NANAWAGAN si Caloocan City 2nd District Representative Edgar R. Erice ng congressional inquiry sa maagang pagkasira ng mga bahagi ng Epifanio de los Santos Avenue (EDSA) kamakailan, kabilang ang mga ulat ng mga lubak at iba pang mga depekto sa simento ilang buwan lamang matapos ang rehabilitasyon nito.

Ang iminungkahing resolusyon ni Erice ay nag-uutos sa appropriate House committees na imbestigahan kung ang mga kakulangan sa planning, design, materials, construction methods, quality control, contract management, drainage or maintenance ay nag-ambag sa maagang pagkasira ng pinaka-abalang daanan sa bansa.

Ang Phase 1, na sumasaklaw sa Roxas Boulevard hanggang Orense Street, ay natapos noong Abril 2026 sa iniulat na halagang P1.183 bilyon. Ang Phase 2, na sumasaklaw sa Orense Street sa Makati City hanggang Monumento sa Caloocan City, ay sinundan sa ilalim ng P4.009-bilyong kontrata na nilagdaan noong Hunyo 4, kasama ang Notice to Proceed na inisyu noong Hunyo 8, 2026.

Ayon sa resolusyon, ang maagang pagkasira ay nagdudulot ng mga katanungan tungkol sa pavement assessment at design, drainage, asphalt mix and material specifications, pavement preparation, compaction, construction methodology, quality assurance and control, at post-construction monitoring.

Sinabi ni Erice na dapat matukoy ng imbestigasyon kung ang mga depekto ay nagresulta mula sa environmental conditions, deficiencies in the existing road foundation or drainage, design limitations, substandard materials, construction deficiencies, inadequate inspection and testing, premature opening to traffic, insufficient maintenance, o iba pang mga kadahilanan.

Susuriin ng mga katanungan ang project plans, engineering studies, technical specifications, procurement and contract documents, material testing and laboratory reports, inspection and quality-control records, payment records, variation orders, warranties at defects-liability provisions. Susuriin din nito ang technologies, asphalt systems, materials at construction techniques used para mapatunayan kung ang mga ito ay sapat sa pamamagitan ng teknikal at performance testing.

Ang resolusyon ay higit pang naghahangad ng isang komprehensibo, geotagged condition assessment of affected Phase 1 sections, documenting defects, occurrence dates, repair history, identified causes at corrective-work costs.

Para kay Erice, lampas sa EDSA ang isyu.

Layon ng proposed inquiry na makakuha ng mga aral para sa Phase 2 at mga pangunahing proyekto sa imprastraktura sa hinaharap, kabilang ang independent testing, third-party quality audits, performance warranties, defects-liability provisions at mas mahigpit acceptance procedures. (Richard Mesa)

IPINAG-UTOS ng Malakanyang sa mga tanggapan ng gobyerno sa National Capital Region (NCR) at mga lalawigan ng Zambales, Bataan, Bulacan, Pampanga, Tarlac, Nueva Ecija, Cavite, Batangas, Rizal, Laguna, Quezon, at Occidental Mindoro, na lumipat at kagyat na magpatupad ng naaangkop na alternative work arrangements, kahapon araw ng Biyernes, Agosto 14, 2026, sa rekomendasyon ng National Disaster Risk Reduction and Management Council, at sanhi ng Heavy Rainfall Warnings na ipinalabas ng Philippine Atmospheric, Geophysical and Astronomical Services Administration (PAGASA) kaugnay ng patuloy na pagbuhos ng malakas na ulan na may kasama Southwest Monsoon.

Ito ang nakasaad sa MEMORANDUM CIRCULAR NO. 126, ipinalabas ng Malakanyang, nilagdaan ni Acting Executive Secretary Ralph Recto, sa pahintulot na rin ni Pangulong Ferdinand Marcos Jr. 

Maliban na lamang kung ipag-uutos ng kani-kanilang Local Chief Executives, ang alternative learning modes para sa klase sa lahat ng antas sa pampubliko at pribadong eskuwelahan ay dapat na ipatupad sa mga nasabing lugar.

Ang mga ahensiyang may kinalaman sa paghahatid ng basic at health services, paghahanda/ pagtugon sa mga sakuna at kalamidad at /o pagganap sa ibang mahalagang serbisyo ay inaatasan na ipagpatuloy ang kanilang operasyon at pagbibigay ng kinakailangang serbisyo.

Ang localized cancellation o suspensyon ng klase at/o trabaho sa mga tanggapan ng gobyerno at iba pang lugar ay maaaring ipatupad ng kani-kanilang Local chief Executives, alinsunod sa kaugnay na batas, rules and regulations.

Ang suspensyon ng trabaho para sa mga pribadong kumpanya at tanggapan ay ipinauubaya na sa diskresyon ng kani-kanilang pinuno. (DARIS JOSE)

INAPRUBAHAN ng House of Representatives ang House Bill No. 9812 na naglalayong klaruhin at bigyan ng pamantayan ang mga local government units sa paglikha at operasyon ng mga local universities at colleges sa kanilang lugar.

“Local universities and colleges have opened doors for many students who otherwise might not have had the chance to pursue higher education. But access also comes with responsibility. We have to make sure these institutions are well-run, financially sustainable, and offering programs that will actually serve their students and their local communities,” ayon kay Tingog party list Rep. Jude Acidre, may akda ng HB 9812.

Batay sa HB 9812, inaatasan ang mga local government units na umugnay sa pamantayan ng pagtatatag ng unibersidad o kolehiyo sa kanilang lugar. Kabilang sa mga kinakailangan ay ang pagpapakita ng feasibility study na nagpapatunay na kailangan ang pagtatayo ng unibersidad o kolehiyo sa kanilang lugar kung papaano popondohan ito at preparasyon ng five-year institutional development plan na aprubado ng sanggunian. 

“A local college should not be created simply because an LGU can establish one. We have to ask whether it can sustain the institution, whether it can deliver quality education, and whether the programs it offers are relevant to the needs of its students and the community,” sabi ni Acidre.

Batay sa panukala, ang Commission on Higher Education (CHED) ang may supervision sa mga degree programs ng lokal na unibersidad o kolehiyo samantalang ang Technical Education and Skills Development Authority (TESDA) ang may awtoridad sa mga associate degrees, diploma programs, technical-vocational courses, at mga non-degree programs. 

Ang CHED at TESDA ay naatasan sa monitoring, inspection, evaluation, at technical assistance sa mga lokal universities at colleges. (VINA de GUZMAN)

HINIKAYAT ng isang mambabatas ang mga local government units (LGUs) sa 16 lungsod at isang munisipalidad sa Metro Manila na magtatag at magtalaga ng “garbage police” na siyang mahigpit na magpapatupad ng mga anti-littering at waste disposal regulations at hulihin ang mga lalabag sa loob ng kani-kanilang hurisdiksyon.

Sinabi ni Las Piñas Lone District Rep. Mark Anthony Santos na ang pagbuo ng dedicated garbage enforcement teams ay magpapalakas sa implementasyon ng mga kasalukuyang anti-littering laws at magsisiguro na yaong mga walang habas na nagtatapon ng basura sa mga pampublikong lugar ay mapapanagot.

“We need garbage police who will be visible on our streets and in our communities. They should have the authority, under existing laws and ordinances, to apprehend violators and bring them before the proper authorities. We cannot solve the garbage crisis if our anti-littering laws exist only on paper,” ani Santos.

Ipinanukala pa nito na ang “Garbage Police” ay hiwalay na enforcement unit mula sa mga barangay tanod, kung saan ang tauhan nito ay sasanayin at itatalaga na mag-monitor at magpatupad ng anti-littering at solid waste management regulations.

Isinusulong din ni Santos na mabigyan ang mga miyembro ng garbage police ng regular monthly compensation mula sa kaukulangang LGU funds, base sa ilalim ng kasalukuyang budgeting, accounting at auditing rules.

“The garbage police should not be an additional burden on our barangay tanods. They should be a dedicated team whose primary responsibility is to enforce our anti-littering and waste disposal rules,” pahayag nito.

Kailangang mabigyan ng sapat na kakayahan o training ang mga ito para magsagawa ng enforcement operations sa kalsada, sidewalks, waterways, markets, transport terminals at iba pang kahalintulad ng littering hotspots.

Magkakaroon din nang mahigpit na koordinasyon ang garbage police, barangay, local environment offices, Philippine National Police (PNP) at Metropolitan Manila Development Authority (MMDA) upang masiguro na ang mahuhuling lalabag o magkakalat ay dokumentado at sumaillaim sa tamang proseso ayon sa isinasaad sa batas.

Sa ilalim ng kasalukuyang MMDA Regulation No. 96-009, as amended, ang pagkakalat o pagtatapon ng basura sa pampublikong lugar ay ipinagbabawal sa buong Metro Manila.

“Hindi puwedeng puro paalala at clean-up drive lamang. Kailangang may mananagot sa bawat paglabag. Kung may mga batas at ordinansa tayo laban sa littering, dapat may mga taong may sapat na mandato para ipatupad ang mga ito. Ang layunin natin ay hindi lamang manghuli at magmulta. Ang gusto natin ay magkaroon ng disiplina at tuluyang mabago ang kultura ng pagtatapon ng basura. Pero para mangyari iyon, kailangang maramdaman ng publiko na seryoso ang pamahalaan sa pagpapatupad ng batas,” ani Santos.

(VINA de GUZMAN)