2020 September Archive - People's Balita

Archive for September, 2020

Gen. Cascolan, nanumpa sa harap ni PDu30 bilang bagong hepe ng PNP

Posted on: September 10th, 2020 by @peoplesbalita No Comments

PINANGASIWAAN ni Pangulong Rodrigo Roa ang panunumpa sa tungkulin ni Police General Camilo Cascolan bilang bagong Philippine National Police (PNP) chief.

Kasama ni Cascolan ang kanyang pamilya sa nasabing seremonya na idinaos sa Malakanyang.

Umaasa naman ang Malakanyang na maipatutupad ni Cascolan ang batas, aalisin ang mga kurakot na pulis at mapanatili ang tagumpay ng giyera laban sa ilegal na droga sa ilalim ng kanyang maiksing termino.

Si Cascolan ay nakatakdang magretiro sa Nobyembre.

“I will lead this organization along the footsteps of my predecessors and along the shadows of their leadership and building on what they have started,” ayon kay Cascolan sa kanyang assumption speech nitong September 2.

“I will lead the PNP along with the vision of a highly-capable, effective, and credible PNP that provides better and more reliable, more efficient and more effective police services,” aniya pa rin.

Samantala, sinabi ni Cascolan na ang police force ay hindi magiging epektibo kung wala ang suporta ng komunidad. (Daris Jose)

Sotto todo na ang G League training

Posted on: September 10th, 2020 by @peoplesbalita No Comments

MAHIGIT isang linggo na nagt-training camp si Kai Zachary Sotto at mga kakampi sa Ignite Team para sa paglalaro sa nalalapit na pagbubukas sa taong ito ng 19^th National Basketball Association (NBA) Gatorade League sa Estados Unidos.

Kasama ng 18-anyos, 7-2 ang taas na Pinoy cage phenom na nasa Walnut Creek, California na sina Jalen Green, Jonathan Kuminga, Princepal Singh, Isaiah Todd at iba pang teammates.

“Beginning of a new chapter that’s about to be legendary,” wika ng tubong Las Piñas na baller.

Gumagabay sa koponan sina coach Brian Shaw, assistant coach Rasheed Abdul-Rahman, video coordinator Jerry Woods, at athletic trainer Pete Youngman.

Nitong Marso pa dapat nag- ang season ng NBA developmental league, pero pinagpaliban dahil sa pandemya. (REC)

Mindoro humakot ng mga coach

Posted on: September 10th, 2020 by @peoplesbalita No Comments

Kung ang ilang mga koponan mga manlalaro ang sinusungkit upang magpalakas, iba naman ang Mindoro Tamaraws na naghahanda sa 4^th Maharlika Pilipinas Basketball League (MPBL) 2020-21.

Humakot ang team ng coaching staff sa pangunguna ni former University Athletic Association of the Philippines (UAAP) coach Joe Silva na minsang nagmando sa University of the East Red Warriors.

Kasamang nirekrut ni Silva ng team sina Marvin Bienvenida at Joel Cagulangan ng La Salle Greenhills.

Isang mabuting pagkakataon naman ito para kay team owner/ coach Justin Tan para sa pagtimpla sa tropa. (REC)

Lakers pinaburan na manalo sa game 3 West Conference semis kontra Rockets

Posted on: September 10th, 2020 by @peoplesbalita No Comments

Nagiging paboritong manalo ng maraming basketball analyst ang Los Angeles Lakers sa game 3 Western Conference semifinals nila ng Houston Rockets.

Ito ay matapos na agad na nakapag-adjust ang Lakers sa Rockets noong Game 2.

Napag-aralan umano ng Lakers ang laro ng Rockets noong sila ay natalo sa Game 1.

Ayon kay Lakers head coach Frank Vogel, na naglaan sila ng mga oras para pag-aralan ang laro ng Rockets.

Ilan sa tinukoy nito ang matagumpay na pagbantay kay Russell Westbrook at James Harden.

4 ARESTADO SA PAGSASAGAWA NG PRANK

Posted on: September 10th, 2020 by @peoplesbalita No Comments

KALABOSO ang apat na lalaki matapos magsagawa ng prank na kanila umanong i-upload sa social media na isa sa kanila ang isinilid sa sako saka iniwan sa gilid ng kalsada na tila isang biktima ng summary execution sa Valenzuela city.

Kinilala ang mga dinakip na si Mark Francis Habagat, 20, Mark Aldrin Arce, 20, Chris Bayron, 20, at Wynzel Tan, 19.

Sa tinanggap na report ni Valenzuela Police Chief Col. Fernando Ortega, nagpaparulya sina PCpl Rosario Cruz at PCpl Ian Baggay ng Sub-Station 1 sa West Service Road, Brgy. Paso De Blas nang isang concerned citizen ang lumapit sa kanila at ipinaalam ang hinggil sa isang hindi kilalang tao na isinilid sa sako bago iniwan sa gilid ng kalsada.

Nang respondehan, nadiskubre ng mga pulis ang nasa loob ng naturang sako ay si Habagat habang ang tatlong kasama nito na kumukuha ng video sa sako ay naaktuhang nagtatago malapit sa lugar.

Inamin ng mga suspek na sinubukan lamang nilang maglaro ng kalokohan sa mga dumadaan sa naturang lugar at balak umano nilang i-upload ang video sa social media.

Ayon sa pulisya, ang insidente ay magbibigay ng alarma sa publiko kaya dinala nila ang apat sa himpilan ng pulisya saka kinasuhan ng alarm and scandal at inisyuhan din ng Ordinance Violation Receipt dahil sa paglabag sa ordinansang nagmamandato ng social distancing at paggamit ng quarantine pass. (Richard Mesa)

Saso trangka pa sa LPGA Tour of Japan

Posted on: September 10th, 2020 by @peoplesbalita No Comments

PUMUWESTO lang sa 11 magkakatabla sa ika-29 na puwesto si Yuka Saso sa 20th Golf 5 Ladies Pro Golf Tournament 2020 sa Gifu Prefecture Honshu nitong Linggo.

Pero hindi lang iyon upang mamantine niya ang liderato sa Ladies Professional Golf Association (LPGA) Tour of Japan ranking dahil nagrasyahan pa rin ang 19-year-old Fil-Japanese rookie pro ng ¥408,000 (₱187K).

Patungo sa 53rd ¥200M JLPGA Championship Minolta Cup 2020 na sisiklab ngayong Huwebes sa JFE Seto Inland Sea Golf Club sa Okayama na panlimang yugto sa pinaigsing Japan Ladies Professional Golf Association (JLPGA) sa taong ito, pumiprimera si Saso sa Mercedes ranking sa total earnings na ¥59,448,000 (₱27M).

Pero bumubuga ng hangin sa bumbunan ng Indonesia 2018 Asian Games double gold medalist at two-time Philippine Ladies Open queen ang reyna sa Earth Mondahmin Cup na si Ayaka Watanabe ng Japan na may ¥51,620,000 makaraang kumubra sa Golf 5 ng ¥4.740M.

Ang kampeon sa Golf 5 na si Sakura Koiwai na nagkamit ng ng ¥10.8M ang nasa tersera na sa ¥31,640,000 patungo sa kampeonato. (REC)

Ads September 10, 2020

Posted on: September 10th, 2020 by @peoplesbalita No Comments

Balik-collegiate league pinaplantsa na ng JAO

Posted on: September 10th, 2020 by @peoplesbalita No Comments

BABALANGKAS Ang technical working group (TWG) ng Joint Administrative Order (JAO) panel ng training guidelines para sa pagbabalik ng mga collegiate league sa pangunguna ng National Collegiate Athletic Association (NCAA) at University Athletic Association of the Philippines (UAAP).

Ito ang ipinahayag nitong Lunes ni Commission on Higher Education (CHED) Commissioner Prospero de Vera III, sa virtual press conference na dinaluhan din nina Department of Health (DOH) Undersecretary Maria Rosario Vergeire, Philippine Sports Commission (PSC) Chairman William “Butch” Ramirez at Games and Amusement Board (GAB) Chairman Abraham Kahlil Mitra.

Sumama rin sa kaganapan sina PSC-Philippine Sports Institute (PS) National Training Director Marc Edward Velasco, Philippine Basketball Association (PBA) Deputy Commissioner Eric Castro, Pilipinas 3×3 Commissioner Frederick Altamirano at Philippine Football League (PFL) commissioner Mikhail Torre.

Idinagdag ni De Vera na manggagaling ang TWG sa CHED, PSC, DOH at mga National Sports Associations (NSAs) na magtatakda ng safety guidelines at health protocols sa mga liga sa harap ng mga kontrobersiyang nilikha ng Sorosogon bubble training ng University of Santo Tomas at team practice ng National University sa Calamba.

May dalawa-tatlong linggong tinataya mapipinalisa ang guidelines para makaiwas sa Covid-19 ang mga student-athlete. (REC)

Ayo malabo sa Letran

Posted on: September 9th, 2020 by @peoplesbalita No Comments

KINONTRA kaagad ni Colegio De San Juan de Letran men’s basketball team coach coach Bonnie Tan ang mga naglalabasang ulat na papalitan siya kahit binigyan niya ng korona ang Knights noong isang taon sa gitnaan ng kontrobersiya sa University of Santo Tomas.

“May kulang yata sa tweet, nakikipag-swap ng position lang naman,” bulalas ni Tan sa kanyang FB account nitong isang araw kasama ang emoji na nakangiti. Patama ito sa paghalili sa kanya nang nagbitiw na si Aldin Ayo sa UST Growling Tigers

Sinuportahan din si Tan ng isa sa mga matalik niyang kaibigang si San Miguel Corporation sports director Alfrancis Chua at governor at team manager ng Barangay Ginebra San Miguel Gin Kings sa Philippine Basketball Association (PBA).

“Baka sa ibang Letran papunta coach nila. Iisa lang Letran ang alam ko at ang coach dun si Bonnie Tan,” ani Chua na sa pagtugon din sa ulat ng ilang website.

Nagpa-Sorsogon training bubble si Ayo sa USTe kaya nasa kumukulong tubig ngayon sa Department of Justice (DOJ) sa pagbalewala sa health protocol laban sa Covid-19. (REC)

Obispo, dismayado sa “white sand project” sa Manila bay

Posted on: September 9th, 2020 by @peoplesbalita No Comments

Dismayado si Archdiocese of Manila Apostolic Administrator Bishop Broderick Pabillo sa hindi napapanahong proyekto ng pagpapaganda at paglalagay ng artificial white sand sa Manila Bay bilang bahagi ng rehabilitasyon nito sa gitna ng krisis na kinahaharap ng bansa mula sa COVID-19 pandemic.

Sinabi ng Obispo sa panayam ng Radyo Veritas na hindi naaangkop na mas bigyang prayoridad at paglaanan ng pondo ang nasabing proyekto dahil marami ang dumaranas ng hirap at nagugutom sa epekto ng pandemya.

“Ngayong panahon po na napakaraming mga tao na walang trabaho, na walang pagkain, tapos kung gagawa ng ganyang project na aabutin ng higit 300 million (pesos) para lang sa white sand, parang hindi po angkop sa ating panahon ngayon.”,pahayag ni Bishop Pabillo sa Radio Veritas.

Iginiit rin ng Obispo na mas nararapat na ilaan ng Department of Environment & Natural Resources ang pondo sa pagkakaloob ng trabaho at pagkain sa mamamayang lubos na apektado ng pandemya.

“So ‘yan po’y marami pong mga hindi tama sa paggawa po ng project at lalung-lalo na sa’ting panahon ngayon na hindi angkop sa kalagayan ng ating bayan. Kaya kung ang DENR ay may pera, itulong nya sana sa mga pagbibigay ng trabaho, pagbibigay ng pagkain sa mga nangangailangan.”, dagdag pa ni Bishop Pabillo.

Ipinaliwanag ng bispo na hindi rin nakatitiyak na ang nasabing white sand ay magtatagal at mapapanatili ang kagandahan ng Manila Bay dahil mapupuno lamang ito ng basura kapag sinalanta ng bagyo ang bansa.

“Hindi pa naman natin sigurado na ang white sand na ‘yan ay mananatili kasi alam naman natin na kapag t’wing bumabagyo ay talagang pinapasukan ‘yan ng lahat ng mga dumi so, pansamantala lang ‘yung kagandahan nyan.”pahayag ni Bishop Pabillo