MAS marami ng miyembro at pensioner ng Government Service Insurance System (GSIS) ang maaaring makinabang sa pinalawak na Balik Ginhawa 2 Program, na nagbibigay ng refund na katumbas ng hanggang anim na buwang kwalipikadong loan amortizations.

Bahagi ito ng direktiba ni Pangulong Ferdinand R. Marcos Jr. na magbigay ng mas malaking tulong pinansyal sa mga miyembro ng GSIS.

“Alinsunod sa direktiba ni Pangulong Ferdinand R. Marcos Jr., mas pinalawak, mas pinadali, at mas pinalaki ang Balik Ginhawa 2 ng GSIS para mas marami pang miyembro at pensioners ang makikinabang,” ani Presidential Communications Office (PCO) Undersecretary at Palace Press Officer Claire Castro.

Ipinaliwanag din ni Castro ,“Sa ilalim ng programa — refund na katumbas ng hanggang six months’ qualified loan amortizations, saklaw ang payments mula December 2025 hanggang May 2026.”

Ayon sa GSIS, layunin ng pinalawak na programa na magbigay ng karagdagang tulong-pinansyal sa mga miyembro at hikayatin silang panatilihing maayos ang kanilang loan accounts.

“Maaari na ring mag-avail kahit may arrears, basta’t hindi pa due and demandable ang inyong mga loan. Patunay lamang ang programang ito ng mas malaking ginhawa ang naghihintay sa bawat member ng GSIS sa Balik Ginhawa 2,” ang winika ni Castro.

Hinikayat naman ng GSIS ang mga kwalipikadong miyembro at pensioner na alamin ang kanilang eligibility at mag-apply sa pamamagitan ng opisyal na website ng GSIS o ng GSIS Touch mobile application.

“Para sa karagdagang impormasyon, bisitahin lang ang website ng GSIS at mag-apply na gamit ang GSIS Touch app,” dagdag na pahayag ni Castro.  

(DARIS JOSE)

INIHAYAG ni Caloocan City 2nd District Rep. Edgar R. “Egay” Erice na ang kamakailang deklarasyon ng World Bank na ang Pilipinas ay nakamit ang upper-middle-income status ay higit na walang saysay sa karamihan ng mga Pilipino na ang mga kita ay nananatiling malayo sa iniulat na pambansang average.

Ayon kay Erice, ang klasipikasyon ng World Bank ay batay sa Gross National Income (GNI) per capita ng bansa na lumampas sa threshold US$4,635.

Gayunpaman, idiniin niya na ang mga numero ng per capita income ay hindi tumpak na sumasalamin sa mga realidad sa ekonomiya na kinakaharap ng karamihan sa mga pamilyang Pilipino at may posibilidad na itago ang hindi pagkakapantay-pantay ng kita sa bansa.

“The income of most Filipinos is significantly lower than the reported per capita income. The figure hides the enormous gap between the poor and middle class on one hand, and the very small number of extremely wealthy Filipinos on the other,” ani Erice.

Ipinaliwanag niya na ang pinakamayamang indibidwal sa bansa ay nagtataglay ng napakalaking kayamanan na artipisyal nilang pinapataas ang pambansang average na kita.

“To illustrate, if a billionaire enters a room with 99 penniless people, the average wealth of everyone in that room would immediately skyrocket. Yet the reality remains that 99 of the 100 people are still poor,” dagdag niya.

Nanawagan ang mambabatas sa gobyerno na maglabas ng mas detalyadong data ng kita na sumasalamin sa aktwal na kalagayan ng ekonomiya ng mga pamilyang Pilipino sa iba’t ibang income groups.

“The government should present the average income of Filipino households according to economic class—the poor, lower-middle class, middle class, upper-middle class, and the wealthy. This would provide a clearer picture of the real condition of Filipino families and help policymakers design programs that directly address the needs of each sector,” giit ni Erice.

Idinagdag niya na ang pag-asa lamang sa mga pinagsama-samang tagapagpahiwatig tulad ng GNI per capita ay maaaring lumikha ng mapanlinlang na impresyon ng pag-unlad ng ekonomiya habang ang milyun-milyong Pilipino ay patuloy na nakikibaka sa pagtaas ng mga presyo, mababang sahod, at limitadong mga oportunidad sa ekonomiya. (Richard Mesa)

NAGBIGAY-pugay si Pangulong Ferdinand Marcos Jr. kay dating Unang Ginang Imelda Romualdez Marcos na nagdiriwang ng kanyang ika-siyamnapu’t pitong kaarawan, ngayong araw ng Huwebes, Hulyo 2.

Sa kanyang taos pusong mensahe ng kaarawan, pinuri ng Pangulo ang “extraordinary life” ng kanyang ina.

Sa isang social media post, ang birthday wish ng Pangulo sa kanyang ina ay mas marami pang taon na makasama pa nila ito.

“Few are blessed with the gift of celebrating 97 years. Fewer still are blessed to spend them surrounded by children, grandchildren and great-grandchildren who continue to draw strength from your love and guidance,” ang sinabi ng Pangulo.

“You have lived an extraordinary life. One that has witnessed history, shaped our family and left an indelible mark on our nation. Through decades of public service, you touched lives in ways that continue to be remembered,” aniya pa rin.

Inilarawan naman ng Pangulo ang dating Unang Ginang bilang “puso” ng kanilang pamilya at “the best Mum” na maaari nilang hilingin pa.

Sa kabilang dako, sa hiwalay na post, binati naman ni Unang Ginang Liza Araneta-Marcos ang kanyang biyenan na si Unang Ginang Imelda o “Mama Meldy” sa kaarawan nito. 

( DARIS JOSE)

Ang Pamumuno ni Kap. Rodel Cruz sa Barangay 148

CALOOCAN CITY — Patuloy ang pag-usbong ng pag-asa at kaunlaran sa Barangay 148, Zone 13, Distrito 1 sa ilalim ng dedikadong pamumuno ni Barangay Chairman Rodel Cruz. Sa pamamagitan ng kanyang mga programang nakasentro sa kapakanan ng mamamayan, napatunayan ng barangay na ang tunay na malasakit ay ipinapakita sa gawa.

Kalusugan at Edukasyon: Pundasyon ng Kinabukasan

Binibigyang-priyoridad ni Kap. Cruz ang kalusugan at kinabukasan ng mga kabataan. Regular na isinasagawa ang Feeding Program upang masugpo ang malnutrisyon at matiyak na malusog ang pangangatawan ng mga pag-asa ng bayan. Bukod dito, nagpatayo rin ang pamahalaang barangay ng isang modernong Day Care Center upang masiguro ang de-kalidad na paunang edukasyon para sa mga paslit.

Kalinisan at Kalikasan: Isang Luntiang Komunidad

Aktibo rin ang barangay sa pangangalaga sa kapaligiran sa pamamagitan ng regular na Clean-up Drive. Kaisa rin ang komunidad sa “HAPAG” (Halina’t Magtanim ng Prutas at Gulay) Program na inisyatibo ng DILG. Sa pamamagitan nito, nahihikayat ang mga residente na magtanim ng mga sariwang gulay at prutas na nagbibigay ng masustansyang pagkain sa bawat pamilya.

Seguridad at Kaayusan: Ligtas na Iskinita at Kalsada

Upang mapanatili ang kapayapaan at maiwasan ang kriminalidad, nagpatayo si Kap. Cruz ng mga CCTV camera sa mga estratehikong lugar. Sinabayan din ito ng malawakang pagpapailaw sa mga kalsada at madidilim na iskinita, upang maging ligtas ang paglakad ng mga residente anomang oras ng gabi.

Alaga sa Senior Citizens at Pag-asa ng Kabataan

Hindi nakakalimutan ng barangay ang mga nakatatanda; mayroong hatid-sundo program para sa mga Senior Citizen na may importanteng lakad. Para naman sa mga kabataan, katuwang ang Sangguniang Kabataan (SK), namahagi ang barangay ng libreng uniporme para sa mga estudyante. Inilunsad din ang Liga ng Basketball upang ilayo ang mga kabataan sa masamang bisyo at itaguyod ang sportsmanship.

Pagkakaisa Tungo sa Kaunlaran

Lubos ang pasasalamat ni Kap. Rodel Cruz kay Mayor Along Malapitan sa walang sawang suporta at tulong na ibinubuhos nito sa kanilang barangay. Nagpapasalamat din siya sa bawat kapitbahay at residente na patuloy na nakikiisa sa mga proyekto.

Ayon kay Kap. Cruz, ang susi sa mas maunlad na pamayanan ay ang patuloy na pagtutulungan at pagkakaisa, dahil sa Barangay 148—”Walang Iwanan!” 

( Sonny Asignacion)

KULUNGAN ang kinasadlakan ng tatlong hinihinalang drug personalities matapos maaresto ng pulisya sa anti-criminality operation sa magkahiwalay na lugar sa Valenzuela City.

Sa ulat, alas-12:35 ng hating gabi, nagsasagawa ng anti-criminality operation ang mga tauhan ng Police Sub-Station 9 sa Santan St., BSOP, Brgy., Karuhatan nang mapansin nila si alyas “Chilf”, 27, na nagyoyosi umano sa pampublikong lugar na malinaw na paglabag sa umiiral na ordinansa.

Nang lapitan nina Pat Adrian Calagui at Pat Bryan Varona para isyuhan ng Ordinance Violation Receipt (OVR) ay bigla umanong itinulak ng suspek si Calagui bago nagtangkang tumakas kaya hinabil siya hanggang sa maaresto at nakuha sa kanya ang isang plastic sachet na naglalaman ng hinihinalang shabu na nagkakahalaga ng P1,360.

Nauna rito, pasado alas-3:46 ng hapon nang maaktuhan ng mga tauhan ng Police Sub-Station 3 si alyas “Aran”, 26, na sumisinghot umano ng shabu sa loob ng isang abandonadong bahay sa Antonette Townhomes, Brgy. Marulas.

Nakumpiska sa kanya ang isang plastic sachet na naglalaman ng hinihinalang shabu, isang nakabukas na plastic sachet na may bahid ng umano’y shabu at drug parapernalya.

Sa Brgy., Canumay West, naaresto naman nina PCpl John Ray Laredo at Pat R-Jay Tagnong, kapwa nakatalaga sa Police Sub-Station 1 ang dalawang indibidwal na nagsusugal umano ng ‘lucky 9’ sa harap ng isang bahay sa Filrezam, 2nd Sreet dakong alas-6:30 ng gabi.

Nasamsam sa kanila ang bet money, gamit na baraha at isang plastic sachet na naglalaman ng hinihinalang shabu na nakuha umano kay alyas “Lyn”, 41, ng Brgy. Lingunan.

Patuloy na hinihikayat ni Valenzuela Police Chief P/Col. Joseph Talento ang publiko na makiisa sa pagpapanatili ng kapayapaan at kaayusan sa pamamagitan ng maagap na pagbibigay ng impormasyon tungkol sa mga kahina-hinalang gawain. (Richard Mesa)