NEWS 2 INATASAN na ng Department of Education (DepEd) ang lahat ng tanggapan nito sa buong bansa na i-adopt ang four-day onsite work arrangement mula Lunes hanggang Huwebes, habang ang araw ng Biyernes naman ay work-from-home (WFH) day, bahagi ng pagsisikap ng pamahalaan na magtipid sa paggamit ng enerhiya at bawasan ang fuel consumption.

Ipinalabas ang polisiya sa ilalim ng DepEd Memorandum No. 018, series of 2026, tinintahan ni Education Secretary Sonny Angara, araw ng Linggo, Marso 8.

Sa ilalim ng direktiba, ang bagong work setup ay magsisimula ngayong araw ng Lunes, Marso 9 at mananatiling ipatutupad hangga’t hindi binabawi ng Office of the President (OP).

Tinuran ng Education Department na ang nasabing hakbang ay pagpapatupad sa Memorandum Circular No. 114 na inilabas ng Office of the President of the Philippines, inaatasan ang mga ahensiya ng gobyerno na i-adopt ang energy conservation protocols at flexible work arrangements sa gitna ng tumataas na presyo ng fuel na iniuugnay sa global geopolitical tensions.

Sa kabilang dako, nilinaw ng DepEd na hindi ia-apply ang WFH arrangement sa mga non-teaching at kaugnay na teaching personnel, kabilang na ang contract-of-service at job-order employees.
Gayunman, patuloy namang susundin ng teaching personnel ang umiiral na class schedules at school arrangements upang matiyak na magpapatuloy ang pagdaraos ng klase at end-of-school-year activities.
Samantala, maliban sa tinatawag na flexible work setup, ipinag-utos sa mga tanggapan ng DepEd na magpatupad ng serye ng energy conservation protocols na naglalayon na bawasan ang paggamit ng kuryente at fuel consumption ng 10 hanggang 20 porsiyento.
Kabilang sa mga kinakailangang hakbang ay ang pagpapanatili sa 24°C ng air-conditioning thermostat, pag-activate sa sleep settings sa office equipment, pag-turn off sa mga hindi kinakailangang ilaw at electronic devices sa panahon ng lunch breaks at pagkatapos ng office hours, pagbabawas sa paggamit ng elevator sa pamamagitan ng paghikayat sa mga tauhan na gumamit na lamang ng hagdan.
Ipinag-utos din ng memorandum na ang mga inter-agency meetings, consultations, at conferences ay gawin ‘virtually’, gawin lamanga ng physical meetings kung maituturing itong kinakailangan.
Ipinag-utos din ng departamento sa mga tanggapan nito na bumiyahe lamang kung kinakailangan at may mahalagang tungkulin lalo na kung layunin nito ay hindi epektibong makakamit sa pamamagitan ng virtual meetings o electronic communication.
Sa kabilang dako, para bawasan naman ang fuel consumption sa government transport, ang mga tanggapan ay dapat na i- adopt ang fleet-efficiency measures gaya ng:
pagsasama-sama o pag-isahin na lamang ang mga official trips, pag-optimize sa travel routes at iskedyul
pagbabawas sa engine idling, paggamit ng “full-tank method” para sa fuel monitoring
Samantala, sa kabila ng WFH arrangement, sinabi ng DepEd na ang government services ay dapat na manatiling nagpapatuloy, episyente at hindi naaabala lalo na para sa mga frontline offices.
Ang mag pinuno ng tanggapan ay inatasan na magtatag ng mekanismo para tiyakin na ang mga kliyente at stakeholders ay maaari pa ring magsumite ng kanilang requests at makapagtanong sa pamamagitan ng official communication channels.
Binigyang diin naman ng departamento na ang implementasyon ng work arrangement ay dapat na alinsunod sa Ease of Doing Business and Efficient Government Service Delivery Act of 2018, kung saan kinakailangan na mapanatili ng mga ahensiya ang zero backlog sa frontline at non-frontline services.
Ang attendance at performance ng mga tauhan na nagta-trabaho sa malayo ay imo-monitor sa pamamagitan ng Daily Time Records, individual daily logs, at accomplishment reports, subject naman ito sa pag-apruba ng immediate supervisors.
( Daris Jose)

SINABI ni Pangulong Ferdinand R. Marcos Jr. na pinag-aaralan ng pamahalaan ang pagpapabuti sa paghahatid ng tulong sa mga senior citizen, kabilang ang posibilidad na alisin ang mahahabang pampublikong programa bago ang distribusyon at gawing mas simple ang proseso upang mas mabilis na makarating ang ayuda sa mga benepisyaryo.
Sa BBMVLOG 278 na pinamagatang Sagot sa Polisiya, tumugon ang Pangulo sa mga komento ng mga manonood, kung saan binasa niya ang isang mungkahi mula sa isang netizen na nagpahayag ng pagkabahala sa kasalukuyang proseso ng pamamahagi ng ayuda sa mga senior citizen.
“Mula kay Geraldo Buena: Mr. President, ‘yung mga senior citizen natin kapag binibigyan ng ayuda, bakit naman po kailangan pang magpunta sa court at maghihintay pa nang matagal bago ibigay ang anumang pinagkakaloob sa kanila? Madalas kailangan pang antayin ‘yung pulitiko na dumating dahil isa-isa pang silang magsasalita sa harap at paulit-ulit lang naman na ipinapakilala ang kanilang mga sarili. Nakakarindi sa pandinig ito. Puwede bang tapusin na ang ganiyang kalakaran? Sayang ang tanggapan ng barangay kung hindi sila puwedeng gamitin upang ihatid sa bawat bahay ng mga benepisyaryo ang ayuda para sa kanila,” ani ng Pangulo.
Bilang tugon, binigyang-diin ni Pangulong Marcos na ang mga tulong na pinopondohan ng pambansang pamahalaan ay hindi dapat gamitin sa mga gawaing pampulitika o personal na promosyon ng mga opisyal.
“Alam niyo po, basta’t ito ay mga programa ng national government. Ang mga speech at iba pang pang-epal bago ng distribution, hindi na pupuwede ‘yan. Hindi puwedeng gamitin ang government services sa pamumulitika o pagpo-promote ng sarili,” pahayag ng Pangulo.
Idinagdag ng Pangulong Marcos na umiiral na ang mga patakaran laban sa ganitong gawain, batay sa memorandum circular ng Department of the Interior and Local Government at mga probisyon ng General Appropriations Act na nagtatakda ng wastong paggamit ng pondo ng bayan.
Sinabi rin ni Pangulong Marcos na pinag-aaralan ng pamahalaan ang pag-digitize ng pamamahagi ng tulong upang mapabilis at mapadali ang proseso, kabilang ang paggamit ng digital payment platform gaya ng GCash.
“Sa distribution naman, pinapag-usapan na ang pag-digitize ng proseso. Baka puwedeng Gcash. May ibang mga LGU na gaya ng Makati na sinusubukan na ang ganitong sistema. Dapat tingnan pa rin ng mga local government unit ang modelong ito. Aralin ang sistema at unti-unting ma-implementa. Basta’t sa national government nanggaling ‘yan, mabilis na. ‘Di ka na kailangan makinig sa mahabang speech ng mga pulitiko,” giit ng Pangulo. (Daris Jose)

ISINUSULONG ni Navotas Representative Toby Tiangco sa Kongreso na magsagawa ng public hearing in aid of legislation para mapabilis ang pagpapatupad ng arrest warrant laban kay Zaldy Co.

Inihain ni Tiangco ang House Resolution No. 808, na hinihimok ang pamunuan ng House of Representatives na ipatawag ang Committee of the Whole para magsagawa ng public inquiry bilang tulong sa batas sa status ng arrest warrant laban kay Co, at magrekomenda ng mga legislative measures, kung kinakailangan.

“Hinahanap ba talaga natin si Zaldy Co? Marami ang nagtatanong kung bakit parang wala tayong sense of urgency na hanapin at panagutin ang isang big fish na gaya ni Co,” ani Tiangco.

Ayon kay Tiangco, kailangan ng malinaw na mga alituntunin para sa pagpapatupad ng arrest warrants kapag ang isang paksa ay nasa labas ng hurisdiksiyon ng Pilipinas, at binanggit ang magkasalungat na posisyon ng Department of Interior and Local Government (DILG) at Department of Foreign Affairs (DFA) sa pagpapatupad ng Co’s warrant of arrest.

“DILG earlier said DFA is the agency primarily responsible for ensuring that Co will be successfully prosecuted before our Court. The DFA, however, clarified that the enforcement of legal processes against Co involves a ‘whole-of-government approach.’ Ano ba talaga at sino ba dapat ang ahensyang dapat manguna sa mga kasong gaya nito?” aniya.

Binigyang-diin din ni Tiangco ang pangangailangang tukuyin kung ang mga legislative gaps ay nagpapahintulot sa mga indibidwal na may malaking mapagkukunan na umiwas sa mga legal na proseso at magtago sa mga dayuhang hurisdiksyon kung saan ang ating bansa ay walang extradition treaty.

“There appears to be a compelling need to determine whether existing laws sufficiently define institutional cooperation and accountability on the service and execution of warrants and bringing before our jurisdiction politically exposed persons who leave Philippine territory,” giit ng mambabatas.

“The inability to immediately enforce an arrest warrant against a high-profile individual, who is allegedly abroad, raises serious policy questions as to which government agency bears primary responsibility for the execution of an arrest warrant, coordination with foreign jurisdictions, and engagement with international law-enforcement agencies,” dagdag niya.

Ani Tiangco, iimbitahan sa pagdinig ang mga resource person mula sa DOJ; Secretary ng DILG; Secretary ng DFA; pinuno ng NBI; Hepe ng PNP; Pinuno ng Bureau of Immigration and Deportation; at Ambassador ng Portugal sa Pilipinas. (Richard Mesa)

PB March 10 Tuesday Front and Page 2