SINABI ng Malakanyang na hindi kailangang maging marahas o may pananakit ang mga nakakasang kilos protesta ngayong araw, September 21.

Ito ang inihayag ni Palace Press Officer Undersecretary Claire Castro sa harap ng mga pagkilos na inaasahan.

Ani Castro, malayang makapagpapahayag ang ibat- ibang grupo ng kanilang sentimyento at hindi naman aniya sila pipigilan sa pagsasabi ng kanilang saloobin.

Sana lamang aniya ay wala ng karahasan pang mangyari lalot bukas naman ang pakinig ng pamahalaan pati na si Pangulong Ferdinand R. Marcos Jr. sa mga panawagan ng mga magsasagawa ng kilos protesta.

Sa kabilang dako, siniguro ng Malakanyang na handa ang hanay ng PNP para bantayan ang mga rally site at masiguro na magiging mapayapa ang mga inaasahang demonstrasyon ngayong araw.

 (DARIS JOSE)

NANAWAGAN si Parañaque Rep. Brian Yamsuan sa mga kapwa mambabatas na agad ipasa ang panukalang naglalayong palakasin ang masiguro ang patuloy na pondo para sa mga school safety programs ng Department of Education (DepEd).

Kasabay nito, hinikayat din ni Yamsuan ang mga local government units (LGUs) na agad gamitin ang bahagi ng kanilang Special Education Fund (SEF) para tumulong sa pagtugon sa security needs ng mga public schools sa kanilang komunidad.

Ang panawagan ay ginawa ng mambabaras makaraan ang naganap na madugong insidente sa Banga National High School sa South Cotabato, kung saan ilang estudyante ang nasawi habang may iba p a ang nasugatan. Ang trahedya ay ilang beses na insidente ng karahasan sa loob at labas ng eskuwelahan sa nakalipas na ilang buwan.

“Ipinaaabot po natin ang ating pakikiramay sa mga pamilya ng mga estudyanteng naging biktima ng karahasang ito. No child should enter a classroom in fear. We need to institutionalize a comprehensive measure now to ensure that our elementary schools, high schools and other basic education institutions are safe and remain conducive environments for learning,” ani Yamsuan.

Ipinanukala ni Yamsuan ang Comprehensive School Safety Act o House Bill (HB) 10864 na nagsusulong na magbuo, magmentina at periodically update ng National Comprehensive School Safety Framework, na magsisilbing standards sa school safety plans, kabilaing na ang kinakailangang infrastructure at security measures na kailangan para maipatupad sa lahat ng public at private educational institutions.

Nakapaloob sa panuakala ang nakatalagang standards at protocols ukol sa learner protection, mental health support, violence prevention at anti-bullying mechanisms.

Ang HB 10864 at iba pang kahalintulad na panukala ay naka-pending sa House Committee on Basic Education and Culture, habang ang Senate version ng Comprehensive School Safety Act ay nakapasa na sa ikalawang pagdinig noong nakalipas na linggo.

“We urge our colleagues in the House of Representatives to act fast in passing the proposed Comprehensive School Safety Act on our end so that we can soon put in place a system that would protect learners and school personnel from all forms of abuse and violence in and outside our schools,” pagtatapos ni Yamsuan. 

(VINA de GUZMAN)

SUPORTADO ng Senior Citizens Party-list ang panukala ni Ombudsman Jesus Crispin Remulla na masaklaw ng civil service laws at rules ang lahat ng barangay officials.

Ayon kay Senior Citizens Party List Rep. Rodolfo Ordanes, Senior Vice Chair ng Committee on Senior Citizens at Vice Chair at Committee on Appropriations, sa ngayon ay walang educational qualifications para maging barangay kapitan at kagawad.

Hindi aniya ito makatarungan para sa mga mamamayan na umaasang may competence ang mga halal na kapitan at kagawad, hindi lang basta can read and write.

“Kasi hahawak sila ng responsibilidad, public funds, at mangangasiwa ng mga programa at proyekto.

Sa aming pananaw, kasama rin dapat sa saklaw ng civil service laws at rules ang lahat ng elected at appointed officials sa barangay. Kailangan ito para tumaas naman ang kalidad ng serbisyo sa barangay,” anang mambabatas.

Kailangan din aniyang maamyendahan ang Local Government Code of 1991 upang ma-upgrade ang kuwalipikasyon ng elected barangay officials.

Ang barangay chairpersons, councilors, at lahat ng regular barangay staff members ay dapat na high school graduates at nakapasa sa Civil Service Subprofessional Examination.

Kung ang barangay staff member ay college graduate, nakumpleto ang ilang college education, o katumbas na kuwalipikasyon base sa work experience at equivalency test results, ang salary grade ay dapat na aayon sa staff member’s qualifications, mula Salary Grade 10 hanggang SG 12.

Dapat ding magkaroon ng isang komprehensibong barangay civil service system para sa mga barangay secretary, treasurer, budget officer, administrator, clerks, administrative assistants, at DRRMO officer.

Ang mga barangay tanods, drivers, at utility personnel ay maaaring maging SG-1 dahil sa minimum educational qualifications na elementary graduate at nakapasa sa equivalency assessment.

 (VINA de GUZMAN)

NAILIGTAS ng Bureau of Immigration (BI) ang isang Filipina na itinuturing na posibleng biktima ng human trafficking na may kaugnayan sa isang pinaghihinalaang surrogacy scheme sa Ninoy Aquino International Airport (NAIA) Terminal.

Sa isinumiteng ulat  kay BI Commissioner Joel Anthony M. Viado ni Jerica Ann Arsola, hepe ng Immigration Protection and Border Enforcement Section (I-PROBES) ng BI sa NAIA Terminal 3, na ang pasahero ay  pupunta siya sa Thailand para sa pitong araw na bakasyon pero dahil sa hindi pagkakatugma ng kanyang mga pahayag, ini-refer siya ng primary immigration officer sa I-PROBES para sa karagdagang beripikasyon.

Sa isinagawang secondary inspection, isiniwalat ng babae na  ang tunay niyang destinasyon ay  Georgia, kung saan makikipagkita siya sa isang Chinese national na kinilalang “Luca,” na nakilala lamang niya sa pamamagitan ng WhatsApp. Ayon sa biktima , ipinakilala sa kanya si Luca ng isang Filipina na tinukoy bilang “Aubrey.”

Isiniwalat din ni pasahero  na inalok siya ng surrogacy arrangement  na umano’y magbibigay sa kanya ng  US$400 kada buwan habang nagbubuntis, bukod pa sa karagdagang  US$600 matapos manganak.

Narekober din ng mga tauhan ng I-PROBES ang isang  Georgia e-visa  at itinerary na nagpapakitang mula Bangkok ay tutuloy ang pasahero sa Georgia sa pamamagitan ng  Shanghai, China. Nagdulot ito ng karagdagang pagdududa sa tunay na layunin ng kanyang paglalakbay.

Dahil dito, ini-refer at kalaunan ay itinurn-over ang pasahero sa  Inter-Agency Council Against Trafficking (IACAT) para sa karagdagang pagsusuri, imbestigasyon, at kaukulang aksyon.

Pinuri ni Commissioner Viado ang pagiging mapagmatyag ng mga immigration personnel sa NAIA na nakapansin sa mga hindi magkakatugmang pahayag ng pasahero at agad na nagsagawa ng kaukulang referral. Gene Adsuara

IPINAALALA ni Manila Vice Mayor Chi Atienza sa mga rallyista na nagsasagawa ng aktibidad sa Lungsod kasabay ng paggunita ng ika-54 anibersaryo ng deklarasyon ng Martial Law ang pagrespeto sa ipinapatupad na patakaran sa Lungsod.

Aniya, pairalin sana ng mga nagkikilos protesta ang kaayusan at paggalang sa lungsod kung saan pinayagan nila ang mga ito na magsagawa ng aktibidad pero dapat maayos ang lahat pagkatapos.

Sinabi ng bise alkalde na kinikilala ng Manila LGU ang karapatan ng bawat isa na magtipon at magpahayag, ngunit hiniling na panatilihing maayos ang mga aktibidad at tiyaking malinis at ligtas ang paligid.

Tiniyak ng Pamahalaang Lungsod ng Maynila na nakahanda naman ang mga kinakailangang kagamitan at tauhan sakaling dumami ang mga magsasagawa ng rally sa lungsod.

Nagpaalala rin si Vice Mayor Chi hinggil sa Anti-Baclavа Ordinance na ipinatutupad sa lungsod. Muling paalala ng Manila LGU, patuloy nilamg pinapayagan ang pagsasagawa ng mga rally at iba pang pagtitipon, basta’t gagawin ang mga ito nang maayos at naaayon sa batas. 

“Bilang OIC ng ating Alkalde, isa lamang po ang hinihingi namin sa mga rallyista. Maaari po kayong pumasok sa aming siyudad, ngunit sana pag labas ninyo, maging maayos rin po kayo,” pahayag pa ni VM Chi.  

(Gene Adsuara)