2026 July 23 Archive - People's Balita

Archive for July 23rd, 2026

Malaking halaga ang nawala sa kanyang bank account…KYLINE, umamin na naging biktima rin ng online scam (ni: ROMMEL GONZALES)

Posted on: July 23rd, 2026 by Francis Paolo Torres No Comments

TARGET talaga ng mga scammers ang mga artista.

Tulad na lamang ni Sparkle actress Kyline Alcantara na mismong nagbahagi ng karanasan niya na mabiktima ng malaking pera sa isang online scam!

Nagsimula ito sa isang mensahe sa kanya na sinabing may problema diumano ang kanyang bank account.

“Meron pong email and text message na may link po.

“Ang nakalagay po dun sa text message is parang may problema daw po sa aking bangko.

“So ‘Click this link’ para maayos.

“So I clicked it and parang napunta po sa ibang website. And then parang okay, so inalis ko na lang po siya agad,” pagbabahagi ni Kyline sa recent guesting niya sa “Fast Talk With Boy Abunda”.

Doon na niya na-realize na may problema.

“And then when I checked the bank app, biglang parang nabawasan yung pera ko. Yun na po pala yun.’ Nabawasan po ang aking pera.”

Hindi na inihayag ni Kyline kung magkano eksakto ang malaking halagang nawala sa kanya.

“Malaki pa rin po yun. Pangkuryente ko po yun e.”

Hindi raw niya malaman ang kanyang gagawin sa mga sandaling iyon.

“Kasi I panicked also na parang, ‘Diyos ko, baka maaresto ako, meron palang problema sa bank ko, baka kung anong mangyari’.”

Lesson-learned para kay Kyline? Maging super-ingat lalo na kapag gumagamit ng public Wi-Fi.

“Sobrang delikado!

“Meron nga pong sinasabi pa nila na just be careful if you want to connect to the Wi-Fi, to the public Wi-Fi.

“Tapos bubuksan mo yung bank app mo, kasi baka puwede rin nilang pasukin yun. Sobrang daming ways na po.”

Next month na ang taping at ipalalabas sa September…JOLINA at MARVIN, tuloy na tuloy na ang balik-tambalan sa TV5 (ni: ROHN ROMULO)

Posted on: July 23rd, 2026 by Francis Paolo Torres No Comments

LAST month may mga sitsit na lumalabas na magkakaroon ng reunion project sina Jolina Magdangal at Marvin Agustin sa TV5.At sa pagpasok ng July, marami ang naglabas ng post na ‘July Na’, na kasunod palagi ang larawan o video clip ni Jolina.July 1 unang nag-post si Direk Roman Perez Jr. na tila teaser na gagawing project, may caption ito ng, “MOMMY” (na may guard emoji) at ni-repost niya ang Facebook post ng ABS-CBN News ng art card na may photo ni Jolina at nakalagay na ‘July na!’ na may caption na July na, mga momshie!Kasunod niyang ni-repost ang post ni Marvin ng ‘JULY NAAAAA!!!!’ na kasama ang old photo nila ni Jolina. Comment ni Direk Roman, “Ready.”July 5 and 9 may FB post uli siya ng ‘July Na!’ Kasama ang pinost ng Preview.ph. at ABS-CBN Film Productions Inc.July 10, muling nag-post si Direk Roman but this time ang caption niya ay ‘July Na! (Red heart emoji) August 10’, kasama ang movie clip ng “Labs Kita, Okey Ka Lang”.July 13, caption naman niya, ‘Tara Na! July Na! (red heart emoji) August 10’, kasama ang kanyang production team at nagkasunud-sunod pang kanyang mga post na may hashtags na #JulyNaAugus10 #TaguangNgFeelings.Hanggang sa ilabas na

kahapon, July 22 ang mga photos kasama sina Jolina, Marvin at Dominic Ochoa. Sa August 10 na raw sila magsisimula ng taping at may napansin kami sa isang group photo na may ‘Guard Ko si Babe’, mukhang ito ang title ng morning series.Mapapanood ito sa TV5 na magiging pre programming ng ‘Eat Bulaga!’, pero may tsikang na magsisimula na raw itong ipalabas sa September 14.

Kasama sa cast sina Susan Africa, Cedrick Juan, Roxanne Guinoo, Pearl Gonzales, at ilang talents ng Star Worx.

***

PlayTime Entertainment at iWant, sanib-pwersa sa paglikha ng mga original Filipino Content

NAGKAISA ang PlayTime Entertainment at iWant ng ABS-CBN Corporation upang gumawa ng mga orihinal na programang Pilipino, simula sa romantic comedy na “Will You Fake Marry Me?” na pinagbibidahan nina JM Ibarra at Fyang Smith, at “Sparks Camp Season 4”.

Ang pagsasamang ito ay ang una sa ilang proyektong naglalayong maghatid ng de-kalidad na nilalamang lokal na tatatak sa mga Pilipinong manonood.

“Ang pakikipagtulungan ito sa PlayTime Entertainment ay nagbibigay pahintulot na kami ay gumawa ng mas maraming kuwento, lalo’t higit ay itaas ang kalidad ng mga programa,” pahayag ni Jolly Estaris, Head ng iWant.

“Sa pamamagitan ng pagsasama-sama ng aming mga creative expertise sa pangako ng PlayTime Entertainment sa paghahatid ng mga makabagong istorya, patuloy kaming magbibigay ng mga nilalamang akma sa mga Pilipinong manonood habang itinataas ang pamantayan para sa local entertainment.”

Ayon sa PlayTime Entertainment, ang kanilang pagsasama sa proyektong ito ay sumasalamin sa pangakong lumikha ng mga orihinal na nilalaman na hinubog batay sa pananaw ng mga manonood at makabuluhang pagkukwento.

“Patuloy kaming makikinig at iintindi sa kung ano ang gusto ng aming mga tagapanood sa pamamagitan ng patuloy na pagsasaliksik at pakikipagugnayan,” sabi ni Adela Mae Marshall, tagapagsalita ng PlayTime Entertainment.

“Bagaman inumpisahan namin sa pamilyar na pormula ng romantic comedy, nasasabik kaming tumuklas nang higit pa sa genre na ito at sumubok ng iba’t ibang konsepto ng kuwento, tema, at mga talento. Ang layunin namin ay hindi lamang magbigay saya kundi magkapagambag sa pag-unlad ng Filipino entertainment.”

Sa hinaharap, sinabi ng PlayTime Entertainment na nais nitong palawakin ang pakikipag-ugnayan nito sa iWant sa pamamagitan ng pagbuo ng mas maraming orihinal na produksyon sa iba’t ibang genre, paglikha ng mga kuwento nakakaaliw, nagdudugtong sa mga manonood at sumasalamin sa magkakaibang karanasan ng mga Pilipino.

Matapos ma-bash dahil sa ‘di pagbanggit sa aktres…VICE GANDA, sinabing magkausap sila ni KIM at hindi nag-aaway (ni: ROSE GARCIA)

Posted on: July 23rd, 2026 by Francis Paolo Torres No Comments

MATUTULDUKAN na kaya ang isyu sa pagitan nina Vice Ganda at Kim Chiu at ng kanilang mga fans?

Sa “It’s Showtime” kasi nitong Miyerkules, marami ang nag-abang kung may mag-a-absent kaya sa kanilang dalawa o ano ang mangyayari sa paghaharap nila.

Parang kaswal naman at parang wala silang isyu kaya ang reaksyon ng mga netizen, okay na, nagka-ayos na ang dalawa.

Sa mga hindi nakakaalam, nagsimula ang isyu sa tila parunggitan nila sa X, dating Twitter. Nang manalo at tumanggap ng awards si Vice sa 1st FAMAS Broadcast Arts Awards bilang Best Variety Show, at si Vice Ganda bilang Best Host for Entertainment para sa “It’s Showtime.”

Tila hindi matanggap ng mga fan ni Kim na nabanggit ni Vice ang lahat halos ng hosts ng IS, pero hindi si Kim. Pinagba-bash o inaway si Vice ng mga fan ni Kim.

Kaya tinawag na “kacheapan” ni Vice ang mga ito at tinag si Kim.

“Grabe the kacheapan of these fans! Look @prinsesachinita,” X post ni Vice.

Nag-post din si Kim na madaling ipagpalagay na sagot niya kay Vice kaya ang dating, nagparunggitan na sila, “Ayaw ko na sanang palakihin ito. Pero bilang mga taga supporta hindi naman cguro ka cheapan ang tawag duon. Cguro po marahil sa sobrang pagmamahal at supporta nila sa idolo nila ay protective sila.

“Initial reaction po cguro ito. Hindi sa tinolerate ko sila pero sana hinayaan na natin ito. Kung wala ang mga taong sumusuporta at lubos na nagmamahal sa atin wala din tatangkilik sa lahat ng ginagawa natin.”

Ang iba pang X post ni Vice, “Sa aking mga LITTLE PONIES hindi sapat at katanggap tanggap na dahilan na mahal nyo ko para maging masama kyo sa iba. Ipinagpapasalamat ko ang suporta nyo but i will not enable your toxic behavior just because i seek ur support. I love you my mature and thinking Little Ponies!

“Sa mga kamag anak ng Nanay ko sana po wag nyo kong ibash dahil nakaligtaan kong imention ang Nanay ko sa speech ko kagabi.”

At ang recent post niya, “Ay di po kami magkaaway. Magkamessage po kami now. As enn.”

Sa isang banda, bakit nga ba sobrang big deal kung hindi nabanggit ang pangalan ni Kim? Hindi ba pwedeng dahil sa live ay nakalimutan lang talaga?

Pacquiao-Mayweather rematch tiwalang magiging record-breaking event pa rin

Posted on: July 23rd, 2026 by Francis Paolo Torres No Comments

NANINIWALA ang MP Promotions CEO Jas Mathur na mananatiling malaking atraksyon sa mga boxing fans ang rematch nina Manny Pacquiao at Floyd Mayweather Jr. kahit na naurong ang laban nito sa Enero sa susunod na taon.

Ayon kay Mathur, tiwala siyang muling magiging matagumpay at makapagtatala ng rekord ang muling pagtatapat ng dalawang boxing legend dahil ito umano ang laban na nais muling mapanood ng publiko.

Iginiit ni Mathur na ang rematch nina Pacquiao at Mayweather ang magiging isa sa pinakamalaking sporting events sa panahon ng streaming era.

Matatandaang inanunsyo ang rematch ngayong taon, ngunit agad itong kinuwestiyon ng ilang boxing analyst at tagahanga kung makakamit pa nito ang parehong interes na nakuha ng kanilang unang laban noong 2015.

Gilas Pilipinas bumagsak ang ranking sa FIBA Basketball World Cup

Posted on: July 23rd, 2026 by Francis Paolo Torres No Comments

BUMAGSAK ang world ranking ng Gilas Pilipinas matapos ang third window ng Basketball World Cup Qualifiers noong Hulyo.Balitang Pilipinas

Ayon sa FIBA Men Ranking ay nasa pang-39 na puwesto na ang Gilas Pilipinas.

Mula sa dating pang-36 ay bumagsak sila ng tatlong puwesto.

Ang nasabing ranking ay inilabas matapos ang double overtime na pagkatalo ng Gilas sa New Zealand 106-102 at Australia 92-49 noong nakaraang mga linggo.

Nasa pang-pitong puwesto naman ang Gilas Pilipinas sa Asian zone kung saan pinapangunahan ito ng Australia.Radyo

Hindi lamang ang Gilas Pilipinas ang nakaranas ng pagbagsak ng puwesto dahil ang Australia na nasa pangpito sa buong mundo ay nasa pang-walo na habang ang Kuwait na mula sa dating nasa pang-109 ay nasa pang 118 na puwesto at ang South Africa na mula sa dating pang-110 ay nasa pang 119 na puwesto.

Inaasahan ang pagbabago ng ranking ng Gilas Pilipinas sa paghaharap nila laban sa Jordan sa Agosto 28 at ang Iran sa Agosto 30.

Kauna-unahang SOPA: Mega Clinic at Command Center, Ibinida ni Gov. Sol Aragones sa Laguna

Posted on: July 23rd, 2026 by Francis Paolo Torres No Comments

SANTA CRUZ, LAGUNA — Inilahad ni Gobernadora Sol Aragones ang mga makabagong proyekto para sa lalawigan—kabilang ang pagpapatayo ng isang 5-palapag na Mega Clinic at ang pagtatatag ng isang Provincial Command Center—sa kanyang kauna-unahang State of the Province Address (SOPA) noong Hulyo 20 na ginanap sa Laguna Sports Complex.

Sa kanyang ulat sa bayan, binigyang-diin ng gobernadora ang malaking pondo at pansin na ibinubuhos ng kanyang administrasyon sa sektor ng kalusugan. Tampok dito ang panukalang Mega Clinic na lalagyan ng mga state-of-the-art na kagamitan at kompletong pasilidad upang magbigay ng mga libreng laboratory test tulad ng X-ray, ECG, CT scan, at MRI.

Bukod dito, magiging libre na rin sa pasilidad ang chemotherapy, dialysis, dental services, at eye check-up na may kasama pang libreng salamin para sa mga pamilyang Lagunense. Kasabay ng mga programang medikal, inihayag din ang pagtatatag ng Provincial Command Center. Sa pamamagitan nito, lalagyan ng mga CCTV camera ang buong lalawigan upang masubaybayan nang mabilis, sentralisado, at tuloy-tuloy ang seguridad, trapiko, at mga sakuna sa Laguna. Kaakibat din nito ang paglulunsad ng sistemang emergency response na tinatawag na “Ambulance on the Go”.

Dinaluhan din ang naturang kaganapan ng mga kinatawan mula sa iba’t ibang distrito, mga punong lungsod, bayan, at mga miyembro ng Sangguniang Panlalawigan na nagpakita ng matatag na pagkakaisa.

Dinaluhan ang naturang kaganapan ng mga kinatawan, alkalde, at miyembro ng Sangguniang Panlalawigan na nagpakita ng matatag na suporta sa mga proyekto. Ayon sa pamahalaang panlalawigan, ang pagkakaisang ito ay magsisilbing pundasyon sa mabilis na pagpapatupad ng mga nakalinyang programa para sa seguridad at kalusugan ng buong Laguna.

(Yvonne Bagang/ Boy Morales Sr.)

Livelihood training sa mga senior citizen sa Caloocan

Posted on: July 23rd, 2026 by Francis Paolo Torres No Comments

BINIBIGYAN ng halaga ng Pamahalaang Lungsod ng Caloocan sa ilalim ng pamumuno ni Mayor Along Malapitan ang kapakanan at aktibong pamumuhay ng mga senior citizen, sa pamamagitan ng livelihood training sa basket weaving ay nagkaroon ng pagkakataon na matuto ng bagong kasanayan at mapanatiling aktibo at malikhain ang mga nakatatanda.

Pinasalamatan naman ni Mayor Along ang pagtutulungan ng Office for Senior Citizens Affairs at Circle of Hope para sa nasabing proyektong. (Richard Mesa)

Napagkasunduan ng Kamara at ng Office of the President na gawing “simple but dignified” ang SONA

Posted on: July 23rd, 2026 by Francis Paolo Torres No Comments

NAKAHANDA na ang lahat sa ika-limang State of the Nation Address (SONA) ni Pangulong Ferdinand R. Marcos Jr. na gaganapin sa House of Representatives sa darating na Lunes, July 27.

Ito ang inihayag ni House Speaker Faustino “Bojie” G. Dy III matapos niyang personal na ininspeksyon ang plenary hall, maging ang mga pasilidad ng Batasan Complex sa Quezon City kung saan matatagpuan ang gusali ng House of Representatives.

“Tungkulin nating tiyakin na ang bawat aspeto ng SONA ay magiging maayos, ligtas, at karapat-dapat sa kahalagahan ng okasyong ito. Mahalaga ang araw na ito hindi lamang para sa pamahalaan kundi para sa bawat Pilipino, dahil ito ang pagkakataong magbibigay ang Pangulo ng ulat sa kalagayan ng bansa at ng direksiyong ating tatahakin. Handa na ang Kamara para sa ikalimang State of the Nation Address ng Pangulo,” pahayag ni Dy.

Ayon kay Dy, napagkasunduan ng Kamara at ng Office of the President na gawing “simple but dignified” ang SONA. Ito ay matapos ang ginanap na inter-agency coordination meeting ng mga opisyales ng House of Representatives, Office of the President, at ng Senado.

“We’re all set,” pahayag naman ni House Secretary General Atty. Cheloy Velicaria-Garafil kung saan sinamahan niya ang mga opisyales sa gagawing seating arrangements para sa mga dignitaries at viewing rooms sa mga hindi makakapasok sa plenary hall.

Sinamahan din ni Garafil ang mga opisyales ng Office of the President sa ruta na dadaanan ni Pangulong Marcos hanggang sa plenary hall kung saan magaganap ang kanyang ika-limang SONA.

Magkakaroon din ng deployment ng medical personnel mula sa House Medical and Dental Service, kasama ang ilang medical teams mula sa St. Luke’s Medical Center, Diliman Doctors Hospital, Philippine Heart Center, at East Avenue Medical Center.

Nakaantabay naman ang emergency services ng Department of Health, local government units, Bureau of Fire Protection, at ang Philippine National Police para sa seguridad ng SONA.

(VINA de GUZMAN)

“Benteng Bigas Meron Na” , umabot na sa 12 milyon

Posted on: July 23rd, 2026 by Francis Paolo Torres No Comments

TINATAYANG umabot na sa mahigit 12 milyong benepisaryo sa iba’t ibang lugar sa bansa ang nakikinabang na sa P20-per-kilo rice na ipinangako ni Pangulong Ferdinand R. Marcos Jr. sa panahon ng kampanya noong 2022.

Sa katunayan, sinabi ni Agriculture Secretary Francisco P. Tiu Laurel Jr. na ang flagship “Benteng Bigas, Meron Na!” ng gobyerno ay patuloy na lumalawak, dahilan para ang 20-peso-per kilo rice ay available na ngayon sa 800 participating outlets sa buong bansa.

Target ng Department of Agriculture (DA) ang magkaroon ng 1,500 outlets bago matapos ang taon upang makapagbigay ng “affordable, dekalidad na bigas na mas malapit sa pamilyang Filipino sa mas maraming komunidad habang pinalalakas ang suporta para sa lokal na magsasaka at mangingisda.

“Ang target natin ay ‘yung mga lower income lalo na ang mga PWD, 4Ps, single parents at seniors. Target natin is 15 million households,” ayon kay Tiu Laurel.

Sa kasalukuyan, ang programa ay namahagi na ng 15,000 hanggan 20,000 metric tons ng P20 bigas kada buwan, na ang layunin ng DA ay doblehin ang 40,000 metric tons kada buwan hanggang Disyembre upang masiguro na mas maraming pamilyang filipino ang maaaring magkaroon ng access sa abot-kayang pangunahing pagkain sa gitna ng global at local challenges.

Sa kabila ng epekto ng El Niño, tiniyak ng DA sa publiko na nananatiling matatag ang food supply, binigyang diin na walang dahilan para mag-alala habang patuloy na nagpapatupad ang gobyerno ng mga hakbang upang matiyak ang pagkain na kakailanganin ng bansa.

“Marami naman tayong supply, ample, walang cause for any alarm, we are food secure,” ayon sa Kalihim.

Maliban sa gawing mas affordable ang bigas, nilikha rin ng inisyatiba ang reliable market para sa locally produced palay, pinapayagan ang mga magsasaka na kumita ng mas maayos habang sinisiguro na mas makikinabang ang mga consumers mula sa mas mababang halaga ng pagkain.

“Masayang-masaya ang farmers… Nakakatulong talaga sa kanilang kabuhayan,” ang sinabi ng Kalihim.

Upang mas lalo pang palakasin ang agriculture sector, patuloy na namumuhunan ang DA sa long-term interventions gaya ng solar-powered irrigation systems, farm-to-market roads, agricultural credit sa pamamagitan ng Agricultural Credit Policy Council (ACPC), climate resilience programs para sa mga magsasaka at mangingisda, at mga hakbang para mapigilan ang pumatay ng isa sa panahon ng matinding weather conditions.

Gayundin, pinabilis naman ng DA ang infrastructure investments sa pamamagitan ng public-private partnerships, na may target na pagpapatayo ng 10,000 kilometers ng farm-to-market roads sa loob ng dalawan taon, habang isinusulong ang unang tatlong mega hatcheries para palakasin ang aquaculture production at paghusayin ang pangkabuhayan ng fishing communities.

Itinutulak din ng DA ang reporma na “that encourage greater investments in rice milling, drying, and storage facilities to strengthen the local rice industry, reduce dependence on imports, and create more opportunities for Filipino farmers over the long term.”

( DARIS JOSE)

BI LUMAHOK SA IMMIGRATION CONFERENCE SA INDONESIA HINGGIL SA HUMAN TRAFFICKING

Posted on: July 23rd, 2026 by Francis Paolo Torres No Comments

DUMALO ang Bureau of Immigration (BI) sa Bali Process Immigration Officials’ Conference sa Bali, Indonesia, upang palakasin ang kooperasyon ng mga bansa laban sa human trafficking para sa sapilitang kriminalidad at iba pang transnational crimes.

Pinangunahan ni BI Commissioner Joel Anthony Viado ang delegasyon ng Pilipinas. Naging resource speakers naman sina Ann Camille F. Mina, Deputy Chief ng Immigration Protection and Border Enforcement Section, at Bienvenido Castillo III, Deputy Chief ng BI Anti-Terrorist Group.

Ibinahagi ng delegasyon ng Pilipinas ang whole-of-government approach ng bansa sa paglaban sa human trafficking, kabilang ang mahigpit na departure screening ng mga outbound Filipino passengers, intelligence-based risk profiling, masusing pagsusuri ng mga dokumento, at pakikipag-ugnayan sa Inter-Agency Council Against Trafficking (IACAT) upang matukoy at matulungan ang mga posibleng biktima bago sila makaalis ng bansa.

Tinalakay din ang lumalalang kaso ng online recruitment para sa cyber scam operations at iba pang uri ng sapilitang kriminalidad, at binigyang-diin ang kahalagahan ng mas matatag na intelligence sharing at cross-border cooperation.

Ayon kay Viado , mahalaga ang naturang kumperensya sa pagpapalakas ng ugnayan ng mga immigration authority sa rehiyon upang mas epektibong labanan ang human trafficking at iba pang transnational crimes.

“Habang patuloy na nagbabago ang mga taktika ng mga trafficking syndicate at ginagamit ang teknolohiya sa kanilang operasyon, kinakailangang paigtingin ang pagbabahagi ng impormasyon, palakasin ang seguridad sa hangganan, at pagtibayin ang pagtutulungan ng mga bansa upang maprotektahan ang mga mamamayan at mapanatiling ligtas ang ating mga hangganan,” ani Viado. (Gene Adsuara)