NAGPAHAYAG ng pagkaalarma ang kampo ni dating Speaker Martin Romualdez sa naging desisyon ng Sandiganbayan na tanggalin si dating Public Works and Highways Secretary Manuel Bonoan sa kaso ng flood control scam.

“Iyang naging desisyon po ay alarming at nakakagulat, ‘yan po ay nakakabahala,” pahayag ni Atty. Ade Fajardo, abogado at tagapagsalita ni Romualdez.

Iginiit din ni Fajardo na hindi isinangkot ni Bonoan si Romualdez sa flood control scandal.

“Going back from the very start to put everything in context po, nang magsimula itong reklamo ng special panel against Congressman Romualdez, wala pong anumang salaysay doon, wala po man lang kahit ni isang taga-DPWH, ni isang statement from Secretary Bonoan, kahit doon sa Blue Ribbon Committee, kahit doon sa Independent Commission for Infrastructure wala pong nag-uugnay kay Congressman Romualdez,” ani Fajardo.

Aniya, walang makitang partikular na DPWH project kung saan nag-participate o allegedly nag-impluwensiya si Romualdez para manalo ang isang partikular na contractor.

“Walang ganung alegasyon kaya nakakagulat na si Secretary Bonoan all of a sudden is now available as a potential witness. And then suddenly, malaya na siya at granted ang immunity practically kasi hindi na siya akusado,” sabi ni Fajardo. 

Naunang iginiit ni Fajardo na wala ng “credible evidence” laban sa kanyang kliyente matapos bumaligtad ng salaysay ang ilan sa mga Maleta Boys, kabilang ang star witness na si Orly Guteza, na iniuugnay si Romualdez sa flood control scam. 

(VINA de GUZMAN)

HINIKAYAT ni House prosecution panel adviser at spokesman Ace Barbers ang mga Pilipino na manatiling mapagbantay laban sa lumalaking information threat sa bansa.

Sinabi ni Barbers na hindi dapat maliitin ang babala ni retired Rear Admiral Roy Vincent Trinidad, partikular na umano’y paglayo ng foreign influence operators sa mga madaling matukoy na pro-China messaging at sa halip ay inilalapit nila ang sarili sa mga isyu na nakaka-apekto sa emosyon ng Pilipino.

“The danger is that a real issue can be hijacked by false narratives. The impeachment is a constitutional process, but if foreign actors are manipulating information surrounding it, Filipinos must be smart enough to distinguish legitimate criticism from deliberately manufactured propaganda,” ani Barbers.

Ayon sa dating Surigao del Norte Congressman at Governor, base sa open-source searches sa Internet, may mga ebidensiya, partikular mula sa Meta, Reuters, Graphika, Microsoft, Philippine government officials at independent researchers, na nagpapakita kung papaano nagtatrabaho ang China-linked influence operations sa Pilipinas at sa iba pang lugar.

Pinaka-sopistikado stratehiya ng operasyon, ani Barbers ay ang samantalahin ang nagaganap na dibisyon sa mga Pinoy. Hindi na kailangang pilitin pa ng operasyon na mahalin ang Tsina.

“China-linked foreign malign influence operations are exploiting contentious Philippine political issues, including the Duterte impeachment controversy, to deepen polarization and shape public opinion,” pahayag pa Barbers, base umano sa datos mula sa internet.

Isa aniya umano sa China-linked operations ang gumamit ng network ng peke o inauthentic accounts para magbuo ng usapin na tumutuon sa pananaw ng mga ordinaryong Pinoy.

Inalis na kamakailan ng Meta ang naturang networks na nagmula umano sa Tsina na tumatarget sa Philippine audiences. Isa sa documented Philippine network ay kinasasangkutan ng 155 accounts na may tinatayang may 130,000 followers and at milyong interaksyon na nagsusulong sa mga pro-China narratives at political figures.

“These accounts can behave like ordinary users—posting political opinions, commenting on news stories, attacking critics of China or boosting favorable personalities. The objective is not necessarily to make one post go viral, but to create an artificial sense of consensus,” paliwanag nito.

(VINA de GUZMAN)

KALABOSO ang isang rider na tulak umano ng ilegal na droga nang makuhanan ng mahigit P.2 milyong halaga ng shabu makaraang maaresto ng pulisya sa buy bust operation sa Valenzuela City, Huwebes ng gabi.

Kinilala ni Valenzuela Police Chief P/Col. Joseph Talento ang suspek na si alyas “Thugs”, 45, ng Brgy., Canumay West na mahaharap sa kasong paglabag sa Sections 5 at 11 ng R.A 9165 o ang Comprehensive Dangerous Drug Act of 2002.

Sa kanyang ulat kay Northern Police District (NPD) Director P/BGen. Benliner Capili, ikinasa ng mga operatiba ng Valenzuela Police Station Drug Enforcement Unit (SDEU) sa pangunguna ni P/Lt. Sherwin Dascil ang buy bust operation sa koordinasyon sa PDEA kasunod ng natanggap na impormasyon hinggil sa pagtutulak umano ng suspek ng ilegal na droga.

Matapos matanggap ang signal mula sa kanyang kasama na nagpanggap na buyer na hudyat na positibo na ang transakyon, kaagad lumapit ang back up na operatiba saka inaresto ang suspek dakong alas-10:40 ng gabi sa L. San Diego Street, Brgy. Canumay West.

Nang kapkapan, nasamsam sa suspek ang isang coin purse na naglalaman ng isang plastic sachet ng umano’y shabu, buy bust money na isang tunay na P500 bill, kasama ang pitong P1,000 boodle money at P150 cash.

Ayon kay SDEU investigator P/MSg Ana Liza Antonio, umabot lahat sa 30 grams ng hinihinalang shabu na nagkakahalaga ng P204,000 ang nasamsam sa suspek habang kinumpiska rin ang gamit niyang motorsiklo sa pagdedeliber umano ng droga.

Paalala ni Col. Talento, huwag makilahok, tumangkilik, o magkubli ng ano mang ilegal na aktibidad na may kaugnayan sa droga. Aniya, kung may impormasyon tungkol sa ilegal na droga ay huwag matakot at kaagad i-report sa pinakamalapit na himpilan ng pulisya upang agad na maaksyunan. 

(Richard Mesa)

LUMOBO ang bagong kaso ng leptospirosis na naitala sa lungsod ng Maynila ngayong Biyernes.

Sa datos ng Manila Health Department, umabot ito sa 146 ngayong araw kaya’t umabot na ang lahat ng kaso ngayong 2026 sa 854.

Paglilinaw naman ni Dr. Ed Santos, Deputy City Health Officer ng Maynila…kasama sa 146 ang mga kaso ng sakit na late nang naireport ng mga ospital at ngayong araw lamang naipasa.

Gayunman, nanawagan pa rin ang mga awtoridad sa publiko na mag-ingat dahil may 34 na ang nasawi kasama ang 6 na bagong namatay sa leptospirosis

Pakiusap ni Dr Santos – huwag nang lumabas at lumusong sa baha kung hindi naman kailangan at kung hindi maiiwasan ay magsuot ng bota o wader

Hinikayat din niya ang mga magulang na iwasan ang paliligo sa ulan lalo na ang mga nagsa shower sa mga alulod na maaaring kontaminado ang tubig.

Bilang dagdag pag-iingat na rin aniya ang paglilinis sa lahat ng de-lata, nakabote, o nakapakete na pagkain na maaaring pinamahayan ng daga ang karton. 

(Gene Adsuara)

KULUNGAN ang kinasadlakan ng dalawang hinihinalang drug personalities matapos maaresto ng pulisya sa magkahiwalay na operation sa Valenzuela City.

Sa ulat, nagsasagawa ng Anti-Criminality Operation ‘Oplan Galugad’ ang mga tauhan ni Valenzuela Police Chief P/Col. Joseph Talento nang maaktuhan ang tatlong individuals na nagsusugal umano ng ‘cara y cruz’ sa likod na bahagi ng Blk. 10, Building 8, Disiplina Village, Barangay Bignay, dakong alas-12:35 ng Biyernes ng hating gabi.

Kaagad silang nilapitan nina PSSg Michael Monib at Pat Timothy Jezer Tinte, saka nagpakilala bilang mga pulis na kapwa nakatalaga sa Police Sub-station 7 at ipinaalam sa kanila ang nilabag nilang kasalanan bago inaresto.

Nakumpiska sa tatlo ang P430 bet money, pangara at isang plastic sachet na naglalaman ng hinihinalang shabu na nakuha umano sa construction worker na si alyas “Jobert”, 25.

Nauna rito, alas-8:27 ng Huwebes ng gabi nang mahuli sa akto nina PCpl Ledrick Bacuran at Pat Robert Regalado, kapwa nakatalaga sa Police Sub-Station 3 si alyas “Rence”, 29, na bumabatak umano ng shabu sa gilid ng Pumping Station, sa Encarnacion Street, Barangay Marulas.

Nakumpiska sa kanya ang isang nakabukas na plastic sachet na naglalaman ng bahid ng umano’y shabu at ilang drug paraphernalias.

Ayon kina SDEU investigators PSSg Christopher Quiao at PSSg Pamela Joy Catalla, mahaharap sina alyas Jobert at alyas Rence sa kasong paglabag sa R.A 9165 o ang Comprehensive Dangerous Drug Act of 2002 sa Valenzuela City Prosecutor’s Office. (Richard Mesa)