PNP NAGPAKITA NG MALASAKIT SA SUNOD-SUNOD NA HUMANITARIAN OPERATIONS MATAPOS ANG LINDOL

IPINAKITA ng Sarangani Police Provincial Office (SPPO) ang kanilang aktibong pakikibahagi sa dalawang magkakaugnay na humanitarian operations bilang tugon sa pangangailangan ng mga komunidad na naapektuhan ng 7.8 magnitude na lindol sa General Santos City at Sarangani Province.

Unang naging katuwang ang SPPO sa maayos at ligtas na pamamahagi ng relief goods sa Purok Colano, Barangay Pangyan, Sarangani Province. Kasama ang Ignite Telecom at Leo Clubs of General Santos City, tiniyak ng mga pulis ang kaayusan at seguridad sa lugar upang maging maayos ang daloy ng distribusyon at maramdaman ng bawat benepisyaryo ang dignidad at respeto sa pagtanggap ng tulong.

Kasunod nito, personal na tumulong din ang mga tauhan ng SPPO sa loading at reloading ng relief goods sa Makar Wharf, Barangay Labangal, General Santos City. Sa pakikipagtulungan sa iba’t ibang partner agencies at stakeholders, tiniyak nilang ligtas, maayos, at mabilis na maipapadala ang mga suplay patungo sa mga apektadong komunidad.

Ayon kay Police General Jose Melencio C. Nartatez Jr., ang ganitong uri ng paglilingkod ay sumasalamin sa tunay na diwa ng pulis na Pilipino.

“Ang pulis ay katuwang ng komunidad sa panahon ng pangangailangan. Sa bawat sakuna, nakikita natin ang puso ng ating kapulisan—handang tumulong, handang umalalay,” pahayag ng PNP Chief.

Patuloy na pinapaigting ng PNP ang presensya nito sa mga lugar na apektado ng kalamidad upang matiyak ang kaligtasan ng publiko at agarang pag-abot ng tulong.

Sa gitna ng hamon, nananatiling buo ang adhikaing Bagong PNP para sa Bagong Pilipinas: Serbisyong Mabilis, Tapat at Nararamdaman—isang paglilingkod na may malasakit, aksyon, at tunay na malasakit sa mamamayan. (PAUL JOHN REYES)