NA-INFECT SA PNR, UMABOT SA 120

HINDI  bababa sa 120 na ang na-infect ng COVID-19 sa kanilang mga tauhan sa Metro Manila, ayon sa pamunuan ng Philippine National Railways (PNR).

Ayon kay PNR Spokepserson Joseline Geronimo, naitala ang naturang bilang nang simulant ang COVID-19 testing  sa mga empleyado ng PNR batay na rin sa kaustusan  ni PNR General Manager Junn Magno.

Target naman aniyang maisalang sa swab test ang 1,000 nilang mga empleyado sa Metro Manila.

Ani Geronimo, nasa higit 1,000 ang mga kawani ng PNR sa Kalakhang Maynila at target na ma-swab test ang lahat ng mga ito.

Sinabi ni Geronimo na  pawang mga asymptomatic naman ang  mga nagpositibo nilang mga kawani sa COVID-19 at sinusundo sila para dalhin sa pasilidad o maisailalim sa quarantine sa tulong ng mga lokal na pamahalaan.

Tiniyak naman ng pamunuan ng PNR na ginagawa nila ang lahat para maprotektahan ang kanilang mga empleyado laban sa COVID-19 tulad ng isinasagawang swab testing.  (GENE ADSUARA)