2026 April Archive - People's Balita

Archive for April, 2026

Lolo na wanted sa statutory Rape sa Valenzuela, nalambat sa Abra

Posted on: April 29th, 2026 by @peoplesbalita No Comments

HIMAS-REHAS ang 66-anyos na lolo na wanted sa kaso ng Statutory Rape at Acts of Lasciviousness sa Valenzuela City nang maaresto ng pulisya sa lalawigan ng Abra.

Ayon kay Valenzuela Police Chief P/Col. Joseph Talento, nakatanggap sila ng impormasyon na nagtatago umano sa Abra ang akusado nakatala bilang No. 3 sa Top Ten Most Wanted Person sa Northern Police District (NPD).

Kaagad namang ikinasa ng mga operatiba ng Station Intelligence Section (SIS) ng Valenzuela Police ang joint operation, kasama ang local police ng Abra hanggang sa makorner ang akusado sa Barangay Ap-apaya.

Dinakip ang akusado sa bisa ng warrant of arrest na inisyu ng Valenzuela City Regional Trial Court (RTC) Branch 270, para sa dalawang bilang ng Statutory Rape na walang inirekomendang piyansa at Acts of Lasciviousness na may inirekomendang piyansa na P180,000.

Pansamantalang nakapiit ang akusado sa Custodial Facility Unit ng Valenzuela Police habang hinihintay ang utos ng korte para sa paglilipat sa kanya sa City Jail.

Pinuri naman ni Northern Police District (NPD) Acting Director P/BGen. Christopher Dela Cruz ang arresting team sa kanilang pagsisikap sa paghahanap sa mga wanted na indibidwal na pinaghahanap ng batas. (Richard Mesa)

KAWANI NG BIR HINATULAN NG MONEY LAUNDERING

Posted on: April 29th, 2026 by @peoplesbalita No Comments

NAHATULAN ng Zamboanga City Regional Trial Court Branch 12 ang isang kawani ng Bureau of Internal Revenue sa Zamboanga City kaugnay ng multiple counts ng money laundering, matapos ang reklamong inihain ng Anti-Money Laundering Council Secretariat.

Napatunayang lumabag sa Republic Act No. 9160 o Anti-Money Laundering Act, kaugnay ng mga kasong bribery at graft ang nahatulan na si BIR Revenue Officer IV Flora Sarau Albao ng Revenue District No. 93A.

Inaresto si Albao sa entrapment operation ng National Bureau of Investigation noong Mayo 27, 2022 dahil sa umano’y pangingikil ng P500,000, na nagbunsod ng imbestigasyon ng AMLC kung saan nadiskubre ang 36 bank accounts at mga depositong hindi tugma sa kanyang sahod.

Pinatawan ng Korte ng pito hanggang labintatlong taong pagkakakulong ang akusado para sa unang anim na bilang na may multang tig-P3 milyon, at apat hanggang anim na taon para sa natitirang anim na bilang na may multang tig-P1.5 milyon bawat bilang.

Ayon kay Department of Justice Secretary Fredderick A. Vida, bahagi ito ng pinaigting na kampanya laban sa katiwalian at money laundering sa hanay ng mga lingkod-bayan. (Gene Adsuara)

PNP NAKATUTOK SA OPERASYON NG MGA GASOLINAHAN UPANG MAIWASAN ANG MGA ILEGAL NA AKTIBIDAD SA SEKTOR NG PETROLYO

Posted on: April 29th, 2026 by @peoplesbalita No Comments

PATULOY na nakatutok ang Philippine National Police (PNP), sa sitwasyon ng suplay ng langis at nakikipagtulungan sa mga kinauukulang ahensya upang matiyak ang maayos na operasyon ng mga gasolinahan at maiwasan ang mga ilegal na aktibidad sa sektor ng petrolyo.

Batay sa pinakahuling monitoring, mula sa 14,529 na gasolinahan sa buong bansa, may kabuuang 290 ang naitala na pansamantalang sarado dahil sa krisis sa langis noong Abril 26, 2026. Iniulat din ng mga awtoridad ang 31 kaso na isinampa kaugnay ng iba’t ibang paglabag, kabilang ang hoarding, profiteering, at iba pang mga paglabag na may kinalaman sa mga produktong petrolyo.

Sa kabuuang kaso, 9 ang inuri sa ilalim ng hoarding, 1 sa ilalim ng profiteering, habang 21 ang kinasasangkutan ng iba pang mga paglabag tulad ng illegal storage, theft, estafa, trademark infringement, customs-related violations, at breaches of Presidential Decree No. 1865 and BP 33, as amended.

May kabuuang 77 indibidwal ang natukoy na bilang mga suspek sa iba’t ibang rehiyon, kung saan ilan sa mga kaso ay naisampa na sa korte, habang ang iba ay patuloy na iniimbestigahan pa.

Binigyang-diin ng PNP na ang monitoring efforts ay bahagi ng coordinated government response sa ilalim ng direktiba ni Pangulong Ferdinand R. Marcos Jr. upang matiyak na ang mga mahahalagang serbisyo ay mananatiling matatag habang pinoprotektahan ang mga mamimili laban sa mga mapang-abuso o ilegal na gawain sa industriya ng gasolina.
Sinabi ni PNP Chief, Police General Jose Melencio C. Nartatez Jr., na nananatiling nakatuon ang organisasyon sa balanseng pagpapatupad ng batas at proteksyon ng publiko.

“Ang ating ginagawa ay hindi lang pagbabantay, kundi siguraduhing walang umaabuso sa sitwasyon. We are acting to protect both consumers and legitimate business operators,” sabi ni PNP Chief.

Dagdag pa niya, ang mga aksyon ng PNP ay ginagabayan ng Focused Agenda nito sa ilalim ng Enhanced Managing Police Operations, na tinitiyak na ang lahat ng aktibidad sa pagpapatupad ay maayos na nakikipagtulungan sa mga regulatory agency at sinusuportahan ng mga legal na pamamaraan.

Tiniyak ng PNP sa publiko na magpapatuloy ang pagsubaybay sa buong bansa upang matiyak ang patas na pamamahagi ng gasolina at pagsunod sa mga regulasyon, habang pinangangalagaan din ang mga karapatan ng lahat ng sangkot na stakeholder. (PAUL JOHN REYES)

Manila frontliners pinag-iingat vs init ng panahon

Posted on: April 29th, 2026 by @peoplesbalita No Comments

SA GITNA ng 41°C heat index, hinikayat ni Manila Mayor Francisco “Isko Moreno” Domagoso ang Manila frontliners na mag-hydrate at mag-ingat sa init ng panahon.

Sa flag-raising ceremony sa Manila City Hall, partikular na pinag-iingat ni Domagoso mula sa init ang mga tauhan mula sa Department of Public Services, Manila Traffic and Parking Bureau, Engineering Department, Estero Rangers, Pasig Rangers, at ang mga naka-deploy sa Roxas Boulevard.
“Mag-iingat kayo. Lagi ninyong isipin na kailangan ninyong pangalagaan ang inyong sarili,” ani Domagoso.

Direkta ring kinausap ng alkalde ang hepe ng Manila Police District na si PBGen. Arnold Santiago at inatasan itong paalalahanan ang mga pulis na unahin ang kanilang kaligtasan habang nasa tungkulin.

Ayon sa DOST-PAGASA, ang 41°C na heat index ay nasa ilalim ng “Extreme Caution” category, kung saan mataas ang panganib ng heat cramps at heat exhaustion. Ang matinding init ay dulot ng El Niño na nagdadala ng mas mahabang tagtuyot at mas mataas na temperatura sa bansa at sa iba pang bahagi ng Southeast Asia.

Hinimok din ng alkalde ang lahat na uminom ng maraming tubig sa buong araw at huwag matakot sa madalas na pag-ihi basta’t nananatiling hydrated.

Kasabay nito, inatasan din ng alkalde ang Manila City Disaster Risk Reduction and Management Department (MCDRRMD) na magsagawa ng malawakang misting operation sa iba’t ibang bahagi ng lungsod bunsod ng matinding init na nararanasan sa Maynila.

Sa lingguhang City Department Heads Meeting, binigyan ng direktiba ni Domagoso si MCDRRMD Director Arnel Eustacio Angeles na agad isagawa ang naturang operasyon upang makatulong sa pagpapahupa ng init at magbigay-ginhawa sa mga Manileño.

Patuloy na pinaaalalahanan ang publiko na uminom ng sapat na tubig, umiwas sa matagal na pagkakabilad sa araw, at maging alerto sa mga sintomas ng heat exhaustion.

“Pass through costs” sa singil sa kuryente, ikinaalarma ng mambabatas

Posted on: April 29th, 2026 by @peoplesbalita No Comments

IKINAALARMA ni Akbayan Partylist Rep. Chel Diokno ang “pass through costs” sa singil sa kuryente, kasunod ng mga reklamo sa naturang mga singgil.
Ang Senior Citizen Discount, Lifeline Rate discount for 4Ps beneficiaries, Feed-in Tariff Allowance, at Green Energy Auction Allowance ay kasama sa pinakokolekta ng electric companies subalit hindi dapat singilin sa mga consumer ayon kay Diokno.
“Hindi tama na sisingilin ito sa consumers, lalo ngayong nasa gitna tayo ng krisis at mataas ang presyo ng bilihin at produktong petrolyo,” sinabi ni Diokno.
Nanawagan si Diokno sa gobyerno na rebisahin ang patakaran at bigyan konsiderasyon ang kakayahan ng mga consumer.
“Kailangang suriing mabuti ang EPIRA (Electric Power Industry Reform Act) Law at baguhin ang rules ng Energy Regulatory Commission (ERC). Ang kumpanya at ang kanilang mga shareholders ang dapat sumalo sa Lifeline Discount—hindi ang taumbayan,” sinabi ni Diokno.
Aniya, hindi makatarungan ang probisyon sa EPIRA Law na mangolekta ang mga power firms ng Lifeline Discount for the Pantawid Pamilyang Pilipino Program.
Sa senior citizens’ discount, tinukoy ni Diokno ang Republic Act No. 9994 kung saan ang mga electric companies ay maaaring gamitin na tax deductions ang mga discounts na binigay sa senior citizens.
“Hindi na ito dapat sinisingil sa consumers dahil mababawas ‘yan sa babayarang tax ng kumpanya,” ani Diokno.
Pinaliwanag ni Diokno na ang mga electric companies ay protektado sa kompetisyon at ang kanilang income ay guaranteed, kaya kailangan nila isoli ang pribilehiyo sa pamamagitan ng subsidiya na kabilang sa kanilang social obligation sa taumbayan.
“Let us not turn a blind eye to the struggles of the Filipino people, they need all the support we can give to deal with this crisis,” giit ni Diokno. (Vina de Guzman)

Paghingi ng political asylum, ginagamit ng mga pugante para makaiwas sa pananagutan at responsibilidad-Malakanyang

Posted on: April 29th, 2026 by @peoplesbalita No Comments

HINDI lingid sa kaalaman ng Malakanyang na mayroong ilang high profile fugitives ang pilit na nagtatangkang gamitin ang asylum route para makaiwas sa pananagutan at responsibilidad.
Sinabi ni Palace Press Officer at PCO Usec. Claire Castro sa press briefing sa Malakanyang na ang ganitong estratehiya ng mga pugante ay matagal ng nasa isip ng Pangulo.
“Dahil iyong iba nating mga pugante ay iyan ang ginagawang last resort para ma-delay ang pagpapauwi sa kanila sa Pilipinas. So, hindi magandang pangitain,” ani Castro.
Samantala, sa ulat, ang mga kilalang Filipino na humirit ng asylum at mga dahilan nila ay sina:
*Harry Roque- nagsumite di umano ng kanyang aplikasyon para sa asylum sa The Netherlands matapos na madawit sa illegal Philippine offshore gaming operator (POGO) operations.
*Jeffrey Celiz- isang Sonshine Media Network International host, kinumpirma na umalis ng Pilipinas at nagtungo ng Estados Unidos dahil sa di umano’y harassment na ipinukol sa kanya at sa kanyang pamilya. Si Celiz ay napaulat na nagplanong humingi ng political asylum sa Canada.
*Royina Garma- retired police colonel, idinawit sa drug war ni dating Pangulong Rodrigo Duterte, naghain ng asylum sa Estados Unidos noong 2024. Naharap din si Garma sa murder complaint sa pagkamatay ni dating PCSO board secretary Wesley Barayug.
*Arnulfo Teves Jr.- humingi ng asylum sa Timor-Leste. Naharap si Teves sa di umano’y pagpatay sa namayapang Negros Oriental governor Roel Degamo at iba pa.
*Jed Mabilog- dating Iloilo City Mayor, nauna nang naisama ng pangalan sa narco-list na may kaugnayan sa drug war ni dating Pangulong Digong Duterte, nag-aplay ng asylum sa Estados Unidos.
*Joma Sison- ang namayapang Communist party of the Philippines founder Jose Maria Sison na nakaira sa The Netherlands ay humingi ng asylum bilang political refugee mula 1987 hanggang sa kanyang pagpanaw noong Disyembre 2022. (DARIS JOSE)

Tulak, tiklo sa pagbenta ng shabu sa pulis sa Navotas

Posted on: April 29th, 2026 by @peoplesbalita No Comments

KALABOSO ang isang mister na sangkot umano sa pagtutulak ng illegal na droga nang kumagat sa ikinasang buy bust operation ng pulisya sa Navotas City.

Sa kanyang ulat kay Northern Police District (NPD) Acting Director P/BGen. Christopher Dela Cruz, sinabi ni Navotas Police Chief P/Col. Renante Pinuela na nakatanggap sila ng impormasyon hinggil sa umano’y pagbebenta ng 52-anyos na si alyas “Kanor” ng shabu.

Nang positibo ang ulat, ikinasa ng Station Drug Enforcement Unit (SDEU) ng Navotas Police ang buy bust operation laban sa suspek sa koordinasyon sa PDEA.

Hindi na nakapalag ang suspek nang dambahin ng mga operatiba ng SDEU makaraang tanggapin ang marked money mula sa pulis na nagpanggap na buyer kapalit ng isang plastic sachet ng shabu sa M. Naval St., Brgy., San Roque.

Nakumpiska sa suspek ang humigi’t kumulang 2.63 gramo ng hinihinalang shabu na nagkakahalaga ng P17,884.00 at buy bust.

Kasalukuyang nakapiit ang suspek sa Navotas Police Custodial Facility Unit na nahaharap sa kasong paglabag sa Republic Act 9165 o ang Comprehensive Dangerous Drugs Act of 2002. (Richard Mesa)

ZALDY CO, WALA SA CUSTODY NG CZECH AUTHORITIES-DOJ

Posted on: April 29th, 2026 by @peoplesbalita No Comments

WALA na sa kustodiya ng Czech authorities ang puganteng si dating Ako Bicol Partylist Rep.Zaldy Co., ayon kay Justice Secretary Fredderick Vida.

Ang impormasyong nakuha ni Vida ay matapos ang kanyang pakikipagpulong sa ministry of Justice ng Czech Republic.

Sa isinagawang press conference mula sa Czech , sinabi ni Vida na nasa Schengen area na si Co batay sa kanilang nakalap na impormasyon ngunit hindi pa alam kung saan ang eksaktong kinaroroonan nito.

Ang Schengen area ay sakop umano ang Poland, Germany, Austria at Slovakia.

Ayon kay Vida, hindi na nagbigay pa ng karagdagang impormasyon ang Czech authorities maliban sa tugon na wala na sa kanilang teritoryo si Co.

Nanawagan naman si Vida sa mga Filipino sa Schengen area na ipagbigay alam ang impormasyon hinggil sa kinaroroonan ng dating mambabatas.

Si Co ay unang napaulat na nahuli sa Prague Czech Republic. (Gene Adsuara)

Matapos pigilin sa Czech Republic: PBBM, dismayado nang malaman na nasa France na pala si Zaldy Co

Posted on: April 29th, 2026 by @peoplesbalita No Comments

DISMAYADO si Pangulong Ferdinand Marcos Jr. nang malaman nitong nasa France na ang puganteng si dating Cong. Zaldy Co mula sa Czech Republic.

Sa press briefing sa Malakanyang, sinabi ni Palace Press Officer Usec. Claire Castro na iniulat ng Department of Foreign Affaris (DFA) sa Pangulo na nakatanggap ang departamento ng ‘highly reliable information’ na si Zaldy Co ay may pending petition para sa political asylum sa France.
“He has been requested to be transferred to and is now under the jurisdiction of French authorities. All missions in Europe have been instructed to obtain further official confirmation,” ayon kay Castro.
Kaya nga aniya nang makausap niya mismo si Pangulong Marcos ukol sa development na ito ay sinabi ng Pangulo sa kanya na disappointed ito sa mga nangyari dahil malapit na aniya sana na napauwi ng gobyerno ng Pilipinas si Zaldy Co subalit dahil mayroong ibang bansa na sangkot at lumalabas na ang nalabag lamang ni Zaldy Co ay ang paggamit ng invalid documentation kaya aniya ang bansang Czech Republic ang siya aniyang mag-uutos kung ano ang gagawin kay Zaldy Co.
Nauna rito, sinabi ni Castro na umaga ng araw ng Martes, Abril 28 ay natanggap na ng Malakanyang ang kumpletong ulat mula kay Justice Secretary Frederick Vida at Foreign Affairs (DFA) Secretary Teresa Lazaro kaugnay ng kalagayan ng puganteng si Zaldy Co.
Batay aniya sa high level engagement nina Vida at Lazaro sa mga opisyal ng Czech Republic at sa mga kinatawan ng European Union, malinaw na ang mga hakbang na ginagawa ay naka-angkla sa paggalang sa umiiral na mga batas ng EU at mga member states nito.
Ang ganito aniyang mga usapin ay nangangailangan nang masinsinang diplomatikong proseso at koordinasyon sa pinakamataas na antas at ito mismo aniya ang ginagawa ng gobyerno ng Pilipinas mula nang matukoy na hawak ng Czech Republic authorities si Zaldy Co dahil sa paggamit ng invalid documentation.
Sa kasalukuyan aniya, kumpirmado aniyang wala na sa kustodiya ng Czech authority si Zaldy Co.
Tiniyak naman ni Castro na nananatiling matatag ang posisyon ng pamahalaan sabay sabing “we will work with foreign governments through every legal channel available under international laws to bring Zaldy Co home and face the graft and malversation cases filed against him.”
“Gagawin natin ang lahat ng naaayon sa batas at sa diplomatikong proseso,” diing pahayag ni Castro.
Samantala, inaasahan naman na magkakaroon ng pagpupulong, araw ng Miyerkules, Abril 29 si Pangulong Marcos kasama ang Ambassador ng France at Ambassador ng Czech Republic o chargé d’affaires para mapag-usapan kung anong pagkukulang, kung anong dapat na ginawa at ano ang dapat na maaari pang gawin para maibalik si Zaldy Co sa Pilipinas.

Makikita sa Commission on Audit (COA) kung magkano ang kabuuang halaga na ginastos ng Malakanyang sa pagpunta ng government team sa Prague para isulong ang pagpapauwi kay Zaldy Co sa bansa.
“Hindi naman po nagpunta doon ang ating mga opisyal para magbakasyon. Pinunta po nila doon ay trabaho para po sa kondisyon at kalagayan ni Zaldy Co. Kung anuman po ang nagastos dito, ito po ay trabaho ng gobyerno – maaari po itong makita sa COA,” ang sinabi ni Castro. ( DARIS JOSE)

Inamin na dream project ang ‘Love is Never Gone’… IVANA, hindi nagpahuli at tinapatan ang husay ni JOSHUA

Posted on: April 29th, 2026 by @peoplesbalita No Comments

UNANG beses lang na napanood nina Joshua Garcia at Ivana Alawi ang kanilang serye, ang “Love Never Gone” sa special screening ng pilot episode nito.

Parehong masaya ang dalawa sa napanood nila. Beyond expectation nga raw. Si Joshua nang tanungin sa naging reaction niya after watching their pilot episode, “Masaya ko. Masaya ko for everyone. Speechless kasi ako, hindi ko alam ang sasabihin ko. Ang ganda, ang ganda!”

Si Ivana naman, “Maganda, sobrang ganda! Grabe kanina noong pinapanood ko, sabi ko, grabe, parang pelikula.

“First episode pa lang ng Love is Never Gone, ang ganda. Ang dating niya, para kang nanood ng pelikula. Gano’n siya ka-puno. Full of action, ang dami, ang daming mapapanood.”

Sinasabi nga ni Ivana na dream project niya ang ‘Love is Never Gone.’

At in fairness, may chemistry nga sina Joshua at Ivana. Yung tipong habang tumatagal, mas lumalabas ang chemistry. Magaling na actor talaga si Joshua at si Ivana ay hindi nagpahuli kay Joshua, para sa amin, ito ang best niya.

Siyempre, muli rin tinukso ni Ivana si Joshua sa paghalik nito na napatunayan niyang higop kiss daw. At naku, isa ito sa mga eksenang aabangan.

Sa May 8, sa Prime Video na mapapanood ang Love is Never Gone kasama rin ang loveteam nina JM Ibarra at Fyang Smith, Jane Oineza, Dina Bonnevie, Ara Mina, Epy Quizon at Jameson Blake.

***

GUSTO naming isipin na okay na si KC Concepcion sa kanyang Dad o stepfather na si Senator Kiko Pangilinan.

Hindi nakalimutang batiin ni KC ang kanyang ina na si Sharon Cuneta at si Kiko sa 30th annoversary nila.

Sa threads, sinabi ni KC kasama ang larawan ng buo nilang pamilya na, “Happy anniversary, KiWie. 30 years deserves an award, well earned!🥇 Thank you for all the love, the lessons, and for always doing your best for each other all these years. Mom and Dad, with all my love 🌹🌹🌹🌹🌹🌹 @reallysharoncuneta kiko.pangilinan.”

(ROSE GARCIA)