joel Saracho, Junjun Quintana, Kakki Teodoro, at Ralph Malibunas.Nitong March 10, ginanap ang Blue Carpet Celebrity Premiere at Grand Media Conference sa Gateway Mall 2, Cinema 11, na kung saan pinasilip ang first episode ng serye.Anyway, fresh na fresh pa sa lahat ang balik-tambalan nina Angelica at Zanjoe sa ‘UnMarry’ na naging bahagi ng 51st MMFF at ito nga nagbabalik naman sila para sa isang mini-series, na susubok na naman sa husay nila sa pag-arte.Para sa aktor, “iba naman ito sa dami ng pinagdaanan namin ni Angelica, from light to romance, comedy to gag show.”Singit naman ng aktres, “I think ito ang pinaka-seryoso natin or darkest siguro na nagawa namin.”Dagdag pa ni Z, “magaling ang project na ito para sa akin, kasi mas nate-test pa namin ang isa’t-isa.”Kuwento naman ni Angge tungkol sa muling pagsasama nila ni Zanjoe.“Feeling ko ganun na ka-kumportable si Z, dahil nakakapag-open up na siya lalo na pag may questions siya sa dapat niyang gawin kapag naguguluhan siya. Binibigyan ko naman siya ng payo, na dapat ganito lang.“Parang kasi noon, may ego pa siya, na baka pag nagtanong ako, baka isiping hindi ko kaya ang eksena. Eh, ngayon we are comfortable with each other, kahit ako ganun din ako kanya, pag may agam-agam ako na, tama ba ‘yun, okay lang ba ang ginawa ko.“Kasi siguro, parang package deal na kaming dalawa, lagi na lang kaming nakikita na magkasama sa isang project.”Aminado rin ang dalawa na malaking challenge ang roles nila sa “The Silent Noise” na magpi-premiere sa Prime Video ngayong March 20 sa Pilipinas at mahigit 240 bansa at teritoryo sa buong mundo.(ROHN ROMULO)

NAGBABALA ang mga nangungunang medical societies sa Pilipinas tungkol sa lumalalang epekto ng obesity sa kalusugan ng puso at bato at sinabing ang pagkaantala sa paggamot ay nagpapalala sa pagdami ng magkakaugnay na cardiovascular, kidney, at metabolic (CKM) diseases sa bansa.Ayon sa Philippine College of Endocrinology, Diabetes and Metabolism (PCEDM), mahigit 39.8% ng mga adult Filipino ay obese at 17.3% ay overweight, na nagpapataas ng panganib sa diabetes, hypertension, at chronic kidney disease—ilan sa mga pangunahing sanhi ng pagkamatay sa bansa.Upang tugunan ito, lumagda sa isang memorandum of agreement ang PCEDM kasama ang Philippine Heart Association (PHA), Philippine Society of Nephrology (PSN), at Philippine Association for the Study of Overweight and Obesity (PASOO) upang palakasin ang koordinadong aksyon laban sa obesity at mga komplikasyon nito.Ayon sa mga eksperto, hindi lamang lifestyle issue ang obesity kundi isang chronic disease na maaaring magdulot ng sakit sa puso, kidney disease, fatty liver, sleep apnea, at ilang uri ng cancer. Dahil dito, mahalaga ang maagang screening, malusog na pamumuhay, at mas mahusay na access sa serbisyong pangkalusugan.Nanawagan din ang mga eksperto sa pamahalaan na palakasin ang mga programa laban sa obesity at gawing mas madali para sa mga Pilipino ang pagpili ng mas malusog na pamumuhay.Ang kampanyang “8 Billion Reasons to Act on Obesity: Stronger Hearts, Healthier Kidneys, and Better Diabetes Control” ay isinagawa bilang paggunita sa Philippine Health Month, World Obesity Day, at World Kidney Day, kung saan nagkaroon ng libreng blood sugar tests, obesity screening, at kidney tests sa Quirino Grandstand upang palakasin ang kamalayan ng publiko tungkol sa obesity at mga kaugnay nitong sakit.Kabilang sa mga panelist sina Dr. Elaine Cunanan, Vice President ng Philippine College of Endocrinology , Diabetes and Metabolism, Dr Lourdes Ella Santos, Director 1 ng PHI, Dr. Ricardo A. Francisco, President ng PSN Dr. Nemecio A. Nicodemus, Presidente ng Philippine College of Physicians at Dr. Luzviminda S. Katigbak, President ng PASOO.(Gene Adsuara)