MAPAYAPA at naging maayos ang naging inisyal na assessment ng Philippine National Police (PNP) para sa naging kabuuan ng obserbasyon ng Holy Week Exodus ngayong taon.
Ayon kay PNP Chief PGen. Jose Melencio Nartatez Jr., walang mga naitalang mga major incidents na nakaapekto sa kabuuang obserbasyon ng Lenten Season.
Aniya, nananatiling prayoridad ng pulisya ang ligtas na pagbabalik ng mga biyaheros matapos ang higit isang Linggong inilaan nito para magnilay-nilay.
Kasundo nito, inihayag ni Nartatez na bilang pagpapakita ng kanilang pagbibigay halaga sa kaligtasan at kaayusan ay mananatiling nakatalaga sa iba’t ibang mga lugar ang halos 98,000 na miyembro ng PNP.
( Gene Adsuara)

BALIK operasyon na ulit simula ngayong Linggo ang Libreng QC Bus Ride para magsakay ng mga pasahero partikular ng mga QCitizens sa may walong ruta sa iba’t ibang bahagi ng Quezon City.

Ito ayon kay Mr. Dexter Cardenas, hepe ng QC Traffic and Transport Management Department ay makaraan ang ilan araw ding suspension ng operas­yon mula noong Huwebes Santo April 2 hanggang nitong nagdaang Sabado April 3 para sa paggunita sa Semana Santa.
Inaasahan aniya na mas maraming pasahero ang maseserbisyuhan ngayong pabalik na sa kani- kanilang tahanan ang mga nagbakasyon noong Kuwaresma.

Nasa higit apat na libong pasahero ang naseserbisyuhan ng QC bus Free Ride sa isang araw hindi lamang taga-QC kundi maging mga commuters na mula sa mga karatig lungsod ng QC.
Ang walong ruta ng QC Bus Free ride ay QC Hall papuntang Cubao, QC Hall papuntang Litex-IBP road, Welcome Rotonda papuntang Aurora-Katipunan, QC Hall papuntang General Luis,QC Hall papuntang Mindanao Avenue, QC Hall papuntang Gilmore, QCHall papuntang Ortigas at QC Hall papuntang Munoz at vice Versa.
( Vina de Guzman)

NAKIISA si Pangulong Ferdinand Marcos Jr. sa sambayanang Pilipino sa pagdiriwang ng Linggo ng Pagkabuhay at ang banal na pagpapahayag ng muling Pagkabuhay ni Kristo.

“On this day, the empty tomb stands as a powerful testament that life conquers death and hope prevails over despair. Across generations, Easter has reminded us that sacrifice is never in vain, that suffering is not the end but the beginning of renewal,” pahayag pa ni Marcos.

Sa muling pagkabuhay aniya ni Kristo, matatagpuan natin ang matibay na pangako na ang biyaya ng Diyos ay nananatili, at kahit sa pinakamadilim nating sandali, ang pananampalataya ang magdadala sa ating tungo sa liwanag.

Bilang isang ba­yang kilala aniya sa katatagan at malalim na­ting pananam­palataya, dalhin natin ang liwanag ng Pasko ng pagkabuhay sa ating pang araw-araw na buhay hindi lamang sa salita kundi higit sa gawa

Ayon pa sa Pangulo, piliin natin ang malasakit kaysa sa kawalang pakialam at ang pagiging bukas palad kaysa sa sariling interes, at ang pagkakaisa kaysa sa pagkakawatak-watak.

Nanawagan din si Marcos sa mga Pilipino na bumangon na may panibagong layunin at pagkakaisa na ginagabayan ng pananalig at pagmamahal sa bansa.

“Today, I call on every Filipino to rise with renewed purpose, unyeilding hope, and a deep sense of responsibility for one another. Let us build a nation where kindness is instinct and unity is our strength l fore when we stand together guided by faith, bound by love of country and driven by a shared vision, there is no challenge we cannot overcome,” pahayag pa ng Pangulo.

Sama-sama rin aniyang magpatuloy sa pagbuo ng isang Bagong Pilipinas kung saan ang malasakit at pag-aaruga sa kapwa ang patuloy na maglalarawan kung sino tayo bilang isang bayan. (Daris Jose)

HINDI malayong tuluyan nang gumarahe ang mga sasakyan tulad ng mga jeepneys na gumagamit ng diesel sanhi ng walang humpay na pagsirit ng presyo ng produktong petrolyo.

Babala ni Senior Citizens Partylist Rep. Rodolfo “Ompong” Ordanes na, kung gagarahe ang mga sasakyang pangunahing gumagamit ng diesel ay malamang na magsikip sa mga bus, MRT, at LRT sa Metro Manila.
Pinuna ng solon na maraming jeepney driver ang dumaraing na ang dating P800-P900 arawang kita nila ay nasa P200-P300 na lang.
Ayon sa mga driver, kapag pumalo sa P150 ang diesel ay baka tuluyan na aniyang hindi bumiyahe ang mga ito dahil pagod na ay talo pa sa gastos.
Kalbaryo naman aniya ang dulot nito sa commuters na mapipilitang maglakad samantalang ang mga e-trike drivers ay nagsasamantala na sumisingil ng P50-P80 sa malapit na lamang na biyahe.
Inihayag pa ni Ordanes na liliit din ang pandesal gayundin ang servings ng kanin at ulam sa mga restaurant at karinderya ay malamang na kumonti na rin kung hindi mapipigilan ang pagsirit ng presyo ng LPG at kerosene.
Bukod dito ay tataas din umano ang presyo ng mga ulam habang maraming Pinoy ang lilipat na sa pagluluto sa uling at panggatong na kahoy.
“The revenue impact of temporarily suspending VAT and excise taxes can be addressed by improving tax collection, cracking down on smuggling and tax evasion, and aggressively reco­vering ill-gotten wealth from corrupt officials,” suhestiyon ng solon.
(Daris Jose)

KASALUKUYANG binabalangkas ng House of Representatives ang panukalang “Bayanihan 3” bilang tugon sa walang tigil na pagtaas ng presyo ng langis dulot ng kaguluhan sa Middle East.
Ayon kay House Committee on Ways and Means chairman at Marikina City Rep. Miro Quimbo, ang Bayanihan 3 ay binabalangkas ng mga mambabatas sa pamumuno at direksyon ni Speaker Faustino “Bojie” G. Dy III na nagsabing mag-focus sa mga hakbangin na matulungan ang mga naapektuhan bukod sa pagbibigay ng ayuda.

“The pandemic was really worse as far as we’re concerned because napaka-indeterminable noong sitwasyon. Hindi natin alam kung magkakagamot, magkakabakuna, gaano ba katagal na masu-sustain. Practically noon, the entire economy went to a halt. Hindi makalabas ang tao, it really necessitated a massive ayuda program. So iba ang konteksto ngayon,” pahayag ni Quimbo.

Ayon kay Quimbo, ang pagbibigay ng ayuda ay isa lamang na parte ng Bayanihan 3. “If ayuda ang pinag-uusapan, this is really just one part of Bayanihan 3. It cannot just be ayuda-centric. In fact, ayuda, as far as what the Speaker wants, is not even 15 percent of the entire package that he wants,” sinabi ni Quimbo.
Ang Bayanihan 3 ay bubuuin ng mga mambabatas na miembro ng House committees ng Energy, Agriculture and Food, Aquaculture and Fisheries, Foreign Affairs, Ways and Means, Labor, Transportation, Information and Communications Technology, Economic Affairs, Social Services, Trade and Industry, Overseas Workers Affairs, and Appropriations.
“We have not talked about the entire concept of what will be the outcome, pero ako, in reality, this is Bayanihan 3. If there’s a key objective here is for Congress to hammer out Bayanihan 3,” Quimbo said during a virtual press briefing.
Naunang nabuo ang Bayanihan 1 at 2 o kilalang Bayanihan to Heal as One Act at Bayanihan to Recover as One Act sa kasagsagan ng COVID-19 pandemic. Parehong nakatuon ang programa sa mga large-scale subsidy programs habang nakatigil ang takbo ng ekonomiya dulot ng lockdown.
(Vina de Guzman )