Pananatili ni VP Sara sa private company board, isang ‘clear violation’ ng konstitusyon

ANG patuloy na pananatili ni Vice President Sara Z. Duterte bilang miyembro ng board ng isang pribadong kumpanya matapos maluklok sa puwesto noong 2022 ay isang “clear violation” sa constitutional restriction na nagbabawal sa isang nakaupong bise presidente sa pagpartisipa sa kalakalan.

Pahayag ito ni House prosecution spokesperson Lanao del Sur Rep. Zia Alonto Adiong kaugnay sa iprinisintang records ng Securities and Exchange Commission (SEC) sa impeachment trial na nagpapakita na patuloy pa ring nakalista ang vp bilang director ng Metro City Chow Foods Corp. Mula 2022 hanggang 2025.

“Pero ’yung mga lahat po ng dineclare niyang mga kumpanya o negosyo kung saan director siya, ’yung saan shareholder siya, hindi po siya nag-divest,” ani Alonto Adiong. “So this is a clear violation. Mas malinaw po ito kaysa sikat ng araw ’yung tahasang pag-violate ng ating Constitution under Article VII, Section 13.”

Sa ginanap na trial, kinuwestiyon ni private prosecutor Atty. Erwin Matib si SEC Company Registration and Monitoring Department Director Gerardo Fernando Del Rosario kung maaaring manatili si Duterte bilang miyembro ng board ng isang kumpanya matapos maupong vice president.

Sinagot naman ni Del Rosario ang pagkakaroon ng constitutional restrictions na sumasakop sa President, Vice President, Cabinet members at kanilang deputies o assistants, na nagbabawal sa kanila na humawak ng ibang opisina o employment, mag-practice ng ibang propesyon o sumali sa business during habang nasa posisyon.

Nakapaloon sa Article VII, Section 13 na ang President at Vice President, kasama ang ibang opisyal ay hindi maaaring humawak ng ibang opisina o employment, mag-practice ng ibang profession o mag- “participate in any business” habang hunahawak ng katungkulan.

Pinagbabawalan din silang magkaroon ng financial interest sa government contracts, franchises o special privileges at iwasan na magkaroon ng conflicts of interest.

Inihayag pa ni Del Rosario na patuloy ang Metro City Chow Foods’ General Information Sheets (GIS) sa paglista kay Duterte bilang miyembro ng board of directors nito matapos maupo bilang vice president.

“Ayon po sa GIS nila, from 2022 hanggang 2024, si VP Sara Duterte po ay member pa rin po ng board of directors,” ani del Rosario.

Para sa 2025, sinabi ni Del Rosario na nananatili pa ring miyembro ng board of directors sa GIS ang VP.

Nagsimulang manungkulan bilang vp si Duterte noong June 30, 2022.

Isinusulong ng prosekusyon na ma-establish na hindi lamang ipinanatili umano ni Duterte ang ownership interest sa Metro City Chow Foods kundi nagpatuloy ito sa pag-upo sa board sa Compensation Committee habang naninilbihan bilang vice president.

Nanatili ang posisyon ng prosekusyon sa naunang testimonya mula kay retired Sandiganbayan Presiding Justice Amparo Cabotaje-Tang, ukol sa Article VII, Section 13 na nagsasaad sa constitutional restrictions para sa naka-upong presidente o vice president. (VINA de GUZMAN)