UMABOT na sa ₱623,715,596.85 ang tinanggal na penalties at interests ng National Housing Authority (NHA) sa pamamagitan ng Condonation 7 program nito.

Bilang isa itong pinakamalaking condonation initiative sa kasaysayan ng ahensya, ang Condonation 7 Programa ay naghatid ng malaking ginhawa sa mga benepisyaryo sa buong bansa. Ipinatupad sa ilalim ng pamumuno ni NHA General Manager Joeben A. Tai, nagkaloob ang programa ng pagtanggal ng 100% na penalties at delinquency interest, at pag-alis ng 95% ng hindi pa nababayarang interes sa amortisasyon. Sa kasalukuyan, nakakolekta na ang NHA ng ₱29,374,466.19 mula sa mga pamilyang nagsumikap mai-settle at mai-update ang kanilang mga housing loan accounts.

Orihinal na nakatakdang nagtapos noong Oktubre 31, 2025, pinalawig ang programa upang mabigyan ng pagkakataon ang mas maraming pamilya, lalo na ang mga naapektuhan ng sunod-sunod na kalamidad at pag-taas ng bilihin, na makapag-avail ng benepisyo. Habang nalalapit ang pagtatapos ng programa, ibinahagi ng ilang benepisyaryo kung paano sila natulungan ng Condonation 7 upang tuluyang maisaayos ang kanilang matagal nang obligasyon sa pabahay.

Muling iginiit ni GM Joeben Tai ang pangako ng ahensya sa pagsusulong ng mga ligtas at komprehensibong programang pabahay sa ilalim ng Expanded Pambansang Pabahay Para sa Pilipino (4PH) bilang tugon sa bisyon ng Bagong Pilipinas. “Sa pamamagitan po ng Condonation 7, maraming pamilya po ang aming natulungan ngayong taon na makaahon sa kanilang pagkakautang sa pabahay at mabawasan ang kanilang bayarin. Makakaasa po kayo sa aming ahensya na kami ang inyong sandigan sa programang pabahay sa ilalim ng administrasyon ni Pangulong Marcos, Jr.,” pahayag ni GM Tai.

Matapos ang walong buwan na pagpapatupad, mayroong 14,330 pamilya ang nakinabang sa malaking diskwento na inilabas ng Ahensya. Nakatakdang magtapos ang programa sa darating na Disyembre 31, 2025.

Isinulong ng NHA Condonation 7 Program na ang maayos na pabahay ay patungo sa isang maginhawang buhay at matatag na komunidad. Maliban sa pagtugon sa matagal na pagkakautang ng mga benepisyary, nagdulot din ito sa kanila na patatagin ang kanilang pinansyal na kalagayan, palakasin ang kanilang kabuhayan, at panatilihin ang kanilang pagtira sa kanilang mga tahanan at lote. (PAUL JOHN REYES)

ISANG pilantropo ang nagkaloob sa pasilidad ng Audio Visual Room at Green House Facilities sa tulong ni Ginoong Nelson Licup at Pamilya nito kasama ang Federation of Filipino Chinese Chamber of Commerce and Industry o FFCCCII at Filipino Chinese Chamber of Commerce Candelaria Chapter ay naisakatuparan ang proyekto para sa mga mag-aaral ng Southern Luzon State University Tiaong Campus.

Ito ay ginanap noong ika -15 ng Disyembre, 2025, sa ganap na ika 3:00 ng hapon sa SLSU Tiaong, Barangay Lagalag, Tiaong Quezon

Ang nasabing programa ay pinamunuan ni Dr. Frederick Villa, SLSU University President katuwang si Bb. Alma Caringal, SLSU Tiaong Campus Director.

Dumalo sa nasabing seremonya ang Pamahalaan Bayan ng Tiaong sa Pangunguna ni Admin Diego Mea bilang kinatawan ng Punong Bayan nito na si Mayor Arjay Mea, kasama ang Sangguniang Bayan nito sa Pamumuno ni Vice Mayor William Razon, Konsehal Recrec Baldeo, Konsehala Maja Escueta at Konsehal Jonas Atienza.

Layunin nito ay suportahan ang mga mag-aaral para sa kanilang ibat ibang mga aktibidad para sa akademiko sa kanilang paaralan.

Ayon kay Ginoong Licup para sa mga mag-aaral ng SLSU , ” sa masigasig na mag-aaral ng SLSU, nandigan kami na hindi namin kayo pababayaan, at hindi kami papayag na ang inyong kinabukasan ay mananakaw ng katiwalaan,” ito ang isa sa mga mensahe ng nasabing pilantropo sa mga kasalukuyan mag-aaral na nagsisikap na makatapos ng pag-aaral.
( Boy Morales Sr.)

NAGING mainit ang pagtanggap ng Pamahalaang Bayan ng General Nakar sa mga mamamahayag na bumisita, nagkortesiya at panayam na pinaunlakan ng butihing Bagong Punong Bayan na si Mayor Alfredo J. Pujeda.

Ayon sa kanya, ang prayoridad niya mula noong kumandidato siya ay ang edukasyon, imprastraktura at mga pangunahing pangangailangan ng kanyang kababayan tulad ng hanapbuhay, pagkain, tahanan, kalsada at kuryente para sa ikakabuti ng kanyang mamamayan.
Mariin din niyang kinondena ang DepEd at ang National Irrigation Agency para sa kanilang mga programa dahil sa walang nakakarating na tulong sa kanilang Bayan, hinaing niya na dapat bisitahin ang kalagayan ng mga eskwelahan sa kanilang Bayan, dahil halos lahat ng gusali ng paaralan nila at may sira ang bubong at walang maayos na palikuran.
Kaya’t panawagan niya sa Department of Education na imbestigahan at aksyunan ang mga paaralan na hanggang sa kasalukuyan ay di pa nakukumpuni o nadaragdagan ng mga upuan at mga silid, kalimitan pa ay nagsisiksikan ang mga estudyante sa iisang silid lamang.

Gayundin sa Irrigation nawa’y mabisita nila ang sitwasyon ng irigasyon sa kanilang bayan, para sa agarang solusyon sa patubig sa nasabing bayan.

Mensahe ni Mayor Fred Pujeda para sa kanyang mga kabababayan ngayon Pasko. “Isang malaking prebilihiyo na ibinigay sa atin ng Panginoon, nawa’y maging malusog at magsikap tayo, maghanapbuhay, kaya natin ito.”
(Boy Morales Sr.)

DUMAUSDOS sa -3% ang net trust rating ni Pangulong Ferdinand Marcos Jr., habang gumanda at bumuti naman ang net trust rating ni Vice President Sara Duterte matapos makahamig ito ng 31% sa gitna ng masusing imbestigasyon ng gobyerno sa di umano’y maanomalyang flood control projects.
Ito ang makikita sa pinakabagong survey ng Social Weather Stations (SWS) na isinagawa noong November 24 hanggang 30 at kinumpirma ng SWS, araw ng Biyernes.
Makikita sa survey na nakakuha si Pangulong Marcos ng 38% ‘much trust rating’ kumpara sa 41% na ‘little trust’ sa kanya.
Sa kabilang dako, nakakuha naman si VP Sara ng 56% na ‘much trust score’ laban sa 26% na mayroong ‘little trust’ sa kanya.
Ang -3% net trust rating ni Pangulong Marcos para sa November 2025 ay mas mababa kaysa sa kanyang October 2025 net trust rating na 7%.
Ang November 2025 net trust rating naman ni VP Sara ay mas mataas kaysa sa kanyang net trust rating na 25% noong nakaraang Oktubre.
Ang Trust na pinakamataas para kay Pangulong Marcos ay sa Balance Luzon (mga lugar sa labas ng Metro Manila sa Luzon) na may +18.
Gayunman, kahit saan pa, nakapagrehistro si Pangulong Marcos ng negative ratings na -37 sa Mindanao, -7 sa Visayas, at -8 sa National Capital Region (NCR).
Para naman kay VP Sara, ang ‘trust’ ang pinakamalakas sa Mindanao na amy +74, sinundan ng +43 sa Visayas, at +12 sa Balance Luzon. Ang kanyang weakest mark ay sa NCR na may +2, bagaman nananatiling positibong rating.
Ang poll na kinomisyon ng Stratbase Consultancy ay isinagawa sa pamamagitan ng face-to-face interviews sa buong bansa na may 1,200 adults na may edad na 18 taong gulang pataas.
Kabilang sa 1,200 respondents ang 300 indibidwal mula sa Metro Manila, 300 indibidwal mula sa Balance Luzon, 300 indibidwal mula Visayas, at 300 indibidwal mula sa Mindanao.
Ang sampling error margins ay ±3% for national percentages at ±6% sa bawat, para sa sa Metro Manila, Balance Luzon, Visayas, at Mindanao.
“Given a sponsor-authorized release of commissioned survey items, SWS is disclosing pertinent survey results and technical details for the benefit of the public,” ayon sa kalatas ng SWS.
“The area estimates were weighted by the Philippine Statistics Authority (PSA) medium-population projections for 2025 to obtain the national estimates,” ayon sa ulat.

HINDI magtatapos sa naging pagbibitiw sa puwesto ni Independent Commission for Infrastructure (ICI) commissioner Rosana Fajardo ang ginagawang pag-iimbestiga ng komisyon hinggil sa maanomalyang flood control projects.
Sinabi ni Presidential Communications Office (PCO) Undersecretary at Palace Press Officer Claire Castro na nakompleto na ni Fajardo ang ‘specific task’ na hiniling sa kanya na kanyang gampanan kaya’t hindi dapat pagtakhan ng publiko kung magbitiw si Fajardo sa kanyang puwesto.
“Kinilala ng administrasyon ang napakahalagang papel na ginampanan ni ICI Comm. Rosanna Fajardo para makalikom, maaral at ma-assess ng mahahalagang ebidensya upang mapanagot ang mga sangkot sa maanomalyang flood control projects,” ayon kay Castro.
“She has already accomplished her tasks based on her mandate. Ngunit patuloy pa rin ang pag iimbestiga kasama ang iba pang investigating bodies. Hindi pa tapos ang laban ng administrasyon kontra korapsyon,” ang diing pahayag ni Castro.
Para naman kay PCO Acting Secretary Dave Gomez, isinama si Fajardo sa ICI para sa isang malinaw na financial forensic purpose- masusing rerebisahin ang pera na iniuugnay sa mga proyekto na sumasailalim sa imbestigasyon at tumutulong sa pagsubaybay kung saan napunta ang public funds.
“That work is now finished. Her full findings will form part of the ICI’s recommendations to the Ombudsman and will also be turned over to the proper government offices, including the Commission on Audit, so the process can move forward,” ayon kay Gomez.
Ang papel aniya ni Fajardo ay “always meant to be temporary and focused only on this mandate. As the Commission continues its work in the coming months, the focus is now on final reports and the proper handover of documents to offices like the Office of the Ombudsman for the next steps.”
Samantala, pinasalamatan naman ni Pangulong Ferdinand Marcos si Fajardo para sa kanyang serbisyo at pagtulong para ang public funds ay ‘properly accounted for.’
“This forms part of the broader effort to make the government more honest, more transparent, and more responsive to the needs of the people,’ ani Gomez.
(Daris Jose)