PINANGUNAHAN ni 2nd District Congressman Egay Erice, katuwang ang Department of Social Welfare and Development (DSWD) ang paghahatid ng Family Food Packs at Sleeping Kits sa 28 pamilyang naapektuhan ng sunog sa Barangay 7, Caloocan City.

Makatatanggap din ang bawat pamilya ng ₱5,000 financial assistance sa ilalim ng Assistance to Individuals in Crisis Situation (AICS) program ng DSWD upang makatulong sa kanilang mga agarang pangangailangan.

Sinabi ni Cong. Erice na sa gitna ng pagsubok ay patuloy niyang inilalapit ang tulong sa mga pamilyang nangangailangan at nawa’y maging dagdag-lakas ang pagkakaisa sa kanilang pagbangon at muling pagsisimula. (Richard Mesa)

NAKATAKDANG bumisita sa Pilipinas si Brazilian President Luiz Inácio Lula da Silva para sa isang state visit kasunod na din ng una ng naging imbitasyon dito ni Pangulong Ferdinand R. Marcos Jr.

Sa darating na Nobyembre 14 hanggang 15 ang state visit ni President Da Silva na sinasabing kauna-unahang pagkakataon na bibisita sa bansa ang isang nakaupong Pangulo ng Brazi

Sinasabing, layon ng pagbisita ng Brazilian leader ang higit pang palakasin ang bilateral relations o ugnayang diplomatiko ng Pilipinas at ng Brazil , gayundin ang pagpapalawak ng kooperasyon sa kalakalan at pamumuhunan.

Inaasahan naman na pagtutuunan ng pansin ng dalawang lider sa kanilang pagkikita sa Malakanyang sa susunod na linggo ay ang pagtutulungan sa larangan ng agrikultura, enerhiya, agham at teknolohiya gayundin ang ukol sa depensa.

Maliban sa State Visit, inaasahang didiretso na rin ang Brazilian President partisipasyon nito sa Plenary Session ng ika-49 na ASEAN Summit bilang Guest of the Chair, sa paanyaya ng Pilipinas bilang tagapangulo ng regional bloc. (DARIS JOSE)

HINIKAYAT ni Pangulong Ferdinand Marcos Jr. ang mga newly promoted generals at flag officers ng Armed Forces of the Philippines (AFP) na huwag hayaan na mawala ang tiwala at kumpiyansa sa kanila ng mga Filipino.

“No matter how advanced our capabilities may become, we must never lose sight of the trust and confidence of the Filipino people,” ang sinabi ni Pangulong Marcos sa kanyang naging talumpati matapos pangunahan ang oath taking ceremony ng mga ito.

“Sustaining that trust is a responsibility that all of us share, government, our institutions, and our communities,” aniya pa rin.

Winika ng Pangulo na “a modern military requires leaders who serve with competence, integrity, and accountability.”

Nangako rin ang Pangulo na ang gobyerno ay magbibigay ng suporta na kailangan ng AFP para magampanan ang kanilang mandato.

Sa kabilang dako, nanumpa sa kanyang tungkulin si General Antonio Nafarrete bilang AFP chief of staff kasama ang 33 iba pang newly promoted generals at flag officers ng AFP. (DARIS JOSE)

HINDI umano napasinungalingan o napabulaanan ng depensa ni Vice President Sara Duterte ang ebidensiya ng prosekusyon sa mga kinuwekuwestiyong ari-arian nito.

Sinabi ni House impeachment prosecution adviser at spokesperson Ace Barbers na naging ‘consistent’ ang depensa ng vp sa kanilang kawalang kakayahan umano na mapabulaanan ang ebidensiya ng prosekusyon sa umano’y undeclared properties matapos aminin ng ikalawang saksi na hindi niya makumpirma na ang kinukuwestiyong property sa Samal ay nakalista sa kanyang Statement of Assets, Liabilities and Net Worth (SALN).

“Ang aking masasabi, sila ay consistent. Consistent sa punto na hindi pa rin nila nagigiba ang mga ebidensya at mga testimonya ng mga witnesses na nanggaling sa prosecution,” ayon kay House impeachment prosecution adviser at spokesperson Ace Barbers sa isang press briefing.

Sa ginanap na cross-examination ni private prosecutor Benjamin “Jay” Tolosa Jr., inamin ni Island Garden City of Samal Assessor Engr. John Kenneth Enumerables na hindi siya sigurado kung ang naturang property na nakarehistro sa pangalan ng asawa ni Duterte na si Manases Carpio, ay kapareho sa nakadeklara sa kanyang SALN.

Ang property, na sakop ng Transfer Certificate of Title No. 142-2019013134, ay nasa Barangay San Isidro, Kaputian, Samal.

Ngunit, nakalagay sa SALN entry na tinukoy ng depensa na ang property ay nakalista sa Barangay Matanos, Kaputian. Lumitaw pa sa record ang pagkakaiba sa acquisition year at presyo.

Sinabi ni Barbers na nabigo ang saksi na ma-establish na iisang property ang nakasaad sa dalawang records.

“Very clear na hindi niya nasagot ang tanong ng prosecution kung ito bang property na pinag-uusapan na hindi idineklara ni Vice President Sara Duterte sa kanyang SALN ay the same property na sinasabi naman ng defense na dineklara. There are two sets of properties na hindi pareho. Ang isa ay hindi naideklara sa SALN ng ating pangalawang pangulo,” dagdag ng dating mambabatas.

Kinuwestiyon ni House prosecution spokesperson Lanao del Sur Rep. Zia Alonto Adiong kung bakit iprinisinta ng depensa ang city assessors sa halip na Registry of Deeds officials para ma-establish kung naideklara ba ang lupa.

“If the defense intention really is to prove that the Vice President did not misdeclare or underdeclare some of her property, it should not be the city assessors ang pupunta dito at gawin nilang witness,” ani Alonto Adiong.

Paliwanag nito, ang city assessors ang siyang nagdedetermina sa property values para sa taxation habang ang Registry of Deeds naman ang nagmementina sa official land ownership records.

“Ang dapat na mag-identify and mag-determine dapat ’yung Registry of Deeds. Bakit ’di nila ’yun ang prinisenta nila dito?” pagtatanong ng mambabatas.

(VINA de GUZMAN)

BILANG paghahanda sa 49th ASEAN Summit, inilabas na ng Metropolitan Manila Development Authority (MMDA) at lokal na pamahalaan ng Maynila ang mga itinakdang alternatibong ruta para sa mga truck na bumibiyahe papunta at palabas ng Port Area sa Maynila.

Para sa mga truck na manggagaling sa Port Area patungong North Expressway o NLEX, Maaring dumaan sa Road 10, Capulong, Raxabago, Yuseco, Felix Huertas, at C-3 Road.

Maaari namang dumaan sa A.Bonifacio Avenue, C-3 Road at Road 10 ang mga sasakyan na manggagaling sa NLEX patungong Port Area.

Maaari ring gamitin ang alternatibong ruta sa Blumentritt, Aurora, A.H. Lacson, Tayuman, Oroquieta, Yuseco, Raxabago, at Capulong Street.

Ang mga truck na babaybay patungong southbound mula Port Area ay maaring dumaan sa itinalagang ruta sa Bonifacio Drive, P. Burgos Avenue, Finance Road, Ayala Boulevard, San Marcelino Street, Quirino Avenue, at Osmeña Highway.

Ang mga truck naman mula Osmena Highway na patungong South Pier ay Maaaring dumaan sa Quirino Avenue ,United Nations Avenue, Romualdez Street, Ayala Boulevard, Finance Road, P.Burgos Avenue at Bonifacio Drive.

Para naman sa patungong Manila North Harbor, Maaring gamitin ang Quirino Avenue, Nagtahan, A.H. Lacson Avenue, Yuseco, Raxabago, Capulong, at Road 10.

Pinaaalalahanan din ang mga truck na patungong pantalan na maglagay ng malinaw na karatula ng kanilang destinasyon sa harapang windshield.   

(Gene Adsuara)

SINIMULAN na ng Pamahalaang Lungsod ng Malabon sa pangunguna ni Mayor Jeannie Sandoval ang pamamahagi ng ikaapat na bahagi ng tulong-pinansyal na “Malabon Ahon” para sa taong 2026, na pakikinabangan ng aabot sa 93,574 benepisyaryo, bilang pagpapatibay sa pangako ng kanyang administrasyon sa patuloy na pag-alalay sa mga pamilyang nangangailangan.

“Para sa atin, ang tunay na serbisyo publiko ay hindi lamang nasusukat sa dami ng programang naipatutupad, kundi sa kung paano natin natutugunan ang pangangailangan ng ating mga kababayan. Hangad natin na maging patas ang pagpapatupad ng ating mga programa upang matiyak na ang bawat Malabueño ay magkaroon ng access sa ating mga serbisyo,” ani Mayor Sandoval.

“Naniniwala tayo na walang dapat maiwan sa paghahatid ng serbisyo publiko. Kaya patuloy nating pinagsisikapang maihatid ang Malabon Ahon Ayuda sa mahigit 93,000 benepisyaryo upang maiparamdam sa ating mga pamilya na ang pamahalaang lungsod ay laging handang umalalay sa kanila,” dagdag niya.

Ayon sa Monitoring, Evaluation, Accountability, and Learning Office (MEAL), maaaring makuha ng mga kwalipikadong benepisyaryo ang kanilang assistance simula 10:00AM ng Nobyembre 9, hanggang 11:59PM ng Disyembre 9, 2026, sa alinmang ATM na konektado sa BancNet o sa mga sangay ng United Storefront Services Corporation (USSC) sa buong bansa.

Makatatanggap ng text message mula sa USSC ang mga benepisyaryo kapag handa nang makuha ang kanilang assistance. Maaari rin nilang tingnan ang listahan ng mga kwalipikadong tumatanggap sa opisyal Facebook page ng Malabon Ahon Blue Card.

Maaari ring gamitin ng mga residente ang kanilang Malabon Ahon Blue Card (MABC) bilang debit card sa mga kalahok na establisyimento na mayroong Point-of-Sale (POS) terminal.

Binigyang-diin ni Ms. Catherine Larracas, Officer-in-Charge ng MEAL Office, ang kahalagahan ng pagpapanatili ng maayos, transparent, at madaling ma-access na proseso ng pamamahagi upang matiyak na makukuha ng mga kwalipikadong benepisyaryo ang kanilang assistance nang walang abala.

Ipinaalala ng MEAL sa mga benepisyaryo na panatilihing malinis at nasa maayos na kondisyon ang kanilang mga Blue Card at ilayo sa mga magnet at elektronikong kagamitan upang maiwasan ang pagkasira. Kung nawala o nasira ang kanilang card, o kaya’y nakalimutan ang kanilang PIN, makipag-ugnayan sa tanggapan ng MABC o sa USSC upang humingi ng tulong.

Samantala, sinabi ni City Administrator Dr. Alexander Rosete na ang tuloy-tuloy na pagpapatupad ng programang ito ay nagpapakita ng ating paninindigan na gawing mas malapit at mas madaling ma-access ang mga serbisyo ng pamahalaan. 

“Sa pangunguna ni Mayor Jeannie Sandoval, sinisikap nating matiyak na ang bawat programang inilulunsad ay may malinaw na layunin at tunay na nakatutulong sa pang-araw-araw na buhay ng ating mga kababayan,” giit niya.

Ito na ang ika-18 yugto ng quarterly assistance na inilabas simula nang ilunsad ang programa noong Disyembre 2022. (Richard Mesa)

MATAPOS ang mga insidente sa Bulacan, isinulong ni FPJ Panday Bayanihan Party-List Rep. Brian Poe ang mas mahigpit na regulasyon sa pet cremation at burial services upang maprotektahan ang mga pet owner at matiyak ang maayos na paghawak sa labi ng kanilang mga alagang hayop.

Inihain ni Poe ang House Bill No. 11785, o ang Beyond Pet Loss and Care Act (Companion Animal After-Life Care and Protection Act), nitong Nobyembre 9 sa House of Representatives. Kasama niya sa paghahain ang aktor na si John Arcilla, sina Animal Kingdom Foundation (AKF) President at Program Director Atty. Heidi Caguioa, at ilang fur parents.

Ayon kay Poe, ang mga insidente sa Bulacan at Cavite ang nagtulak sa kanya na maghain ng panukala upang magtakda ng malinaw na pamantayan sa cremation at burial services para sa mga alagang hayop.

Layunin nitong matiyak na alam ng mga pet owner kung tunay na na-cremate ang kanilang alaga at kung ang mga abo na ibinabalik sa kanila ay talagang mula sa kanilang minamahal na hayop.

Binanggit ni Poe ang pangamba sa communal cremation, kung saan maaaring pagsamahin ang mga labi ng maraming hayop at ibalik ang mga abo na tila mula sa iisang alaga. Sa ilalim ng panukala, bibigyang-diin ang individual cremation, transparency, dokumentasyon, at wastong proseso upang mapanatili ang pagkakakilanlan ng mga labi.

Ayon sa inihain na panukala, maaaring mapatawan ng multang P100,000 hanggang P500,000 at pagkakakulong ng isa hanggang apat na taon ang mga mapatutunayang lumabag. Panukala pa lamang ang HB No. 11785 at hindi pa ito batas.

Sinabi ni Poe na daraan sa committee hearings ang panukala upang mapakinggan ang mga testimonya at ebidensiya, kabilang ang mga reklamo ng pet owners. Aniya, hindi dapat mangamba ang mga lehitimong negosyo dahil layunin ng panukala na palakasin ang tiwala at kredibilidad ng mga sumusunod sa tamang proseso.

“Ang mga hayop ay hindi basta-basta pag-aari o bagay. Sila ay mga buhay na nilalang at bahagi ng ating pamilya,” ayon kay Caguioa.

Hinimok ng AKF official ang mga pet owner na nakaranas o may reklamo kaugnay ng pet after-life care services na magsalita at makipagtulungan upang masuri ang mga insidente. Aniya, tumatanggap ang organisasyon ng mga reklamo, kabilang ang mga pagdududa sa abo na ibinabalik sa mga may-ari at mga nawawalang alagang hayop.

Ibinahagi naman ni Arcilla na mayroon siyang 11 aso na na-cremate at ang mga urn ng mga ito ay itinatago niya mula pa noong 2004.

“Hindi ito simpleng pag-aalaga na parang laruan. May relasyon ka diyan. Hindi lang siya simpleng laruan. Siya ang pamilya, actually,” ani Arcilla.

Binigyang-diin niya na mahalagang marinig ang mga pet owner na naapektuhan ng mga insidente at pinasalamatan sina Poe at AKF sa pagsusulong ng panukala.

Nagpahayag din ng suporta si Marlon De Guzman, pet owner ng asong kabilang sa mga natagpuang labi sa Bulacan.

“Nandito po kami to support the bill. We want justice, kung sino man yung nasa likod ng pangyayari, especially sa Ahjay (Ahjay Paws Aftercare Pet Crematorium), kung nasaan man po kayo, sana po lumutang na kayo dahil ito po yung hiniling namin simula’t sa pul pa lang po dahil itong dogs and cats na natagpuan sa Bulacan, they’re our family,” ani De Guzman.

Umaasa si Poe na maisusulong at maipapasa ang panukala sa 20th Congress, kasabay ng iba pang hakbang para sa kapakanan at proteksyon ng mga hayop. (VINA de GUZMAN)

NANAWAGAN si House Speaker Faustino “Bojie” G. Dy III sa mga kapwa mambabatas sa Southeast Asia na makipag-ugnayan sa mga kilos laban sa illegal recruitment, human trafficking, at online child safety sa darating na 47th General Assembly of the ASEAN Inter-Parliamentary Assembly (AIPA) na gaganapin sa Pilipinas nitong Nobyembre.

“Mahalaga ang pagtitipong ito dahil marami sa mga problemang kinakaharap ng ating bansa ay kinakaharap din ng ating mga kapatid sa Southeast Asia,” pahayag ni Dy na gaganap na AIPA president.

Tinukoy ni Dy ang tumataas na presyo ng mga bilihin, illegal recruitment at human trafficking, cybercrime, threats to children’s safety online, at mga banta sa kapayapaan at seguridad sa rehiyon.

Ayon kay Dy, ang gaganaping AIPA ay pagkakataon ng mga mambabatas sa mga ibang bansa na ibahagi ang kanilang karunungan kung papaano labanan ang mga nasabing peligro.   

“Sa pamamagitan ng AIPA, naibabahagi natin ang mga karanasan ng ating mga bansa, napag-aaralan ang mga epektibong batas, at napagkakasunduan ang mga hakbang na maaari nating isulong sa kaniya-kaniyang parlyamento,” ani Dy.

 (VINA de GUZMAN)