INAPRUBAHAN ng national government ang paglikha ng 32,916 bagong teaching positions para sa School Year 2026–2027 sa sinasabing bid na pagaanin ang masikip na silid-aralan at paghusayin ang teacher workloads sa mga pampublikong paaralan.

Sinabi ng Department of Budget and Management (DBM) na inaprubahan nito ang request ng Department of Education’s (DepEd) na palawigin ang teaching workforce nito sa lahat ng antas, Kindergarten hanggang Senior High School, kabilang na ang Alternative Learning System (ALS).

Sinabi ni Education Secretary Sonny Angara na ang karagdagang posisyon ay naglalayong tugunan ang long-standing staffing gaps at paghusayin ang learner-to-teacher ratio sa public schools.

“These additional items are meant to give our schools the structural support they need and allow teachers to focus more on instruction,” ayon sa Kalihim, sabay sabing ang hakbang ay alinsunod sa direktiba mula kay Pangulong Ferdinand Marcos Jr. na iprayoridad ang kapakanan ng mga guro at kalidad ng edukasyon.

“Of the total approved posts, 32,047 are Teacher I positions,” ayon sa DepEd.

Kabilang sa alokasyon ang 369 Teacher III posts para sa Special Science Teachers at 500 Teacher IV positions para sa Special Needs Education (SNED), naglalayon na palakasin ang suporta sa mga mag-aaral na nangangailangan ng specialized instruction.

Ang mga bagong posisyon ay hahati-hatiin sa buong bansa, kasama ang Zamboanga Peninsula (Region IX) na makatatanggap ng pinakamalaking alokasyon na 3,361 items.

Mayroong 1,467 Teacher I posts naman ang nakalaan para sa Schools Division ng Sulu, kung saan tinukoy ng DepEd bilang ‘critical instructional gaps.’

Sa kabilang dako, ang iba pang rehiyon na nakatanggap ng malaking alokasyon ay ang Central Luzon na may 2,722 positions, Calabarzon na may 2,644, Central Visayas na may 2,586, at Northern Mindanao na may 2,541.

Sa ilalim ng umiiral na polisiya, magpapalabas ang DBM regional offices ng Notices of Organization, Staffing, and Compensation Actions (NOSCAs) direkta sa Schools Division Offices para sa elementary, senior high school, at ALS teaching positions.

Para sa junior high school, magpapalabas ang NOSCAs ng implementing units.

Ang paglikha ng bagong teaching items comes ay bukod pa sa pagsisikap ng DepEd na paghusayin ang teacher career development sa pamamagitan ng Expanded Career Progression (ECP) system, isang merit-based framework na ipinakilala sa ilalim ng Executive Order No. 174, s. 2022.

Samanatala, pinapayagan naman ng ECP system ang mga guro na tumaas ang ranggo at sahod habang nananatiling ginagampanan ang kanilang papel sa loob ng silid-aralan. (Daris Jose)

NAGPALABAS si Manila Mayor Francisco “Isko Moreno” Domagoso ng P350 milyong pondo para sa mid-year bonus nang mahigit 8,000 empleyado ng Pamahalaang Lungsod ng Maynila.

“Noong Huwebes, nilagdaan ko ang pagpapalabas ng halos P350 milyon para sa inyong mid-year bonus,” ani ng alkalde sa isinagawang flag-raising ceremony sa Manila City Hall.

“Mamayang alas-dose ng tanghali, maaari niyo nang kunin. I-check niyo na. Sa inyo na ’yan, ingatan niyo ’yan,” dagdag niya.

Sa kanyang mensahe sa mga empleyado at residente ng lungsod, sinabi ng alkalde: “Eyes on the ball, doon lang tayo,” at iginiit na hindi dapat makaapekto sa pang-araw-araw na buhay at mga obligasyon ng mga Manileño ang mga hindi pagkakaunawaan ng mga pambansang lider.

Ipinaliwanag din ng alkalde na nakatakda sanang ilabas ang bonus noong nakaraang linggo ngunit naantala ito dahil sa mga patakaran ng Civil Service na nagbabawal sa pagpapalabas ng naturang benepisyo bago sumapit ang ika-15 ng buwan.

Hinimok din ni Domagoso ang mga empleyado na maging maingat sa paggamit ng kanilang bonus.

“Deserve ninyo ’yan, pero kailangan ninyo ring mag-ipon. Magtabi kayo para sa oras ng pangangailangan,” ani niya.

Ginamit din ng alkalde ang pagkakataon upang tiyakin sa mga empleyado ng lungsod na matatanggap nila ang kanilang benepisyo nang hindi na kailangang humingi pa.

“Kung ano ang nararapat para sa inyo, ibibigay sa inyo. Hindi ninyo kailangang hingin pa,” saad ng alkalde. (Gene Adsuara)

PINANGUNAHAN ni Speaker Faustino “Bojie” G. Dy III ang mga mambabatas ng House of Representatives sa pagbibigay pugay sa grupong BINI, ang kauna-unahang Pinoy Pop group na nag perform sa Coachella Valley Music and Arts Festival sa California at ipinamalas ang Original Pilipino Music (OPM) at Filipino talent sa global stage. 

Kasama si House Majority Leader Sandro Marcos ng Ilocos Norte at Negros Occidental Rep. Javier Miguel “Javi” Benitez, personal na sinalubong ni Dy ang mga miyembro ng BINI sa Kamara matapos ang Resolution No. 1001 na kumikilala sa international achievement at kontribusyon ng banda na i-promote Filipino culture worldwide. 

Sa nasabing resolusyon na inaprubahan nitong May 13, 2026, pinuri at binati ang BINI, binansagang “Nation’s Girl Group,” na kauna-unahang Filipino pop group na nag-perform sa Coachella, isa sa itinuturing na pinaka-malawak at impluwensiyal na music festival sa buong mundo.

“The success of BINI at Coachella 2026 serves as a source of immense national pride, proving that Filipino musicality and artistry can compete and excel at the highest levels of the international entertainment industry,” isinasaad ng resolution.

Isinasaad din sa resolusyon ang pagkilala sa BINI bilang “significant contribution to global promotion of Filipino talent and culture,” at ang pag-perform sa prestihiyosong Coachella ay naging inspirasyon sa mga Filipino artists at creators.

“The success of BINI at Coachella 2026 serves as a source of immense national pride, proving that Filipino musicality and artistry can compete and excel at the highest levels of the international entertainment industry,” saad ng resolusyon. 

Ang grupong BINI ay naging popular matapos itong mag-perform sa Coachella Valley Music and Arts Festival noong April 10 at 17, 2026. Sa kanilang 45-minute set sa Mojave stage, kanilang inawit ang kanilang unang single “Blush” at ilan sa kanilang popular hits tulad ng “Pantropiko,” “Karera,” at “Salamin, Salamin.” (Vina de Guzman)