PARA sa kapakanan ng manlalakbay, maagang naghanda ang Pamahalaang Lungsod ng Malabon at nag-deploy ng siyam na sasakyan na gagamitin sa “Libreng Sakay” upang matulungan ang mga commuters na apektado sa ikinasang nationwide transport strike ng isang transport group. “Prayoridad natin ang kapakanan ng ating mga mamamayan kaya’t narito tayo upang masigurong makararating sila nang ligtas sa kanilang mga paroroonan,” ani Mayor Jeannie Sandoval. (Richard Mesa)
- April 25, 2026
Ang Diyaryong Pinagkakatiwalaan
Archive for March, 2026
PNP PINAG-IINGAT ANG PUBLIKO SA KUMAKALAT ONLINE NA FAKE AI VIDEOS
PINAPAALALAHANAN ng Pambansang Pulisya ng Pilipinas (PNP) ang publiko na maging mapagmatyag laban sa mga video na likha ng artificial intelligence (AI) na kumakalat online. Ang mga videong ito hindi lamang ang mga nagpapanggap na opisyal ng pulisya kundi pati na rin ang iba pang nakaliligaw na nilalaman, ay ginawa upang magmukhang totoo at madaling magkalat ng maling impormasyon.
Nagpapaalala sa lahat si Police General Jose Melencio C. Nartatez Jr., Chief PNP, “Ang ating layunin ay mapanatili ang tiwala ng publiko at siguraduhing tama at maaasahan ang bawat impormasyon. Huwag basta-basta maniwala o mag-share ng video o post na hindi galing sa opisyal ng PNP channels.”
“Hinihimok namin ang publiko na beripikahin ang impormasyon mula sa mga opisyal na mapagkukunan at mag-isip nang mabuti bago ibahagi. Ang inyong kooperasyon ay makakatulong upang protektahan ang integridad ng pulisya at ang kaligtasan ng ating mga komunidad,” dagdag ni PGEN Nartatez.
Ang inisyatibong ito ay bahagi ng PNP Focused Agenda sa ilalim ng Enhanced Managing Police Operations, na nagpapalakas ng mga pananggalang laban sa maling impormasyon. Mahigpit na sinusubaybayan ng PNP sa pamamagitan ng Anti-Cybercrime Group ang mga aktibidad na ito na binuo ng AI at magsasampa ng mga kaukulang kaso laban sa mga lumalabag. (PAUL JOHN REYES)
100 housing units, ipina-raffle ng Manila LGU
NASA 100 housing units ng In-City Vertical Housing Projects na matatagpuan sa San Lazaro Residences, Pedro Gil Residences at San Sebastian Residencesn ang ipina-raffle ng Manila City Government para sa mga residente ng lungsod.
Mismong sina Manila Mayor Francisco “Isko Moreno” Domagoso at Vice Mayor Chi Atienza ang nanguna sa Pabahay Grand Raffle kahapon kung saan 50 housing units sa San Lazaro Residences, 25 sa Pedro Gil Residences at 25 San Sebastian Residences.
Ayon kay Domagoso, isinagawa ang ‘public draw of lots’ bilang patunay ng transparency at patas na pagpili ng mga benepisyaryo ng naturang housing program.
Una nang sinabi ni Domagoso na sisikapin niyang mabigyan ng maayos na bahay ang mga Manilenyo kaya naman abut-abot ang kanyang pasasalamat sa mga taxpayers upang maisakatuparan ang kanyang mga programa.
Tiangco, naghain ng House Resolution para bilisan ang impeachment proceedings ni VP Sara
NANAWAGAN si Navotas City Congressman Toby Tiangco sa mga kapwa mambabatas na bilisan at ipagpatuloy ang impeachment proceedings ni Vice President Sara Duterte kahit na sa recess ng kongreso mula Marso 21 hanggang Mayo 3, 2026.
Inihain ni Tiangco ang House Resolution No. 894 na umaapela sa chairperson at mga miyembro ng House Committee on Justice na pabilisin ang pagresolba sa impeachment case.
“The long recess will only delay the resolution of the pending complaints. It is imperative that the impeachment proceedings continue even during recess to once and for all settle the issue of whether or not there is a ground to impeach Vice President Sara Duterte,” ani Tiangco.
Binanggit ni Tiangco na inihain na ng Bise Presidente ang kanyang sagot sa mga impeachment complaints.
“Recent developments also indicate that the complainants in one of the impeachment
complaints have waived their right to file a reply, thereby allowing the proceedings to move forward,” dagdag niya.
Ayon kay Tiangco, ang pagpapabilis sa impeachment proceedings ay magbibigay-daan sa Kamara na makapag-concentrate sa mga bagay na may pantay na kahalagahan, tulad ng hindi nakokontrol na presyo ng langis, kawalan ng trabaho, disparity sa sahod, katiwalian, peace and order, edukasyon, at kalusugan.
“Mahalagang maresolba agad itong isyu ng impeachment dahil napakaraming isyu ang kailangan ng agarang pansin,” aniya.
“At present, the country is facing significant economic challenges arising from
global instability, particularly tensions and conflict in the Middle East, which have contributed to rising fuel prices and increased costs of transportation, goods, and basic services, thereby adversely affecting Filipino households and businesses,” pagtatapos ng mambabatas. (Richard Mesa)
DAHIL SA “ISUMBONG MO SA PDEA” REPORT, TULAK NG ILEGAL NA DROGA ARESTADO
ISANG beripikadong ulat na natanggap sa pamamagitan ng Isumbong Mo sa PDEA (IMSP) platform ang nagresulta sa matagumpay na buy-bust operation at pagkakaaresto ng isang hinihinalang sangkot sa ilegal na droga sa Purok 7, Barangay Bool, Tagbilaran City, Bohol dakong 8:53 ng gabi noong Marso 16, 2026.
Pinangunahan ang operasyon ng magkasanib na puwersa ng PDEA Bohol Provincial Office, Tagbilaran City Police Station, at Bohol Maritime Police.
Kinilala ni PDEA 7 Regional Director Joel B. Plaza ang suspek sa alyas na Rex, 40 anyos, walang trabaho, at residente ng nasabing lugar.
Nakumpiska sa operasyon ang isang pakete ng hinihinalang shabu na may timbang na humigit-kumulang 5 gramo at tinatayang may halagang ₱34,000, gayundin ang buy-bust money at isang cellular phone.
Pinadala ang nakuhang drug evidence sa PNP Bohol Forensic Laboratory para sa pagsusuri, habang ang suspek ay kasalukuyang nakadetine sa Tagbilaran City Police Station.
Ang pagbebenta ng ilegal na droga ay may kaukulang parusang habambuhay na pagkakakulong at multang aabot sa ₱10 milyon.
Hinimok din ang publiko na iulat ang anumang ilegal na aktibidad sa droga sa IMSP hotline: 0995 354 7020. Tiniyak ng awtoridad na ang lahat ng impormasyong matatanggap ay dadaan sa beripikasyon at mananatiling kumpidensyal.
(PAUL JOHN REYES)
Mga bayarin sa graduation bawal – PBBM
IPINAGBAWAL ni Pangulong Ferdinand Marcos Jr. ang paniningil sa mga mag-aaral ng mga bayarin at kontribusyon ngayong panahon ng graduation ng mga estudyante sa mga pampublikong eskwelahan.
Ayon kay Pangulong Marcos, gumagawa ng hakbang ang pamahalaan para hindi makadagdag sa bigat sa bulsa ang pag-aaral sa gitna ng patuloy na pagtaas sa presyo ng mga produktong petrolyo.
Patuloy aniyang tututukan ang kapakanan ng mga kabataang Pilipino, kaya bawal pa rin ang mga bayarin o kontribusyon na sisingilin sa mga mag-aaral sa mga pampublikong eskwelahan lalo na ngayong panahon ng graduation.
Inanunsiyo rin ng Pangulo na magsisimula ang Serbisyo Fair ng Department of Education (DepEd) kung saan ang mga ahensiya ng gobyerno at mga employer ang pupunta sa eskwelahan para makapag-apply ng trabaho ang mga high school student at graduates. Sa ganitong paraan aniya ay mas madali nang makakakuha ng clearance at hindi na rin gagastos pa ng malaki sa pamasahe.
Airport at seaport terminal fees, suspendihin muna
PINASUSUSPINDE ng isang mambabatas ang ipinatutupad na airport at seaport terminal fees habang patuloy sa pagtaas ang presyo ng gasolina sa bansa.
Ayon kay Bohol Rep. Kristine Alexie Tutor, Chairperson ng House Committee on Globalization, isa ang sektor ng turismo ang tatamaan ng matindi dahil sa patuloy na fuel price increase.
Nangangamba ang mambabatas na maaapektuhan dito ang transport at food sector lalo na ang maraming Pilipino ang mawawalan ng trabaho kung patuloy ang pagtaas ng presyo ng gasolina sa mga susunod na linggo o buwan.
Nakakalungkot aniya ang timing nang pagtaas ngayong Marso hanggang Mayo dahil na rin sa kasagsagan ito ng summer travel months.
Ang pagkonti ng dumarating na turista ay nangangahulugan ng pagkalugi sa maraming MSMEs sa mga probinsiya ngayong summer.
Bukod sa pagsuspinde ng airport at seaport terminal fees ay dapat ayusin din ang mga kalsada at bawasan ang toll fees.
“Let us act now to ease the cost of travel and fuel, because every delayed response means more jobs lost and more livelihoods at risk,” ani Tutor.
(Vina de Guzman)
Barangay kagawad, pinagsasaksak ng selosong waiter, dedo
HUMANDUSAY ang duguang katawan ng 60-anyos na kagawad ng barangay nang pagsasaksakin ng selosong waiter sa loob ng isang bar sa Caloocan City, Martes ng umaga.
Nalagutan ng hininga habang ginagamot sa Manila Central University (MCU) Hospital ang biktimang si alyas “Nestor”, residente ng 10th Avenue, Brgy. 64 at kagawad sa kanilang lugar sanhi ng tinamong mga saksak sa iba’t ibang bahagi ng katawan.
Patuloy namang tinutugis ng mga tauhan ni Caloocan police chief P/Col. Joey Goforth ang suspek na si alyas “Argie”, 32, waiter, ng isang KTV bar at residente ng Brgy. Potrero, Malabon City.
Sa kanyang ulat kay Northern Police District (NPD) Acting Director P/BGen. Christopher Dela Cruz, sinabi ni Col. Goforth na nadatnan ng suspek ang 29-anyos niyang live-in partner na si alyas “Lyn”, waitress sa Scarlet Disco Bar sa MacArthur Highway, Brgy. 78, habang naka-table sa biktima dakong alas-5:30 ng umaga.
Dahil umano sa selos, sinapak ng suspek sa mata ang kanyang live-in partner bago bumunot ng patalim at inundayan ng sunod sunod na saksak sa katawan ang biktima.
Matapos ang insidente, mabilis na tumakas ang suspek sa hindi matukoy na direksyon habang isinugod naman ang biktima sa nasabing pagamutan.
Nakuha ng mga nagrespondeng tauhan ng Caloocan Police Sub-Station 3 sa lugar na pinangyarihan ng krimen ang patalim na ginamit ng suspek sa pananaksa.
(Richard Mesa)