INILUNSAD ng House of Representatives ang Diwang Yakap project nitong Huwebes sa layuning matulungan ang mga persons with disabilities (PWD), senior citizens, mga empleyado o bisita na nangangailangan ng mobility assistance o pag-alalay.

Ayon kay House Speaker Faustino “Bojie” G. Dy III, ang proyekto ay magpapahiram ng mga wheelchairs sa mga taong nangangailangan habang nasa loob ng House of Representatives at mga opisina nito.

“Today we affirm a foundational truth. Every single Filipino deserves to be seen, valued, respected and given an unhindered path to reach their full potential,” pahayag ni Speaker Dy sa isang mensahe na binasa ni Office of the Speaker Deputy Secretary General Atty. Maria Margarita Garalde-Chua. 

Inilarawan ni Dy ang Diwang Yakap bilang tugon sa commitment ng Kamara na bigyan ng oportunidad ang mga mamamayan na bisitahin ang mga mambabatas at saksihan ang pagbabalangkas ng lehislatura.

Ayon naman kay House Secretary General Atty. Cheloy Velicaria-Garafil, ang inisyatibo ay naglalarawan ng commitment ng Kamara na paglingkuran ang publiko.

“Today we gather not merely to launch a program but to reaffirm a fundamental principle that public service is at its best when it is compassionate, inclusive and accessible to all,” sinabi ni Garafil. 

Ang proyekto ay pinasimulan ng donasyon ng 50 wheelchairs ng Taiwan Association, Inc. of the Philippines (TAPh), kasama ang suporta ng Taipei Economic and Cultural Office (TECO). 

Nagpasalamat ang mga mambabatas sa TAPh at TECO sa kanilang inisyatibo. Nagpasalamat din si Garafil sa mga Taiwanese partners sa kolaborasyon sa kanyang panunungkulan bilang chairperson ng Manila Economic and Cultural Office (MECO). 

Sinabi naman ni TAPh President Jia Hsieh na ang wheelchair donation ay kabilang sa kanilang charitable initiatives sa Pilipinas at sumisimbulo ng kanilang pasasalamat sa Filipino community habang pinagtitibay ang relasyon ng Taiwan sa bansa. 

(Vina de Guzman)

TINIYAK ni House Speaker Faustino “Bojie” Dy III ang agarang tulong mula sa Kamara at national government sa mga komunidad na naapektuhan ng malawakang fishkill sa Ramon, Isabela nitong nakaraang Lunes.

Sa pagbisita ni Dy sa mga nasabing komunidad, personal nitong inalam ang sitwasyon at anong tulong ang kinakailangan.

Aniya, naiulat na niya ang sitwasyon kay Pangulong Ferdinand R. Marcos Jr. at Department of Agriculture bago nagtungo sa Isabela. 

“Titingnan po natin kung ano pong pinaka-agaran at mabilis na paraan para makatulong tayo sa ating mga naapektuhang kababayan dito sa ating lalawigan ng Isabela,” sabi ni Dy.

Batay sa paunang ulat, libu-libong isda ang namatay sa mga fish cages malapit sa Magat Dam. Umaabot ₱120 million halaga ng isda ang namatay sa Magat, kabilang ang mahigit ₱20 million sa bayan ng Ramon.

“Ngayon kami po ay makikinig sa mga report para lalo pong kami rin ay makapagbigay ng update sa national para sa ganoon kung ano pa po ang dapat naming gawin para mabigyan natin ng tamang solusyon at tamang pagtulong sa ating mga naapektuhang kababayan dito sa ating lalawigan ng Isabela,” sabi ni Dy 

Naunang naobserbahan ang mga namamatay na isda noon pang June 23, na dahil umano sa tagtuyot at sobrang init ng panahon na nagpababa sa lebel ng Magat Dam. (Vina de Guzman)

ANG walang katapusan na “objection” at delaying tactics ng defense lawyers ni Vice President Sara Duterte sa impeachment trial sa Senado ay nangangahulugan lamang ng kawalan ng sapat sa depensa at interes na sagutin ang mga alegasyon laban sa kanya.

“Walang katapusang objection sa lahat ng bagay,” sinabi ni Deputy Minority Leader at ACT Teachers Party-list Rep. Antonio Tinio.

Ayon kay Tinio, puro drama si Duterte at hindi sineseryoso ang impeachment trial. 

Tinukoy ni Tinio ang maikling pahayag ni Duterte sa media,“In this bloodbath and bludgeoning, I will be bloodied but unbowed.”

“Ang statement niya ay puro drama. Hindi nag-address sa kahit anong alegasyon. Hindi nito ipinakita ang kahandaan niyang harapin ang trial nang personal,” dagdag ng kongresista.

Ayon kay Tinio, ang istratehiya ng defense panel ay iwasan o pigilan ang presentasyon ng ebidensya gamit ang mga teknikalidad. harangin o huwag ipalabas ang mga ebidensiya na makikita ng publiko.

“Ito ay nagpapakita na takot sila na malantad ang mga paglabag ni Duterte sa publiko. Kung walang kasalanan, bakit kailangan pang harangin ang ebidensya?” tanong ni Tinio.

Tinukoy ni Tinio ang mga online videos ni Duterte na nagbabantantang papatayin si Pangulong Ferdinand R. Marcos Jr., Unang Ginang Liza Araneta Marcos at dating House Speaker Martin Romualdez.

“Napanood na ng madla ang mga press conference ni Duterte kung saan nagbitaw siya ng mga banta. Ang kaibahan ngayon ay itinuturing nang ebidensya ang mga videos sa isang impeachment trial. Ito ang isang magiging batayan para matanggal sa pwesto si Duterte. Kaya natatakot ang depensa na ipakita ito sa opisyal na proseso,” sinabi ni Tinio.

Pinuri ni Tinio ang prosecution na naging matatag sa gitna ng pambabatikos ng defense panel.

 “Ang prosecution ay malinaw na inilatag ang kaso. Ang NBI witness at video evidence ay nagpakita ng seryoso at dokumentadong nature ng mga banta na inilabas ng Vice President. Ang depensa ay walang sagot kundi objections,” sabi ni Tinio. 

“Dapat ipagpatuloy ang trial nang walang tigil at walang takot sa delaying tactics. Ang bayan ay naghihintay ng accountability. Hindi dapat payagan ang depensa na gawing drama ang prosesong ito.” 

(Vina de Guzman)

BILANG pagpapatibay sa pangako nito sa environmental sustainability at responsableng pamamahala ng basura, lumagda sa isang Memorandum of Agreement (MOA) ang Pamahalaang Lungsod ng Valenzuela, sa pamamagitan ng City Environment and Natural Resources Office (CENRO) kasama ang Coca-Cola Europacific Aboitiz Philippines (CCEAP) at mga opisyal ng Barangay Ugong para palakasin pa ang pagpapatupad ng Tapon to Ipon Program.

Ang partnership ay nagmamarka ng isa pang makabuluhang hakbang sa mga pagsisikap ng lungsod na mapabuti ang recovery ng mga basurang plastik at isulong ang isang circular economy sa antas ng komunidad. Bilang bahagi ng kasunduan, nagbigay ang CCEAP ng isang baling machine, na ngayon ay nakatalaga sa Material Recovery Facility (MRF) sa Barangay Ugong upang suportahan ang mahusay na koleksyon, compaction, at recycling ng PET (Polyethylene Terephthalate) plastic bottles.

Ang karagdagang pasilidad ay inaasahang magpapahusay sa mga operasyon ng plastic recovery ng barangay, hikayatin ang mga residente sa wastong paghihiwalay ng basura, at gawing mas madaling ma-access at mahusay ang pag-recycle para sa komunidad. Nakakatulong din ang inisyatiba na mabawasan ang mga basurang plastik na maaaring mapunta sa mga landfill o mga daluyan ng tubig.

Sa pamamagitan ng pakikipagtulungan sa pribadong sektor, patuloy na isinusulong ng pamahalaang lungsod ang mga makabago at napapanatiling programang pangkapaligiran na naghihikayat sa aktibong pakikilahok ng komunidad habang isinusulong ang responsableng pamamahala ng basura at pangangalaga sa kapaligiran.

Binigyang-diin ni Mayor WES Gatchalian ang kahalagahan ng pagtutulungan sa pagsusulong ng bisyon ng lungsod ng sustainable urban development.

“Ang aming misyon ay gawing hindi lamang isang industriyal na lungsod ang Lungsod ng Valenzuela, kundi pati na rin isang lungsod na matitirahan. Ang pagkamit nito ay nangangahulugan na ang kalinisan at epektibong pamamahala ng basura ay nananatiling ating pangunahing priyoridad,” sabi ni Mayor Gatchalian.

Ang pagpapatupad ng Tapon to Ipon Program ay sumasalamin sa patuloy na pangako ng Lungsod sa pagbuo ng isang mas malinis, luntian, at mas napapanatiling kinabukasan. (Richard Mesa)