HUMINGI ang Land Transportation Franchising and Regulatory Board (LTFRB), sa ilalim ng patnubay ni Department of Transportation (DOTr) Secretary Giovanni Z. “Banoy” Lopez, ng exemption sa Commission on Elections (COMELEC) para sa pagpapatuloy ng Service Contracting Program, kabilang ang EDSA Busway “Libreng Sakay,” Fuel Subsidy Program, at iba pang programa sa pampublikong transportasyon sa panahon ng election ban.

Sa liham na may petsang Setyembre 15, ipinaliwanag ni Acting LTFRB Chairman Atty. Greg G. Pua, Jr. na ang mga naturang programa ay hindi election-related o partisan activities, kundi mga patuloy na programa ng pamahalaan na naglalayong suportahan ang mga commuter, driver, at operator, lalo na sa gitna ng epekto ng kaguluhan sa Middle East at patuloy na pagtaas ng presyo ng produktong petrolyo.

Kabilang sa mga programang hinihiling na ma-exempt sa election ban ang Service Contracting Program (SCP), kabilang ang EDSA Busway Extension at Love Bus “Libreng Sakay” Program; Fuel Subsidy Program (FSP), kabilang ang one-time fuel subsidy at P12 kada litro na fuel discount; at Public Transport Modernization Program (PTMP) at mga nagpapatuloy na aktibidad nito.

Kasalukuyan ding isinasagawa ng LTFRB ang pagpapalabas ng hanggang tatlong buwang assistance package para sa mga operator ng modern public transportation bilang tulong sa kanilang buwanang loan amortization at operational expenses.

Ayon kay Acting Chairman Pua, mahalagang maipagpatuloy ang mga programa upang matiyak ang tuloy-tuloy, abot-kaya, ligtas, at maaasahang serbisyo ng pampublikong transportasyon.

Ayon kay Acting Chairman Pua, nagbibigay ang Service Contracting Program ng suporta batay sa aktuwal at validated na serbisyong naibigay, habang ang Fuel Subsidy Program ay nagbibigay ng targeted assistance sa mga kwalipikadong operator at driver upang mabawasan ang epekto ng mataas na presyo ng gasolina at mapanatili ang kanilang operasyon. Samantala, ang PTMP ay isang patuloy na pambansang programa para sa modernisasyon at pagpapabuti ng pampublikong transportasyon.

Binigyang-diin ni Acting Chairman Pua na maaaring maapektuhan ang mga commuter, driver, at operator kung maaantala ang mga programang ito, pati na ang tuloy-tuloy na paghahatid ng mahahalagang serbisyo sa pampublikong transportasyon.

“Ang LTFRB, sa pamamagitan ng patnubay ng Department, ay patuloy na titiyaking ang pagpapatupad ng mga programang ito ay sasailalim sa objective eligibility requirements, wastong dokumentasyon, validation, accounting at auditing rules, at iba pang safeguards na maaaring itakda ng COMELEC, nang walang partisipasyon o pakikilahok ng mga kandidato o partidong pulitikal,” ani Acting Chairman Pua.

 (PAUL JOHN REYES)

INAASAHANG sa November billing mararamdaman ng mga konsumer ang epekto ng pagtatanggal ng value added tax (VAT) sa allowable system loss charges na ipinapataw ng mga power utilities.

Ayon sa Energy Regulatory Commission (ERC), nakipagpulong na sila sa mga stakeholders upang madaliin ang pagpapatupad ng circular na inisyu ng Bureau of Internal Revenue (BIR) noong ­Setyembre 14.

“So hopefully, by October consumption natin ay mag-e-effect na ’yung walang VAT sa system loss charge, at ito ay makikita na natin sa November na bill na matatanggap natin,” pahayag ni ERC chairperson Francis Saturnino Juan sa panayam sa radyo.

Batay sa Revenue Memorandum Circular 097-2026, ang system loss charges na pasok sa cap na aprubado ng ERC ay hindi na papatawan ng 12% VAT at ituturing na government-mandated pass-through costs.

Nilinaw ng ERC na ang aalisin lamang ay ang VAT, hindi ang mismong system loss charge. Paliwanag ng BIR, ang system loss ay kaugnay ng generation at transmission costs ng kuryenteng nawawala, hiwalay sa mismong generation, transmission, at distribution charges na nananatiling may VAT.

Tinatayang nasa pagitan ng P20-P30 ang VAT sa system loss charge. Ayon sa Department of ­Energy (DOE), ang mga tahanang kumukonsumo ng 200 kilowatt-hours (kWh) kada buwan ay maaaring makatipid ng hanggang P20 sa kanilang electricity bills sa sandaling tuluyan nang matanggal ang VAT sa system loss charge.