GAGAMITIN ng gobyerno ang diplomatic relation para makakuha ng AstraZeneca vaccine.

Ito’y upang masiguro na hindi mabibitin sa pagtuturok ng ikalawang dose ang mga naturukan ng Astrazeneca sa harap ng umano’y pagkakaantala sa pagdating ng mga bakuna mula sa COVAX Facility.

Ayon kay Chief Implementer at Vaccine czar Secretary Carlito Galvez, may problema talaga patungkol sa global supply na kahit ang malalaki at mayayamang bansa ay nahahagip.

“Nakita po natin talaga na mayroon pong problema iyong tinatawag nating global supply even alam natin sa India, sa Europe or even sa US. So ang naano po natin ngayon ay talagang ginagawa po natin ang lahat ng magagawa, may mga diplomatic relation natin ngayon para makapag-produce tayo ng AstraZeneca vaccine,” ang pahayag ni Galvez.

Ani Gavez, ginagawa naman nila ang lahat ng magagawa para makapag- produce ng kailangang bakuna partikular ng AstraZeneca vaccine at isa na dito ang paggamit ng diplomatic relations.

Maliban dito, pinanghahawakan din aniya nila ang pahayag ni Dr Rabindra Abeyasinghe ng WHO na baka may dumating ngayong Abril na 2nd dose ng Astrazeneca na nasa 525,600 doses.

“Umaasa po kami na mayroon po tayong makukuha considering that mayroon din tayong procurement. And rest assured na we will do our best na iyong second dose ng 525,600 doses ay magagawa po natin iyan. At nagsabi naman po si Dr. Rabi na baka po dumating mga end of April,” aniya pa rin.

KINUMPIRMA ng Malakanyang na inirekomenda ng Vaccine Expert Panel (VEP) sa Food and Drug Administration (FDA) ang paggamit ng Sinovac vaccine para sa mga senior citizens o mga indibidwal na may 60 taong gulang pataas.

Masusing tinalakay ng VEP ang usaping ito sa gitna ng kasalukuyang vaccine supply sa bansa.

“We hope that this would respond / address the present demand of vaccines,” ayon kay Presidential Spokesperson Harry Roque.

Nauna nang sinabi ni Dr. Rontgene Solante, miyembro ng VEP at San Lazaro Hospital’s adult infectious diseases division chief na kailangan nilang tingnan ang data ng Sinovac lalo pa’t kaunti na lamang ang natitirang doses ng AstraZeneca.

‘We just finished the recommendation (for the Food and Drug Administration ) the other day. Fino-forward na namin sa Department of Health (DoH),” ayon kay Solante.

Hindi naman maisiwalat ni Solante ang nasabing rekumendasyon sa ngayon.

Makabubuti  na hintayin na lamang ang ebalwasyon ng DoH.

Sa ulat, sinabi ni Dr. Rontgene Solante na nagpadala na sila ng rekomendasyon sa Department of Health (DOH) hinggil sa posibleng paggamit ng Sinovac COVID-19 vaccine sa mga nakatatanda.

Gayunman, tumanggi si Dr. Solante na ilahad kung ano ang rekomendasyon nila sa DOH at sa halip ay ipinauubaya na aniya nila sa Health Department ang paglalabas ng anunsiyo.

Una nang sinabi Health Undersecretary Maria Rosario Vergeire na kulang na ang suplay ng bakuna ng AstraZeneca na gamit sa mga nakatatanda at hindi magamit ang gawa ng Sinovac dahil sa kawalan ng datos hinggil dito.

Kinumpirma naman ni Dr. Solante, bukod sa China at Hongkong, ginagamit na rin ang Coronavac sa mga senior citizen sa Indonesia at Turkey. (Daris Jose)

SINABI ng gobyerno na lawyer to lawyer ang magiging transaksiyon sa kasalukuyan ng gobyerno sa kumpanyang Pfizer.

Ayon kay Vaccine czar Secretary Carlito Galvez , itoy dahil na rin sa mahigpit na patakaran ng Pfizer lalo na sa isyu ng indemnification.

Sa kasalukuyan ay halos tapos na ang negosasyon sa pitong kumpanyang maaaring mapagkunan ng bansa ng bakuna maliban sa Pfizer.

Tanging ang nasabing kumpanya na lang ang isinasapinal habang ang ibang kumpanya gaya ng Sinopharm ay nasa estado na ng processing.

“Ongoing ngayon ay iyong processing ng Sinopharm at the same time may mga interested na talagang mag-apply ng mga EUA doon sa Sinopharm. We are processing it, we are looking na lang iyong tinatawag nating mga clinical trials niya and we are assessing na kung just in case katulad ng ginawa natin sa mga nauna, talagang dadaan sila sa proseso, ” ani Sec.Roque.

May mga interesado na din daw na mag- apply ng Emergency Use Authorization sa Sinopharm na siyang preffered brand ni Pangulong Duterte na maiturok sana sa kanya.

“And then iyong sa Pfizer, ongoing nga ang ating negotiation with lawyer-to-lawyer kasi alam natin na napakahigpit ng kumpanyang ito in terms of sa indemnification. So iyon po ang ongoing na ano natin. So sa lahat po, halos lahat ng—pito nating portfolio, halos iyong anim talagang halos talagang buo na po iyon, iyon na lang sa Pfizer po ang pina-finalize po natin,” dagdag na pahayag nito. (Daris Jose)

TILA ipinamukha ni Presidential Spokesperson Harry Roque sa mga kritiko ng gobyernong Duterte na hindi lang naman panahon ng ECQ naglalabas ng tulong ang gobyerno sa mga pamilyang patuloy na naaapektuhan ng pandemya.

Ito ang pahayag ni Presidential Spokesperson Harry Roque sa gitna ng mga nagsasabing hindi raw sapat ang isanlibong pisong amelioration assistance sa bawat indibidwal o apat na libong piso para sa bawat pamilyang Pilipino na nasa ilalim ng ECQ.

Aniya, nandyan naman ang DSWD na patuloy na nagpapatupad ng regular social welfare services nito kagaya ng Assistance to Individuals in Crisis Situation.

Sinabi pa ni Sec. Roque na tumutugon din ito sa pangangailangan ng mga mahihirap na Filipino gaya ng medical, burial, transportation assistance at iba pa.

Bukod dito, mayroon din aniya na resource augmentation mula naman sa LGUpara sa mga family food packs habang naririyan din ang 4Ps.

“Sa mga nagsasabi na hindi raw sapat ang isanlibong pisong amelioration assistance bawat indibidwal or 4,000 pesos bawat pamilyang Pilipino, patuloy ang DSWD na nag-i-implement po ng mga regular social welfare services nito kagaya ng AICS, iyong Assistance to Individuals in Crisis Situation, para tumugon sa iba pa pong mga pangangailangan ng mga kababayan nating mahihirap gaya ng medical, burial, transportation assistance at iba pa,” ayon kay Sec. Roque.

“Gayun din ang resource augmentation nito sa LGUs para sa mga family food packs upang tumulong sa LGUs na tugunan ang pangangailangan ng kanilang mga nasasakupan.  Mayroon din tayong 4Ps beneficiaries,” dagdag na pahayag nito.