IKINUKONSIDERA ng House prosecution panel ang pagsasagawa ng regular press briefings sa panahon ng impeachment trial ni Vice President Sara Duterte upang tulungan ang publiko na maintindihan ang proceedings at maiwasan ang kalituhan sa mga legal issues ukol sa mga kaganapan sa Senate impeachment court.

Sinabi ni House trial spokesperson Zia Alonto Adiong ng Lanao del Sur, naghanda na ang prosecution team sa posibilidad na mahabang araw ng pagdinig, public attention at mga pagtatanong mula sa media at sambayanan na nakabantay sa kaso.

“Tayo naman po ay naka-ready na tayo. Alam na po natin baka kunti na lang ‘yung tulog natin ‘pag nagkataon po na mag-umpisa na po ang trial,” pahayag ni Adiong, House Assistant Majority Leader at chairman ng House Committee on Suffrage and Electoral Reforms sa isang radio interview.

Sinabi pa nito na tinatalakay pa ng panel ang eksaktong format pero naniniwala ito na makakatulong ang pagkakaroon ng regular briefings lalo na at masusi itong babantayan.

“But as to your question po, pinag-uusapan pa po ‘yan kung magkakaroon, pero ako in my own opinion mukhang kailangan po ‘yung sinasabi nating ginawa nung nakaraang kongreso na magkaroon ng press briefing,” paliwanag ni Alonto Adiong. 

“Para sa ganon ay mas madali para sa ating mga kaibigan sa media na mailahad ang mga dapat mailahad na information at magtanong na rin ng ating partners in the media ‘yung mga kinakailangan tanong para po magkaroon ng mas masusing diskusyon at mas clarified na information na maipapahatid po natin sa publiko.”

Naniniwala pa ito na makakatulong ang pagsasagawa ng formal briefings sa mga mamamahayag na makakuha ng malinaw na impormasyon mula sa bahagi ng prosekusyon at maiwasan ang iba’t ibang interpretasyon sa mga kaganapan sa impeachment court.

“So isa po yan sa pinag-usapan ng prosecution team whether or not there will be a press briefing by the House trial prosecution. Pero ako, naniniwala po ako na kailangan po ‘yan,” dagdag nito.

Ito ay dala na rin sa maraming Pinoy ang sumusunod at nagbabantay sa impeachment case kaya kailangan na magkaroon ng regular updates sa trial. (Vina de Guzman)

INIHAIN ni House Senior Deputy Minority Leader at Mamamayang Liberal (ML) Partylist Rep. Leila de Lima ang panukalang magkukurba sa ginagawang pagbebenta muli o reselling ng admission tickets sa pamamagitan ng hindi awtorisadong paraan.

Sa House Bill No. 9171, layon ni De Lima na protektahan ang consumers at masiguro ang patas na access sa mga entertainment events sa pamamagitan nang pagbawal sa ticket scalping, partikular na sa resale ng tickets sa presyong mahigit sa 10% face value ng walang sapat na awtorisasyon.

Ang ticket scalping ay ang nakagawiang pagbili ng admission tickets sa isang entertainment events at muling pagbebenta nito sa mas mataas sa kanilang original face valueginagawa sa mataas na demand sa mga concerts, sports matches, at festivals. 

“We want to restore public trust and ensure that access to live events is determined by fairness rather than the ability of intermediaries to exploit demand for profit. Hindi pwedeng hayaan lang ang labis na pananamantala ng scalpers. Kung hindi ito aaksyunan at papatawan ng mahigpit na parusa, titindi pa ang kanilang modus at mas marami pa silang mabibiktima – mga fans na mapipilitang bumili sa di-makatarungang presyo o mapagkakaitan ng oportunidad na mapanood ang kanilang mga hinahangaan dahil naubusan o dahil hindi kayang makabili ng mahal na ticket,” dagdag nito.

Sinabi ng mambabatas na may mga reklamo mula sa mga fans ukol sa sobrang resale prices ng mga events na gusto nilang panoorin o daluhan.

Nakapaloob pa sa HB 9171, ang mga napatunayang nagsagawa ng “ticket hoarding, selling through unauthorized channels, and failure to disclose accurate pricing information” ay paparusahan ng multang mula P50,000.00 hanggang P500,000.00 atpagkakakulong ng 6 na buwan hanggang tatlong taon.

“Malinaw po: Ang ticket scalping ay hindi maituturing na diskarte lang sa pagnenegosyo. Hindi ito dapat ipagkibit-balikat lang kung na-a-afford naman ng pinagbebentahan. Isa itong garapalang pagkatuso, panloloko at panggagantso sa kapwa,” pahayag ni De Lima. 

 (Vina de Guzman)

NANAWAGAN si ACT Teachers Party-list Representative at Deputy Minority Leader Antonio Tinio sa Office of the Ombudsman na agad aksyunan ang mga umano’y anomalya sa Davao at Matina River projects.

Naging matundi kasi ang pagbaha sa ilang komunidad sa Davao City nitong Lunes.

Ang pagbaha ay dulot ng matinding buhos ng ulan dala ng Intertropical Convergence Zone (ITCZ) at easterlies, mga pagbaha sa mga lugar tulad ng Matina Pangi, Matina Crossing, Bunawan, at mababang lugar na nakaapekto sa klase, trabaho, pagkakitaan at pagbibigay ng basic services.

“What we are seeing in Davao City today is the human cost of ‘flood control’ that exists only on paper or is grossly shortchanged in implementation,” ani Tinio. 

“If billions were truly spent to protect communities along the Davao and Matina River systems, people should not be wading through waist-deep floodwaters year after year.”

“Hindi na ito simpleng ‘masamang pa panahon.’ Malinaw itong ebidensya ng bulok at kuwestiyonableng flood control projects sa lungsod. Kapag bilyon-bilyon ang inilaan, pero paulit-ulit ang pagbaha at pagkasira ng kabuhayan, may dapat managot,” dagdag nito.

Sinabi ni Tinio na sa isinagawang independent review ng ACT Teachers sa 121 flood control projects sa Davao at Matina Rivers mula 2019 hanggang 2022 at pagred-flagged sa 80 contracts na nagkakahalaga ng ₱4.44 billion dahil umano sa iregularidad tulad ng overlapping contracts, double funding, location changes at shortened project lengths sa kabila ng near-full payments, contracts without verifiable specifications, items without clear GAA authorization, at long-incomplete projects.

“The current flooding makes the case for physical verification even more urgent. We cannot allow a cycle where funds are repeatedly allocated, contracts are repeatedly awarded, and communities are repeatedly flooded,” aniya.

Nagsumite na rin ang mambabatas ng liham kay Ombudsman Jesus Crispin C. Remulla, kabilang na ang mga documents, materials, at panawagan ng Kamara para sa imbestigasyon sa Davao flood control issue.

“Enough delays. The Ombudsman must move immediately—inspect the sites, audit the contracts, trace the payments, and file the appropriate cases. Every rainy season that passes without accountability is a green light for another round of corruption and negligence. Lahat ng sangkot, dapat managot. Hindi puwedeng ang taumbayan ang laging binabaha, habang ang mga kontratista at opisyal ang laging nakikinabang,” pagtatapos ni Tinio. (Vina de Guzman)

HIMAS-REHAS ang isang pulis nang arestuhin kanyang mga kabaro makaraang hipuan sa puwit ang 14-anyos na dalagita at sugurin pa sa loob ng bahay ang biktima nang magsumbong sa kanyang pamilya sa Malabon City, Martes ng gabi.

Sa ulat ng tanggapan ni Northern Police District (NPD) Acting Director P/BGen. Benliner Capili, lasing umano ang 45-anyos na pulis na may ranggong PCMS at nakatalaga sa District Anti-Carnapping Unit (DACU) ng Manila Police District (MPD) nang mapag-tripang hipuin ang matambok na puwit ng 14-anyos na dalagita habang naglalakad pauwi sa Salmon St., Brgy., Longos dakong alas-7:30 ng gabi.

Kaagad namang nagsumbong sa kanyang pamilya ang dalagita kaya sinamahan siya ng kanyang kuya upang komprontahin ang pulis subalit, sa halip na humingi ng paumanhin, nagalit at nagbitiw pa umani ito ng mga pananakot na pananalita.

Dahil sa takot, napilitang tumakbong pauwi ang magkapatid subalit, hinabol sila ng pulis hanggang sa loob ng kanilang bahay na nagdulot ng takot sa pamilya ng dalagita.

Nang makarating naman sa kaalaman ng mga tauhan ni Malabon Police Chief P/Col. Allan Umipig ang pangyayari ay agad nagresponde ang mga ito sa nasabing lugar sa pangunguna ng Special Weapon and Tactic (SWAT) team na nagresulta sa kanyang pagkakadakip sa suspek.

Nahaharap sa mga kasong Acts of Lasciviousness in relation to RA 7610 (Child Abuse), Grave Threats, Alarms and Scandal, Violation of Domicile, at paglabag sa R.A. 10591 o ang Comprehensive Firearms and Ammunition Regulation Act ang pulis matapos makumpiska sa kanya ang kalibre .9mm pistol na kargado ng 20 bala sa magazine. (Richard Mesa)

  MABABAKAS sa kanyang maamong anyo ang kabutihan ng kanyang kalooban at pagka-matulungin sa kanyang kapwa. Siya si dating kapitan Rogelio ” Ricky” Madali ng Brgy. 35 , Zone-3, Dist. 2 Caloocan City! Matagal ding nanungkulan ang butihing kapitang Rogelio sa kanilang pamayanan ng may 13 years in Service as Public Servant. Nagsimula siya bilang Kagawad hanggang siya’y naupo bilang butihing “AMA” ng Brgy. 35. Sa loob ng mga nagdaang taon marami siyang nagawa sa kanilang komunidad tulad ng pananatili sa kaayusan ng Brgy. Hall,

paglilinis sa mga estero at paglalagay ng mga CCTV para maiwasan ang anumang masamang kaganapan.  

Pinabakuran din ng butihing Kap. Ricky ang ilog para ‘ di na tapunan ng mga basura at maiwasan ang pagbaha. Nagkaroon din sila ng firetrucks at mga ambulansiya para sa anumang sakuna at meron din fire extinguisher para sa emergency.

Libre rin ang pagkuha sa kanila ng Indigency Clearance at Brgy. Clearance. Pagdating naman sa mga gamot laging nakalaan para sa mga Senior Citizens mga magulang at kabataan. Ayon pa sa butihing Ama Kap. Ricky “, ibabalik ko ang Serbisyong Totoo sa aking mga anak dito sa aming Barangay 35. Kahit sa maliit na bagay maibigay ko sa kanila masaya na ako..kahit ngayon po, pag may humihingi sa akin tinutulungan ko po sa abot ng aking makakaya. Nararamdaman ko rin po kasi ang kanilang kahirapan, ang sa’kin, magtulungan lang po. Nais ko rin pong magpasalamat sa aming Mahal na Mayor Along Malapitan sa kanyang mga magagandang proyektong ibinaba sa aming barangay at asahan din po ng aming mahal na Mayor Malapitan ako po at ang aking anak na si Rowena ” Weng” Madali-Oros na tatakbo bilang kagawad ay susuporta sa mga Gawaing Panlungsod ng ating Alkalde!” ang madamdaming pahayag ng isang mabait at mapagmahal na Ama ng Barangay 35 na si Kap.Rogelio ” Ricky” Madali.

( Sonny Asignacion)

TIKLO ang anim na indibidwal kabilang ang tatlong drug suspects nang maaktuhan naglalaro ng illegal na sugal sa magkahiwalay na lugar sa Valenzuela City.

Sa ulat ni Valenzuela Police Chief P/Col. Joseph Talento, nagsasagawa ng Anti-Criminality Operation ‘Oplan Galugad’ ang mga tauhan ng Police Sub-Station 3 sa Libra St., Batimana Compound, Brgy., Marulas nang maaktuhan nila ang dalawang kelot na nagsusugal umano ng ‘cara y cruz’ alas-7:25 ng gabi.

Nakumpiska sa dalawang inaresto ang bet money, pangara at isang plastic sachet na naglalaman ng hinihinalang shabu na nasamsam kay alyas “Edmar”, 39.

Nauna rito, natimbog ng mga tauhan ng Police Sub-Station 1 ang dalawa ring lalaki habang nagsusugal naman umano ng ‘lucky 9’ sa tabi ng isang covert court sa Jasmin St., Brgy., Paso De Blas dakong alas-3:40 ng hapon.

Nakuha sa kanila ang perang taya, gamit na baraha at isang plastic sachet na naglalaman ng umano’y shabu na nakumpiska umano kay alyas “Randy”, 35, helper.

Pasado alas-11:30 naman ng gabi nang maaresto ng mga tauhan ng Police Sub-Station 7 ang dalawang kelot habang nagsusugal din umano ng ‘cara y cruz’ sa Northville 1, Casarival, Brgy., Bignay. Nasamsam sa kanila ang bet money, pangara at isang plastic sachet umano’y shabu na nakumpiska kay alyas “Jerome”, 31.

Mahaharap ang mga suspek sa kasong paglabag sa PD 1602 (Anti-illegal Gambling Law) habang karagdagan pa na kasong paglabag sa R.A 9165 (Comprehensive Dangerous Drug Act of 2002) ang kakaharapin ng tatlong nakuhanan ng droga. (Richard Mesa)