HINIKAYAT ni Senior Citizens Party-list Rep. Rodolfo “Ompong” Ordanes ang gobyerno ng Pilipinas na iprayoridad ang pagbili ng langis at iba pang produktong petrolyo mula sa kalapit na ASEAN oil-exporting countries upang mabawasan ang gastos at masiguro ang matatag na suplay ng enerhiya.

Aayon kay Ordanes, dapat ikunsidera ng gobyerno ang pagbili ng langis mula sa kalapit na bansa sa Asya tulad ng Malaysia, Indonesia, at Brunei, dahil na rin sa logistical advantages nito at posibleng government to government arrangements.

“Buying from them would be cheaper because of shorter shipping routes, and there is also the possibility of countertrade or government to government deals that could stabilize supply and pricing,” dagdag nito.

Sinabi pa ni Ordanes na dapat din tignan ng Pilipinas na makakuha ng suplay mula sa iba pang bansa tulad ng Canada at Mexico.

“We have good relations with Canada and Mexico, and there are many Filipino migrants there. These partnerships can help ensure diversified sources of supply,” pahayag nito.

Idinagdag pa ng mambabatas na maaari pa namang ipagpatuloy ng Pilipinas ang pagbili ng langis mula sa Saudi Arabia, dala na rin sa pagdaan ng shipments sa western ports nito na malayo sa Strait of Hormuz kaya mas malayu-layo sila sa tensiyon sa Middle East.

Iginiit naman ni Ordanes na iwasan ng Pilipinas ang pagkuha ng langis mula sa Russia.

“Buying oil from Russia would effectively mean helping finance its ongoing war against Ukraine. Hindi natin dapat suportahan ang isang digmaang nakakaapekto nang masama sa mga Pilipino sa Ukraine at sa ibang bahagi ng Europa,” pahayag pa ng mambabatas.

Malaki ang paniniwala nito na ang pagkuha ng suplay sa kalapit na bansa ay makakatulong para mapagaan ang epekto ng pagtaas ng presyo ng langis dala na rin sa tumutinding giyera sa pagitan ng Iran at US at Israel.
(Vina de Guzman)

INIULAT ng Bureau of Immigration (BI) na mahigit 133,000 rehistradong dayuhan na may hawak na immigrant at non-immigrant visas sa Pilipinas ang nakilahok sa taunang Annual Report ngayong taon, na isinagawa mula Enero 1 hanggang Marso 1.

Ayon kay Immigration Commissioner Joel Anthony Viado, umabot sa 133,372 dayuhan ang tumalima sa mandatoryong annual reporting, bahagyang mas mababa kumpara sa humigit-kumulang 135,000 dayuhan na tumalima sa nasabing requirement noong 2025.

Sinabi ni Viado na ang bilang na ito ay katumbas ng humigit-kumulang 1.5 porsiyentong pagbaba mula sa kabuuang bilang noong nakaraang taon.

Ipinaliwanag ni Viado na ang bahagyang pagbaba sa bilang ng mga nag-report ay inaasahan, dahil ang populasyon ng mga rehistradong dayuhang naninirahan sa bansa ay natural na nagbabago taun-taon.

Dagdag pa niya, ang ganitong pagbabago ay maaaring maiugnay sa mga pandaigdigang trend, at napansin ang pagbaba ng bilang ng mga dayuhan sa bansa matapos ang pandemya.

Iniulat naman ni BI Alien Registration Division Chief Atty. Jose Carlitos Licas na ang mga Chinese nationals ang may pinakamataas na bilang ng mga nag-report na umabot sa 50,094, sinundan ng mga Indian na may 21,108, mga Amerikano na may 11,519, mga South Korean na may 6,922, at mga Taiwanese na may 6,842.

Idinagdag ni Licas na nanatiling pareho ang limang pangunahing nasyonalidad ng mga nag-report kumpara sa 2025 Annual Report.

Ayon pa sa kanya, mas dumami ngayong taon ang mga dayuhan na nagsagawa ng kanilang reporting sa pamamagitan ng online system ng Bureau at nagbayad ng kaukulang fees, habang ang iba naman ay patuloy na personal na nag-report sa mga field, extension, at satellite offices ng BI sa buong bansa.

Sinabi ng Bureau na ang virtual reporting system na bahagi ng Bagong Immigration initiatives ay nakapagpabuti sa accessibility at kaginhawaan, kaya maraming dayuhan ang nakapagsumite ng kanilang report online.

Sa ilalim ng Alien Registration Act of 1950, ang mga rehistradong dayuhan sa Pilipinas ay kinakailangang magsumite ng kanilang annual report sa Bureau sa loob ng unang 60 araw ng taon.

Nagpasalamat si Viado sa mga dayuhang sumunod sa nasabing requirement at muling iginiit ang pangako ng Bureau na patuloy na pagbutihin ang kanilang serbisyo habang pinapalakas ang monitoring sa imigrasyon sa bansa.. (Gene Adsuara)

SINABI ni Pangulong Ferdinand Marcos Jr. na depende sa magiging trends o takbo ng presyo ng langis ang pagpapatupad ng emergency power para pansamantalang suspendihin o bawasan ang oil excise tax.
“That depends… Marami, that’s a very complicated calculation… We will see. Depends on the trends. We have to watch the trends on oil prices. We just have to look. It’s very hard to say because it’s all speculation. We don’t know how long this will last for,” ang sinabi ng Pangulo sa isang ambush interview matapos ang Special Joint Price and Supply Monitoring ng Trade and Industry Department at ng Department of Agriculture sa Agora Market at Puregold Agora sa 1 N. Domingo cornerF. Blumentritt, Lungsod ng San Juan, araw ng Miyerkules.
“We don’t know what the effects are. We don’t know what will happen in the Strait of Hormuz. So, you know, right now, we are just adjusting to the situation. And when the situation calls for it, then we will see when to exercise that power and by how much,” aniya pa rin.
Sa ulat, nagbabala ang military command ng Iran na maaaring umabot ang presyo ng langis sa USD$200 per barrel.
Ang Strait of Hormuz ay isa sa pinakamahalagang rutang dinadaanan ng supply ng langis sa buong mundo kung saan dumaraan ang malaking shipment lines at kalakaran ng produktong petrolyo mula sa Middle East patungo sa iba’t ibang bansa.
Samantala, aprubado na sa ikatlo at huling pagbasa sa Senado ang panukalang batas na magbibigay ng kapangyarihan kay Pangulong Marcos na suspendihin o bawasan ang excise tax sa langis.
Sa botong 17-0 inaprubahan ang Senate Bill 1982
Sa ilalim ng panukalang batas, mabibigyan ng agarang ginhawa ang mga Pinoy sa gitna ng patuloy na pagtaas ng presyo ng produktong petrolyo.
Batay sa panukalang batas, puwedeng suspendihin o bawasan ng pangulo ang buwis sa langis kapag lumagpas sa eighty dollars per barrel ang presyo ng Dubai Crude Oil.
Magiging pansamantala lamang ang hakbang at awtomatikong babalik ang buwis kapag naging normal na ang sitwasyon at ang suplay ng produktong petrolyo. ( Daris Jose)

POSIBLENG magdeklara si Pangulong Ferdinand Marcos Jr ng state of emergency kapag sumirit ang presyo ng mga pangunahing bilihin bunsod ng tumataas na presyo ng langis.
Sinabi ni Presidential Communications Office (PCO) Undersecretary at Palace press officer Claire Castro na hindi pa nagdedeklara ang Pangulo ng price freeze simula nang mag-usap ang trade department at stakeholders ukol sa presyo ng mga pangunahing billihin
“Pwedeng mangyari ‘yan katulad nangyari doon sa bagyo, lindol. Hindi pa napag-uusapan sa ngayon pero maaaring magdeklara kapag nagkataptton, kapag tama na ang sitwasyon. Kapag nakita naman natin na umaabuso lang,” ayon kay Castro.
“Hindi maiiwasan ang pagtaas ng presyo ng fuel dahil sa tuloy-tuloy na nangyayari sa Middle East so titignan natin kung ‘yung pagtaas ba ng presyo ng basic commodities ay dapat,” aniya pa rin.
Sa kabilang dako, hindi pa napag-uusapan ang panukala na posibleng umento sa sahod.
Kinumpirma rin ni Castro na ang pagtapyas sa fuel excise taxes ay mapakikinabangan ng middle class at mga mayayaman.
“I-appreciate na natin kasi hindi pwedeng mamili lang tayo. Pati ‘yung middle class, pati ‘yung nakakaangat sa buhay kailangan din nila ng tulong sa gobyerno.”
Nauna rito, kapwa nagbabala sina Economist Winnie Monsod at Prof. Mon Abrea na ang pagtapyas sa fuel excise taxes ay maaaring mauwi sa pagtaas ng national debt dahil sa paghiram ng gobyerno upang tapalan ang pagtapyas sa revenues para tustusan ang budget.
Ang panukala naman nina Monsod at IBON Foundation executive director Sonny Africa ay buwisan ang ‘wealthiest individuals’ sa bansa, sabay sabing ang 15 wealthiest Filipino ay may pinagsamang yaman na 2.6 trillion piso. ( Daris Jose)

NILINIS ng Commission on Elections (Comelec) En Banc si Senador Rodante Marcoleta sa mga kasong paglabag sa halalan kaugnay ng kanyang Statement of Contributions and Expenditures (SOCE).

Ito ay matapos pagtibayin ng en banc, sa kanilang sesyon noong Miyerkules, ang rekomendasyon ng Political Finance and Affairs Department (PFAD) na itigil na ang imbestigasyon dahil “wala nang ibang ebidensya na magpapatunay na ang respondent ay nakagawa ng anumang election offense.”
Ayon sa Commission, matapos ang masusing pagtalakay ay nagpasya, at dito ay ipinapasyang tandaan ang mga natuklasan ng Political Finance and Affairs Department kaugnay ng Fact-Finding Investigation Case No. 2025-032,” ayon sa pitong-pahinang desisyon.
Gayunpaman, inirekomenda ng Comelec na magsampa ng kaso ng paglabag sa eleksyon laban sa mga nagbigay ng kontribusyon kay Marcoleta, sina Michael Tan Defensor, Joseph Varias Espiritu, at Aristotle Baluyut Viray, dahil sa kanilang di umano’y hindi pagsumite ng kanilang indibidwal na ulat ng kontribusyon sa loob ng 30 araw matapos ang eleksyon.
Nagsimula ang imbestigasyon matapos sabihin ni Marcoleta na hindi niya idineklara ang mga kontribusyon sa kanyang SOCE dahil humiling ang mga nagbigay na manatiling lihim ang kanilang pagkakakilanlan.
Kinumpirma rin ng kanyang kampo ni Marcoleta sa position paper na isinumite noong Enero 6 ,2026 na tumanggap siya ng kabuuang P75 milyon mula s a tatlong indibidwal ideal sa tatlong magkakahiwalay na pagkakataon ngunit natanggap ito mahigit isang buwan bago magsimula ang opisyal na campaign period.
Dahil hindi pa siya itinuturing na kandidato noong panahon ng pagtanggap ng mga kontribusyon hindi ito maituturing na ginawa upang impluwensyahan ang resulta ng eleksyon.

Sa SOCE ni Marcoleta, nagastos niya ang halagang P139.9 milyon para sa kanyang kampanya, na mas mataas sa kanyang idineklarang net worth na P51,965,559.
Muling binigyang-diin ni Chairman George Erwin Garcia na ayon sa batas , lahat ng kontribusyon at gastusin na may kaugnayan sa eleksyon ay dapat iulat at magsumite ng kumpleto,totoo at detalyadong ulat .
(Gene Adsuara)