ANG napipintong pag-aresto kay Sen. Rodante Marcoleta sa kinakaharap nitong kasong plunder ay walang kinalaman sa impeachment trial ni Vice President Sara Duterte sa Senado.

Ito ay ayon kay dating Surigao del Norte congressman Robert Ace Barbers, tagapagsalita ng House prosecution panel at impeachment trial adviser.

Dinismiss ni Barbers ang pahayag ni Marcoleta na ang impending plunder case laban sa kanya at ang napipintong pag- aresto ay kabilang sa hakbang na tanggalin siya bilang isa sa mga senator-judges sa impeachment proceedings laban kay Duterte.

Ayon kay Barbers, walang kinalaman ang plunder case ni Marcoleta sa impeachment trial ni Duterte.

“Well, nirerespeto ko ‘yung kanyang (Marcoleta’s) opinion. In fact, karapatan niya ‘yan na ganyan ang kanyang paniniwala. Kaibigan po natin ‘yang si Senator Marcoleta, pero para sa akin, personally, walang kinalaman dito sa impeachment na ito ‘yung kasong kakaharapin niya,” ani Barbers. 

Sinabi ni Barbers na lininaw ng Office of the Ombudsman na ang plunder complaint laban kay Marcoleta ay nag-ugat sa pahayag at pag amin nito na nakatanggap siya ng P75 million mula sa tatlong “kaibigan” bilang campaign funds na hindi niya nai deklara sa kanyang Statement of Assets, Liabilities and Net Worth (SALN) at Statement of Contributions and Expenditures (SOCE) noong May 2025 mid-term elections.

Tinukoy ni Barbers na tinanggap umano ni Marcoleta ang pera noon nung siya’y naninilbihan bilang Sagip Party-list sa Kamara. Dito kumilos ang Ombudsman.

“Sabi ng Office of the Ombudsman, nanggaling sa kanya (Marcoleta) ang admission o revelation. At dahil sa information na ‘yan, umakto immediately ang government anti-graft body about it. So that’s another problem that must be resolved by Senator Marcoleta. But this has nothing to do with the impeachment trial of VP Sara Duterte,” sabi ni Barbers.

Idinagdag ni Barbers na ang pagkilos ng Ombudsman laban kay Marcoleta ay dahil sa mga dinetalye ng senador nung nahaharap siya sa kaso ng violation ng kanyang SOCE sa Commission on Elections (Comelec) na kalaunan ay na dismiss.

Iginiit ni Barbers na lahat ng legal na problema na kinakaharap ng bawat senator-judges ay hindi dapat iugnay sa impeachment proceedings. (Vina de Guzman)

WALANG ebidensiya o sinumpaang salaysay na nag-uugnay kay Leyte Rep. Ferdinand Martin G. Romualdez sa anumang anomalya hinggil mga flood control projects.

Ito ang iginiit ni Atty. Elaine A. Atienza, tagapagsalita ni Romualdez, tungkol sa mga alegasyon na kinasasangkutan ng dating House Speaker sa mga anomalya.

Ayon kay kay Atienza, ang mga alegasyon laban kay Romualdez ay hindi tumutugma sa proseso ng pagbabalangkas ng national budget sa Kamara.

Sa gitna ng malawakang imbestigasyon ng Kamara at ng Senado, walang sinumang opisyal ng Department of Public Works and Highways (DPWH) ang direktang nagturo kay Romualdez na sangkot sa mga anomalya.

Kahit si dating DPWH Manuel Bonoan mismo ay hindi itinuro si Romualdez, tinukoy ni Atienza.

“Simple lang kung bakit — because Rep. Romualdez was not involved,” sabi ni Atienza..

 “The issue traces back to the national budget process. Sa prosesong iyan — no single person—not even the Speaker of the House—can control,” aniya.

Pinaliwanag ni Atienza na ang National Expenditure Program (NEP) ay binabalangkas ng Executive branch sa pangunguna ng Department of Budget and Management (DBM) at ibang ahensiya ng gobyerno, kabilang ang DPWH, bago ito isumite sa Kamara at sa Senado.

“No Speaker can dictate upon Cabinet secretaries. Neither can he dictate upon senators, who exercise their own independent constitutional mandate. Sila po ay pantay-pantay diyan being elected officials. Primus inter pares,” sabi ni Atienza.

Aniya, sa oras na maisabatas ang national budget, wala nang kapangyarihan o impluwensiya ang Speaker sa mga project bidding, contract awards, implementation, inspections, payments or the release of government funds. 

“Hindi niya po saklaw ang pagpapa-release ng budget. Those are functions vested by law in the Executive Branch,” sabi ni Atienza. “Hindi kayang utusan ng Speaker ang DPWH Secretary. Hindi niya kayang diktahan ang DBM o ang Senado. At lalong hindi siya ang nagpa-plano ng proyekto, nagpapa-bid, nag-a-award ng kontrata, nag-iinspeksyon, o naglalabas ng pondo.” 

Ayon kay Atienza, ang mga alegasyon na pumipilit na si Romualdez ay “mastermind” ng mga anomalya sa budget at infrastructure process ay isang “political convenience” ng mga kalaban ng administrasyon.

“Ang gustong palabasin ng iba, parang iisang tao ang may hawak ng buong gobyerno. Hindi po ganoon ang ating Konstitusyon. If there were irregularities in any infrastructure project, then those who actually exercised legal and operational authority should be identified and held accountable. Accountability must follow the evidence—not political convenience,” ani Atienza. 

“Kung may nagkasala, papanagutin natin. Pero huwag nating gawing shortcut ang paghahanap ng isang malaking pangalan para lang may maipakita sa publiko. Sa paghahanap ng hustisya, hindi puwedeng mauna ang akusasyon bago ang ebidensya. Sa batas, ang ebidensya ang nagtuturo kung sino ang mananagot,” dagdag nito. 

(VINA de GUZMAN)

SHOOT sa kulungan ang 52-anyos na mister nang makuhanan ng hindi lisensyadong baril sa bisa ng ipinatupad na search warrant ng pulisya sa Navotas City.

Sa kanyang ulat kay Northern Police District (NPD) Acting Director P/BGen. Benliner Capili, sinabi ni Navotas Police Chief P/Col. Renante Pinuela na nakatanggap sila ng impormasyon na nagmamay-ari umano ng ilegal na baril ang suspek na si alyas “Romy”.

Nang mag-isyu ng search warrant ang Regional Trial Court, Branch 288, Navotas City , kaagad bumuo ng team ang mga tauhan ni Col. Pinuela na kinabibilangan ng Intelligence Section, Patrol Base 2, at SWAT bago sinalakay ang bahay ng suspek.

Sa bisa ng nasabing search warrant, hinalughog ng mga pulis ang loob ng bahay ng suspek sa Brgy. Tangos South, kung saan nasamsam ang isang calibre .38 revolver na may tatlong bala.

Nang hanapan siya ng kaukulang mga dokumento hinggil sa ligaledad ng nasabing baril ay wala siyang naipakita na dahilan upang posasan ng mga pulis ang suspek na mahaharap sa kasong paglabag sa Republic Act 10591 (Comprehensive Firearms and Ammunition Regulation Act).

Sinabi ni Col. Pinuela na patuloy ang mahigpit nilang pagpapatupad ng batas laban sa ilegal na pagmamay-ari ng mga baril upang matiyak ang kaligtasan ng publiko at maiwasan ang mga insidenteng maaaring magdulot ng panganib sa buhay at ari-arian. (Richard Mesa)

BAGSAK sa kulungan ang 46-anyos na sundalo ng Philippine Army na nahaharap sa kasong Murder may sampung taon na ang nakalilipas matapos maaresto habang nasa bisinidad ng Caloocan Judicial Complex sa Caloocan City.

Sa ulat ng tanggapan ni Northern Police District (NPD) Director P/BGen. Benliner Capili. nagtungo si alyas “Erwin”, residente ng Brgy. Tabuk, Isabela City, Basilan, sa Judicial Complex sa 10th Avenue dakong ala-1:25 ng hapon upang kumuha ng court clearance sa pag-aakalang na-dismiss na ang kanyang kaso na dahilan para siya maaresto.

Nagtago umano ang sundalo matapos masangkot sa kasong murder at lumutang lang muli sa pag-aakalang sarado na ang usapin matapos ibasura ng hukuman ang kaso laban sa kanyang mga kasama.

Hindi na nakapalag ang akusado nang isilbi sa kanya ng pulisya, kasama ang legal officer ng hukuman, ang warrant of arrest na inilabas noong Mayo 16, 2016, ni Caloocan Regional Trial Court (RTC) Assisting Judge Rosalia Hipolito-Bunagan ng Branch 121 ng walang piyansang inirekomenda.

Ani Bgen. Capili, ang operasyon ay bahagi ng pinaigting na kampanya ng NPD laban sa mga wanted na indibidwal at sa patuloy na pagsusulong ng kapayapaan, kaayusan, at hustisya sa lugar ng CaMaNaVa.

 (Richard Mesa)