PERSONAL na binisita nina Mayor John Rey Tiangco at Congressman Toby Tiangco para kamustahin ang kalagayan ng mga pamilyang kasalukuyang nanunuluyan sa Tanza National High School matapos tupukin ng apoy ang kanilang mga kabahayan sa naganap na sunog sa Tambak 2, Brgy. Tanza 2, Navotas City. Kaagad din nagpaabot ng tulong ang magkapatid na Tiangco na mga pagkain, malinis na tubig inumin, banig at iba pang pangunahing pangangailangan ng mga nasunugan. (Richard Mesa)

HINDI ‘ghost’ ang kaso sa P96.5-milyong flood control project sa Culaman, Jose Abad Santos, Davao Occidental dahil natapos nang maayos at nalapatan pa ng kaukulang mga ‘repair’ ng daanan ito ng mga bagyo.

Ito ang nakasaad sa mga dokumento, video footages at mga larawan sa ‘inspection report’ na ginawa mismo ng Department of Public Works and Highways (DPWH). Kasama rin ang drone footage, naipapakita rito ang concrete revetment project ay talagang naroroon sa lugar, at pinabubulaanang ang proyekto ay hindi isang “ghost project.”

Sa mga aerial ­videos na nakalap at kalakip sa DPWH inspection report kuhang-kuha ang mga “flood control structure in place.”

“Nagkaroon pa nga ng mga muling pag-aayos sa ilang bahagi nito matapos daanan ng matitinding pagbaha bunga ng malalakas na bagyo noong 2022,” anang mapapagkatiwalaang source.

Nabatid na ang pagsasaayos ng proyekto ay walang karagdagang gastos mula sa gobyerno, dahil sakop pa ito ng warranty na isinasaad ng mga batas hinggil sa mga goverment contracts.

Ang project ayon na rin sa nga dokumento (Project ID 22LE0029) ay naisakatuparan ng DPWH Davao Occidental District Engineering Office na siyang taga-pangasiwa nito at nai-award noon din 2022 sa St. Timothy Construction Corporation, na pag-aari ng ngayon ay nakakulong na si Cezarah “Sarah” Discaya. Sakop nito ang pagtatayo ng “concrete revetment” bilang proteksiyon sa baha ng mga komunidad sa lugar. ( Daris Jose)

HUWAG hayaan na kasamang mailibing itong kaalaman sa kanyang libing din.
Ito ang pahayag ni Akbayan Partylist Rep. Chel Diokno sa isinagawang
press conference sa Kamara.

Ayon sa mambabatas,
sa mga nangyaring imbestigasyon ay lumalabas na malalim ang kaalaman ni dating Usec. Maria Catalina Cabral tungkol sa mga anomalya sa mga infra at flood control projects.

Sinabi ni Diokno na hindi lang ito ukol sa mga kontratista at iba pang mga proponent at konektado sa proyekto, kundi maging ‘yung mga sinasabing mga nasa likod ng mga anomalya.

“Kaya ‘wag nating hayaan na kasamang mailibing itong kaalaman [niya] sa kanyang libing din. At kailangang maimbestigahan ng Kongreso ito, we have to get to the bottom of this,” ani Diokno.

Bukod sa usapin sa tunay na dahilan nang pagkamatay ng opisyal ay dapat ding alamin ang lahat ng nalalaman nito sa kontrobersiya.

Sinabi pa ng kongresista na maraming iba’t ibang aspeto ang dapat gawin sa imbestigasyon.

Bukod sa hawak na ebidensya ay pati na ang pag-imbestiga mismo sa pagkamatay ni Cabral.
(Vina de Guzman)

NAKATAKDANG mag-reconvene ang Kamara sa Disyembre 29 upang ratipikahan ang bicameral conference committee report, bago lagdaan ni Pangulong Marcos ang budget.

Ito ay matapos suspendihin ng Kongreso ang sesyon para sa Christmas break kasunod nang pagkaka-apruba ng 2026 national budget.

Ayon kay Speaker Faustino “Bojie” Dy III, dumaan ang ipinasang P6.793-trillion 2026 national budget sa kauna- unahan at livestreamed bicameral conference committee.
Sa kanyang closing remarks, sinabi ni Dy na isang mahalagang hakbang tungo sa mas bukas, mas malinaw, at mas mapagkakatiwalaang proseso ng paggawa ng pambansang budget.
Aniya, nakapagtapos ng badyet ang Kamara na maaaring pagkatiwalaan ng taumbayan, isang budget na walang insertions, na hindi itinago, hindi minadali, at hindi inilayo, kundi bukas sa mata ng publiko.

Pinapurihan naman ni Dy ang mga miyembro ng 20th Congress sa pagtatapos ng budget.

“This budget is historic—not only because the process was transparent, but because the priorities were clear. It is a budget shaped by love for country, a deep understanding of our people’s realities, and genuine compassion for our kababayan,” saad ni Dy.

Ang sektor ng education ang nakakuha ng pinakamalaking alokasyon na katumbas sa 4.1% ng gross domestic product.

Kabilang sa alokasyong pagpapaggawa o rehabilitasyon ng 25,000 classrooms arbpagbabalik ng buo sa pondo para sa Universal Access to Quality Tertiary Education program.

“Ang badyet na ito ay hindi lamang mga numero sa papel. Ito ay pagkain sa hapag, gamot sa ospital, at edukasyong magbubukas ng pinto sa mas maliwanag na bukas,” pagtatapos ni Dy.
(Vina de Guzman)