DISMAYADO ang isang mambabatas sa kakulangan ng suporta ng gobyerno sa mga serbisyong pampubliko para sa mga Pilipinong may autism.

Ayon kay House Deputy Speaker Alfredo “Albee” Benitez, nasa 1.2 milyong Pilipino at kanilang pamilya ang apektado ng “Autism Spectrum Disorder (ASD).

“Autism Spectrum Disorder (ASD) affects 1.2 million Filipinos and their families. Yet, many still face barriers in terms of access to early diagnosis early intervention inclusive education meaningful employment and community support. These gaps limit not only their potential but also the opportunities for them to fully participate in society” ani Benitez.

Sinabi pa ng mambabatas na dahil sa aspetong ito ay napipilitan ang mga magulang na may anak na may autism na kumuha ng mas mahal at magastos na serbisyo mula sa private therapy centers o hindi na nabibigyan ng therapy ang kanilang mga anak.

Bunsod nito, isinusulong ng mambabatas ang House bill 3379 o “An Act Instituting a Comprehensive National Autism Spectrum Disorder (ASD) Program.” Pangunahing layunin nito ay mabigyan ng libreng therapy session ng pamahalaan ang mga Pinoy na may autism sa pribado o pampublikong ospital.

Nakapaloob pa sa panukala ang paglaan ng libreng developmental assessment, pagpapatuloy ng programa sa bahay, buwanang ayuda o allowance sa pamilya ng may spectrum, dagdag na leave para sa mga magulang ng mga batang may autism, edukasyon at iba pang oportunidad gaya ng trabaho.

(Vina de Guzman)

News 5

Electrician na wanted sa rape, inaresto sa loob ng selda sa Caloocan

NABISTONG wanted pala sa kasong panghahalay sa isang menor-de-edad na biktima ang isang electrician na kabilang sa mga naaresto sa operation ng pulisya sa Caloocan City.

Sa ulat ng tanggapan ni Northern Police District (NPD) Acting Director P/BGen. Benliner Capili, ang 29-anyos na akusado na residente ng Brgy, Nasucob, Bulalacao, Oriental Mindoro ay kabilang sa mga Most Wanted Person ng NPD. 

Nakapiit sa Custodial Facility Unit ng Caloocan CPS ang akusado nang kasamang maaresto sa isinagawang mga operation ng mga tauhan ni Caloocan Police Chief P/Col. Joey Goforth sa lungsod.

Nang isagawa ng pulisya ang background investigation, natuklasan na may nakabimbing warrant of arrest ang electrician na inilabas nitong Mayo 18, 2026 ng Caloocan City Regional Trial Court (RTC) Branch 131, para sa kasong Statutory Rape.

Kaagad namang isinilbi ng mga operatiba ng Warrant and Subpoena Section ng Caloocan CPS sa electrician ang nasabing warrant sa loob mismo ng nasabing detention facility.

Ayon kay Col. Goforth, walang piyansang inirekomenda ang hukuman para sa pansamantalang paglaya ng akusado kaya mananatili muna siya sa nasabing piitan habang hinihintay ang commitment order ng korte para sa paglilipat sa kanya sa Caloocan City Jail. (Richard Mesa)

NAGLABAS ng abiso ang Philippine Coast Guard (PCG) kaugnay ng posibleng paghulog ng mga pira-pirasong bahagi ng roketete sa Hilagang Luzon mula sa paglulunsad ng Long March 7A na roketete ng Tsina.

Ang nasabing paglulunsad ay nakatakdang isagawa mula sa Wenchang, Hainan, sa pagitan ng 12:08 ng hatinggabi hanggang 1:12 ng madaling araw (oras sa Pilipinas), ika-27 ng Mayo 2026.

Natukoy ang mga lugar na maaaring laglagan ng mga pira-pirasong bahagi sa mga sumusunod na karagatan:

Lugar ng Laglagan 1 – humigit-kumulang 41 nautical mile mula sa Burgos, Ilocos Norte, at 62 nautical mile mula sa Pulo ng Dalupiri, Cagayan

Lugar ng Laglagan 2 – humigit-kumulang 69 nautical mile mula sa Burgos, Ilocos Norte, at 81 nautical mile mula sa Pulo ng Dalupiri, Cagayan

Ipinapayo ng PCG sa mga mangingisda, mga nagpapatakbo ng maliliit na sasakyang pandagat at mga mandaragat na iwasan ang mga natukoy na lugar sa panahon ng itinakdang oras ng paglulunsad at manatiling mapagmatyag kung may anumang lumulutang na pira-piraso o kahina-hinalang bagay sa dagat.

Mahigpit na pinapayuhan ang publiko na huwag lumapit o kunin ang anumang pinaghihinalaang bahagi ng roketete dahil maaaring nagtataglay ito ng mga mapanganib na materyales. Ang anumang makitang lumulutang na bagay o pira-piraso ay dapat agad iulat sa pinakamalapit na himpilan ng PCG o sa mga lokal na awtoridad para sa wastong pagsusuri at paghawak. (Gene Adsuara)

OPISYAL na tinurn-over ang 26 housing units sa ilalim ng Ameya Homes sa mga kwalipikadong pamilyang benepisyaryo mula sa Samahang Nagkakaisang Kapatiran ng Mapulang Lupa (SNKMKL), na nagmarka ng isa pang milestone sa patuloy na pangako ng Pamahalaang Lungsod ng Valenzuela sa inclusive housing at sustainable community development.

Ang proyektong pabahay ay naging posible sa pamamagitan ng pagtutulungan ng Pamahalaang Lungsod at Habitat for Humanity Philippines, isang non-profit na organisasyon na nakatuon sa pagtatayo ng ligtas at disenteng mga tahanan para sa mga pamilya at komunidad na nangangailangan.

Sa kanyang mensahe, pinaalalahanan ni Mayor Wes Gatchalian ang mga benepisyaryo na panatilihin ang kaayusan ng Ameya Homes, “Sa bagong bahay, bagong buhay na sisimulan natin dito sa Mapulang Lupa, kung sinimulan natin nang maayos at maganda, sana ay panatilihin natin maayos at maganda ang inyong lugar.”

Sa ilalim ng partnership, ipinagkaloob ng Pamahalaang Lungsod ang property na pag-aari ng LGU para sa pagpapaunlad ng pabahay, habang ang Habitat for Humanity Philippines, sa pamamagitan ng suporta ng mga donor at partner nito, ay pinondohan at itinayo ang 26 housing units para sa mga kwalipikadong miyembro ng SNKMKL.

Bilang karagdagan sa mga yunit ng pabahay, ang Habitat for Humanity Philippines ay nag-donate din ng dalawang palapag na multi-purpose building na inilaan upang magsilbing lugar para sa mga aktibidad, pagpupulong, at mga programa ng komunidad ng mga may-ari ng bahay.

Samantala, pinondohan at ipinatupad ng Pamahalaang Lungsod ang humigit-kumulang PhP 7.6 milyong halaga ng mga gawaing pagpapaunlad ng lupa, kabilang ang pagtatayo ng mga kalsada, drainage system, at perimeter fences upang matiyak ang mas ligtas, mas functional, at matitirahan na kapaligiran para sa mga residente.

Sa loob ng mga dekada, ang mga miyembro ng SNKMKL ay nabuhay sa mga mapanghamong kondisyon nang walang ligtas na panunungkulan at sa pamamagitan ng proyektong pabahay, binibigyan na sila ngayon ng mas ligtas at mas matatag na mga tahanan sa loob ng isang maunlad na komunidad.

Ang Ameya Homes ay bahagi ng mas malawak na inisyatiba ng lungsod upang iangat ang mga komunidad at pahusayin ang kalidad ng buhay ng mga Valenzuelano sa pamamagitan ng accessible na pabahay at pag-unlad ng urban na nakasentro sa mga tao. (Richard Mesa)

ISINELDA ang apat drug suspects kabilang ang 18-anyos na teenager nang maaktuhan naglalaro ng illegal na sugal kasama ng apat pang kelot sa magkahiwalay na lugar sa Valenzuela City.

Sa ulat ni Police Investigator P/MSgt. Carlito Nerit Jr. kay Valenzuela Police Chief P/Col. Joseph Talento, nagsasagawa ng Anti-Criminality Operation ‘Oplan Galugad’ ang mga tauhan ng Police Sub-Station 6 sa D. Santiago St., Brgy. Malanday nang maaktuhan nila ang dalawang kelot na nagka-cara y cruz alas-9:30 ng gabi.

Nasamsam sa kanila ang bet money, pangara at isang plastic sachet ng hinihinalang shabu na nakuha umano sa 18-anyos na si alyas “Lito”.

Nauna rito, huli rin sa akto ng mga tauhan ng Police Sub-Station 1 ang dalawang kelot na nagsusugal umano ng ‘lucky 9’ sa Wistaria St., De Castro Subdivision, Brgy. Paso De Blas alas-7:30 ng gabi at nasamsam sa kanila ang perang taya, baraha at isang plastic sachet ng umano’y shabu na nakuha alyas “Cliford”.

Naaresto rin ng mga tauhan ni Police Sub-Station 5 Commander P/Capt. Doddie Aguirre ang dalawang lalaki habang nagsusugal umano ng ‘cara y cruz’ sa San Diego St., Brgy., Arkong Bato alas-10:10 ng gabi at nakuha sa kanila ang bet money, pangara at isang plastic sachet ng umano’y shabu na nasamsam umano kay alyas “Efren”.

Samantala, nakumpiska naman ng mga tauhan ng Police Sub-Station 4 kay alyas “Jun” ang isang plastic sachet ng hinihinalang shabu nang mahuli sa akto na nagsusugal umano ng ‘Dice’ kasama ang isa pang lalaki pasado alas-3:19 ng hapon sa Area 3, Pinalagad, Brgy., Malinta. 

(Richard Mesa)

INIHAYAG ng Department of Trade and Industry (DTI) na may programa ang kanilang ahensiya para magbigay at magpautang sa mga drivers at operators ng mga public utility vehicles (PUVs) na gagamit ng electric vehicle (Evehicle). Nagbigay sa unang pagkakataon ng loan sa mga drivers at operators ng PUVs ang DTI sa ilalim ng programang P2 billion E-Transport Loan. Mayroong labing-tatlong (13) kooperatiba ang nabigyan ng P3 milyon na pautang bawat isa upang palitan na ang mga traditional jeepneys at gamitin ang E-vehicle. 

Ang unang batch ay mga drivers at operators na kung saan ibibili nila ng 2 E-vehicle para gamitin bilang pampublikong transportasyon. “The loan which is being facilitated by our attached agency, the Small Business Corporation, will help public utility drivers and even transport network vehicle service (TNVS) drivers to shift to electric vehicles, which also include electric motorcycles,” wika ni DTI secretary Cristina Roque.

Sa ilalim ng programa ay sa loob ng isang (1) taon ay wala munang babayaran na interest mula sa principal loan upang ang mga operators at drivers ay makausad muna dahil mayroon pang krisis at ayaw ng pamahalaan na mahirapan sila. Ang interest ay 6.7 percent kada taon. Ang nasabing programa ay magbibigay ng suporta sa mga small transport operators upang mag shift sa paggamit ng electric vehicles. 

 Ang utang ay babayaran sa loob ng 5 taon. Kasama sa mga qualified na beneficiaries ay ang mga valid na jeepney operators ganon din ang mga affiliated sa kumpanya tulad ng Grab Philippines, JoyRide Philippines, InDrive kung saan sila ay maaaring makakuha ng pautang hanggang P1.5 million kada sasakyan o di kaya ay hanggang P3 million kada beneficiary.

 Si Pasang Masda National President Obet Martin ay nagalak sa nasabing programa ng pamahalaan at sinabing maaari na nilang simulan ang pagpapalit ng mga traditional jeepney upang maging E-vehicle na. Kasabay din niyang sinabi na dahil mataas ang presyo ng krudo sa pandaigdigan, ang programa ay isang pagkakataon upang gumamit na sila ng E-vehicle.Ang naunang batch ng programa ay katuwang ang Global Electronic Transport (GET) Philippines kung saan sila rin ang naglungsad ng “Love Bus” na E-vehicles na tumatakbo sa ilang lugar ng Metro Manila. Dagdag naman ni Roque na mas maraming drivers at operators ang maeengganyo na kumuha ng loan para sa E-vehicles at umaasa siya na mas tataas pa ang pondo ng programa at magiging P2 billion. (LASACMAR)