UMABOT sa mahigit P4.7 milyong halaga ng ilegal na droga ang nasamsam ng pulisya sa dalawang drug suspects kabilang ang isang High Value Individual (HVI) matapos madakip sa buy bust operation sa Caloocan City, Biyernes ng gabi.

Sa report ni Caloocan Police Chief P/Col. Joey Goforth kay Northern Police District (NPD) Acting Director P/BGen. Christopher Dela Cruz, nakatanggap ng impormasyon ang kanyang mga tauhan hinggil sa umano’y pagbebenta ng ilegal na droga ng 30-anyos na lalaki na itinuturing bilang HVI.

Dahil dito, kaagad ikinasa ng mga operatiba ng Station Drug Enforcement Unit (SDEU) ng Caloocan CPS ang buy bust operation laban sa suspek, sa koordinasyon sa PDEA.

Dakong alas-8:04 ng gabi nang maaresto ng mga operatiba SDEU ang suspek, kasama ang 23-anyos na kasabwat matapos umanong bintahan ng shabu ang isang pulis na nagpanggap na buyer sa Phase 12 Riverside, Brgy., 188.

Nakumpiska sa kanila ang humigi’t kumulang 701.27 grams ng hinihinalang shabu na may standard drug price P4,768,636.00, buy-bust money na binubuo ng isang tunay na P500 bill at sampung P1,000 boodle money at itim ba pouch bag.

Mahaharap ang mga suspek sa kasong paglabag sa Sections 5, 11, at 26 ng R.A 9165 (Comprehensive Dangerous Drug Act of 2002). (Richard Mesa)

LAGLAG sa selda ang dalawa sa limang suspek na sangkot umano sa pagpaslang sa isang dating policewoman nang maaresto ng pulisya sa follow-up operation sa Valenzuela City, Sabado ng hapon.

Sa kanyang ulat kay Northern Police District (NPD) Acting District Director P/BGen. Christopher Dela Cruz, kinilala ni Valenzuela Police Chief P/Col. Joseph Talento ang mga nadakip na sina alyas “JR Tae”, 38, at alyas “Topak”, 40, habang tinutugis pa si alyas”Ponjaps” at dalawa pang hindi kilalang suspek na kanilang mga kasabuwat sa pagpatay sa biktimang si alyas “Joan”, 38, dating miyembro ng Philippine National Police (PNP).

Lumabas sa imbestigasyon na dakong alas-12:10 ng Sabado ng madaling araw nang pasukin at pagbabarilin ng dalawang suspek ang biktima sa loob ng kanyang bahay sa Matiyaga Street, Sitio Pinalagad, Brgy., Malinta, matapos umanong utusan ni alyas Topak si alyas JR Tae na ihatid ang dalawa sa lugar.

Kaagad bumuo ng Special Investigation Team si Col. Talento sa pangunguna ni P/Major Randy Llanderal kung saan unang nadakip ng mga tauhan nina P/Capt. Robin Santos ng Station Investigation and Detective Management Section (SIDMS) at P/Lt. Sherwin Dascil ng Station Drug Enforcement Unit (SDEU) si alyas JR Tae nang makita sa kuha ng CCTV na kausap niya ang dalawang suspek sa Pinagpala Ext. bago mangyari ang pagpatay.

Pilit na itinanggi ni ‘JR Tae’ na kilala niya ang dalawang suspek hanggang madakip din ang 25-anyos na si alyas “Bogart” na nagsilbing testigo matapos niyang ikanta na inutusan lang sila ni alyas Topak na sunduin ang dalawang suspek, sabay abot sa kanya ng P400 para pambayad sa grab service.

Pagdating ng dalawang suspek, nagtungo sila sa isang abandonadong bahay sa Area 3, Dumpsite upang mag-pot session hanggang marinig niya ang planong pagpatay sa biktima.

Sumunod na nasakote ng pulisya si alyas Topak bandang alas-2:50 ng Sabado ng hapon sa kanyang tirahan sa Pinalagad, Malinta kung saan nakumpiska sa kanya ang isang hindi lisensiyadong kalibre .38 revolver na kargado ng dalawang bala at 55.28 gramo ng hinihinalang shabu na nagkakahalaga ng P375,904.

Patuloy ang imbestigasyon ng pulisya sa insidente habang mahaharap naman sa kasong murder sina alyas JR Tae, alyas Topak, alyas Ponjaps at dalawa pang hindi kilalang suspek.

Samantala, karagdagan na kasong paglabag sa R.A 9165 at R.A 10591 ang kakaharapin pa ni ‘Topak’. (Richard Mesa)

TITIYAKIN ng pamahalaan na wala nang anumang hadlang o sagabal sa mga expressways at highways ngayong Huwebes Santo, Abril 2 at Biyernes Santo, Abril 3.
Ito’y kasunod na rin nang inaasahang pagbiyahe na ng mga motoristang magsisiuwian sa kani-kanilang lalawigan upang doon gunitain ang banal na okasyon.
Ayon kay Transportation Secretary Giovanni Lopez, simula ngayong Miyerkules Santo, Abril 1, ay sisimulan na ng Department of Transportation (DOTr) ang pagtatanggal ng mga nakaparadang mga sasakyan sa mga sidewalks sa highways.
Makakatuwang aniya nila sa naturang aktibidad ang Department of the Interior and Local Government (DILG), Philippine National Police, Highway Patrol Group (HPG), at maging ang Land Transportation Franchising and Regulatory Board (LTFRB) sa naturang aktibidad.
Sa kanyang panig, binigyang-diin naman ni Department of Public Works and Highways (DPWH) Secretary Vince Dizon na mahalagang maisagawa ang clearing operations at maisaayos ang mga kalsada, lalo na ngayong mas tumaas pa ang presyo ng mga produktong petrolyo. (Daris Jose)