INIHAYAG ni dating Speaker Ferdinand Martin G. Romualdez na hindi siya papayag na magamit na scapegoat o panakip butas sa flood control controversy.
Ayon sa Leyte solon, bukas ang kanyang records sa publiko kasabay nang hamon sa imbestigador na gawin ang full chain of accountability.
“I will not be a scapegoat for actions I did not commit. The truth is not afraid of scrutiny—and neither am I,” ani Romualdez.
Binigyang otorisasyon ni Romualdez ang pagpapalabas sa publiko ng kanyang sworn affidavit at supporting documents, dahil karapatan ng mga Pilipino na makita ang katotohanan.
“I have nothing to hide. Let the Filipino people judge the truth based on evidence—not on speculation or politics,” pahayag pa nito.
Iginiit nito na nagbigay siya ng buong kooperasyon sa otoridad mula pa lamang sa simula kabilang na ang pagharap sa imbestigador at boluntaryong pagsusumite ng mga dokumento.
Itinanggi naman ni Romualdez ang alegasyon na siya ang pasimuno sa anumang corruption scheme, kasabay nang pahayag na walang katotohanan ang mga akusasyon laban sa kanya.
“The national budget is not the work of one person. It is the product of a constitutional process involving the Executive, the House, and the Senate.”
Iginiit nito na ang Kamara ay isang collegial body, kung saan ang desisyon ay ginagawa ng sama-sama at hindi isang unilateral action.
“If irregularities occurred, accountability must follow the entire chain—not be selectively assigned,” pahayag nito.
Upang kontrahin ang alegasyon, sinabi ni Romualdez na handa siyang buksan ang lahat ng proyekto sa kanyang distrito para sa public verification.
Ang anumang alegasyon ng korupsyon ay dapat suportahan ng katunayan.
“If I were involved, it would reflect in the projects associated with me. I am ready for full scrutiny,” pahayag nito.
Hinikayat naman nito ang Office of the Ombudsman na manatiling objective at tanggihan ang anumang political pressure.
“Follow the evidence wherever it leads. Justice demands fairness, not convenience,” aniya.
Iginiit pa nito na handa siyang sagutin ang lahat ng alegasyon sa pamamagitan ng kaukulang legal process.
“I will face this head-on. I have nothing to fear from the truth,” pagtatapos ni Romualdez. (Vina de Guzman)

PINAKOKOMENTO ng Korte Suprema si Pangulong Ferdinand Marcos Jr. at Acting Executive Secretary Ralph G.Recto sa petisyon na inihain ni Pantaleon D. Alvarez at iba pa na humiling na isa publiko ang resulta ng kanyang medical test.
Inatasan din ng SC ang Pangulo at co-respondent na magkomento sa loob ng hindi na mapapalawig na 10 araw mula sa pagtanggap ng abiso.
Sa kanilang 12-pahinang petisyon, hinihiling ni dating House Speaker Pantaleon Alvarez at iba pa ang pag-isyu ng writ of mandamus na nag-uutos sa Pangulo na sumailalim sa pisikal at mental na pagsusuri, kabilang ang hair follicle drug test.
Hiniling din ng mga petitioners ang pagsasapubliko ng medical report na nagpapakita ng resulta ng pagsusuri, kasama ang medikal at klinikal na kumpirmasyon ng kanyang pisikal at mental na kakayahan upang gampanan ang mga kapangyarihan at tungkulin ng Pangulo.
Sa petisyon , nakasaad na ang kakayahan at kapasidad ng respondent bilang pinuno ng pamahalaan ay nakaapekto sa lahat ng aspeto ng operasyon at direksyon ng patakaran nito.
“Binibigyang-pansin namin ang Korte Suprema sa kawalan ng anumang executive proclamation o utos na may malinaw, positibo, at epektibong aksyon bilang tugon sa nararamdamang epekto sa sosyo-ekonomiko ng taumbayan… dulot ng digmaan sa Gitnang Silangan,” ayon pa sa petisyon.
“Ang kredibilidad ng respondent ay labis nang naapektuhan kaya ang kanyang mga pahayag sa mga panayam at paglabas sa telebisyon ay napapawi ng impresyon sa kanyang sariling kilos at disposisyon,” dagdag nito.
Bukod kay Alvarez, kabilang din sa mga petitioner sina Juan Raña Raymundo Junia at retiradong heneral Virgilio Garcia sa kanilang kapasidad bilang mga rehistradong botante at nagbabayad ng buwis. (Gene Adsuara)

INIHAYAG ni Batangas Rep. Gerville “Jinky Bitrics” Luistro na nasa parte na ng “territory of forensic truth” ang pagdinig ng House Committee on Justice sa impeachment proceedings laban kay Vice President Sara Z. Duterte, kung saan nakatuon ito sa statement of assets, liabilities, and net worth (SALN), Bureau of Internal Revenue (BIR), at Anti-Money Laundering Council (AMLC) records sa halip na oral testimony.

Sinabi ni Luistro, chairman sa pagdinig ng komite, sila ay magbabase na sa document-and-data mula sa nakalipas na pagdinig na nakatuon sa witness-based testimony kaugnay sa alegasyon ng unexplained wealth ng bise presidente.
Kabilang na rito ang mga ebidensiya mula sa Office of the Ombudsman, BIR, SEC, at AMLC.
“Kung mapapansin ninyo, ang pag-uusapan natin ngayon ay mga numero, SALN, tax records from the BIR, and reports from the AMLC. This is the part where the numbers have to be studied, compared, and analyzed,” ani Luistro.
“And numbers, unlike people, do not have motives. Numbers do not lie.” At dito po nagiging mas mabigat ang usapan. Because when we speak of numbers, we are no longer dealing with opinion, spin, or narrative, we are confronting cold, unyielding facts. Hindi ito napapakiusapan. Hindi ito natatakot. Hindi ito napipilit magsinungaling. A number either matches, or it does not.”
Idinagdag pa nito na kapag pinagsama-sama ang mga records mula sa SALN, BIR at AMLC ay maipapakita nito ang isang istorya na hindi mabubura o mada-divert.
“Kung ayaw magsalita ng tao, kung ayaw humarap ng Bise Presidente, hayaan natin na ang mga numero ang magkuwento. Let the evidence speak. Let the numbers testify. Let the chips fall where they may. And let us, finally, resume this hearing,” pahayag ni Luistro. (Vina de Guzman)

PINURI ng Land Transportation Franchising and Regulatory Board (LTFRB) ang mga Transport Network Companies (TNCs) na nagbaba ng kanilang komisyon bilang tulong sa mga transport network vehicle service (TNVS) partners sa gitna ng patuloy na pagtaas ng presyo ng langis.

Ayon kay LTFRB Chairman Vigor D. Mendoza II, malaking tulong ang hakbang na ito sa pagsisikap ng pamahalaan na maibsan ang epekto ng krisis sa langis sa sektor ng pampublikong transportasyon, alinsunod sa direktiba ni Pangulong Ferdinand “Bongbong” R. Marcos Jr.

“Ito ay tunay na kapuri-puri at taos-puso kong pinasasalamatan ang mga TNCs na tumugon sa panawagan na magbigay ng kanilang ambag sa pagtulong sa sektor ng pampublikong transportasyon. Malaking tulong ito sa ating mga TNVS partners ngayong mataas ang presyo ng diesel at gasolina,” ani Chairman Vigor.

Noong Abril 16, nakipagpulong si Chairman Vigor sa mga opisyal at kinatawan ng 18 TNCs na kasalukuyang nag-ooperate sa bansa, kabilang ang mga motorcycle taxi. Sa naturang pagpupulong, tinalakay ang pagbawas ng komisyon na umabot hanggang 10%, at tatlo sa mga TNCs ang pansamantalang nag-waive ng lahat ng kanilang komisyon hanggang sa makabawi ang sektor ng transportasyon.

Nagpasalamat din si Chairman Vigor sa bawat TNC sa ngalan ni Secretary Lopez, at tiniyak na ang LTFRB ay maghahanda ng guideline kaugnay ng pagbawas ng komisyon bilang bahagi ng regulasyon.

“Ito ang tunay na diwa ng bayanihan. Ito ang mga pagkakataon na dapat ipagmalaki na maging Pilipino dahil sa malasakit at pagtutulungan,” dagdag pa ni Chairman Vigor. (PAUL JOHN REYES)