DUMALO sina Pangulong Ferdinand R. Marcos Jr. at Unang Ginang Liza Araneta-Marcos, araw ng Miyerkules sa centennial canonical coronation ng iginagalang na imahe ng Our Lady of Manaoag sa Manaoag Church sa Pangasinan.
Ang nasabing okasyon ay tanda ng 100 taon ng pananampalataya at paglalakbay sa banal na lugar sa imahe, nakadambana sa Minor Basilica ng Our Lady of the Rosary of Manaoag sa Pangasinan.
Nagsimula ang pagdiriwang sa rededication ng basilica, araw ng Martes, marka ng eksaktong anibersayo ng koronasyon.
Sinundan ito ng grand procession at pontifical Mass, araw ng Miyerkules, sa Minor Basilica, kung saan ang Papal Nuncio to the Philippines, Archbishop Charles Brown, pinangunahan ang makasaysayang coronation rites.
Tangan naman ng Pangulo ang korona at binless (blessed) ni Brown bago pa ang ceremonial canonical coronation ng Our Lady of Manaoag.
Kung matatandaan, pinangunahan ni Doña Josefa Edralin Marcos, lola ni Pangulong Marcos, ang koronasyon noong golden canonical celebration noong 1975.
Abril 21, 1926, ang imahe ay kanónikóng kinoronohan ni Most. Rev. Guillermo Piani, D.D., apostolic nuncio ni Pope Pius XI to the Philippines.

SA pagbibigay ng kaluwagan sa mga Malabueño sa gitna ng patuloy na mga hamon, ang Pamahalaang Lungsod ng Malabon ay naglabas ng ikalawang yugto ng tulong pinansyal sa ilalim ng 2026 Malabon Hour Blue Card (MABC) Program, na pakikinabangan ng nasa 93,727 households

“Ito po ang panahon para magtulungan upang masiguro ang kapakanan ng bawat tahanan. Sa pamamagitan ng Malabon Ahon Blue Card, nailalapit natin ang serbisyo at tulong sa mga komunidad, lalo na sa higit na nangangailangan. Ang pag-release ng ikalawang ayuda ay isa sa ating mga inisyatibo upang matugunan ang mga agarang pangangailangan sa kabila ng krisis na ating pinagdaraanan. Naririto lamang po ang Pamahalaang Lungsod ng Malabon para sa inyo,” ani Mayor Jeannie Sandoval.

Ayon sa alkalde, ang pagpapalabas ng MABC cash aid ay kasabay din ng Tambobong Festival 2026, na isang buwang pagdiriwang ng Malabon’s 25th Cityhood Anniversary at 427th Founding Anniversary mula Abril 21 hanggang Mayo 21, na nagpapaalala sa mga residente ng diwa ng “Bayanihan,”.

Ang mga benepisyaryo ay maaaring mag-claim ng kanilang cash assistance sa alinmang BancNet-powered ATMs o Universal Storefront Services Corporation (USSC) branches simula Abril 21, 8:00 ng umaga hanggang Mayo 21, 11:59 ng gabi.

Ang kwalipikadong households ay makakatanggap ng mensahe mula sa USSC sa sandaling makuha ang tulong pinansyal. Maaari din nilang tingnan ang listahan ng mga benepisyaryo sa pamamagitan ng link na naka-post sa Malabon Ahon Blue Card Facebook page.

Bukod sa quarterly financial aid, pinalawak din ng pamahalaang lungsod ang MABC, kabilang ang Burial and Hospitalization Assistance, Eskwela Savings Project at MABC for Working Students; at ang MABC para sa Kababaihan, na nagbibigay ng mga oportunidad sa kabuhayan para sa mga single mother.

Ibinahagi rin ni Mayor Jeannie na kasalukuyang nakikipag-ugnayan ang pamahalaang lungsod sa iba’t ibang restaurant, fast-food chain, drugstores, at iba pang partner establishments para palawigin ang posibleng diskwento sa mga residente gamit ang kanilang MABC para sa pagbili ng mga produkto at serbisyo.

“Ito ay bahagi ng mas malawak na layunin ng lungsod na palakasin ang kakayahan ng bawat pamilya na makabangon at maging mas matatag. Sa pamamagitan ng maayos na implementasyon at pakikipag-ugnayan sa iba’t ibang sektor, tinitiyak natin na ang tulong ay napupunta sa tamang benepisyaryo sa tamang panahon,” pahayag naman ni City Administrator Dr. Alexander Rosete.
(Richard Mesa)

IKINATUWA ni Pangulong Ferdinand Marcos Jr., ang pagkaka-aresto kay Ako Bicol Partylist Rep. Zaldy Co sa Prague, Czech Republic.
Sinabi ni Presidential Communications Office (PCO) Undersecretary at Palace Press Officer Claire Castro na itinuturing kasi ng gobyerno na isa sa ‘big fish’ si Zaldy Co sa flood control anomaly.
“Kung ang isang tao po ay may warrant of arrest, fugitive, cancelled ang passport – sino po ang hindi matutuwa na ang isang taong fugitive ay maibabalik sa Pilipinas para managot,” aniya pa rn.
Sa kabilang dako, isang malaking katanungan naman sa Malakanyang ang kahandaan ni Zaldy Co na magsabi ng katotohanan at sinu-sino ang kanyang mga kasama sa maanomalyang flood control projects.
Tinanong kasi si Castro kung gaano kahanda si Pangulong Marcos sa pagkaka-aresto kay Zaldy Co sa Prague, Czech Republic lao pa’t idinawit ng huli ang Chief Executive sa usapin ng maanomalyang flood control projects.
“Ang Pangulo, uulitin po natin, ang siyang nagsimulang magpaimbestiga ng maanomalyang flood control projects. Siya ang naunang magpaimbestiga ng diumanong korupsiyon. Ang Pangulo ay handang makinig sa lahat ng maaaring sabihin ng mga taong involved at dapat na managot sa batas,” ang sinabi ni Castro.
Samantala, isang magandang balita naman para sa Malakanyang na ang isang pugante ay maibabalik na sa Pilipinas. (Daris Jose)

NAKATANGGAP ang iba’t ibang local government units (LGUs) ng daan-daang kilo ng gulay mula sa La Trinidad, Benguet bilang bahagi ng pamamahagi ng tulong ng Office of the President para sa mga pamilyang nangangailangan, kung saan pinangasiwaan ng mga lokal na opisyal ang distribusyon sa mga kwalipikadong benepisyaryo.

Personal na bumisita si Pangulong Ferdinand R. Marcos Jr. sa La Trinidad Vegetable Trading Post at Benguet Agri-Pinoy Trading Center (BAPTC), araw ng Biyernes, kung saan bumili siya ng 20 toneladang produktong agrikultural upang suportahan ang mga magsasakang apektado ng pagtaas ng presyo ng krudo.
Kabilang ang Quezon City at Pasay City sa mga unang LGU na nakatanggap ng gulay, na kanilang ibinahagi sa kani-kanilang Facebook accounts.
Sa Quezon City, dumating ang mga suplay ng gulay sa City Hall para ipamahagi sa mga “QCitizens,” sa presensya ng ilang lokal na opisyal.
Ibinahagi rin sa social media ang mga larawan ng pagbaba ng mga gulay mula sa isang bus.
“Dumating na sa Quezon City Hall ang daan-daang kilo ng gulay mula sa mga magsasaka sa La Trinidad, Benguet, hatid ng Office of the President para sa mga pamilyang QCitizen,” ayon sa pahayag ng pamahalaang lungsod sa Facebook.
Dumalo sa turnover sina Chief of Staff Rowena Macatao, District Action Officers Atty. Zandy Zacate at Atty. Bong Teodoro, City General Services Department head Fe Bass, Traffic and Transport Management Department head Dexter Cardenas, at Zennette Mariano ng Office of the President.
Isinagawa rin ang kaparehong distribusyon sa Pasay City, kung saan kinumpirma ng lokal na pamahalaan na ipamamahagi ang mga gulay sa mga residenteng higit na nangangailangan.
Ayon sa post sa Facebook, personal na tinanggap ni Pasay City Mayor Emi Calixto-Rubiano ang mga gulay na inilagay sa transparent na lalagyan at ipamamahagi sa mga piling benepisyaryo.
“Personal nating tinanggap ngayong gabi ang Vegetable Distribution mula sa Office of the President of the Philippines na ating ipamamahagi at masusing pinili ng DSWD para sa mga mas higit na nangangailangan na mga minamahal na Pasayeño,” ayon sa alkalde.
Nagpasalamat din si Calixto-Rubiano kay Pangulong Marcos sa patuloy na tulong.
“Muli, maraming salamat po, Pangulong Ferdinand ‘Bongbong’ Marcos Jr., sa patuloy na malasakit sa ating mga kababayan,” dagdag ng alkalde.
Dinala ang mga gulay sa Philippine School for the Blind sa Galvez St., cor. Figueroa St., Pasay City para sa distribusyon.
Bahagi ang inisyatibang ito ng patuloy na pagsisikap ng national government na magbigay ng tulong na pagkain at suportahan ang mga magsasaka sa pamamagitan ng direktang pagbili ng ani mula sa mga agricultural area gaya ng Benguet.
Sa Caloocan, dinala ang mga gulay sa distribution area sa likod ng Caloocan City Hall North.
Sa Navotas City, dinala ang mga gulay sa drop-off point sa Navotas Convention Center.
Sa Malabon City, ang Brgy. Potrero Hall sa Barangay Potrero ang nagsilbing drop-off point ng mga gulay.
Kabilang din sa iba pang drop-off points ang DSWD NCR sa Bago Bantay, Quezon City (likod ng SM North); DSWD Walang Gutom Kitchen sa Nasdake Building, 50 Williams Corner, FB Harrison Street, Barangay 13, Pasay City; Lungsod ng Maynila sa Delpan Sports Complex; Bureau of Corrections – New Bilibid Prison sa Muntinlupa; at Manila City Jail. (Daris Jose)