PINANGUNAHAN ni Unang Ginang Louise Araneta-Marcos, ang pamamahagi ng tulong na bigas sa Barangay Doña Imelda sa ika-apat na distrito ng Quezon City para sa mga pamilyang higit na nangangailangan.

Sa ilalim ng programang Mula sa Puso Para sa Pamilya, layunin ng inisyatiba na makapagbigay ng agarang tulong sa mga pamilya sa Metro Manila.

“Nandito po ako bilang ina kasi alam ko, as a mother, mahalaga na magkaroon ng pagkain sa lamesa natin. Maski na po konting tulong lang ‘to, I hope it goes a long way, few days that we can help you,” ani ng Unang Ginang sa ginanap na programa sa D4 Amphitheater sa Barangay Doña Imelda, kung saan naghatid siya ng mensahe ng pakikiisa, malasakit, at pag-asa.

Ayon kay Quezon City Mayor Joy Belmonte, may kabuuang 1,200 benepisyaryo ang tumanggap ng tig-10 kilong bigas na nagkakahalaga ng P550 bawat isa sa ilalim ng programang pinondohan sa pamamagitan ng Local Government Support Fund (LGSF) na inilabas ng Tanggapan ng Pangulo sa Pamahalaang Lungsod ng Quezon City.

Ang LGSF ay programang pinansyal ng pambansang pamahalaan na nagbibigay ng direktang tulong sa mga local government units (LGU) para sa mga prayoridad na programa, proyektong pang-imprastraktura, at mga serbisyong pampubliko.

Sinabi ni Belmonte na naglaan ang Tanggapan ng Pangulo ng P462.9 milyon para sa rice subsidy program ng Quezon City, na pakikinabangan din ng mga lokal na magsasaka sa pamamagitan ng pagbili ng kanilang ani.

Sinabi rin ng alkalde na ginamit ng lungsod ang Sagip Saka Act upang direktang makipagnegosasyon sa mga kooperatiba ng mga magsasaka para sa lokal na suplay ng bigas.

Idinagdag niya na inaasahang makikinabang sa programa ang kabuuang 210,455 pamilya, o humigit-kumulang 25 porsiyento ng lahat ng pamilya sa Quezon City

Ang isinagawang pamamahagi, araw ng Lunes ay ang ikalawang bugso ng rice distribution program sa Quezon City. Dalawa pang bugso ang isasagawa upang makumpleto ang apat na nakatakdang distribusyon.

Sinabi naman ni San Juan City Mayor Francis Zamora, na siya ring pangulo ng Metro Manila Council, na ipatutupad din ang kaparehong programa sa iba pang lungsod sa Metro Manila na tatagal hanggang Nobyembre ngayong taon. ( DARIS JOSE)

NANAWAGAN si House Minority Leader at 4Ps Party-list Rep. Marcelino “Nonoy” Libanan sa mga local government units (LGUs) at community organizations na maghanda sa napipintong El Niño-induced dry weather conditions sa pamamagitan ng paggamit sa P1-billion People’s Survival Fund (PSF) para sa climate adaptation projects, kabilang na ang rainwater harvesting systems.

Ayon sa mambabatas, nakapaloob sa 2026 General Appropriations Act ang P1 billion para sa People’s Survival Fund upang mapondohan ang mga climate adaptation initiatives, kabilang na ang installation ng rainwater collection at storage systems na magpapalakas sa paghahanda ng komunidad kapag nagkaroon ng freshwater shortages.

Aniya, maaaring i-access ng LGUs at community organizations ang PSF financing para sa mga eligible projects na naglalayong mabawasan ang panganib na dala ng matinding epekto ng klima.

Ang panawagan ay ginawa ng mambabatas kasunod ng babala ng Philippine Atmospheric, Geophysical and Astronomical Services Administration (PAGASA) na ang Metro Manila at 47 probinsiya ay maaaring dumanas ng below-normal rainfall sa mga darating na buan dahil sa El Niño.

“We should make rainwater harvesting a regular practice so communities can build up additional freshwater reserves before severe dry periods set in. Every liter of rainwater captured and stored today can help cushion households and communities from water shortages tomorrow. Investing in rainwater harvesting is one of the simplest, most practical, and most cost-effective climate adaptation measures available to us,” dagdag nito.

Sa forecast ng PAGASA, ang Metro Manila at mga probinsiya sa Luzon ay maaaring dumanas ng “dry condition” pagdating ng Nobyembre. Kasama na dito ang Abra, Albay, Apayao, Aurora, Bataan, Batangas, Benguet, Bulacan, Camarines Norte, Catanduanes, Cavite, Ifugao, Ilocos Norte, Ilocos Sur, Isabela, Kalinga, La Union, Laguna, Marinduque, Masbate, Mountain Province, Nueva Ecija, Nueva Vizcaya, Occidental Mindoro, Oriental Mindoro, Palawan, Pampanga, Pangasinan, Quezon, Quirino, Rizal, Romblon, Sorsogon, Tarlac, at Zambales.

Sa Visayas, ang probinsiya ng Aklan, Antique, Biliran, Eastern Samar, Guimaras, Iloilo, Northern Samar, Samar, at Southern Leyte ay inaasahan din na sasailalim sa matinding init sa November.

Habang sa Mindanao, ang probinsiya ng Dinagat Islands at Surigao del Norte ay posible ding tamaan ng dry condition sa Nobyembre.

Inihayag ng PAGASA na ang “dry condition” ay dalawang magkakasunod na buwan ng below-normal rainfall, katumbas ng 21%-60% bawas sa average na ulan.

Ang People’s Survival Fund ay pinangangasiwaan ng board na binubuo ng kalihim mula sa Department of Finance, Department of Budget and Management, Department of the Interior and Local Government, at Department of Economy, Planning and Development; ang chairperson ng Philippine Commission on Women; vice chairperson ng Climate Change Commission; at representatives mula sa scientific community, business sector, at non-governmental organizations.

(Vina de Guzman)

MATAPOS magamot ang tinamong sugat sa kamay at kaliwang hita sanhi ng tama ng bala, binitbit na sa selda ang isang lalaki nang matuklasang walang lisensiya ang baril na aksidente niyang napaputok sa Malabon City.

Sa imbestigasyon, isinugod ng kanyang mga kaanak ang lalaki sa ospital nang aksidenteng mabaril ang sarili sa loob ng kanilang tirahan sa Barangay San Agustin noong Sabado ng madaling araw, gamit ang hawak na kalibre .38 revolver.

Nang makarating sa tanggapan ni Malabon police acting chief P/Col. Kenneth Mission ang pangyayari, agad niyang inatasan ang mga operatiba ng Police Sub-Station-6 na mag-imbestiga sa insidente hanggang matuklasan na walang kaukulang lisensiya o anumang dokumento ang baril na gamit ng biktima.

Nakumpiska rin ng mga pulis ang baril na kargado pa ng isang bala kaya’t nang payagan ng mga doktor na makalabas na ng ospital ang biktima Linggo ng gabi, kaagad siyang inaresto ng pulisya para sampahan ng kasong paglabag sa Comprehensive Firearms ang Ammunition Regulation Act sa Malabon City Prosecutor’s Office.

Sinabi ni Col. Mission na patuloy ang mahigpit nilang pagpapatupad ng batas laban sa ilegal na pagmamay-ari ng mga baril upang matiyak ang kaligtasan ng publiko at maiwasan ang mga insidenteng maaaring magdulot ng panganib sa buhay at ari-arian. (Richard Mesa)

KULUNGAN ang kinasadlakan ng isang lalaki nang maaktuhan ng pulisya na may bitbit na baril habang nakaupo sa Caloocan City, Linggo ng madaling araw.

Ayon kay Caloocan Police Chief P/Col. Joey Goforth, mahaharap sa kasong paglabag sa R.A 10591 o ang Comprehensive Firearms and Ammunition Regulations Act ang suspek na 49-anyos na lalaki at residente ng Barangay 176-C.

Sa kanyang ulat kay Northern Police District (NPD) Acting Director P/BGen. Benliner Capili, sinabi ni Col. Goforth na dakong alas-4:00 ng madaling araw, nagsasagawa ng foot patrol ang mga tauhan ng Police Sub-Station 13 sa nasabing barangay nang mapansin nila ang suspek na nakaupo sa isang eskinita at may hawak umanong baril.

Kaagad nila itong nilapitan saka nagpakilala bilang mga pulis bago kinumpiska ang hawak nitong isang revolver na kargado ng bala.

Nang hanapan ng mga pulis ang suspek ng kaukulang mga dokumento hinggil sa ligaledad ng nasabing baril ay wala itong naipakita kaya inaresto nila ito. 

(Richard Mesa)

ISANG malaking programa sa pagpapalawak ng serbisyong pangkalusugan ang inihahanda ng Pamahalaang Lungsod ng Maynila upang matugunan ang patuloy na pagdami ng mga pasyente sa mga ospital ng lungsod.

Sa panayam ng mga miyembro ng Manila City Hall Press Club, sinabi ni Bise Alkalde Chi Atienza na plano ng lokal na pamahalaan na magtayo ng ilang Super Health Centers sa iba’t ibang bahagi ng lungsod upang mabawasan ang pagsisikip sa mga pampublikong ospital at mapabuti ang akses ng mga residente sa serbisyong medikal.

Ayon kay Atienza, ang mga planong pasilidad ay lalagyan ng makabagong kagamitang medikal at pang-diagnostiko upang mas maraming serbisyong pangkalusugan ang maibigay sa mga residente nang hindi na nila kailangang agad magtungo sa malalaking ospital.

Inaasahang magkakaroon ang mga Super Health Center ng mga kagamitang tulad ng X-ray machine, MRI, at iba pang mahahalagang kagamitan para sa pagsusuri at paggamot ng mga pasyente.

Sinabi ng bise alkalde na layunin ng programang ito na mabawasan ang sobrang dami ng pasyente sa mga district hospital habang inilalapit ang de-kalidad na serbisyong pangkalusugan sa mga komunidad.

Gayunman, humingi si Atienza ng pang-unawa mula sa publiko at binigyang-diin na kinakailangang sumailalim muna sa masusing pag-aaral at pagsusuri ang proyekto bago ito maisakatuparan.

Ipinaliwanag niya na kabilang sa mga pangunahing konsiderasyon ang paglikha ng mga plantilla position at ang pagtiyak na may sapat na pondo para sa mga healthcare worker na magpapatakbo ng mga pasilidad.

“Maganda ang ating plano, ngunit ayaw nating madaliin ang pagpapatupad nito,” ani Atienza. “Kailangan nating tiyakin na kayang sustentuhan ng lungsod ang suweldo at benepisyo ng mga healthcare worker na itatalaga sa mga sentrong ito.”

Binalaan ng bise alkalde na kahit matapos ang konstruksyon ng mga pasilidad, maaaring maantala ang pagbubukas ng mga ito kung walang sapat na pondo para sa pagkuha at pagpapanatili ng mga kwalipikadong healthcare professional.

Aniya, posibleng makumpleto ang mga gusali ngunit hindi agad mapatakbo kung kulang ang mapagkukunan para sa kinakailangang mga tauhan.

Tiniyak ni Atienza sa mga residente na aktibo nilang pinag-aaralan ni Manila Mayor Francisco “Isko Moreno” Domagoso ang iba’t ibang paraan upang maisakatuparan ang proyekto sa lalong madaling panahon.

Dagdag pa niya, nananatiling nakatuon ang pamunuan ng lungsod sa pagpapalakas ng sistemang pangkalusugan ng Maynila at sa pagbibigay ng mas mahusay na akses sa serbisyong medikal sa pamamagitan ng maayos, napapanatili, at mahusay na planadong imprastraktura sa kalusugan.

Sinabi pa ni Atienza sa nabanggit na forum ang planong pagkakaroon ng ng Internal Rules of Procedure (IRP) para sa quasi-judicial function na may kapangyarihang magsagawa ng pagdinig at magpataw ng kaukulang parusang administratibo sa mga inaakusahang opisyal tulad ng ginagawa ng mga hukom.

Paliwanag ni VM Atienza na binibigyang pangil nito ang City Council para humawak ng mga kasong administratibo upang matiyak na may “check and balance” sa sistema ng pamamahala sa Lungsod ng Maynila. 

(Gene Adsuara)