BINASURA ng Armed Forces of the Philippines (AFP) ang pag-angkin na ginawa ng mga Chinese scholars kaugnay sa di umano’y ang Batanas ay bahagi ng Tsina.

Tinawag ito ng AFP na “baseless.”

“The AFP categorically rejects and dismisses the baseless assertion from a state-sanctioned symposia in China claiming that the northernmost Philippine province of Batanes belongs to Beijing as a ‘geographical extension of Taiwan,” ang sinabi ni AFP spokesperson for the West Philippine Sea Navy reservist Rear Admiral Roy Vincent Trinidad sa isang panayam.

Gayundin tinawag ni Trinidad ang pinakabagong Chinese disinformation bilang “salami slicing in the information domain.”

Aniya, ito ay isang “systematic manufacturing of false historical and legal narratives intended to desensitize the international community, gradually alter the status quo and establish a pretext for future expansion.”

Binigyang diin nito na ang soberanya ng Pilipinas sa Batanes ay “settled, indisputable at non-negotiable.”

“The province of Batanes is an integral part of our republic, protected by international law and entrenched in our historic national boundaries,” aniya pa rin.

Tinuran pa ni Trinidad na hindi maaari at hindi hahayaan ng AFP ang mga pagtatangka na ito ng foreign malign na hayaan na lamang.

“Leaving these attacks on our cognitive domain unanswered allows revisionist history to take root,” ang sinabi ni Trinidad sabay sabing “the AFP remains fully committed to protecting the country’s cognitive domain, maintaining total Maritime Domain Awareness and defending the territorial integrity of the country.”

(DARIS JOSE)

PINALAGAN ng Malakanyang ang akusasyon ni Davao City Mayor Sebastian “Baste” Duterte na ginagamit ng administrasyon ang batas upang parusahan ang mga taong ayaw o hindi sumusunod dito.

Sinabi ni Presidential Communications Office (PCO) Undersecretary at Palace Press Officer Claire Castro “Gusto ba nila na hindi kikilos ang gobyerno, hindi susundin ang sinasabi ng batas at hayaan na makaalpas at makaligtas ang mga naaakusahang gumagawa ng krimen laban sa bayan.”

Kaya nga hinamon ni Castro ang mga gumagawa ng alegasyon ng political persecution na direktang tugunan ang akusasyon laban sa kanila sa halip na ipag-ingay na sila’y politically persecuted.

Aniya pa, sa ilalim ng panunungkulan ni Pangulong Ferdinand R. Marcos Jr., ang government authority ay “being exercised properly and in accordance with the law.”

“Bakit hindi sagutin ng diretso ang pag aakusa at hindi puro bintang na pinupulitika sila,” ani Castro.

Tinukoy din ni Castro ang alegasyon na ibinabato sa kapatid ni Mayor Baste na si Vice President Sara Duterte, sabay sabing hanggang ngayon ay walang pagtanggi sa akusasyon na may kaugnayan sa di umano’y maling paggamit ng public funds ang mga nakalipas na pahayag nito kabilang na ang di umano’y usapan sa isang killer.

“Nadinig na ba nila na itinanggi ng Bise Presidente ang isyung paglulustay ng pondo ng bayan at ang pag-amin niyang kumakausap siya ng killer para pumatay,” ayon kay Castro.

Binanggit din ni Castro ang 2011 incident nang suntukin ni VP Sara ang isang sheriff, binigyang diin na ang pag-atake sa isang opisyal ay nagpapatatag ng isang “real abuse of power.”

Tinuran ni Castro na nananatiling committed ang administrasyon sa rule of law at pinaalalahanan na ang legal processes ay dapat na magpatuloy alinsunod sa Konstitusyon at umiiral na batas. ( DARIS JOSE)

CALOOCAN CITY — Hindi kailanman pumasok sa orihinal na plano ni Kapitan Jennette B. Manlapig ang pasukin ang mundo ng politika. Ngunit ngayon, kilala siya bilang isang ehemplo ng maagap at tapat na pamumuno sa Brgy. 69, Zone-6, Distrito 2 ng lungsod.

“Actually, wala po talaga akong planong tumakbo o sumali sa politika,” pahayag ni Kapitan Manlapig. “Subalit ito ang naging huling kahilingan ng mahal ko sa buhay—ang aking namayapang Daddy. Noong siya ay nabubuhay pa, siya ang aking katuwang at gabay sa pagpapatakbo at pagtulong sa aming barangay.”

Bilang pagpupugay sa legasiya ng kanyang ama, agad na kumilos si Kapitan Manlapig nang maupo sa puwesto. Unang sumailalim sa rehabilitasyon ang kanilang Barangay Hall upang mas maging maayos at presentable sa mga bisita at sa mga kabarangay. Upang masiguro naman ang kaligtasan ng komunidad, naglagay siya ng mga CCTV camera at karagdagang mga ilaw sa mga kalsada upang maging maliwanag ang paligid.

Alaga sa Senior Citizens at Kalusugan ng Publiko

Sa ilalim ng kanyang pamamahala, binigyang-halaga ang kapakanan ng mga nakatatanda. Bumili ang barangay ng isang Service Vehicle na nagagamit ng mga Senior Citizen para sa libreng hatid-sundo tuwing sila ay magpapagamot o may check-up sa ospital. Bukod dito, palagi ring nakahanda at libre ang kanilang mga maintenance na gamot.

Dahil sa banta ng tag-ulan, baha, at mga sakit, mahigpit na ipinatutupad ng barangay ang kalinisan at kaayusan:

Proyektong HAPAG: Alinsunod sa programa ng DILG, aktibong isinusulong ng barangay ang urban farming at mga prinsipyo ng Clean & Green.

Pag-iwas sa Pagbaha: Regular ang isinasagawang de-clogging o paglilinis sa mga kanal at estero upang matanggal ang mga naipong basura na sanhi ng pagbara ng tubig.

Disiplina sa Kalsada: Agad na ipinapaalis ang anumang nakabalang o nakasagabal sa daan upang maiwasan ang trapiko at upang hindi ito pamugaran ng mga lamok na nagdadala ng Dengue.

Karangalan Bunga ng Nagkakaisang Serbisyo

Ang ganitong agresibo at tapat na paglilingkod ay hindi nagtagal upang mapansin. Kamakailan lamang ay ginawaran ang Barangay 69 ng prestihiyosong parangal bilang “Most Outstanding Barangay.”

Binigyang-diin ni Kapitan Manlapig na ang tagumpay na ito ay bunga ng pagkakaisa. Lubos ang kanyang pasasalamat sa kanyang mga Barangay Staff at mga Kagawad sa kanilang walang sawang pakikipagtulungan. Nagpaabot din siya ng pasasalamat kina Mayor Along Malapitan at Congressman Oca Malapitan sa patuloy na suporta at mga ambag sa pag-unlad ng kanilang barangay.

Sa pamamagitan ng gawa, malasakit, ngalan ng kanyang ama, pinatutunayan ng “The Action Lady” na ang tunay na pinuno ay nakikita sa mabilis at konkretong aksyon.

( Sonny Asignacion)

TIAONG, QUEZON – Naging makasaysayan at punong-puno ng sigla ang ginanap na Mayor RJM Night noong gabi ng Hunyo 24, 2026, sa Festival Stage ng Municipal Hall Grounds. Bilang bahagi ng BayaniJuan Festival 2026, pinangunahan ni Mayor RJ Mea ang gabing ito na dinaluhan ng napakaraming mamamayan upang saksihan ang pagtatanghal ng mga tanyag na artista.

Naging sentro ng atensyon ang mga de-kalibreng pagtatanghal na nagpasigla sa mga Tiaongin. Kabilang sa mga nagbigay ng saya at musikang tumatak sa mga manonood ay ang kilalang OPM icon na si Chito Miranda, na naghatid ng enerhiya sa entablado. Hindi rin nagpahuli ang sikat na aktor at performer na si Piolo Pascual, na nagbigay ng kanyang espesyal na pagtatanghal para sa mga mamamayan ng Tiaong.

Higit pang nagpasaya sa gabi ang partisipasyon ng paboritong performer na si Maymay Entrata. Ang kanyang masiglang pagtatanghal ay nagdagdag ng kulay at tuwa sa nasabing festival night, na tunay na kinatuwaan ng mga kabataang Tiaongin at ng buong madla.

Sa mensahe ni Mayor RJ Mea, ipinaabot niya ang kanyang pasasalamat sa mga artistang nakibahagi sa pagdiriwang at sa lahat ng mga mamamayang nagpakita ng suporta sa pagpapatuloy ng BayaniJuan Festival. Ang matagumpay na pagtitipon na ito ay patunay ng pagkakaisa at masayang kultura ng mga taga-Tiaong.

Ang gabi ay nagtapos na may kagalakan sa puso ng bawat dumalo, na magsisilbi ring alaala ng isang masigla at matagumpay na selebrasyon para sa bayan ng Tiaong. (Yvonne Bagang/ Photos Boy Morales)

CALABARZON — Opisyal nang umupo ngayong Biyernes si Police Brigadier General Dominic Baccay bilang bagong Regional Director ng Police Regional Office (PRO) 4A (Calabarzon). Pinalitan niya si PBrig. Gen. Hansel Marantan, na nagretiro na sa serbisyo matapos maabot ang mandatory retirement age na 56 taong gulang.

Si Baccay, na itinuturing na isa sa mga pinakabatang miyembro at karangalan ng Philippine National Police Academy (PNPA) “Kapanalig” Class of 1997, ay hindi na bago sa rehiyon. Bago ang itinalagang liderato, nagsilbi na siya bilang Deputy Regional Director for Operations (DRDO) ng PRO-4A sa ilalim ng pamumuno ng dating Regional Director na si PBrig. Gen. Paul Kenneth Lucas. Dahil dito, kabisado na niya ang sitwasyong pampulitika, heograpiya, at mga katangiang pisikal ng buong rehiyon.

Nakuha naman ni Baccay ang kanyang ranggo bilang isang heneral (one-star general) noong siya ay italaga bilang Executive Officer ng PNP Directorate for Logistics (DL).

Inaasahang magiging malaking tulong ang kanyang malawak na karanasan sa operasyon upang mapanatili ang kapayapaan at kaayusan sa Calabarzon.

(Yvonne Bagang/ Boy Morales)

APAT na hinihinalang drug personalities kabilang ang 17-anyos na senior high school student ang naaresto ng pulisya sa anti-criminality operation sa magkahiwalay na lugar sa Valenzuela City.

Alas-11:40 ng tanghali nang makuhanan umano ng isang transparent plastic sachet ng umano’y pinatuyong dahon ng marijuana ang binatilyong estudyante makaraang tangkain takasan ang mga tauhan ni Police Sub-Station 3 Commander P/Capt. Joan Dorado na nagsasagawa ng ‘Oplan Sita’ sa Sampaguita Street corner Dama De Noche, Brgy., Marulas habang sakay ng isang motorsiklo.

Naaktuhan naman ng mga tauhan ng Police Sub-Station 7 ang dalawang kelot na nagsusugal umano ng ‘cara y cruz’ sa A Dolorito St,, Brgy. Punturin alas-8:50 ng gabi at nasamsam sa kanila ang bet money, pangara at isang plastic sachet ng suspected shabu na nakuha umano kay alyas “Ruel”, nasa hustong gulang.

Nauna rito, naaresto ng mga tauhan ng Police Sub-Station 1 ang dalawang indibidwal na nagsusugal umano ng ‘lucky 9’ sa D. Bonifacio St., Brgy. Canumay East alas-6:10 ng gabi at nakumpiska sa kanila ang gamit na baraha, bet money at isang plastic sachet na naglalaman ng hinihinalang shabu na nakuha umano kay alyas “Carlos”.

Sa Brgy., Malinta, nadakip din ng mga tauhan ng Police Sub-Station 4 ang dalawang lalaki habang nagsusugal naman umano ng ‘dice game’sa Pinagpala St., Sito Pinalagad pasado alas-9:30 ng gabi. Nakuha sa kanila ang bet money, dice cube at isang plastic sachet ng umano’y shabu na nasamsam umano kay alyas “Marvin’, 27.

Hinihikayat naman ni Valenzuela Police P/Col. Joseph Talento ang publiko na makiisa sa pagpapanatili ng kapayapaan at kaayusan sa pamamagitan ng maagap na pagbibigay ng impormasyon tungkol sa mga kahina-hinalang aktibidad. (Richard Mesa)

KALABOSO ang isang tulak na tricycle driver na itinuturing bilang High-Value Individual (HVI) matapos makuhanan ng mahigit P.3 milyong halaga ng shabu nang maaresto sa buy bust operation sa Caloocan City, Sabado ng hating gabi.

Sa ulat ni Caloocan Police Chief P/Col. Joey Goforth kay Northern Police District (NPD) Acting Director P/BGen. Benliner Capili, ang suspek ay isang 22-anyos na tricycle driver na kabilang sa kanilang drug watchlist.

Nang magawang makipagtransaksyon sa suspek ng isa sa mga operatiba ng Station Drug Enforcement Unit (SDEU), kaagad ikinasa ng mga ito sa pangunguna ni P/Lt. Restie Mables ang buy bust operation, sa koordinasyon sa PDEA.

Hindi na nakapalag ang suspek nang sunggaban ng mga operatiba ng SDEU matapos umanong tanggapin ang marked money mula sa isang pulis na nagpanggap na buyer kapalit ng isang plastic sachet ng shabu dakong alas-12:13 ng hating gabi sa Remedios St., Brgy., 180. 

Umaabot sa 55.11 grams ng suspected shabu na nagkakahalaga ng P374,748.00 ang nasamsam sa suspek, kasama ang buy bust money na isang tunay na P500 bill at 27 pirasong boodle money at isang motorsiklo.

Mahaharap ang suspek sa kasong paglabag sa Sections 5 at 11 ng R.A 9165 o ang Comprehensive Dangerous Drug Act of 2002 sa Caloocan City Prosecutor’s Office. (Richard Mesa)