PINULONG ni Presidential Task Force on Media Security (PTFOMS) Usec. Joe Torres ang mga opisyal at miyembro ng CAMANAVA PRESS CORPS na pinamumunuan ni Ka Maeng Santos upang bigyan ng kaalaman ang mga miyembro ng media at ipabatid sa kanila ang mga dapat at hindi dapat gawin sa pagtupad sa kanilang tungkulin bilang mga mamamahayag. Ipinaalala din ni Usec. Torres ang mga hakbang na dapat gawin kung sakaling may matatanggap na pagbabanta sa buhay ng isang mamamahayag. (Richard Mesa)

IPINANUKALA ng opisina ni Vice President Sara Duterte ang P785.2 milyong badyet para sa susunod na taon.

Mababa ito ng 11.7% sa P889.236-million approved budget ngayon taon.

Ito ay upang maipagpatuloy ng OVP ang mga programa at serbisyo nito maging ang kinakailangang operational requirements sa kabila ng pagbaba sa budget nito.

Sa P785-million panukalang budget, P220.232 million ay ilalaan sa Personnel Services, P561.651 million sa Maintenance and Other Operating Expenses (MOOE), at P3.321 million para sa Capital Outlay. 

Ang P561 million budget para sa MOOE, sinabi ng OVP na P193.103 million ay ilalaan sa procurement ng goods at probisyon sa livelihood assistance grants sa ilalim ng OVP’s “MagNegosyo Ta ‘Day” program at iba pang assistance at service-oriented initiatives.

Samantala, isang hiwalay na P15.544 million ay “automatically appropriated” para sa Retirement and Life Insurance Premium ng mga plantilla personnel, ayon pa sa OVP.

Ang iba pang programa na tinukoy ng OVP na popondohan ay ang “Pagbabago Campaign” para sa 150,000 learners, disaster operations, Relief for Indigents and Individuals in Crises and Emergencies (RIICE) Program, Libreng Sakay, wheelchair distribution, provision ng Al-Janazah Kits at iba pang supplies, at “You Can Be VP” Program, at iba pa. (VINA de GUZMAN)

INIHAYAG ni Pangulong Ferdinand R. Marcos Jr. na maglalaan ang national government nang humigit-kumulang P300 milyon sa local government unit (LGU) ng Tarlac City para pondohan ang pagpapagawa sa dalawang nasirang tulay sa kasagsagan ng bagyo at pagbaha.

Ayon sa Pangulo, ida-download ang pondo sa lokal na pamahalaan upang mapabilis ang pagsasagawa ng repair works sa mga tulay.

“So, para maging mas mabilis ang trabaho, we will be downloading PhP300 million to the local government dahil ito ay local bridge. Kaya sila ang kailangang magtatrabaho dito. Siyempre, tutulungan natin, tutulungan sa technical aspects and we’ll help them in every way that we can,” pahayag ni Pangulong Marcos matapos inspeksyunin ang mga nasirang Aquino at Agana bridges sa Tarlac City.

“But just so that it is properly funded, it will go through the local government. The P300 million that will come from the national government, ibibigay natin sa local government. And of course, local government and the national government magtutulungan para maging mas mabilis,” dagdag ng Pangulo.

Sa isinagawang inspeksyon sa Agana Bridge sa Romulo Boulevard, Barangay Cut-Cut 1, Tarlac City, inutusan ng Pangulo si Department of Public Works and Highways (DPWH) Secretary Vince Dizon na agad kumpunihin ang tulay at maglagay ng Bailey bridge bilang pansamantalang daanan.

Ang Bailey bridge ay isang portable at pre-fabricated na truss bridge na idinisenyo upang mabilis na mai-assemble nang hindi nangangailangan ng mabibigat na makinarya.

“So right now, ang ginagawa dito ay nagbubuo ng Bailey bridge para makatawid, para ilalagay, para palitan ‘yung section na natanggal, na natangay ng ilog,” paliwanag pa ng Pangulo.

Ayon kay Pangulong Marcos, inaasahang mai-install ang Bailey bridge sa loob ng isang linggo.

Sa loob naman ng dalawang linggo, umaasa ang Pangulo na magiging passable na sa mga sasakyan ang na-repair na tulay kung saan unang padadaanin ang maliliit na sasakyan at may bigat na 10 tonelada o mas mababa, gaya ng mga van. 

(DARIS JOSE)

SA KABILA ng naganap na sunog sa tanggaan ng Manila Vice Mayor Chi Atienza, tiniyak nito na tuloy ang kanilang operasyon.

Ayon sa Bureau of Fire Protection (BFP) nagsimula ang sunog 5:45 ng umaga na inakyat lamang sa unang alarma.

Partikular na natupok ng apoy ang pantry ng nasabing tanggapan kung saan posible umanong sa electrical wiring ang naging sanhi ng sunog.

Paliwanag ni Vice Mayor Chi, wala nang iba pang gamit na iniwang nakasaksak maliban sa refrigerator na karaniwan naman aniyang hindi tinatanggal ang saksakan.

Wala rin aniyang mga mahahalang dokumento na nasunog gayundin ang mga gamot para sa mga nangangailangan na mga Manileño ay hindi naman nasunog bagama’t nabasa lamang dahil sa pagbuhos ng tubig ng mga bumbero.

Naapula ang sunog 6:21 ng umaga .

Habang nagpapatuloy ang imbestigasyon ay pansamantala munang sarado ang tanggapan ng bise alkalde ngunit tuloy ang kanilang operasyon upang nakapagbigay pa rin ng tulong sa mga nangangailangan.

Aniya, maglalagay na lamang sila ng lamesa sa harap ng kanyang tanggapan upang ma-cater ang mga humihingi ng medical assistance lalo na ang mga senior citizens.

Matatagpuan ang tanggapan ng bise alkalde sa ikalawang palapag ng gusali ng MCH.

Samantala, inanunsyo na rin ni Manila Mayor Isko Moreno -Domagoso na hindi suspendido ang pasok ng mga kawani kahapon Araw ng Miyerkoles.

 (Gene Adsuara )

KASABAY ng ika-49 taong anibersaryo ng ASEAN Inter-Parliamentary Assembly (AIPA), nanawagan si Speaker at AIPA President Faustino “Bojie” G. Dy III sa parlyamento na siguruhin na ang halos limang taon na kooperasyon ay mauuwi sa malakas na institusyon at konkretong pagpapabuti sa buhay ng mga taga- Southeast Asia.

“Our work must ultimately be measured not by the meetings we hold, but by the difference we make in the lives of our people,” ani Speaker Dy. 

“I have always believed that public trust is earned not through declarations, but through credible laws, trusted institutions, and results that improve people’s lives. That same principle must guide AIPA.”

Ang AIPA ay nagsimula sa Manila may 49 taon ng nakakalipas, ng ang parlyamento ng Indonesia, Malaysia, Pilipinas, Singapore, at Thailand ay nagbuo ng ASEAN Inter-Parliamentary Assembly or AIPA.

Mula sa limang founding parliaments, winelcome nito ang Timor-Leste bilang ika-11th Member Parliament sa ginanap na 47th AIPA General Assembly sa Manila ngayong November. Dalawampu’t anim na Observer Parliaments ang inaasahang dadalo.

“Forty-nine years ago, five founding parliaments chose to build one boat rather than sail alone. Today, that journey continues. One balangay, one vision, one destination,” pagtatapos ni Dy. 

(VINA de GUZMAN)

KINASTIGO ni dating ACT Teachers Partylist Rep. France Castro si Presidential Communications Undersecretary Claire Castro hinggil sa kanyang mga komento na aniya’y kawalan empatiya sa mga taong humihingi ng tulong sa gitna ng matinding pagbaha dulot ng habagat.

“Sana naging mas sensitive ang mga statement ni Usec Castro,” sabi ng dating kongresista. 

“Kahit mga senador nga ay hindi makapasok o nahirapang makapasok. What more sa mga manggagawa na arawan ang sahod, isang kahig, isang tuka? Sa mga estudyanteng hindi makakuha ng eksamen? Sa mga truck driver na nagde-deliver ng produkto na kada byahe lang ang bayad?” 

Ayon sa dating mambabatas, ang hinihiling lang ng mga manggagawa na gumagamit ng NLEX sa kanilang byahe papasok ay kaunting relief sa pagbabayad ng toll fee.

“Hindi naman dadami ang dadaan doon kahit maging libre pa ito—baha nga, jusko. Bakit ka naman dadaan pa doon kung di naman talaga kailangan?” tanong ni Castro.

Aniya, imbes na pagalitan ang mga nagrereklamo, pakinggan sila kung bakit nagrereklamo at mag -focus sa solusyon. 

“Ang trabaho ng pamahalaan ay paginhawain ang buhay ng mamamayan, hindi saktan ang kanilang damdamin habang naghihirap sila,” sinabi ng dating kongresista.

“Di ba dapat magmungkahi ka kung paano madaling mawala ang baha, imbes na murahin ang mga taong humihingi ng kaunting ginhawa?” (VINA de GUZMAN)