MATAGUMPAY na naaresto ng mga ahente ng Philippine Drug Enforcement Agency Regional Office–National Capital Region Northern District Office (PDEA RO-NCR NDO), sa pakikipagtulungan ng PDEA RO-NCR Southern District Office (SDO), Philippine National Police Drug Enforcement Group – Special Operation Unit NCR (PNP DEG SOU NCR), at Pasay City Police Station 1, ang dalawang suspek na nahulihan ng humigit-kumulang 10 kilo ng pinaghihinalaang Methamphetamine Hydrochloride o mas kilala sa tawag na shabu, na tinatayang nagkakahalaga ng ₱68-M sa isang buy-bust operation sa Pasay City.

Ang operasyon ay isinagawa bandang alas-7:30 ng gabi noong Hunyo 6, 2026, sa kahabaan ng Diosdado Macapagal Boulevard, Barangay 76, Pasay City.

Ang mga naarestong suspek ay kinilala lamang sa kanilang mga alyas na “Ron,” isang 41-anyos at residente ng Barangay Santa Isabel, Dipolog City, at “Bai,” 32-anyos at residente ng Barangay Divisoria, Zamboanga City.

Narekober sa operasyon ang isang kulay abong foil pack na naglalaman ng humigit-kumulang 1,000 gramo ng pinaghihinalaang shabu, na siyang pinagbentahan at siyam pang kulay abong foil pack na naglalaman ng humigit-kumulang 9,000 gramo ng pinaghihinalaang shabu, kaya ang kabuuang dami ng nakumpiska ay nasa 10,000 gramo na tinatayang aabot sa halagang ₱68-M.

Nakumpiska rin ang tatlong identification card, dalawang Android mobile phone, perang ginamit bilang buy-bust money at isang sasakyan.

Ang mga suspek ay sasampahan ng kasong paglabag sa Section 5 (Sale of Dangerous Drugs) at Section 11 (Possession of Dangerous Drugs), Article II ng Republic Act No. 9165 o mas kilala bilang Comprehensive Dangerous Drugs Act of 2002.

Ang mga nakumpiskang pinaghihinalaang ilegal na droga ay ipapadala sa PDEA Laboratory Service para sa forensic examination. (PAUL JOHN REYES)

TINIYAK ng Manila Police District (MPD) na handa silang magbantay at magbigay ng seguridad sa Mendiola sa Biyernes, kasabay nang pagdiriwang ng Araw ng Kalayaan sa bansa.

Kaugnay nito, perso­nal na ring ininspeksyon ni MPD Director PBGen. Arnold Santiago ang Mendiola kahit ilang araw pa bago ang pagdiriwang ng Independence Day sa Hunyo 12, para sa isinasagawa nilang preparas­yon, sakaling magdaos ng mga kilos-protesta ang ilang grupo sa nasabing lugar.

Ayon kay Santiago, nais niyang masiguro na protektado ang sangay ng ehekutibo ng pamahalaan, partikular na si Pang. Ferdinand Marcos Jr.

Kabilang sa ininspeksyon ng MPD chief ay ang mga pangunahing kalsada, mga gate, papasok, at palabas ng Palasyo ng Malacañang.

Siniguro rin naman ni Santiago na may sapat silang mga tauhan upang magbantay sa Malacañang at panatilihin ang kapayapaan at kaayusan sa lungsod ng Maynila, sa Araw ng Kasarinlan sa bansa.